Luuka 5

ɄYɨɨsʉ ikʉvɨɨlanga avakongi avatatsi

(Mataayo 4:18-22; Maliko 1:16-20)

1Ɨkɨgono kɨpamato ʉYɨɨsʉ ɨɨmile pa lʉkanzi pa nyanza jya Genesaleti,#5:1 Nyanza jya Genesaleti Ɨlɨ litaawa ɨlɨnge lya nyanza jya Galilaya. aamanyiisaaga ɨlimenyu lya Ngʉlʉve. Avaanu vongosu vakahegelela kʉ mwene kukʉmpʉlɨhɨtsa, pwʉ vakamʼbanyilitsa. 2ɄYɨɨsʉ akavʉvona ʉwaato vʉvɨlɨ mu lʉkanzi lwa nyanza. Avalovi va somba, avenenawo ʉwaato ʉwa navaalemwo, ʉlwakʉva vaale kwisuka ɨmisʉngʉlʉ gya veene. 3ɄYɨɨsʉ akiingila mu waato ʉwʉ waale wa Simoni. Akanʼdoova ʉSimoni ahɨlɨke ʉwaato kʉgati padebe mu nyanza. Pwʉ ʉYɨɨsʉ akataama mu waato, alɨkʉmanyiisa ɨkɨpʉga kya vaanu.

4Wʉ amalile ʉkʉmanyiisa, akambʉʉla ʉSimoni akata, “Hɨlɨka ʉwaato kʉgati kʉ nyanza. Ʉkwa mukiise ɨmisʉngʉlʉ giinyo, mukalove isomba.” 5ɄSimoni akamwanda ʉYɨɨsʉ akata, “Gwe Mbaha, tʉvombile ɨmbombo ɨkɨlo jyoni, natʉkavili kɨɨnu. Lɨno, ʉlwakʉva ʉve ʉtsovile ɨlɨ, ʉne ndikiise ɨmisʉngʉlʉ.”

6ɄSimoni na vanine vakatsikwisa ɨmisʉngʉlʉ gya veene. Wʉ visiitse, isomba nyongosu siitso tsikagwɨla, nagɨ misʉngʉlʉ gɨkatengʉla ʉkʉlegetʉka. 7Pwʉ vakavɨɨlanga avajyavo ʉwʉ vaale mu waato ʉvʉnge, ʉkʉta viitse kukʉvatanga. Vakiitsa, vakadɨtsa isomba mu waato wooni wʉ vʉvɨlɨ. Isomba tsyale nyongosu siitso pwʉ naweene ʉwaato vʉkava ʉta vudwiviila.

8ɄSimoni Petulo wʉ agaweene ago, akasugama kwa Yɨɨsʉ akata, “Gwe Ntwa, ndikʉkʉdoova ʉhege paane, ʉlwakʉva ʉne ndɨlɨ ntulanongwa.” 9ɄSimoni aatsovile ago, ʉlwakʉva ʉmwene na vanine vooni vaadegile siitso pa kulongwi jya somba nyongosu itsʉ vaalovile. 10ɄYakobo nʉ Yohana, avaana va Zebedayo, ʉwʉ vaavombaga ɨmbombo paninie nʉ Simoni, naveene vakadega siitso. Pwʉ ʉYɨɨsʉ akambʉʉla ʉSimoni akata, “Ʉladwadaga, ʉkʉhʉma lɨno vuveetsaga indovi va vaanu.”#5:10 Indovi va vaanu kwʉ kʉta ʉnkongi va Yɨɨsʉ ʉjwa iiva va kʉlʉmbɨlɨla ɨLivangɨli kʉ vaanu pakʉta avaanu avo viingile mu Lʉdeeva lwa Ngʉlʉve. 11Pwʉ vakavʉhɨlɨka ʉwaato wa veene kʉ lʉkanzi lwa nyanza, vakasileka syoni, valɨkʉnkonga ʉYɨɨsʉ.

ɄYɨɨsʉ ikʉmbalatsa ʉmuunu ʉnya bʉʉba

(Mataayo 8:1-4; Maliko 1:40-45)

12Ɨkɨgono kɨpamato ʉYɨɨsʉ akiingila mu vʉtsenge vʉpamato. Ʉmwa aalemwo ʉmuunu ʉnya bʉʉba#5:12 Bʉʉba Ʉvʉtamu ʉvʉ waale vʉdwadwa ʉvunangania ʉmmana kʉnzi. Avaanu avaaveetsaga nɨ bʉʉba vaavalɨlwagwa ʉkʉta valamile, vɨkoleliinie. Navaatavʉlɨlwe ʉkʉtaamania nakʉ kʉlʉta kukɨsaja paninie na vaanu avange avatsila bʉʉba. Ʉmuunu ʉvaamwabaasaaga ʉnya bʉʉba namwene aavalɨlwagwa ʉkʉta ɨkoleliinie. ɄYɨɨsʉ ʉpwʉ amwibiite ʉmuunu ʉjʉ ʉnya bʉʉba, aavombile ɨkɨɨnu ɨkyʉ avaanu avange navaavombage. Ʉkʉkongana na gaavɨgilwe kʉ Valawi 13:45-46, namwene ʉYɨɨsʉ ɨɨkoleliinie. ʉmmana gwoni. Ʉmuunu ʉlya wʉ ambwene ʉYɨɨsʉ, akɨgwisa kɨvʉgudamo pa Yɨɨsʉ, akansiima akata, “Gwe Ntwa, ʉngave vunogwa ʉkʉmbalatsa, ndidoova ʉmbalatse!” 13ɄYɨɨsʉ akagolosa ɨkɨvoko kya mwene, akamwibata akata, “Ndinogwa, ʉvalatsiwe!” Ʉnsɨkɨ gʉʉgwa ɨbʉʉba jɨkahega mu mmana gwa mwene. 14Akandagɨla ʉmuunu ʉlya akata, “Lola, ʉlambʉʉlaga ʉmuunu ʉvaveetsaga ɨkulongwi ɨjɨ, apeene ʉbɨhe ʉkɨvonie kʉ nteeketsi#5:14 Ʉbɨhe ʉkɨvonie kʉ nteeketsi Ʉmuunu ʉvaveetsaga ʉvɨ aaponile ɨbʉʉba aalʉtaga kukɨvonia kʉ vateeketsi ʉkʉta aponile pakʉta vamwɨdɨke ikange ʉkwɨhanza na vaanu avange (Valawi 13:45-46; 14:1-31). nʉ kʉhʉmya isyavʉpe sya kʉvonia ʉkʉta ʉvalatsiiwe ndʉwʉ ʉlʉlagɨlo lwa Moose lulagɨla.#Valawi 14:1-32#5:14 Moose Ʉjʉ aale indongotsi va Vaisilahɨli. Kange vɨ mwene aavɨgile mu Bibilia isitabu isitala sihaano isya ndagɨlo. Ʉmwene aasue ɨmyaka myongosu wʉ akaanale ʉYɨɨsʉ ʉkʉholwa. Ɨkɨ kɨveetsage kɨmanyilo kʉ vaanu kya kʉpona kwave.” 15Napeene, ikulongwi tsa Yɨɨsʉ tsikoongelela ʉkʉpʉlɨkɨka imbasu tsyoni. Ɨkɨpʉga ɨkɨvaha kya vaanu kɨlɨkʉlʉndamana kukʉmpʉlɨhɨtsa, nʉ kʉponetsiwa isitamu sya veene. 16Napeene, ʉmwene aalʉtaga ʉkwʉ kʉtsila vaanu, kukɨsaja.

ɄYɨɨsʉ alɨ nawo ʉvʉtavʉlɨlwa wa kʉsyɨkɨla imbiivi tsa vaanu

(Mataayo 9:1-8; Maliko 2:1-12)

17Ɨkɨgono ɨkɨnge ʉYɨɨsʉ aamanyiisaaga avaanu. Mu vaanu avo vaalemwo aVafalisayo#5:17 AVafalisayo Ʉvʉganulu wa Vafalisayo lola kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. na vamanyisi va ndagɨlo#5:17 Vamanyisi va ndagɨlo Ava vaale wʉ Vayahudi avamanyi va ndagɨlo itsivɨgilwe mu Lwɨdɨngʼano ʉLʉlaala ni nyiiho itsihʉma mu ndagɨlo itso. Avo wʉ vaanu avaavamanyiisaaga avaanu avange indagɨlo ni nyiiho itso mu masinagogi. avaahʉmile mu matsumbe gooni ga kʉ Galilaya na ga kʉ Yuuda, na mu vʉtsenge wa Yelusalemu. Amaka ga Ntwa ʉNgʉlʉve gaale nʉ mwene pa kʉponia avatamu.

18Pwʉ vakiitsa avaanu vampɨmbile mu kɨtanda ʉmuunu ʉvɨ aasugujwike ʉmmana, valɨkʉnogwa ʉkʉmwingitsa mu nyumba pakʉta vambɨɨke ʉpwʉ aale ʉYɨɨsʉ. 19Napeene, vakalemwa ʉkʉmwingitsa ʉntamu ʉlya pa ndyango, pakʉva avaanu vaadɨgile siitso. Pwʉ vakatoga kʉ kɨtʉʉvɨlɨ, vakahotola ɨndwelo. Apo vakamwisa ʉvasugujwike ʉlya mu liteesu, pagatinagati ʉpwʉ aale ʉYɨɨsʉ.

20Namwene ʉYɨɨsʉ wʉ aweene valɨ nʉ lwɨdɨko kʉ mwene, akambʉʉla ʉvɨ asugujwike ʉmmana, akata, “Lʉkolo, ʉsyɨkɨliiwe imbiivi tsyako.” 21Pwʉ avamanyisi va ndagɨlo na Vafalisayo valya vakatengʉla ʉkwɨvʉʉtsa valɨkʉta, “Oogo, vɨ veeni ʉjʉ ʉvɨ idʉkɨla kwa Ngʉlʉve? Nalʉmanyili ʉkʉta ʉNgʉlʉve mwene vɨ isyɨkɨla imbiivi?” 22ɄYɨɨsʉ akagamanya ago ʉgwʉ vɨɨvʉʉtsaaga. Pwʉ akavavʉʉtsa akata, “Kɨki mulɨ na masaago ago mu numbula tsiinyo? 23Lɨno! Lyebeepe lɨlɨku, ʉkʉmbʉʉla ʉvasugujwike ʉmmana ʉkʉta, ‘Ʉsyɨkɨliiwe imbiivi tsyako,’ evo ʉkʉta, ‘Ɨma, ʉgendage’? 24Ndinogwa mulʉmanye ʉkʉta ʉMwana va Muunu#5:24 Ʉmwana va Muunu Ʉvʉganulu wa Mwana va Muunu lola kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ.#Danieli 7:13-14 alɨ nʉ lʉlagɨlo pa kɨlʉnga ʉlwa kʉsyɨkɨla imbiivi.” Baaho akambʉʉla ʉvɨ asugujwike ʉmmana akata, “Ndikʉkʉvʉʉla wɨɨme, toola ɨliteesu lyako, ʉvujage kʉ nyumba!” 25Baaho akɨɨma pamiiho ga veene, akapɨmba ɨliteesu lya mwene, akahega alɨkʉvuja kʉ myave kʉnʉ ikʉnʼginia ʉNgʉlʉve. 26Pwʉ vooni valɨkʉdega nʉ kʉnʼginia ʉNgʉlʉve, vakava nʉ lʉdwado, vakata, “Ɨleelo tʉtsiweene itsa kʉdega.”

ɄYɨɨsʉ ikʉmwɨlanga ʉLawi

(Mataayo 9:9-13; Maliko 2:13-17)

27Kʉmbele, ʉYɨɨsʉ akahʉma mu nyumba jɨlya, akambona ʉnsangʉtsi va songo mpamato, ʉvɨ aatambʉlwagwa Lawi,#5:27 Lawi Ɨlitaawa ɨlɨnge itambʉlwa vɨ Mataayo. ataamile apoonu ʉpwʉ aasonzaaga ɨsongo. ɄYɨɨsʉ akambʉʉla akata, “Tʉvʉʉke ʉngʼongage.” 28Palya ʉLawi akasileka syoni, akahega, alɨkʉnkonga ʉYɨɨsʉ.

29Kʉmbele, ʉLawi akannotsehetsa ʉYɨɨsʉ ɨkyakʉlya kya lʉhekelo mu nyumba jya mwene. Ikange kyalepwo ɨkɨpʉga ɨkɨvaha kya vasangʉtsi va songo na vaanu avange avaataamile valɨkʉlya paninie nave. 30Pwʉ aVafalisayo na vamanyisi va ndagɨlo ʉwʉ naveene vaale Vafalisayo, vakatengʉla ʉkwɨlwenga kʉ vakongi va Yɨɨsʉ valɨkʉta, “Kɨki mwilya nʉ kʉnywa paninie na vasangʉtsi va songo na vatulanongwa?” 31ɄYɨɨsʉ akavaanda akata, “Avatava vatamu navilonda ʉnʼganga, veene avatamu wʉ veene vilonda ʉnʼganga. 32Nanditsili kukʉvɨɨlanga avikɨvona vagolosu, ndɨviitsye avatulanongwa, pakʉta vapelage imbiivi tsa veene.”

Ɨkulongwi jya kwɨdɨnda ʉkʉlya

(Mataayo 9:14-17; Maliko 2:18-22)

33Avaanu valya vakata kwa Yɨɨsʉ, “Avakongi va Yohana na vakongi va Vafalisayo, kakongosu, valɨ nalwo ʉlwiho lwa kwɨdɨnda ʉkʉlya, pa vʉsumbe wa kwɨvɨɨka mu nyɨsajo. Kɨki avakongi vaako viilya nʉ kʉnywa isigono syoni!” 34ɄYɨɨsʉ akavaanda akata, “Avaanu ʉwʉ vɨlangilwe viitse kʉ vʉtegʉlanie, wʉ valɨ paninie nʉ ntegʉlanʼdala, namukagele ʉkʉvasiga ʉkʉlya. 35Lola, gʉliitsa ʉnsɨkɨ ʉgwʉ ʉntegʉlanʼdala alahetsiwa pagati pa veene, apo pwʉ valɨdɨndaga ʉkʉlya.” 36Akavavʉʉla ɨkɨtsovo akata, “Nakʉli ʉmuunu ʉvɨ igɨda ɨkɨlaka mu nsabwa ʉmpya, pa vʉsumbe wa kʉhonela mu nsabwa ʉndaala. Angave ivomba ɨlyo, jiiva aagɨdile ʉnsabwa ʉmpya, ikange ɨkɨlaka ɨkyo nakɨkahwanane nʉ nsabwa ʉndaala. 37Ikange, nakʉli ʉmuunu ʉvɨ iduudila ɨdivai ɨɨmya mu sipako isya ngwembe isilaala. Ɨngave iduudila, ɨdivai ɨjyo ɨɨmya jibatsʉla isipako isyo, pwʉ ɨdivai jiduudika nasyene isipako sya ngwembe sinangɨka.#5:36-37 Mu kɨhwananitso ɨkɨ, ʉnsabwa ʉndaala ni sipako sya ngwembe isilaala tsʉ manyiiso evo inyiiho tsa katale. Isiinu isipya tsʉ manyiiso iimya tsa Yɨɨsʉ. Ɨngave avaanu vikonga imanyiiso indaala ni mya, viweesa ʉkʉnanga tsyoni. 38Panogye ʉmuunu aduudilage ɨdivai ɨɨmya mu sipako sya ngwembe isipya. 39Ikange nakʉli ʉmuunu ʉvɨ inogwa ʉkʉnywa ɨdivai ɨɨmya, wʉ anyue ɨndaala, manya iita, ‘Ɨdivai ɨndaala jyʉ jɨlʉtɨɨlye ʉvʉnonu.’ ”

Currently Selected:

Luuka 5: zga

Highlight

Copy