Luuka 17

Imanyiiso tsa kʉsyɨkɨlanila

(Mataayo 18:6-7, 21-22; Maliko 9:42)

1ɄYɨɨsʉ akavavʉʉla avakongi va mwene akata, “Ingelo itsikʉvapelela avaanu ʉkʉvomba imbiivi pwile isigono syoni. Lɨno, asue vʉvʉle ʉmuunu ʉvipela ingelo itso! 2Ɨkaale jiiva hʉba kʉ muunu ʉjwa ʉkʉkʉngɨlwa ʉlwala lwa kʉhevetela mu singo, nʉ kʉtaagwa mu nyanza, ʉkʉlɨngʼaania nʉ vʉkʉvɨlwa ʉvʉlambona, angave ikʉmpelela mpamato mu vadebe ava avombe imbiivi! 3Lɨno, mwɨlolelage pakʉta muleke ʉkʉvomba ɨlyo!

“Ʉmwɨdɨkinnino angakʉnangɨle, tsova nave, angapele, nsyɨkɨle. 4Ndavɨ jɨve ikʉkʉnangɨla kavɨlɨ kavɨlɨ#17:4 Kavɨlɨ kavɨlɨ Mu Kɨyunaani jɨvɨgilwe kilivukila lekelakʉpamato (7). Ʉkʉtsova ewo kwʉ kʉta ʉleke ʉkʉgatala ʉkʉnsyɨkɨla ʉmuunu ʉvitsile kudoova ʉvʉsyɨkɨlo. mu kɨgono kɨpamato, nʉ kʉkilivuka kwave kavɨlɨ kavɨlɨ kwita, ‘Ndɨpelile,’ ʉve nsyɨkɨle!”

5Pwʉ avapositili valya vakanʼdoova ʉNtwa vakata, “Tudoova ʉtwongeletse ʉlwɨdɨko!” 6ɄNtwa ʉYɨɨsʉ akavaanda akata, “Mukaale muve nʉ lwɨdɨko lʉdebe ndavɨ lʉve ndɨ mbeju ɨndebe ʉkʉlʉtɨɨlɨla tsyoni, mukaale mukʉgʉvʉʉla ʉmʼbɨkɨ ʉnkʉjʉ ʉgʉ ʉkʉta, ‘Ngʼongʼovoka ʉkoogame mu nyanza,’ nagwene gʉkaale gukʉvɨɨdɨkɨla!”

Ʉwɨɨdɨhɨtsi mu mbombo

7“Tʉte mpamato pagati paanyie alɨ nʉ mbanda ʉvɨ ilɨma evo idɨɨma ingʼolo. Veeni ʉvikʉmbʉʉla ʉmbanda wʉ asiike ʉkʉhʉma kuvomba ɨmbombo, ate, ‘Itsa ngʼaningʼaani, taama ʉlye ɨkyakʉlya’? 8Baako! Apeene jiita, ‘Innotsehetse ɨkyakʉlya, ikange ʉmbombelele ʉkʉsika ʉpwʉ ndimala ʉkʉlya nʉ kʉnywa. Wʉ ndɨmalile, pwʉ najyʉve ʉlye nʉ kʉnywa.’ 9Ndeeti, jʉvukʉnsaana ʉmbombi, ʉlwakʉva avombile ʉgwʉ ʉkandagye? Baako! 10Wʉ jɨlɨwo na kwanyie, wʉ mumalile ʉkʉvomba tsyoni itsʉ ʉNgʉlʉve avalagye ʉkʉvomba, pwʉ muteetsage, ‘Ʉwe tʉlɨ vavanda avanavanogiili ʉkʉsaanwa, tʉvombile itsʉ tsitʉnogye ʉkʉvomba.’ ”

ɄYɨɨsʉ iponia avanya bʉʉba kɨtsigo

11ɄYɨɨsʉ wʉ ilʉta kʉ Yelusalemu, akagendela ɨnzɨla ɨjyalʉtɨngʼiinie pagati pa kɨlʉnga kya Samaliya nɨ kya Galilaya. 12Wʉ alɨ pa kwingila mu litsumbe lipamato, akaaganila na vaanu kɨtsigo (10) avanya bʉʉba. Avaanu valya, vakɨɨma kʉvʉtale nʉ mwene,#17:12 Vakɨɨma kʉvʉtale Vaavombile ndavʉle ʉkʉkongana ni ndagɨlo itsyabeetsaaga ʉnya bʉʉba ʉkʉhegelela kʉ muunu ʉntsila bʉʉba (Valawi 13:45-46). 13vakatotsa ɨlimenyu, vakanʼdoova vakata, “Gwe Mbaha, Yɨɨsʉ, ʉtʉkolele ɨkɨsa!” 14ɄYɨɨsʉ wʉ avaweene, akavavʉʉla akata, “Bɨhagi mukɨvonie kʉ vateeketsi.” Wʉ valɨ mu nzɨla vilʉta, vakakenyemuka vaponile.

15Pwʉ impamato pagati pa veene, wʉ aweene aponile, akakilivuka ngʼaningʼaani kwa Yɨɨsʉ, kʉnʉ ikʉnʼginia siitso ʉNgʉlʉve. 16Wʉ asiike, akɨgwisa kɨvʉgudamo pavʉlongolo pa silʉnde sya Yɨɨsʉ kʉnʉ ikʉnsaana. Ʉmuunu ʉjwa, aale Nsamaliya. 17ɄYɨɨsʉ akavʉʉtsa akata, “Navavalatsiiwi avaanu vooni kɨtsigo? Avange budikakʉpamato (9) valɨ ndaku? 18Nakʉli ʉvɨ akiliwiike kukʉnʼginia ʉNgʉlʉve, apeene mwene ʉmpooma ʉjʉ?” 19Pwʉ ʉYɨɨsʉ akambʉʉla akata, “Ɨma, bɨhaga, ʉNgʉlʉve akʉponiitse kʉ nzɨla jya lwɨdɨko lwako!”

Ʉkwitsa ʉLʉdeeva lwa Ngʉlʉve

(Mataayo 24:23-28, 37-41)

20Ɨkɨgono kɨpamato, aVafalisayo vakambʉʉtsa ʉYɨɨsʉ vakata, “ɄLʉdeeva lwa Ngʉlʉve lʉliitsa ndali?” ɄYɨɨsʉ akavaanda akata, “ɄLʉdeeva lwa Ngʉlʉve nalukwitsa ni simanyilo isyʉ sivoneka na miiho. 21Avaanu navakaate, ‘Lola! Lʉlɨ apa’ evo, ‘Lʉlɨ palya,’ manya ʉLʉdeeva lwa Ngʉlʉve lʉlɨ pagati paanyie.”#17:21 ɄLʉdeeva lwa Ngʉlʉve lʉlɨ pagati paanyie ɄYɨɨsʉ aatsovile amamenyu aga pa kʉvavonia ʉkʉta, palya ʉpwʉ aale ʉYɨɨsʉ, nalʉ Lʉdeeva lwa Ngʉlʉve lwale baaho ʉlwakʉva ʉmwene aale vɨ Mesiya. Mesiya kwʉ kʉta ʉNkʉlʉdeeva ʉvɨ asuungʼilwe nʉ Ngʉlʉve kulongotsa avaanu va mwene. Kʉ nzɨla jya Yɨɨsʉ ʉkwitsa mu kɨlʉnga, ʉNgʉlʉve akava ɨmiike ʉLʉdeeva lwa mwene apa pa kɨlʉnga.

22Pwʉ ʉYɨɨsʉ akavavʉʉla avakongi va mwene akata, “Siliitsa isigono isyʉ gʉlanogaga ʉkʉmbona ʉMwana va Muunu pange ndakɨve kɨgono kɨpamato, napeene namulambone. 23Avaanu valavavʉʉlaga valateetsaga, ‘Lola! Ʉlya palya’ evo ‘Ʉjʉ apa.’ Mwitse muleke ʉkʉvɨɨdɨka pange ʉkʉvakonga. 24Ndɨvavʉʉlile ago, ʉlwakʉva ʉnsɨkɨ ndɨlaava ndikilivuka ndɨ Mwana va Muunu, ndɨliitsa ʉta nzasi ɨjyʉ jikwitsa ngʼaningʼaani nʉ kʉmulika imbasu tsyoni mu vʉtandaatse. 25Wɨgane wa Ngʉlʉve ʉkʉta wʉ ago gakaanale ʉkʉhʉmɨla, mbʉlongolo ndɨ Mwana va Muunu, ndɨtale ʉkʉkʉvɨlwa mu mongosu nʉ kʉbeelwa na vaanu va kɨvʉmbʉkʉ ɨkɨ.

26“Ndʉwʉ jyale mu sigono sya Nwaka, wʉ jɨlaava namu mu sigono sya Mwana va Muunu. 27Avaanu vaalitsaga nʉ kʉnywa, valɨkʉtegʉla nʉ kʉtegʉlwa, ʉkʉsika ɨkɨgono kɨlya ʉpwʉ ʉNwaka iingye mu ngalava. Apo, ʉlwongometso lʉkiitsa nʉ kwongometsa avaanu vooni.

28“Ikange mu sigono sya Loti, jyale vʉle vʉle. Avaanu vaalitsaga nʉ kʉnywa, vaagʉlaga nʉ kʉgʉtsa, vaavyalaga nʉ kʉtsenga. 29Napeene, ɨkɨgono kɨlya ʉLoti wʉ ahʉmile kʉ Sodoma, ʉmwoto na maganga agiviika gʉkiika ndɨ sula ʉkʉhʉma kʉkyanya, gʉkakobosa avaanu vooni. 30Ewo wʉ jɨlaava ɨkɨgono kɨlya, ʉMwana va Muunu alaava ihʉmɨla pavʉvalasu.

31“Ɨkɨgono ɨkyo, ʉmuunu angave kʉkyanya kʉ nyumba, aleke ʉkwika paasi nʉ kwingila mu nyumba pakʉta atoole isiinu sya mwene isyʉ silɨ nʼgati, apeene iike nʉ kʉnyila. Namwene ʉvɨ alɨ pa kɨlɨmɨla, aleke ʉkʉkilivuka kʉ nyumba kutoola ɨkɨveetsaga.

32“Mukʉmbʉhɨtsaage itsʉ tsyahʉmye kʉ nʼdala va Loti.#17:32 Nʼdala va Loti Ʉnʼdala ʉjwa aahambwike ʉkʉva liganga lya mwinyo pa nongwa jya kʉbeda ʉlʉlagɨlo lwa Ngʉlʉve ʉpwʉ aanogilwe ʉkʉkilivuka kʉ Sodoma, ʉvʉtsenge ʉwʉ ʉNgʉlʉve aatye woongometswe (Vʉtengʉlɨlo 19:26). 33Ʉmuunu ʉvaveetsaga ʉvɨ inogwa ʉkʉponia ʉwʉʉmi wa mwene, ʉjwa alawaambʉtsa. Apeene ʉmuunu ʉvaveetsaga ʉvɨ ikʉwaambʉtsa ʉwʉʉmi wa mwene kʉ nongwa jyane, ʉjwa vɨ alavʉpoka.

34“Ndikʉvavʉʉla ʉkʉta, ɨkɨgono ɨkyo pakɨlo avaanu vavɨlɨ valaava vagonile pa kɨtanda kɨpamato, mpamato alatoolwa, ʉjyʉnge alasigatswa. 35Avadala vavɨlɨ valaava pa kʉheveta, mpamato alatoolwa, ʉjyʉnge alasigatswa. 36Avagoosi vavɨlɨ valalɨmaga ɨkɨlɨmɨla, mpamato alatoolwa, ʉjyʉnge alasigatswa.”#17:36 Inyandʉlʉ itsinge tsa katale tsa Vʉvɨge ʉVʉvalatse natsilɨ nalwo ʉlʉkɨndɨ ʉlʉ.

37Avakongi vakambʉʉtsa vakata, “Ntwa, kwʉ ndaku ʉkwʉ ago galavombeka?” Akavaanda kʉ kɨtsovo akata, “Apoonu apalɨ kɨtuuve, pwʉ peene ingasimula tsilʉndamana#17:37 Apalɨ kɨtuuve, pwʉ peene ingasimula tsilʉndamana Ɨkɨtsovo ɨkɨ kwʉ kʉta ʉYɨɨsʉ alaava ikwitsa mu wɨɨmɨkiwa wa mwene, ʉmuunu nʉ muunu alambona ndʉwʉ ʉmuunu ikʉtsivona ingasimula tsilʉndamiine paninie ikʉlʉmanya ʉkʉta palɨ kɨtuuve. Ʉvʉganulu ʉvʉnge wa mamenyu aga wiita wʉ mukʉgavona ago, mulʉmanye ʉkʉta ʉnsɨkɨ gʉsiike ʉgwa kwongometswa kwa vʉtsenge wa Yelusalemu. paninie.”

Currently Selected:

Luuka 17: zga

Highlight

Copy