Lucca 17

Calchì dettu di Ghjesù

(Mt 18,6-7.21-22; Mc 9,42)

1Disse Ghjesù à i discepuli: «ùn si pò chisià ch'ellu ci sia impittatoghji, ma malasciu à chì face da impittatoghju. 2Megliu saria par ellu ch'omu l'appicchi una macine à u collu è lampallu in mare, prima ch'ellu fia impittà unu solu d'isti chjuchi. 3Siate attenti à voi. S'ellu hà fattu male u to fratellu, littica lu. Ma s'ellu si pente, lascia ch'ellu vaga. 4È puru ch'ellu offendi à tè sette volte ind'una ghjurnata è chì, sette volte, ch'ellu venga duv'è tè dicendu: “mi pentu”, u lasciarè ch'ellu vaga.»

5È dissenu l'apostuli à u Signore: «cresci ci a fede.» 6È u Signore disse: «si voi avissite fede quant'è un granillucciu di senapa#17,6 Vede Mt 17,20 è a nota., diciariste à issa chjalza: “dirradicheghja ti è poni ti in mare”; è cusì avia da fà quella.

7Qualessu di voi, s'ellu hà un ischiavu chì li face da lavuradore o da pastore, l'hà da dì à u vultà da a campagna: “aiò veni subitu è posati à tavulinu.” 8Ma nò chì l'hà da dì: “appronta mi da manghjà, metti ti a cinta di travagliu è servimi fintantu ch'eiu manghju è beiu. Dopu fattu, manghjarè è biarè tù?” 9Sarà pò ch'ellu abbia da avè l'ubblicu à u servu par avè fattu ciò chì l'era statu cumandatu? 10Cusì sete voi: fattu chì voi avete ciò chì v'era statu cumandatu, dite puru: “ùn semu mai cà schiavi di pocu ghjuvore, ciò ch'ellu ci tuccava à fà, l'emu fatta.”»

I dece liparosi risanati

11Fendu strada à via di Ghjerusaleme, ancu ellu francò trà Samaria è Galilea, 12è, à l'entre ind'un paese li t'affaccanu dece leparosi; battendu à a larga#17,12 Vede Lv 13,45-46., 13piglionu è dissenu: «Ghjesù Maestru, abbia cumpassione di noi altri.» 14Quand'ellu i vide, Ghjesù disse: «andate ind'è i preti è prisintate vi#17,14 Vede Lv 14,2-3.». È in lu mentre ch'elli andavanu, funu risanati. 15Vistu si guaritu, unu di quelli vultò in daretu, ludendu à Diu, à voce rivolta. 16Si lampò di faccia in tarra, à i pedi di Ghjesù, ringraziendu lu. Era un Samaritanu. 17Tandu, Ghjesù rispose è li disse: «ùn funu risanati i dece? D'unde sò chjappi quill'altri nove? 18In fora d'issu frusteru, ùn ci ne hè unu chì sia vultatu à ringrazià à Diu.» 19È à quellu, disse: «pesati è vai. A to fede t'hà salvu.»

U Regnu di Diu, di cum'ellu vene

(Mt 24,23-28.37-41)

20Intargatu da i Farusei: «quandu hà da vene u Regnu di Diu?» Li rispose è disse: «ùn vene u Regnu di Diu cum'è una cosa ch'ella si possa vede. 21Mancu diciaranu: “mì chì hè quì!”, mì lu culà!, chì, mirè, u Regnu di Diu hè à l'ingrentu di voi.» 22È disse à i discepuli: «anu da vene i ghjorni chì vo bramarete di vede solu unu di i ghjorni di u Figliolu di l'Omu, è ùn vidarete. 23Vi diciaranu: “mì culà!” [o]: “mì quì!” Ùn andate. Ùn circate puru, 24chì cum'è u lampu di a saietta allumineghja u celu da un capu à l'altru, cusì hà da esse u Figliolu di l'Omu [in lu so ghjornu]. 25Ma prima, li tocca à pate assai cose è à esse ricusatu da issa leva. 26Cum'ella fù à i ghjorni di Noè, cusì hà da esse ancu à i ghjorni di u Figliolu di l'Omu: 27manghjavanu, biianu, pigliavanu moglie è mariti, finu à u ghjornu ch'ellu intrì Noè in lu battillone chì tandu, vense u dillubiu è tumbò à tutti#17,27 Vede Gn 6,9–7,24.. 28È sarà cum'è à i ghjorni di Lot, manghjavanu, biianu, cumpravanu, vindianu, punianu, custruianu, 29ma u ghjornu ch'ellu iscì Lot da Sodoma, falonu da u celu focu è insolfaru chì tumbonu à tutti#17,29 Vede Gn 18,20–19,25.. 30Cusì hà da esse à i ghjorni ch'ellu si palesa u Figliolu di l'Omu. 31Quellu ghjornu, à chì sarà annantu à u tettu è avarà robba in casa ùn falga puru à ricute la; è mancu ch'ellu volti in daretu quellu chì sarà in campagna. 32Ramintate vi a moglia di Lot#17,32 Vede Gn 19,26.. 33À chì prova di francà si u fiatu u ci hà da perde è à chì l'avarà persu l'hà da tene. 34A vi dicu, in quella nuttata, di dui chì sò ind'un lettu, unu hà da esse pigliatu è l'altru lasciatu. 35È di duie donne chì saranu inseme à macinà, una hà da esse pigliata è l'altra lasciata.» 36[…] 37Tandu i discepuli, da risposta, li dicenu: «è induva o Signore?» È tandu ellu: «duv'ellu sarà u cadavaru s'anu da accoglie l'altagne#17,37 Paragunà cù Ghjb 39,30..»

Currently Selected:

Lucca 17: 4EvCors

Highlight

Copy