MARCOS 9

1Zegahc ra Jesúz leeyâme:

―Gapyaꞌ laꞌd ni uli, nu lahd meññ-rieꞌ ni nu yahc neꞌ nehx zehty sinn güieꞌ mod-rtzoo Dioz mdad ni beeiyu lee gyreu.

Bwieꞌ xmeññ Jesúz bydzee mod-nac lo me

(Mt. 17:1-13; Lc. 9:28-36)

2Güdedy shoꞌb dzé, güiyno Jesúz Pedr, Jacob no Juaṉ ihqy to dañ-suu lehzy yâme. Uga bwieꞌ yâme bydzee mod-nac lo Jesúz. 3No pycampytzeꞌ shab me, no gucnquitzybou. No nehx nu mbehty nquitzybo beeiy leeu, nîcze ma nguihby meññu. 4No bwieꞌ yâme Elíaz no Moiséz ni güyuꞌ yahc ba xtze, gayu yâme diidz no Jesúz. 5Were ra Pedr Jesúz:

―Muextr, ¡lehgxu zuu nó neꞌ! Gzaa noꞌ tzonn ṟamad: tohbyu par lii, stohbyu par Moiséz, no stohbyu par Elíaz.

6Xmeññ Jesúz naꞌ gadzie yâme, no nehx nann Pedr bia ganii. 7Tohzydzi gúḻ to zá no bihtz ximbleu ru zu yâme, no lo za-wé bieññ to riedz ni ne:

―Nirieꞌ we dShiñaꞌ ni ndzin lee; lâ guieññ ni ga me laꞌd.

8Hor-caḻ gahc, bwieꞌ yâme guingybi yâme, no ba ndruhty nehx bwieꞌ yâme, ba nunzy Jesúz zu no leeyâme.

9Lóni gayaht yâme dahñ, ra Jesúz leeyâme na di gu yâme diidz lo ndruhty ni bwieꞌ yâme, xtâ glo leeme, Mpyquie-Pshahl Dioz Lee, ba gübahñ me de lahd mînguty. 10No leewe nehx bie yâme diidz lo ndruhty, nîcze ganabdiidz saꞌ yâme biahx‑e leeu ni rbahñ meññ de lahd mînguty. 11Günabdiidz yâme Jesúz, ra yâme:

―¿Bia nacu ne muextr-ruuḻ yahc xleiy Moiséz nier Elíaz‑e guiaad?

12Ra Jesúz leeyâme:

―Ni uli we leeu nier Elíaz‑e guiaad, no leeme guistziaawy gyreu. ¿No bia mód‑e naꞌ güyaa lo Guehtzy ru queꞌ xtiidz Dioz, de ni naa, Mpyquie-Pshahl Dioz Lee, zdeedyaꞌ xtahl guîlné no stzunéladzy meññ naa? 13Per naa gapyaꞌ laꞌd, Elíaz ba biahd me, no ptzoo meññ leeme gyre ni gucladzy yâme, mod-güyaa lo Guehtzy ru queꞌ xtiidz Dioz lguia ni gac me.

Psiaḻ Jesúz to ñobywiñ ni nu mbenahcsy lee

(Mt. 17:14-21; Lc. 9:37-43)

14Ru gubyguiat yâme ru zu zrieñ xmeññ me we naꞌ, bwieꞌ yâme nu xtahl meññ guingybi xmeññ me, no lahd muextr ni ruuḻ yahc xleiy Moiséz gadeḻydiidz no leeyâme. 15Scâsy bwieꞌ gyre meññ-rieꞌ yahc Jesúz, modni gatzunadz yâme no byxuunn yâme bigynii yâme diux leeme. 16No günabdiidz Jesúz leeyâme, ra me:

―¿De bia gadeḻydiidz laꞌd no dmeññ yahcaꞌ?

17To lahd meññ-rieꞌ yahc ra leeme:

―Muextr, zidnon dñoobyaꞌ loꞌy, porni nu to mbenahcsy leeme, no psaꞌnu leeme ngop. 18No rutisy rnahzyu leeme, rguiñguieu leeme lo yu; no rruu mboo ruꞌ me, no rahgü laiy me, no racnchuhg me. No günabaꞌ xmeññiꞌ mboo leeu leeme, per di ñaḻu leeyâme.

19Ra Jesúz leeyâme:

―¡Laꞌd ni nu ni naꞌ, nehx rlíladzyt naa! ¿Xtâ buc rapaꞌ de ni tzun lahd laꞌd? ¿Xtâ buc beeiy ctibdadzyaꞌ laꞌd? Lâ guidno leeme neꞌ.

20Were güiyno yâme ñobywiñ ru zu Jesúz. Per hor-bwieꞌ mbenahcsy Jesúz, tohzydzi bzoobu mbeꞌ ñobywiñ, no biahb me lo yu, gabihsh gado me no garuu mboo ruꞌ me. 21Günabdiidz Jesúz xtad ñobywiñ, ra me:

―¿Buc diaa rzahc me ze?

Ra xtad ñobywiñ Jesúz:

―Glo nyaañ me; 22no nehx rsaꞌn mbe-wé ni rsiahbu leeme lo gue o lo nzeꞌ, lehdy igaꞌdyu leeme. Per bâḻ beeiyu lii ctzooyu la, bioob noꞌ no gucno noꞌ.

23Ra Jesúz leeme:

―Bâḻ beeiyu lii gylíladzyiꞌ la, gyreu we beeiy no meññ ni rlíladzy naa.

24Tohzy günii xtad ñobywiñ ndip, lé pquee me riedz:

―Naa rlídadzyaꞌ lii. ¡Gucno naa lehdy ma gylídadzyaꞌ!

25Hor-bwieꞌ Jesúz ngueeḻy gadohp xtahl meññ, ptzoo me mdad mbenahcsy, no ra me lee:

―Mbenahcsy, lii rtzooy meññ ngop no nguat, naa gayapyaꞌ lii: byruu de ñobywiñ-rieꞌ, no ba di guibyguiat tzuriꞌ leeme.

26Were pquee mbenahcsy riedz ndip no gyzac bzoobu mbeꞌ ñobywiñ, no byruu gahcu de leeme. No rluu me beeiy ni guhty, xtâ ra xtahl yâme:

―Ba guhty me we.

27Per günahzy Jesúz ña me no gülesy leeme, no guzli gahc me.

28Bylux güyuꞌ Jesúz leññ yuꞌ, günabdiidz xmeññ me leeme lehzy yâme, ra yâme:

―¿Bia nacu noꞌ di ñaḻ mboo noꞌ mbenacsy-wé?

29Ra Jesúz leeyâme:

―Zâ mbenacsy-wé racladzyu gnab mu lo Dioz no ctzoo mu ayun, no were beeiy gboo mu leeu.

Gyzac günii Jesúz ni gaty me

(Mt. 17:22-23; Lc. 9:43-45)

30Ru byruu yâme uga, güdedy yâme lo ṟegioṉ-Galilea; no nehx gucladzy Jesúz ñann ndruhty, 31porni galuu me xmeññ me, no ra me leeyâme:

―Naa Mpyquie-Pshahl Dioz Lee; zdee dxuhch naa lo ña meññ-rdziadzyno naa, no zgaꞌdy yâme naa, per lo tzonn dzé zbahñaꞌ gyzac.

32Per di ñieññ yâme ni ganii me, no rdzie yâme gnabdiidz yâme leeme bia leeu günii me.

¿Dxu ma rsahc?

(Mt. 18:1-5; Lc. 9:46-48)

33No bydzihñ Jesúz no xmeññ me guiedzy-Capernaum. Ru ba nu yâme leññ yuꞌ, günabdiidz Jesúz xmeññ me, ra me:

―¿Bia lguia gadeḻydiidz laꞌd hor-zioꞌb nó lo ñahz?

34Per nehx günii yâme mbehty; porni hor-ziaad yâme lo ñahz gadeḻydiidz yâme dxu de lahd yâme ma qysahc. 35Were gürie Jesúz no pquee me riedz gydiby tzipychop xmeññ me, no ra me lee:

―Bâḻ dxuhch racladzy ma qysahc la, rahp me de ni gac me scâsy ni ndruhty nehx nac lahd gyre zrieñ, no gac me scâsy xmós gyre zrieñ.

36Luxu biycaꞌ me to ñôbydxuur, no bzu me lee glaꞌy ru zu yâme. Luxu cuaꞌ me lee lo ña me, no ra me leeyâme:

37―Bâḻ dxuhch, porni rzobdiidz naa, gacno to beeiy mbiux-rieꞌ la, scâsy ñacno yâme naa we; no dxu ycaꞌ dtiidzaꞌ la, dac‑e dtiidzaꞌ gacáꞌ yâme, mazyg gacáꞌ yâme xtiidz Dioz ni pshahl naa.

Dxu nehx néladzy nó la, gayacno me nó we

(Mt. 10:42; Lc. 9:49-50)

38Ra Juaṉ Jesúz:

―Muextr, bwieꞌ noꞌ to mpyquie ni ganii ley lehdy gboo me mbenahcsy meññ, per nehx ganzeno me nó. No ra noꞌ leeme ba di ctzoor me mod-wé, porni dac me ni ganzeno nó lee.

39Were ra Jesúz leeyâme:

―Di ycar laꞌd leeu leeme; porni ndruhty ni beeiy rtzoo to milagür hor-ganii dlen, nehx beeiy luegü gahc nnii ni nahcsy dcheshaꞌ. 40Porni dxu nehx néladzy nó la, gayacno me nó we. 41Nitisy dxu gdee to vas nzeꞌ goo laꞌd por dlen, porni nac laꞌd dmeññaꞌ la, gapyaꞌ laꞌd ni uli, nehx znihty ni guiscady Dioz leeme.

Ndzieeby bâḻ meññ guiahb lo guîlquie

(Mt. 18:6-9; Lc. 17:1-2)

42’Nitisy dxu por xtoḻ guiatrxan to ni zidguiahc beeiy mbiux-rieꞌ ni rlíladzy yahc naa la, beeiydí nguꞌ meññ to duu yañ me no nlihby yâme to xguie-ro molin lou; luxu nráḻ yâme leeme leññ nisdoo. 43No bâḻ ñay rquihlyu lii ctzooy guîlquie la, pchuꞌ leeu. Beeiydí tzuy ru gapiꞌ guîlmbahñ ni nehx zluhx no nrung ñay, no ba dac tzaꞌy infiern, queꞌ gyrop ñay, ru nehx ziuꞌ dzé guiee gue. 44Uga nehx rehty mpcuch yahc ni rahgü cuerp, no nehx riee gue. 45Bâḻ nieꞌy rquihlyu lii ctzooy guîlquie la, pchuꞌ leeu. Beeiydí tzuy ru gapiꞌ guîlmbahñ ni nehx zluhx no ndanguiꞌ, no ba dac tzaꞌy infiern, queꞌ gyrop nieꞌy, ru nehx ziuꞌ dzé guiee gue. 46Uga nehx rehty mpcuch yahc ni rahgü cuerp, no nehx riee gue. 47No bâḻ to loꞌy rquihlyu lii ctzooy guîlquie, güloo leeu; beeiydí tzuy ru rtzoo Dioz mdad no tohzy loꞌy, no ba dac tzaꞌy infiern, queꞌ gyrop loꞌy. 48Uga nehx rehty mpcuch yahc ni rahgü cuerp, no nehx riee gue.

49’Porni ziahb xgue guîlné lguia gyre meññ scâsy riuꞌ ziahd lo gyre gun par Dioz. 50Ziahd, to ni mos‑e leeu; per bâḻ nnihty ni ndzihgu la, ¿xnahc beeiy ñacndzihgu gyzac? Zegahc laꞌd, lâ gac scâsy ziahd ni ndzihg ni beeiy yquihñ, no lâ tzu dzie tziaawy no saꞌ laꞌd.

Currently Selected:

MARCOS 9: zpg

Highlight

Copy