MARCOS 4
4
Ejempl xchieñ ladzy trigü ni byraꞌdz lehdy gylahñ
(Mt. 13:1-9; Lc. 8:4-8)
1Gyzac guzlo galuu Jesúz meññ coo nisdo-Galilea, no bydohp xtahl meññ ru zu me; were güyehpy me leññ to barcü ni naḻ lo nzeꞌ, no gürie me; no meññ-caḻ yahc biaꞌn coo nisdoo. 2No guzlo galuu me meññ-caḻ yahc, ndaagü lo diidz rnii me. Lóni galuu me, ra me meññ-rieꞌ yahc:
3―Lâ guieññ nirieꞌ: Güyuꞌ to mpyquie, güya me lo xilyu me bicchaꞌdz me ladzy trigü lehdy gylahñu. 4Lóni gachaꞌdz me leeu we naꞌ, doozyu biahb coo ñahz, no biahd mayaañ güdahgü yâmaꞌ leeu. 5Stoozyu biahb lahd guie, ru nehx nu xtahl yu; no ngueeḻy gülahñ yahcu, porni uxiee yu rahpu. 6Per ru byruu ncübidz bdzuu leeyahcu; no gumm nehx ziaꞌ ba günahzyu lo yu zaꞌgndzi la, gübihdzyu. 7Stoozyu biahb ru rlahñ guix-guiahtz; no bygaꞌy guix-guiahtz no di ndee lgar nniꞌzyu, no nehx cueꞌ lou. 8Per stoozyu biahb lo yu-tziaawy ru beeiy cueꞌu mos; gülahñ yahcu no bygaꞌyu, no lahdu cueꞌ treint gá ladzyu cad to lo xan, no zrieñu cueꞌ sesent, no zrieñu cueꞌ diby gayuu.
9No ra me leeyâme:
―Bâḻ racladzy laꞌd gann laꞌd bia ganin la, lâ yquee ihqy laꞌd dtiidzaꞌ.
Günii Jesúz bia nacu rnii me no ejempl yahc
(Mt. 13:10-17; Lc. 8:9-10)
10Byluxu, ru biaꞌn Jesúz tohg leeme, günabdiidz meññ-zu gahsh de leeme no gydiby tzipychop xmeññ me bia rnii ni günii me ndaagü lo diidz. 11Ra me leeyâme:
―Laꞌd, bdee Dioz lsenzy gann ni nungaꞌdzy de ni rtzoo me mdad; per zrieñ meññ la, wé gyninon lee pur ndaagü lo diidz. 12Were nîcze ma güieꞌ yâme, guiaꞌn yâme beeiy ni di rwieꞌ; no nîcze ma guieññ yâme, per nehx zann yâme bia leeu, lehdy di ssaan yâme ni nahcsy ni nac yâme no ba di ssiaaḻladzy Dioz xguîlquie yâme.
Ni rnii ejempl xchieñ ladzy trigü ni byraꞌdz lehdy gylahñ
(Mt. 13:18-23; Lc. 8:11-15)
13No ra me leeyâme:
―¿Nehx rieññ laꞌd nirieꞌ ni günin ndaagü lo diidz la? ¿Xnahc‑e naꞌ guieññ laꞌd zrieñ ni gapyaꞌ laꞌd ndaagü gahc lo diidz? 14Mpyquie-ricchaꞌdz ladzy trigü lehdy gylahñu, leeme zidguiahc beeiy meññ-runo meññ xtiidz Dioz. 15No lahd meññ ni rieññ yahc‑e zidguiahc beeiy ladzy ni biahb coo ñahz; rieññ yâme xtiidz Dioz, per luxu ba ziaad bêndzab rboo leeu leññ xguîlmbahñ yâme. 16No zegahc zrieñ meññ yahc‑e zidguiahc beeiy ladzy ni biahb lahd guie ru dxie doozy dzii yu: hor-rieññ yâme xtiidz Dioz, rcaꞌ gahc yâmeu no rxilyno yâmeu; 17per gumm zidguiahc yâme beeiy plant ni nehx günahzy lo yu zaꞌgndzi la, doozy dzé rtibladzy yâme; no leewe, dze-riahd xtahl ni nadz ni rdedy yâme, o rgultihp zrieñ meññ leeyâme por xtiidz Dioz, ba gahc rxiññladzy yâme. 18No zrieñ yâme zidguiahc beeiy ladzy ni biahb ru rlahñ guix-guiahtz; rieññ yâme xtiidz Dioz, 19per rguꞌ ihqy yâme ni nu lo guiedzylie-rieꞌ, no risquiee guîlṟicü leeyâme, no rzîbyladzy yâme zrieñ cos yahc; no gyre niwé rcau dziiñ ni ntzoo xtiidz Dioz leññ xguîlmbahñ yâme, no rahc yâme beeiy plant ni nehx rqueꞌ. 20No zrieñ yâme zidguiahc beeiy ladzy ni biahb lo yu-tziaawy; rieññ yâme xtiidz Dioz no rcaꞌ yâmeu. Zidguiahc yâme beeiy plant yahc ni cueꞌ treint gá ladzyu to lo xan, no zrieñu cueꞌ sesent, no zrieñu cueꞌ diby gayuu.
Nehx nu mbehty ni nungaꞌdzy no di gyxal lou
(Lc. 8:16-18)
21Zegahc ra Jesúz leeyâme:
―¿Nehxni ridno mu lampr lehdy cuiahzu leññ to caj o leññ to luꞌn la? Yac, ru guia we rbiahzu, lehdy cuw byniꞌ. 22Porni nehx nu mbehty ni nungaꞌdzy no di gyxal lou; no nehx ziaꞌn mbehty ni nungaꞌdzy, gyreu gyruu lo byniꞌ. 23Bâḻ racladzy laꞌd guieññ laꞌd bia ganin la, lâ yquee ihqy laꞌd dtiidzaꞌ.
24No ra me meññ-rieꞌ zegahc:
―Gax lâ gann no ni rieññ laꞌd. Mdid ni rquee gahc laꞌd zrieñ meññ, leegahcu we squee Dioz mdid laꞌd no zdee me laꞌd mazy. 25Porni dxu beeiy rieññ dtiidzaꞌ la, scaꞌ me dguîlriehñaꞌ mazy; no dxu di rieññ dtiidzaꞌ, xtâ doozy guîlriehñ ni rahp me zruuw leeme.
Ejempl xchieñ byni ni rniꞌzy
26Zegahc ra Jesúz:
―Beeiy ni rahc ru to mpyquie rchaꞌdz me byni lo to lyu lehdy gylahñu, ze we zidguiahc mod-rtzoo Dioz mdad. 27No rgahsy me guiaal no riahs me rsily, no byni galahñu no ganiꞌzyu, no nehx nann me xnahc rniꞌzyu. 28Porni yu gahc‑e riscaꞌy leeu; nier rboou guix, luxu ba gboo xdou, no ba yqueꞌ lou no rdzeꞌ lo xdou. 29No dze-ba guryahlu, ba zicchuꞌ yâme leeu, porni ba bydzihñ xicüsechu.
Ejempl xchieñ ladzy mostas ni modni rniꞌzy
(Mt. 13:31-32; Lc. 13:18-19)
30Zegahc ra Jesúz:
―¿Bia zidguiahc beeiy mod-rtzoo Dioz mdad, o bia ejempl beeiy nsahc nó leeu? 31Zidguiahcu beeiy to ladzy mostas ni rbib lo yu lehdy gylahñu, no leeu ma nwiñu de lo gyre zrieñ ladzy yahc ni nu lo guiedzylie. 32Per incs ba güdzibu, modni rgaꞌyu no rahcu ma nro que gyre zrieñ ni rbib lo lyu, no rboo xuz-roobu, xtâ no ma-rzîbydun yahc beeiy rzaa xguehsh maꞌ leññ ximbleu.
Mod-pquihñ Jesúz ejempl yahc
(Mt. 13:34-35)
33Mod-rieꞌ gayuno Jesúz xtiidz me meññ no xtahl ni rnii me ndaagü lo diidz beeiy nirieꞌ yahc, glohdy ru beeiy guieññ yâme leeu. 34No mbehty nehx ra Jesúz leeyâme bâḻ di ñahcu pur ndaagü lo diidz; per ru ba lehzyme no xmeññ me, were ba rboxñahz me gyreu.
Biscuiahz Jesúz to mbedun-ro
(Mt. 8:23-27; Lc. 8:22-25)
35Dze-caḻ gahc ru ba gayuꞌ guiaal ra Jesúz xmeññ me:
―Tedy nó stiby chehsh nisdo-Galilea.
36Gumm ba dxie me leññ barcü la, güyuꞌ yâme leññu zegahc no za yâme, psaꞌn yâme meññ-xtahl coo nisdoo. No zegahc za zrieñ barcü no leeme. 37Per tohzydzi guzlo byxuu to mbedun-ro lo nisdoo no lé ruhtz oḻ chehsh barcü no gadzeꞌ nzeꞌ leññu. 38No nash Jesúz traz leññ barcü, nishcahsy me ncuꞌg me to lmad. Were psiuꞌ yâme lo me, no ra yâme leeme:
―¡Muextr! ¿Nehx nacu mbehty la, gayaꞌb nó?
39Were biahs Jesúz, no ptzoo me mdad mbedun; no ra me nisdoo:
―¡Güyudzie! ¡Di ctzuṟidiꞌ!
No güliahz gahc mbedun, no gyreu güyuꞌ dzie. 40Byluxu ra Jesúz xmeññ me:
―¿Bia nacu zehdy rdzie laꞌd? ¿Nehx ziaꞌ rlíladzy laꞌd naa la?
41Per leeyâme, modni gadzie yâme no ganabdiidz saꞌ yâme, ra yâme:
―¿Dxuz‑e leeme mpyquie-rieꞌ? ¡Xnahc‑e xtâ mbedun no nisdoo rzoob xtiidz me!
Currently Selected:
MARCOS 4: zpg
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
