San Juan 21

Jesús se aparece a siete de sus discípulos

1Ngaa ni̱ gachin do̱j ni̱ gurugüiꞌ ru̱huaꞌ yún Jesús rian ni tsínj nicoꞌ sij ngaa nne ni sij duꞌua laguna xa̱chij gu̱ꞌnaj Tiberias. Ni̱ nan huin si guiꞌyaj Jesús ngaa gurugüiꞌ sij rian ni síꞌ: 2Ni̱ nne nu̱guanꞌan Simón Pedro nga̱ Tomás tsínj gu̱ꞌnaj Gemelo nej, Natanael tsínj ꞌna̱ꞌ xumanꞌ Caná huin xumanꞌ ngaj estado Galilea nej, nu̱ngüej daꞌníj Zebedeo nej, yahuij tsínj nicoꞌ Jesús nej. 3Ngaa ni̱:

―Ga̱nꞌanj gui̱daꞌā xucuaj. ―Daj gataj Pedro.

Ni̱:

―Hué daj ga̱nꞌanj ni únj nga̱ re̱ꞌ nej. ―Daj gataj ni tsínj nne nga̱ sij.

Hué dan ni̱ ganꞌanj ni tsínj daj. Ni̱ gahui ni sij ꞌngo̱ rio̱ achéj rian nnee. Sani̱ ni̱ a̱ ꞌngo̱ xucuaj nun guidaꞌa ni sij ya̱nꞌ daj.

4Ni̱ ngaa ruhua guixigui̱n, ni̱ niquinꞌ Jesús duꞌua laguna daj. Sani̱ nun na̱niꞌi ni tsínj nicoꞌ Jesús manꞌan síꞌ. 5Ngaa ni̱ nachínj snanꞌanj Jesús ni sij. Ni̱ gataj síꞌ:

―Hua si xa á re̱ꞌ níꞌ. ―Gataj Jesús.

―Nitaj mánj. ―Gataj ni sij.

6Ngaa ni̱ gataj Jesús:

―Du̱nij a ni é re̱ꞌ nnánj ne̱ꞌ chrej raꞌa sa̱ꞌ rio̱, ni̱ gui̱daꞌa á re̱ꞌ xuj aj. ―Daj gataj Jesús.

Ngaa ni̱ guiꞌyaj ni sij da̱j rúnꞌ gataj Jesús. Hué dan ni̱ nun gahuin nucuaj ni sij guiri ni sij nnánj chruhua nnee xiꞌí si ducu gara xuj chruhua nnánj. 7Ngaa ni̱ hua ꞌngo̱ tsínj nicoꞌ Jesús huin síꞌ tsínj ꞌi̱ ruhua niꞌi Jesús. Ni̱ gataj síꞌ gunun Pedro:

―Hué sij huin Señor. ―Daj gataj síꞌ.

Ni̱ ngaa gunun Pedro sisi̱ Señor huin, ni̱ ꞌngo̱ hora gananun sij si-ganꞌ sij. (Daj si hua guiri sij si-ganꞌ sij.) Ni̱ güéj sij manꞌan sij chruhua nnee.

8Ni̱ guisíj ango ni tsínj nicoꞌ Jesús duꞌua laguna daj nga̱ rio̱. Ni̱ anucuaj ni sij nnánj gara xucuaj daj. Daj si achin ango ciento metro gui̱sij ni sij duꞌua nnee daj. 9Ni̱ ngaa nanij ni sij chruhua rio̱, ni̱ guiniꞌi ni sij anun yanꞌa̱n. Ni̱ ta̱j ꞌngo̱ xucuaj rian yanꞌa̱n. Ni̱ ma̱n chrachrúnj nej. 10Ngaa ni̱ gataj Jesús gunun ni sij:

―Ni̱caj á re̱ꞌ do̱j xucuaj gui̱daꞌa ni é re̱ꞌ ga̱ꞌnaꞌ á re̱ꞌ. ―Daj gataj Jesús.

11Ngaa ni̱ gahui Simón Pedro. Ni̱ ganucuaj sij nnánj gara xucuaj xxi guisíj sij rian yoꞌój. Ni̱ nu̱n ꞌngo̱ ciento táj hui̱j xia xa̱ꞌnij xucuaj chruhua nnánj daj. Ni̱ nu̱nj si nico xuj nu̱n, sani̱ nun xiꞌnij mánj.

12Ngaa ni̱:

―Ga̱huaꞌ aninꞌ é re̱ꞌ ra̱ruhua aninꞌ é re̱ꞌ. ―Daj gataj Jesús.

Ni̱ a̱ ꞌngo̱ ni tsínj nicoꞌ Jesús nun gui̱sij ruhua na̱chinj snanꞌanj síꞌ u̱n tsínj huin síꞌ. Daj si hua niꞌi ni sij sisi̱ Señor huin síꞌ. 13Ngaa ni̱ gahuin ni̱chrunꞌ Jesús guidaꞌa sij chrachrúnj daj gaꞌuiꞌ sij rian ni síꞌ. Ni̱ hué daj guiꞌyaj sij nga̱ xucuaj nej.

14Ni̱ hué nan guisíj hua̱ꞌnij gurugüiꞌ Jesús rian ni tsínj nicoꞌ sij ngaa guisíj ganáꞌnij sij scanij ni níman.

Apacienta mis ovejas

15Ngaa guisíj ganahuij raruhua ni sij, ni̱ nachínj snanꞌanj Jesús Simón Pedro. Ni̱ gataj sij:

―Simón, daꞌníj Jonás. Ni̱ ꞌi̱ ruhuá re̱ꞌ niꞌyáj re̱ꞌ doj manꞌānj daj nga̱ ni tsínj nan ga̱ níꞌ. ―Daj gataj Jesús.

Ngaa ni̱:

―Xa̱ngaꞌ niꞌí re̱ꞌ sisi̱ ꞌi̱ ruhuāj niꞌyā manꞌán re̱ꞌ Señor. ―Daj gataj Pedro.

Ngaa ni̱:

―Ga̱ꞌuiꞌ re̱ꞌ si xa̱ ni dānj xachij ꞌni̱j. ―Gataj Jesús.

16Ngaa ni̱ nachínj snanꞌanj ru̱huaꞌ yún Jesús Pedro. Ni̱ gataj sij:

―Simón, daꞌníj Jonás. Ni̱ ꞌi̱ ruhuá re̱ꞌ niꞌyáj re̱ꞌ manꞌānj níꞌ. ―Daj gataj Jesús.

―Xa̱ngaꞌ niꞌí re̱ꞌ sisi̱ ꞌi̱ ruhuāj niꞌyā manꞌán re̱ꞌ Señor. ―Gataj Pedro.

Ngaa ni̱:

―Du̱gumi re̱ꞌ ni dānj xachij. ―Gataj Jesús.

17Ngaa ni̱ síj hua̱ꞌnij nachínj snanꞌanj Jesús Pedro. Ni̱ gataj sij:

―Simón, daꞌníj Jonás. Ni̱ ꞌi̱ ruhuá re̱ꞌ niꞌyáj re̱ꞌ manꞌānj níꞌ. ―Daj gataj Jesús.

Ngaa ni̱ ganani ruhua Pedro. Daj si síj hua̱ꞌnij nachínj snanꞌanj Jesús sij daj. Ngaa ni̱ gataj Pedro:

―Niꞌí re̱ꞌ daranꞌanj Señor. Ni̱ niꞌí re̱ꞌ sisi̱ ꞌi̱ ruhuāj niꞌyā manꞌán re̱ꞌ. ―Daj gataj Pedro.

Ngaa ni̱:

―Ga̱ꞌuiꞌ re̱ꞌ si xa ni dānj xachij. 18Xa̱ngaꞌ atā gu̱nun re̱ꞌ sisi̱ ngaa hua lí re̱ꞌ, ni̱ ninún re̱ꞌ si-gánꞌ re̱ꞌ ganꞌánj re̱ꞌ ni̱ a̱ garanꞌ ruhuá re̱ꞌ ganꞌánj re̱ꞌ. Sani̱ ngaa ga̱chij re̱ꞌ ni̱ jnucuáj re̱ꞌ nu̱ngüej raꞌá re̱ꞌ. Ni̱ na̱ꞌnij ango sij si-gánꞌ re̱ꞌ xá re̱ꞌ. Ni̱ ni̱caj sij manꞌán re̱ꞌ ga̱nꞌanj sij rian naꞌuej ruhuá re̱ꞌ ga̱nꞌanj re̱ꞌ. ―Daj gataj Jesús gunun Pedro.

19Ni̱ nga̱ ni nuguanꞌ daj ni̱ digyán Jesús rian Pedro da̱j gui̱ranꞌ síꞌ ga̱huiꞌ síꞌ. Ni̱ digyán sij da̱j ga̱ꞌmi sa̱ꞌ ni ngüi̱ xiꞌí Yanꞌanj ngaa gui̱niꞌi ni sij da̱j ga̱huiꞌ Pedro. Ngaa ni̱ gataj Jesús gunun Pedro:

―Gui̱nicóꞌ re̱ꞌ yūnj anj. ―Daj gataj Jesús.

El discípulo amado

20Ngaa ni̱ nanica̱j Pedro. Ni̱ guiniꞌi sij nicoꞌ ango tsínj nicoꞌ Jesús huin síꞌ tsínj ꞌi̱ ruhua niꞌyaj Jesús. Ni̱ hué tsínj daj huin tsínj nne xiꞌníj Jesús ngaa xa stiꞌni̱ ni sij ngaa riqui. Ni̱ tsínj daj huin tsínj nachínj snanꞌanj Jesús u̱n tsínj huin si na̱gaꞌuiꞌ Jesús rian ni tsínj nicaj sun. 21Ni̱ ngaa guiniꞌi Pedro tsínj nicoꞌ daj, ni̱ nachínj snanꞌanj sij Jesús. Ni̱ gataj sij:

―Señor, da̱j gui̱ranꞌ tsínj nan únj. ―Daj gataj Pedro.

22Ngaa ni̱ gataj Jesús:

―Sisi̱ huin ruhuāj sisi̱ gu̱na sij da na̱nicaj ru̱huaꞌ yūnj ga̱ꞌnāj, ni̱ u̱n sin gui̱ꞌyáj re̱ꞌ únj. Gui̱nicoꞌ manꞌán re̱ꞌ manꞌānj. ―Daj gataj Jesús gunun Pedro.

23Ngaa ni̱ gaxaꞌni̱ nuguanꞌ nan scanij ni tsínj xuman ruhua niꞌyaj Jesús. Ni̱ gani ruhua ni sij sisi̱ si̱ gahuiꞌ tsínj nicoꞌ Jesús daj. Sani̱ nun gataj Jesús sisi̱ si̱ gahuiꞌ tsínj da mánj. Maan si gataj sij nuguanꞌ nan: “Sisi̱ huin ruhuāj sisi̱ gu̱na sij da na̱nicaj ru̱huaꞌ yūnj, ni̱ u̱n sin gui̱ꞌyáj re̱ꞌ únj.” Hué daj gaꞌmi Jesús.

24Ni̱ huēj huin tsínj nicoꞌ Jesús daj. Ni̱ huēj huin tsínj natāj ni nuguanꞌ nan rian ni ngüi̱. Ni̱ arūnj nuguanꞌ nan rian yanj nej. Ni̱ niꞌi néꞌ sisi̱ xa̱ngaꞌ si-nu̱guanꞌānj. 25Ni̱ hua gaꞌi̱ ango ni rasu̱n guiꞌyaj Jesús nej. Ni̱ sisi̱ ga̱run ni sij go̱ꞌngo ni rasu̱n guiꞌyaj Jesús rian yanj, ngaa ni̱ si̱ gaꞌue gu̱nucuaj ni ngüi̱ na̱ra sa̱ꞌ ni sij ni libro sisi̱ nun garun ni sij mánj.

Currently Selected:

San Juan 21: trqNT

Highlight

Copy