Mattaayo 4

Seytaan Yeesso kajmeti uskeel kaluguꞌddo ikeena

(Marko 1:12-13, Luuka 4:1-13)

1Rubeyti Munyee saahka Yeesso woyte, ichoowka hidaad geesse, ꞌdee Seytaan kajmeti uskeel kaluguꞌddo ikeena. 2Inkoo us ibeen tomon affar maalintiche khabto af hiite ka, weyti ankaye. 3Seytaanki ꞌDookkaje layadeeh la iyimiyye, iiyeyye, “Chirri at Weeli Waakh tahe, dagahta leeyeede makaate a titaahe.”

4Yeesso la wihi us ilaabe, “Wihi chiiran, ‘Weeli enenyet golol kalday mee kanoolyahe, iꞌdaasenyi yeedi tuummane afi Waakh kasoobaho kanoolyahe.’ ”#4:4 Deewutoronomi 8:3.

5Seytaan toro Yeesso khaate, ilkerengeetti weene lagane Yeerusaleem ka minki Waakhe buure guutiis korche. 6Wihi us Yeesso iyidah, “Chirri at Weeli Waakh tahe, inta kanyaam. Iꞌdi tahe wihi chiiran,

“ ‘Waakh hertiis amure ibahcha,

iche la dahanohiche ka serey kiokkhissa,

uus ꞌdee luhtaah dagah guꞌddine.’ ”#4:6 Sabuur 91:11-12.

7Yeesso wihi us ilaabe, “Chiirnaanneti Waakh toro mehe tadeeh ya, ‘Kamuri Waakkhaahe kajme agelin.’ #4:7 Deewutoronomi 6:16.”

8Seytaan toro Yeesso khaate, haloo weyti deer korche, yaafohi harra tuumman ichoow kamurroonkicho ba tuse. 9Seytaan wihi us Yeesso iyidah, “Chirri at jilbo il kaguꞌdubte at ani iwahatte, waha tuumman a kisiicha.”

10Yeesso wihi us iyidah, “Seytaan, nyaam ikatab! A mehe wihi chiiran, ‘Kamuri Waakkhaahe waho toro la usu kalday on ihil.’#4:10 Deewutoronomi 6:13. ”

11Seytaan ꞌdeerka Yeesso katabe, herti Waakh la timiyye Yeesso gargaarte.

Yeesso hiliis boroofenhi Gaalilaaya ka sookhabta

(Marko 1:14-15, Luuka 4:14-15)

12Yeesso inkoo us saggi Yoohana jeela liigesse daage ka, boroofenhi Gaalilaaya inokhte. 13Ilkerengeetti Naasaret katabe, ilkerengeetti Kafarnaaꞌhume beyti Gaalilaaya aficheenye ili yaaf Seebulon ichoow Naaftalee irte furte. 14Waha la a yateehiine, ꞌdee wihi eti Waákh íyeyyeedo Isaaya layadeeh ka lacheeke, labuuhicha.

15ꞌDooꞌdi harrati yaaf Seebulon ichoow yaaf Naaftali toolla yaalle,

jiti beyti Gaalilaaya liikasohti, hawti ꞌdusso Yoordan bahayhiise yaal,

harrati Gaalilaaya ꞌdooꞌdi Waakh igaran yaalliine yaal.

16Atinhi mugꞌdihi uskeel goya fiddiiteen,

banayhi Waakhe buure a agarteen.

ꞌDooꞌdi ili oosinti omooteet fiddiye,

banay a isookoreen. #4:16 Isaaya 9:1-2.

17Uus maantaas Yeesso Yeedi Waakh ꞌdooꞌd icheeke, wihi us iyidah, “Uskeeliin kasoonokhda, a mehe dakhi goobi Waakh a soodowwaatee.”

Yeesso abattitiisti oraat soobahsata

(Marko 1:16-20, Luuka 5:1-11)

18Yeesso Beyti Buurenye Gaalilaaya afiche kasohtaayi, reeroo lammeenye isleedesse arge. Waha a Siimonhi Beetero layadeeh ichoow Andereeya. Iche la oroohti bahag lakakhabti bey goya isaate, a mehe hiliche a ki bahag lakhabti. 19Yeesso la wihi us iyidah, “Kaaleya isooraaha abattiteey ateeha, hiloo husube enenyet Waakh liikeeno a atin korcho.” 20Chirraas on oroohti kootte iche bahag kakhabatti ꞌdiisse Yeesso raahte.

21Toro orey isohte yeeletoo addane lammeenye isleedelatte too Sebedaayee arge. Iche la a Yaakoobo ichoow Yoohana. Lammache aabbahiche khabtaayi kooban goya fiddiita, oroohti bahag lakakhabti haagsatta. Yeesso yeele lammache wahe. 22Iche la chirraas on kooban ichoow aabbahiche ba katabte Yeesso raahte.

Yeesso Yeedi Waakh cheeka toro la ꞌdooꞌdi khakkhannan samaacha

23Yeesso boroofenhi Gaalilaaya tuumman goya tabe, minassichoki weysiite Yaꞌhuud ka Wori Haaggane dakhi Waakh miinsan cheeke, ꞌdooꞌdi khakkhannane khannaattetiis fil dakkhan tahe laka samaache. 24Woriis boroofenhi Siiriya tuumman kataaꞌhe, ꞌdooꞌd la ꞌdooꞌdi tuummane khakkhannane sugeerreti yeerare khabo ichoow ki bolokkhi uskul khabo ichoow ki ginnayyo dakhtaan ichoow ki sungaal khabo ichoow ki maꞌdee ikeene, ulla icho tuumman samaache. 25Ururreti buurenye boroofenhi Gaalilaaya ichoow Dekaabolis#4:25 Dekaabolis. Waha a Ilkerengeetohi Tomone. ichoow ilkerengeetti weene Yeerusaleem ichoow boroofenhi Yaꞌhuudiya ichoow hawti ꞌdusso Yoordan berihichee kayimiy Yeesso raahe.

Currently Selected:

Mattaayo 4: rel

Highlight

Copy