Luuka 3
3
Yoohanahi Enenyet Baattissiyo Yeedi Waakh ꞌdooꞌd icheeka
(Mattaayo 3:1-12, Marko 1:1-18, Yoohana 1:19-28)
1Waakh saahka ínam Sakkariiyaki Yoohana layadeeh hidaad ka wori us ꞌdooꞌd icheeko siiche. Maantaas la Kaaysarhi Tibeeriyas layadeehe guꞌh tomon ichoow chan karnati ili Rooma tuumman eheet. Boontiyo Bilaato la gaafanahi boroofenhi Yaꞌhuudiya eheete, ꞌHerood Antiiba la boroofenhi Gaalilaaya itoolla, walaaliiski Fiilif layadeeh la boroofenhi Itureeya ichoow Tirakoniiti itoolla, Laysaniyas la usú boroofenhi Abileen itoolla. 2Aanas ichoow Kayaafas la kuhaaniyyohi wewweene eheneet. 3Yoohana la hawti ꞌdusso Yoordan tuumman kaassohte. Ayti Waakhe us cheeke la a ki ꞌdooꞌd uskeelicho kasoonokhti, ulla baattissiyo, ꞌdee Waakh uskeelicho ikakuto. 4Saggi buuggi eti goorat Waákh íyeyyeedo Isaaya layadeeh liikachiiruu,
“Etoo hidaad ka a rirriira,
‘Kamur jit imujjummoocha,
jiti us leeyamiit ficcha.
5Inti ankhare tuumman buuhicha,
halal tuumman ichoow kuro iskeekkaacha,
jitassi khokkhollokkhan tuumman la ficcha,
jitassi sussuuje la mujjum haaggicha.
6Weeli enenyet tuumman la ꞌdee saggi Waakh ꞌdooꞌd iribo a arga!’ ”#3:6 Isaaya 40:3-5.
7ꞌDooꞌdi ittaawenye baattissiyoti labaattissiyo ꞌdoono la Yoohana iyimiyye, Yoohana la wihi us iyidah, “Dessi Toof! Ayyo atin tootooche ꞌdee holi Waakh dowwanoha ka keeno kafiriddaan? 8Taba gurnaanki saggi rumanka atin uskeel ikasoonokhatteen tuso dela. Taba la iisekkeysanna, ‘Aburaaham a aacchihaanya,’ eelanna. A mehe wihi an atin isoocheeko, Waakh a geeddi us dagahta urgiyicho us nyaakhut nyaakhut Aburaaham kayeelo! 9Waakh iꞌdi eti uroti geeyo hiiyyay khabaani goosso dahan kakhabuu kola ꞌdee a atin goocha. Geeyi gurnaanki haaggan idelin tuumman la a lagoocha ꞌdab goya lakalugꞌda.”
10Urur wihi us Yoohana worsate, “Mehe ꞌdeerka yeello?”
11Yoohana wihi us ilaabe, “Eti ubbaar lamma derdeer khabo, eti ikhabin koo a siicho, eti golol khabo la ki ikhabin a leegismo.”
12ꞌDooꞌdoo kooddi goocho baattissiyo yimiy laka wihi us Yoohana worsate “Eti ween nah la mehe yeello?”
13Yoohana la wihi us ilaabe, “Taba chilimme geeddi laꞌdoono on ꞌdooꞌd kagudda, wohoo rucchul laka akorsanna.” 14Iskartoo laka wihi iche Yoohana worsatte, “Nah la mehe yeello?”
Wihi us ilaabe, “Taba enenyet miig ka chilimme asarina ommos enenyet wihi beenaat akacheekina. Macchaara geeddi atin ꞌhessaan oolloꞌdina.”
15ꞌDooꞌd wohoo khummane suge. Uurassicho ka kol Yoohana Ki Lasubhe lasugo yahe kamasseen. 16Yoohana la wihi us icho dakkhan ilaabe “An toolla bicche atin kabaattissiya, iꞌdaasenyi etoo ani ikaween a yamiit. Anna falfihi kobtiissa an jalkhicho ma muꞌdan. Ulla Rubeyti Munyee ka ichoow ꞌdab ka a atin baattissiya. 17Birtiisti gurnaan lakahafaricho, dahane kakhaba. Inti gurnaan lakatumo hara, ꞌdargaayye koondi kichiba, iꞌdaasenyi urfo ꞌdabi jirtuu ijitin goya kichiba.” 18Yoohana la yeedassoo ittaawe ka enenyet uur miigooche Wori Haaggan icheeke.
19Iꞌdaasenyi maanti Yoohana ꞌHeroodhi gaafanee jeente ꞌHeroodiyati makhaabál walaaliisenye us diste ichoow suujoonki noole ꞌHerood ꞌhor yeele leejaakhuu, 20ꞌHerood suujoon kakhaye Yoohana jeela gesse.
Yeesso bicche ka ichoow Rubeyti Munyee ka labaattissiya
(Mattaayo 3:13-17, Marko 1:9-11)
21Geedda enenyet tuumman labaattissiyo, Yeesso laka yimiyye labaattissiye. Yeesso Waakh wahtaayi, sereye bakkaahte, 22Rubeyti Munyee la iꞌdi kutukuurrug u serey ka isooyagte. Hooyoo la serey kasooyeede wihi us yidah, “Ati a Weeleeyki an weyti ꞌdoono, weyti ikahamaadicho.”
Hiiy Yeesso
(Mattaayo 1:1-17)
23Maanti Yeesso hili us Yeedi Waakh cheeko sookhabte, Yeesso geeddi guꞌh tomon seyyahe khabe. ꞌDooꞌd tuumman la goorat kol Yeesso ínam Yuussuf yahe koogyahe.
Yuussuf la a hiiy ꞌHeeli.
24ꞌHeeli la a ínam Maaꞌdaꞌd,
Maaꞌdaꞌd la a ínam Laawi,
Laawi la a ínam Meelchi,
Meelchi a ínam Yaanay,
Yaanay la a ínam Yuussuf.
25Yuussuf la a ínam Mataatiya,
Mataatiya la a ínam Aamos,
Aamos la a ínam Naaꞌhum,
Naaꞌhum la a ínam Eesili,
Eesili la a ínam Naagay,
26Naagay la a ínam Maaꞌd,
Maaꞌd la a ínam Mataatiya,
Mataatiya la a inam Seemeyin,
Seemeyin la a ínam Yoosech,
Yoosech la a ínam Yooda,
27Yooda la a ínam Yoowanan,
Yoowanan la a ínam Reesa,
Reesa la a ínam Serubabeel,
Serubabeel la a ínam Cheeltiyeel,
Cheeltiyel la a ínam Neeri,
Neeri la a ínam Meelchi,
28Meelchi la a ínam Aadi,
Aadi la a ínam Koosam,
Koosam la a ínam Elmaadam,
Elmaadam la a ínam Eer,
Eer la a ínam Yoochuwa,
29Yoochuwa la a ínam Eliyeesar,
Eliyeesar la a ínam Yoorim,
Yoorim la a ínam Maaꞌdaꞌd,
Maaꞌdaꞌd la a ínam Laawi,
Laawi la a ínam Siimiyon,
30Siimiyon la a ínam Yuuda,
Yuuda la a ínam Yuussuf,
Yuussuf la a ínam Yoonam,
Yoonam la a ínam Eliyakiim,
Eliyakiim la a ínam Meleeya,
31Meleeya la a ínam Meena,
Meena la a ínam Mataaꞌda,
Mataaꞌda la a ínam Naaꞌdan,
Naaꞌdan la a ínam Dawuud,
32Dawuud la a ínam Yeesse,
Yeesse la a ínam Obeed,
Obeed la a ínam Boowas,
Boowas la a ínam Saalmon,
Saalmon la a ínam Nahachoon,
Nahachoon la a ínam Aminaadab,
33Aminaadab la a ínam Raam,
Raam la a ínam ꞌHeesiron,
ꞌHeesiron la a ínam Beeres,
Beeres la a ínam Yuuda.
34Yuuda la a ínam Yaakoobo,
Yaakoobo la a ínam Isakh,
Isakh la a ínam Aburaaham,
Aburaaham la a ínam Teerah,
Teerah la a ínam Naahor,
Naahor la a ínam Seerug,
35Seerug la a ínam Reewu,
Reewu la a ínam Beeleg,
Beeleg la a ínam Eeber,
Eeber la a ínam Cheelah,
Cheelah la a ínam Kaaynan,
36Kaaynan la a ínam Aarfakisad,
Aarfakisad la a ínam Cheem,
Cheem la a ínam Noowa,
Noowa la a ínam Lameeg,
Lameeg la a ínam Meꞌduseelah,
37Meꞌduseelah la a ínam Eenog,
Eenog la a ínam Yaared,
Yaared la a ínam Maꞌhalaleel,
Maꞌhalaleel la a ínam Kaaynan,
Kaaynan la a ínam Eenoch,
38Eenoch la a ínam Seeꞌd,
Seeꞌd la a ínam Aadam,
Aadam la ooyohiis Waakhe eheet.
Currently Selected:
Luuka 3: rel
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
