Luuka 15

Mammahti naffi adi baabe toro laꞌhele

(Mattaayo 18:12-14)

1Maantoo makhaaballeti kooddi goosso ichoow ꞌdooꞌdoo ꞌdooꞌdi uskeel khabo liiekkaacho a yimiyye wihi Yeesso ꞌdooꞌd abcho dagansate. 2Iꞌdaasenyi Farissaayo ichoow tagaammeti amurre ba nyunnyuweene wihi icho yidaaheen, “Eta ꞌdooꞌdi uskeel lehe soodowweesta toro leegolossata!”

3Yeesso la ꞌdeerka mammahta ibahche, 4“Eemba etiinkoo iiyti kudoowenye khaba, koo la baabaa. Etaas, iiyti tomon saagaal ichoow saagaale inti iche yaakhto kataba, ki kaldaye baabe yowta ichoowka ꞌhela menya? 5Chirri us ꞌhele ka weyti hamaada, naf adah sookorsata 6goob keena. Ulla ꞌdeerka ollokkiis ichoow aalassiis dakkhamba waha wihi us iyadeeh, ‘Kaaleya a isleehamaano, iꞌdi tahe naffeeyki iiyyaate kootte baabe a ꞌhele.’ 7Wihi an atin iadeeh, saggaas on u, goobi Waakh ka hamaadi buurenye jira jeenteti etoo kaldaye uskeeliis kasoonokhtuu. Hamaadi eta khabo hamaadi et tomon saagaal ichoow et saagaal fiffissane uskeelicho ikasoonokhan weyti kussanyahe.

Hawweesi chilinki baabe

8“Ommolla eemba makhaabassoo chilim tomon khabto, koo kalday a kabaabe. Makhaabassa taahiche a bolkhissa min harta chilinkiche mujjum yowatta ichoowka ꞌhessa menya? 9Chirri iche ꞌhesse la deyyehoti aalassichee ichoow ti ollokkichee tuumman wahta wihi iche itadeeh, ‘Kaaleya a isleehamaano, iꞌdi tahe an chilinkeeyki baabe a ꞌhele!’ 10Wihi an atin icheeko, saggaase herti Waakh ihamaadda chirri etoo kalday uskeeliis kasoonokhte.”

Inanki baabe toro goob isoonokhte

11Yeesso yeed orey iwoye, “Makhaabaloo yeeletoo lammee khabo a jire. 12Inanki nugul kahe wihi us aabbahiis iyidah, ‘Aabba, dahalheeyki ani imiinsan isii!’ Makhaabal ꞌdeerka hoola yeele lammache gise.

13“Inkoo geeddoo labarye ka, inanki nugul wihi lasiiche dakkhan ororiche, iloo fogaat irte, ilaas ka hoolahiis kagirꞌdaame. 14Wihi goorat us khabe tuumman massiche. Saahka abaartoo uskul ilaas gesse raarahe ititah. 15Ulla irte hili etoo ilaas gele, et la gosas ierge, ꞌdee golcha a yaakhicho. 16Ulla gololi golcha taham ohom ꞌdoone. Iꞌdaasenyi et wihi us yaham siicho mele.

17“Maanti matah soonokhte, masse wihi us uuriis goyaka yidah, ‘ꞌDooꞌdi aabbaheey kireeste gololi yaakho us yahame ichoowka us soowaacho a khaba, ani la kalla inta ka raarahe ikhaatta! 18A kaha aabbaheey inokhda wihi an iadeeh, “Aabba an Waakh ortiis ka ichoow ortaah ka uskeel a yeele. 19Kola ma imalin chirri weelaahha liiyadeeh, iꞌdi etoo at kireysatte ikayeelo.” ’ 20ꞌDeerka kahe anki aabbahiis jiro fool siiche.

“Iꞌdaasenyi geeddi us goobicho isooeleelin on fogaka aabbahiis usu arge, uur isoonugleeste inyaame sorboobte dongate.

21“Inam la wihi us yidah, ‘Aabba an Waakh ortiis ka ichoow ortaah ka uskeel a yeele. Ma imalin chirri kola weelaahha liiyadeeh!’#15:21 Chiirnaanne gaasoo mehe kakhayta ya, “Iꞌdi etoo at kireysatte ikayeelo.”

22“Iꞌdaasenyi aabbahiis ilbooyyetiis wahe wihi us iyidah, ‘Nyaama dafarti weyti haaggan sookhaata inam gessa. Lahaagti far sookhaata far gessa. Kobo laka sookhaata gessa. 23ꞌDee irda maari weyti ruusan sookhaata khala sukuuku a gello, a hamaano! 24Iꞌdi tahe inankeeyka a iꞌdoo goorat us yumuyye toolla la a sookahe, goorat a baabe toollaka a soonokhte!’ Sukuuku ꞌdeerka labahche.

25“Geeddaas dakkhan la inanki teyyane gose khuta. Chirri us goob yimiyye us min isoodowwaate ka, kowdoti ꞌdooꞌdi girꞌdaamo daage. 26Ilbooyoo wahe wihi us worsate, ‘Mehe jira?’ 27Wihi us ilaabe, ‘Walaalaahki goorat baabe iche soonokhte, aabbahaah la heeri ruusan ikhale. Iꞌdi tahe usuhi nebey khabo toro la haaggane yimiy.’

28“Inanki ween hollowe min gelin ꞌdiiꞌde. Aabbahiis ꞌdeerka bahe hawwaaste, mine soogessaa. 29Iꞌdaasenyi wihi us aabbahiis ilaabe, ‘Aabba an guꞌhassi ittaawenye iꞌdi bowꞌdataah u hil kihaaggiche. Anna injire amurretaah ma kutin. At mehe injire isiisse? Weeli makhaleete an aalasseey leeꞌdubdi laka ma siin! 30Iꞌdaasenyi inankaahka hoolahaah tuumman malaayayyo on kamassiche. Maanti us soonokhte ka, at la kahte heeri weyti ruusan ikhasse!’

31“ Aabbahiis la wihi us iyidah, ‘Inankaaw at orran dakkhan a ileejirta, wihi an khabo tuumman la a wahaahha. 32Iꞌdaasenyi a imasse chiꞌinno sukuuku bihinno hamaano, a mehe walaalaahka goorat a iꞌdi eti yumuyye toolla la a jira, goorat a baabe toolla la a soonokhte.’ ”

Currently Selected:

Luuka 15: rel

Highlight

Copy