Luuka 1
1
Yeed ortiissa
1ꞌDeyoofiloow, ꞌdooꞌdi buure a tirriinsate, wihi goyteen ka yitah chiire. 2Wihi icho chiireen a wihi ꞌdooꞌdi uuꞌ maanti kolooraate waha yitaaheen arge nah isoocheeke. Icho la hili Waakhe icho haaggicheen, a ki wori Waakh ꞌdooꞌd liicheeko. 3Toollaka ani rubeyteey walah tuumman uuꞌ maanti waha yitaaheen mujjum goya a yeye, ichoowka mali an waha saggi icho iyitaaheen ikaasoochiiro gooche. 4An iꞌda a yeele ꞌdee runti wihi liiabche ubta.
Herti Waakh delmaat Yoohanahi Enenyet Baattissiyo cheekta
5Maanti ꞌHerood karnati ili Yaꞌhuudiya eheet, etoo kuhaaneenye Sakkariiya layadeeh a jire. Sakkariiya la a ki rabittoo kuhaaniyyoote Abiija layadeeh. Arantiis la Eliissabeet iche layadeehe, iche laka a ti gooboo ullaka kuhaaneenye Haruun layadeeh. 6Lammacho ba la ꞌdooꞌdi Waakh ortiis ka fiffissane eheete, raahnaanki amurreti Kamur ichoow wihi Kamur enenyet kaꞌdoono laraaho ka wohoo rucchul laka ma lakacheekan. 7Iꞌdaasenyi nyaakhut icho khabeen mele, iꞌdi tahe Eliissabeet a mahane, lammacho la toro a araarroween.
8Maantoo Sakkariiya hiliiski kuhaani iche minki Waakhe buure ka haaggicha, a mehe koli rabitti kuhaaniyyohichooda. 9Kura guꞌddeene, hugunki kuhaaniyyoot ka Sakkariiya lasoobahche, eti minki Waakhe buure gelo Kamur uyuugge igubo yitah. 10Chirri sahaꞌddi uyuugge lagubo titah ka, ꞌdooꞌdi Waakh wahti tuumman khar ka kulme Waakhe wahtaa.
11Hertoo Kamur Sakkariiya isoobahte, gaꞌdaari uyuugge lakagubo miigtiis tolossatte. 12Sakkariiya uus arge ka nahe, weyti roorro gesse. 13Iꞌdaasenyi herta Waakh wihi iche itidah, “Sakkariiya roorro akhabin. Waakh weysihaah a daage, makhaabassaah la inankoo dessa. Maanti us desse la magahiis Yoohana daha. 14Maanti us desse la, ati weyti hamaadda ꞌdooꞌdi buure la delmaattiis ka a kileehamaada! 15Iꞌdi tahe us Waakh ortiis ka eti weene yateeh. Ulla uus farsotoo rucchule sabiib laka af kaꞌdaarin. Uꞌ dessi la Rubeyti Munyee usu a buuhissa. 16Ulla ꞌdooꞌdi buurenye Issiraayele anki Kamuri Waakkhichee isoolaaba. 17Ulla miig ichoow rubeyti eti goorat Waákh íyeyyeedo Eliiya layadeeh khabe iche khaba, Kamúr ortiis sohta. Ulla ooyenye ichoow nyaakhutichooda isineybicha, ꞌdooꞌdi yeed idaagin kharati ꞌdooꞌdi fiffissan ilaaba, ꞌdee ꞌdooꞌd emeetti Kamur itannabicha.”
18Sakkariiya wihi us herti Waakh worsate, “Ani ichoow makhaabasseey ba a araarrowne, mehe tusa ꞌdee waha runticho igardi?”
19Herti Waakh wihi iche ilaabte, “Ani a Gaabiriyel. An Waakh ortiissa toolla, Waakkhane isooergate ꞌdee wora haaggane an kikeene kicheeka. 20Jeenteti at yeedeey irummeysan u, at a gammadissa toro yeyyeed ma tabuuꞌde ichoowka maanti mujjumenye yeedeey larummaacho.”
21Geeddaaas tuumman la ꞌdooꞌd Sakkariiya khar ka a suga. Icho la Sakkariiyahi geeddi deer minki Waakhe buure goya kamalmale kamasseen. 22Chirri us minki Waakhe buure goya kasoobaho, icho leeyyeedin ma yabuuꞌd. ꞌDooꞌd saggi us minki Waakhe buure goyaka fooltabcho iarge kase. A mehe enenyet dahano kaleeyyeede, iꞌdaasenyi yeedin ma yabuuꞌd.
23Chirri koliiski hili minki Waakh massate ka goobiis irte. 24Saahka makhaabassiisti Eliissabeet layadeeh uurowte, hay chan la min goya ma kabihin. 25Iche la wihi iche tidah, “Kamure ani waha iyeele. Ibeenneta a igargaare, heebti an baꞌh goya kakhabo a ikabahche.”
Herti Waakh delmaat Yeesso cheekta
26Inkoo Eliissabeet uuriche hay lih eleele ka, Waakh hertoo Waakhe Gaabiriyel layadeeh ilkerengeettoo Naasaret layadeehe boroofenhi Gaalilaaya kajirto iergate. 27Herta Waakh la farniinki weeloo Maariya layadeehe etoo Yuussuf layadeeh alkume iche khabta. Yuussuf la hiiy karnati Dawuud layadeehe kayimiy. 28Herta Waakh Maariya isoobahte wihi iche itidah, “Nebeytaah ma furatti, atihi Kamur weyti kijilhaate. Kamur a kileejira!”
29Yeedassa herta Waakh elatti weyti Maariya malalicheene, wihi liidowo aficho waayte. 30Iꞌdaasenyi herti Waakh wihi iche itidah, “Maariya roorro akhabin iꞌdi tahe Waakh a kijilhaatee. 31At a uurowta, inankoo dessa, magahi at ibihisso la a Yeesso. 32Ulla eti weene yateehe, toro la Weeli Waakkhi Weyti Ween iche layadeeh. Kamuri Waakhe komborti antoote too aacchihiiski Dawuud layadeehe siicha. 33Ulla nyaakhut nyaakhut Yaakoobo jirtuu tuummamba dakhta, dakhiis la yombuu ma massati!”
34Maariya la wihi iche herti Waakh worsatte, “An mejel ma gardi gone, waha saggoh iyateehiin?”
35Herti Waakh wihi iche ilaabte, “Rubeyti Munyee a kisooyagta, miigti Waakkhi Weyti Ween iꞌdi oosimeet u koogoogta. ꞌDeerka weela munyeenye dessi Weeli Waakhe layadeeh. 36Eliissabeetti uuraahe laka araarri goyaka weel a ꞌhessa. Ichehi goorat a mahan liidah toolla uuri hay lihe khabta. 37Iꞌdi tahe wohoo rucchule Waakh kamiigenye us iubaaꞌdan ma jiraan.”
38Maariya la wihi iche ilaabte, “An a falfati Kamure, wihi at tidah a yitaaheen giꞌde.” Herti Waakh Maariya katabte.
Maariya Eliissabeet isulhaassa
39Saahka Maariya tannabatte dowwa ilkerengeettoo ili Yuuda kuro sarche kajirto iratte. 40Min Sakkariiya gesse Eliissabeet bariitisse. 41Chirri iche bariito Maariya daagte ka, weeli Eliissabeet uur kakhabto yuutte, Rubeyti Munyee Eliissabeet buuhisse. 42Eliissabeet riirte wihi iche tidah, “At rumanka deyyeho tuumman goycheka a lakimaale, toro la weeli at soodesso laka a liimaale! 43An a ayyo waha liiyeela ichoowka abar Kamureey laka ani itamiit? 44Uus an bariitotaah daage, weeli uureey goya kajiro laka weyti hamaade, birgiꞌde. 45Waakh ba atihi wihi Kamur kiyidahye sooyateeh rummeysatte kimaala!”
Maariya Waakh saaꞌdda
46Maariya la wihi iche tidah,
“An weyti Kamur saaꞌda
47Rubeyteey la weyti Waakkheeyki ꞌDoorribee kahamaadda.
48Iꞌdi tahe anihi falfatiisenye nugul a ikasooꞌhele!
Uuꞌ maalinka kholoyyo tuumman ani eti Waakh imaale iyadeehiin.
49Iꞌdi tahe Waakkhi Miig Leh wihi buurenye iyeele,
magahiis la a munya.
50Kamur la kholoyyohi soomaro tuumman ka,
ꞌdooꞌdi usu karooro uure inugleesta.
51Dahantiisti miig leh ka wihi noole yeele.
ꞌDooꞌdi uuricho goyaka eylajo seleye fide.
52Kamur karnatohi wewween komborohichoki antoot a kasookhube,
iꞌdaasenyi ꞌdooꞌdi isnuglaacho a okkhiche.
53ꞌDooꞌdi raarahte wihi hahhaaggan ka dargiche,
iꞌdaasenyi kamurre dahano marah rihe.
54Waakh Falfatiisti yaafohi Issiraayel a gargaare,
uur inugleeste.
55Aburaaham ichoow nyaakhut nyaakhutiis
iꞌdi us aacchinyeteen iyidah u ma kadabine, uur isoonugleeste.”
56Maariya geeddi hay seyyah Eliissabeet leefiddiite, saahka goob inokhatte.
Eliissabeet inankoo dessa
57Maanti Eliissabeet hayohiche massateen ka, inankoo desse. 58Ollokkiche ichoow ꞌdooꞌdi uurichee saggi Kamur weyti uur ikasoonugleeste daage, leehamaade.
59Inkoo weel teebatoo barye ka, ꞌdooꞌd khandihi weel yimiy. Icho la goorat magah aabbahiiski Sakkariiya layadeehe ibihin ꞌdoonaane, 60iꞌdaasenyi abartiis, “Mele, magahiis Yoohana layadeeh” tidah.
61Icho la wihi icho Eliissabeet iyidaaheen, “Etoo kaldaye kiinenye magahaas khabo mele!”
62ꞌDeerka aabbahiis dahano ka leeyyeedeene, magahi us weel ibahcho worsateen. 63Sakkariiya la reenkoo lakachiirti daahe, wihi us chiire, “Magahiis a Yoohana.” ꞌDooꞌd tuumman la girmeeste! 64Chirraas on Sakkariiya toro afi goorat us waaye bahche, yeyyeede Waakh saaꞌde. 65ꞌDooꞌdi intaas kijiro tuumman roorro gesse, ili Yaꞌhuudiya kuro khabo tuumman ka, enenyet wahanyeyyohane kaayyeeda.
66Eti tuummane yeeda daage la mal gele, wihi islaworsate, “Weela ꞌdeerka berri mehe yateeh?” Wihi tahe, saggi miigti Kamur weela ileejirto iche laarga.
Sakkariiya Waakh saaꞌda
67Sakkariiyahi aabba Yoohanee Rubeyti Munyee buuhisse wori Waakh kaayyeede wihi us yidah,
68“Kamuri Waakkhi Issiraayele a lasaaꞌdo!
Iꞌdi tahe us ꞌdooꞌdiis a soofure.
69Kamur ꞌDoorribehi miig khabo a inno siiche,
ulla hiiy falfatiisti Dawuud layadeeh kayimiy.
70Iꞌdi goorat us ꞌdooꞌdiiski munyayyeenye Waákh íyeyyeedo ka cheekuu,
71us chiiyteen a inno kajeycha,
ꞌdooꞌdi inno ꞌdiiꞌdo tuumman la ma inno kamiigowo.
72Toro Kamur ayyintiisti munyeenye us gooche,
us aacchinyeteen uur isoonugleesti ma kadabo.
73Ayyintaas la a ayyinti Kamur aacchiheenki Aburaaham layadeeh igooche,
74saggi us chiiyteen inno ikaribo icheeke.
Toro la a inno gargaara roorro laan hiliis haagginna,
75ꞌdee geeddi inno jirro tuumman ꞌdooꞌdi munyeenye toro fiffissan ortiis ka nateeh.
76Inankaaw, at la eti Waákkhi Weyti Ween íyeyyeedo lakiyadeeh.
At la Kamur ortiissa sohatta jit iharta,
77uskeelichoki liikakuto ka,
ꞌdooꞌdiis saggi Waakh iribo abissa.
78A mehe, Waakkheen uure nugulyahe toro a haagganyahe.
Kamureen ꞌdooꞌdiis a riba, banayhiis la iꞌdi orrahti baryo sookortuu inno siicha,
79ꞌdee ꞌdooꞌdi mugꞌdihi omooteet goya kajiro serey ka banay sootusa,
inno yaakhicha, jiti nebeyeet inno gata.”
80Yoohana la weynaate, Rubeyti Munyee ka miigowe. Ulla hidaad on fiddiye ichoowka ibeenki us ꞌdooꞌdi Issiraayel isoobaho yitah.
Currently Selected:
Luuka 1: rel
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
