Eḍighiom ạar 15

Ezue bhꞌaJerusạlẹm

1Ẹde arōoy mẹeḍua taJudia etu tẠntiok nẹtughumiom maburumōr obho maa, “Urue ḍio ọbhel enyina otẹnẹmi tughuneen molo mooḍunogh zenyina kẹzo bho araalōgh obho taMozis ịgba bho.” 2Keḍio ạPol nꞌạBanabas ịghanan zeedi tụtuu mi tabaabha bho, molo uru ụḍeghe molo ạPol nꞌạBanabas nꞌẹde ibhꞌẠntiok mọghi taJerusạlẹm ọmiinan iteledōm nꞌarukenya bho mebum eedi iibha bho.

3Ạsosi obho irōm zeedi mọghi. Suo eedi nẹki bọ bho eedi ịḅol taFonisia nꞌaSameria isulogh ịgba mẹzo arōoy ịnon aruubhugh nekiraan etu tẸnaan. Iiḅi ịimoghon bhibha ẹḅaaleni miloghi aburumōr obho. 4Amen eedi iru isi taJerusạlẹm, pạsosi obho nꞌiteledōm obho, nꞌarukenya bho ibhin zeedi ịloghom, tobo bho eedi ịgba ịnogho moomo ibha Ẹnaan aḍighian zeedi obho. 5Pẹde obo bho imōruōm obho, obho iḍigh ạni mogbo arōoy aFarisi iḅetunu ịkpete kua, “Toḍunogh ni zeedi, ọkpete ọnogho zeedi mookō araalōgh obho taMozis.”

6Keḍio iteledōm obho nꞌarukenya bho iḍigh mezue mọḍeghe iibha bho otẹnẹ. 7Amen eedi nẹeghanan ninii ịbher keḍio aPita aḅetunu ạkpete kua, “Aburumōr, enyina neelōghōm mobho tamen olo neetẹn ibia, Ẹnaan ạseghe ạami mi togbo enyina mọghi ọgba ooḅi adōm obho ọnogho obo bho ịnon aruubhugh obho, molo eedi ẹmoghon ạni emōruōm. 8Keḍio Ẹnaan obho alōghōm bọ miloghi arōoy obho aḍighi aḍeeriom mobho odi nạaseghe ạni zeedi, tibha odi ạnogho ạni zeedi mẸmugh Iigbia bho, kẹzo bho odi ạnogho zezira bho. 9Akẹrekere olo odi aḍighi teedi nꞌezira olo, keḍio aḍighi ạḅaaleni miloghi obhꞌeedi tebum obho eedi imōruōm obho. 10Kebum eeghe kenyina netu mọdegh Ẹnaan mọnogho ibꞌadōol mobo bho imōruōm obho, ilo ạburude ezira nꞌezira nạ ni ẹko utue ḍio morōol. 11Ekua ḍio! Ezira umōruōm ni keḍio ụbhel zezira tebum inwo bho tạJizos Obạmọogh obho, pẹzo nạ ụbhel zeedi.”

12Oomo arōoy obho ịbhamagh ni mịnu eedi men eedi ịmoghon mạBanabas nꞌạPol nẹgba mọkpo ibꞌaruugu ilo Ẹnaan aḍighi teedi mi taruubhugh obho itu ḍio milꞌIzirẹl obho. 13Amen eedi ịkpete ịḅele paJems aḅetunu ạkpete kua, “Aburumōr, ịmoghon ạami. 14ẠSaimon eede siibha aḅetunu ạgba mẹzo Ẹnaan abhira aḍighi aḍeeriom mobho odi nạaseghe ạni marōoy ịnon aruubhugh obho tibha odi ạseghe ạni mi teedi arōoy ilo neeru milꞌodi be. 15Ọnuekpete arizil obho emōruōm magey miibha bho. Kẹzo bho ẹegia bho ạkpete bho:

16‘Iibha neetẹn pạami omula, pẹzo Obạmọogh obho ạkpete,

keḍio ạami kaḅẹtōn motu obho taDevid obho naameel obho.

Ạami tamulumi ni mọkpo bho iḅẹebh obho,

keḍio ạami tamina aḅōgh ạmarami,

17molo oomo arōoy ipedi obho tẹva mObạmọogh obho,

oomo aruubhugh ipedi obho ạami naabheleghi moru ilꞌạmi.

18Pẹzo Ẹnaan ạkpete, obo bho aḍighi miibha bho amutiom kọkanya amen.’

19“Idi tologhi ạmi molo ezira kụuḅaghami ḍio zeedi obo bho neemōruōm obho. 20Kpẹlen nꞌipa, ezira ọge ọghiom zeedi milo eedi kẹḅele mole ariḍian ilo nọotunom mạar ụnogho meru, ẹḅele mịkarabh eḍighiom ạar, ẹḅele mọḅa ẹnam olo ụbhur orum obho ughigh, bolobolo amughom ịḅaal. 21Ilōghōm mobho nooghōl umina ughōl maraalōgh obho taMozis mi tarutu iikpulughu obho moomo aḍuma obhooghia bho, nꞌobho nọogba mọnuekpete odi umina ụgba mi toomo ạraama.”

Ọbhereer obho ụge ụghiom obo bho neemōruōm obho itu ḍio milꞌaJu obho

22Keḍio iteledōm obho nꞌarukenya bho, nꞌoomo arōoy ạsosi obho, iḍumom mọson arōoy mi togbo eedi ọseghe morōm eedi kẹtuonuman mạPol nꞌạBanabas kẹghi tẠntiok. Keḍio eedi iru ịseghe maJudas, obho ughōl nạ Bạsabas obho nꞌạSailas, ịzal arōoy ilo aburumōr obho nekiilaan magey. 23Keḍio eedi ịge mọbhereer ịfirima. Ọbhereer obho ạkpete kua,

“Ezōor, iteledōm obho nꞌarukenya bho, aburumōr obhꞌenyina nepuruan enyina magey, oomo enyina aburumōr arōoy ibha itu ḍio milꞌaJu obho, ibha netughogh tẠntiok nꞌaSiria, nꞌaSilisia obho.

24“Ezōor nọomoghon mobho ẹde arōoy ezōor neemute iru ịnogho zenyina mịiḅaghami mi tọnuekpete obhꞌeedi. Eedi ibhin io mịikpo tezōor moru oḍighi ibha eedi iḍighi obho. 25Tiibha bho bẹleni, keḍio ezōor uḍigh mezue ụmoghonyan mọson itelema oruom enyina. Eedi tẹtuonuman mibꞌiiḅi aburumōr ezōor ạPol nꞌạBanabas, 26obo bho neebhiẹmi maghuḍum eedi mi toḍighi tạJizos Kraist Obạmọogh ezira bho. 27Ezōor nọoson maJudas nꞌạSailas notuom enyina milo eedi kẹgba mibha ezōor ụge nạ bho. 28Ẹmugh Iigbia bho nꞌezōor nọomoghonyan mọḅele ooti enyina mobꞌadōol, tughuneen araalōgh bhibha bho ịgbaan ni obho. 29Íle ghạ meḍian ilo ụtunom mạar ụnogho mEru obho; ị́ḅa ghạ mẹnam olo ạbhuom nꞌịḅaal bolobolo ụbhur orum obho ughigh; metughuneen lōor enyina mi tịkarabh eḍighiom ạar. Enyina eḍighi miibha bho, pịnon ọkpo ilo mu. Ịmaar mẹrol!”

30Peedi irōm itelema bho ịghi tẠntiok, keḍio eedi iru iikōbhōghi moomo obo bho imōruōm obho iru ịnogho mọbhereer obho. 31Amen arōoy obho iru ighōl mọbhereer obho, pologhi eedi ạḅaal mi taliiki obho. 32AJudas nꞌạSailas arizil tẸnaan ẹkpete nạ mịkanya ọkpo ẹnogho maburumōr obho molo ọghuemi iloghi obhꞌeedi ẹnogho nạ zeedi aliiki. 33Eedi ịrolan zeedi mịbam amen, paburumōr obho ịḅele zeedi momula oghẹel nꞌekima mi tobo bho irōm zeedi obho. 34ẠSailas ạatua momina ọrolan eedi.

35ẠPol nꞌạBanabas ịrol mịbam amen mi tẠntiok. Eedi nꞌịnon arōoy itul mọnu ẹrol ẹtughumiom rōoy, ẹgba nạ mọnuekpete tObạmạogh obho.

ẠPol nꞌạBanabas ịgbaranuan

36Ịbam amen itẹn pạPol ạkpete kua ạnogho mạBanabas, “Tue omina omula ọghi ọmiinan aburumōr ibhꞌạraama bho ezira ụgba mọnuekpete tObạmọogh obho molo omina ọmiin mẹzo eedi idi.” 37PạBanabas aghōl mọbhamam ạJon Mạk, 38keḍio ạPol omōrō ḍio ebum obho odi amula tạPamfilia ạḅele zeedi ọtol io asi tikunughi erele obhꞌeedi. 39Peedi ịteeny mọoghuanaan ẹmoghonyan olo aḍighi molo eedi ịbaana raabōom. PạBanabas ạseghe mạMak ạzoghi ạghi tạSaipros. 40Keḍio ạPol ạseghe mạSailas aḅetunu. Aburumōr obho nạ iikpulughu ịnogho zodi molo inwo tObạmọogh obho kẹrolan zeedi. 41Keḍio odi ạḅol atẹn taSiria nꞌaSilisia ạnogho liiki mạrasosi obho.

Currently Selected:

Eḍighiom ạar 15: OḌU

Highlight

Copy