Zakaria 13
13
1Yawɛ Tabohiatsɛ ɔ ya nɔ nɛ e de ke, “Ke jamɛ a be ɔ su ɔ, a ma bli nyu vu ko nya, nɛ a maa ngɔ e mi nyu ɔ kɛ tsu David nina, kɛ Yerusalem bi ɔmɛ a he kɛ jé a he yayami ɔ, kɛ a he mu ɔ. 2Jamɛ a be ɔ, ma ha amaga amɛ a biɛ maa laa pɛsɛpɛsɛ, nɛ nɔ ko nɔ ko be mɛ kaie hu ngɛ zugba a nɔ. Ma je gbali ɔmɛ, kɛ mumi yayami ɔmɛ kɛ je zugba a nɔ. 3Enɛ ɔ se, ke nɔ ko maa te si ke gbalɔ ji lɛ ɔ, e nyɛ kɛ e tsɛ nɛ fɔ lɛ ma de lɛ ke, ‘Ja a gbe mo; ejakaa o ngɔ Mawu biɛ kɛ ngɛ lakpa yee.’ Ke e ya nɔ ngɛ gbae ɔ, e nyɛ kɛ e tsɛ nɛ fɔ lɛ ɔ maa fia lɛ nɔ nɛ a gbe. 4Jamɛ a be ɔ, e maa pee gbali tsuo zo kaa nina nɛ maa je kpo ha mɛ ɔ, a ma de, loo kaa a ma tsɛ mɛ gbali tete. A be tade kunyaa woe nɛ a kɛ sisi nihi hu. 5Se mohu ɔ, nɔ́ nɛ gbalɔ ma de ji, ‘Imi lɛɛ, pi gbalɔ ji mi; ngmɔ i huɔ. Kɛ je ye jokuɛwi a si ɔ, zugba pɛ ji ye weto ní.’ 6Ke nɔ ko ma bi lɛ ke, ‘Mɛni pa dokuhi ngɛ o gugue mi nɛ ɔ?’ e ma he nɔ ke, ‘Ye huɛ ko we mi nɛ i ya ná kɛ je.’ ”
A fa ke a gbe Mawu to hyɛlɔ ɔ
7 #
Mat 26.31; Mar 14.27 Yawɛ Tabohiatsɛ ɔ ke, “Klaate, tee si ngɔ wo ye huɛ to hyɛlɔ nɛ ngɛ ní tsue ha mi ɔ! Moo fia lɛ nɔ konɛ to ɔmɛ nɛ a gbɛ fĩa. I kɛ tsɔwitsɔwi nɛ ɔmɛ maa to ní. 8A maa gbe zugba a tsuo nɔ bi mi dlami etɛ mi enyɔ nɛ a gbo, nɛ e maa piɛ mi dlami etɛ mi kake. 9Ma ngɔ mi dlami etɛ mi kake nɛ ɔ kɛ wo la mi, nɛ ma tsu a he kaa bɔ nɛ a tsuɔ sika hiɔ he ɔ. Ma tsu a he kaa bɔ nɛ a tsuɔ sika tsu he. Kɛkɛ ɔ, a maa fa kue ma tsɛ mi, nɛ ma he nɔ. Ma de mɛ ke, ‘Ye ma ji nyɛ,’ nɛ a ma de ke, ‘Yawɛ ji wa Mawu.’ ”
Currently Selected:
Zakaria 13: Dangme
Highlight
Share
Copy
Want to have your highlights saved across all your devices? Sign up or sign in
Bible in Dangme © Bible Society of Ghana, 2018.
