Marko 9

1E de mɛ hulɔ ke, “Niinɛ i ngɛ nyɛ dee ke ni komɛ ngɛ nihi nɛ daa si ngɛ hiɛmɛ nɛ ɔ a kpɛti nɛ a be gboe kɛ yaa su be nɛ a maa na kaa Mawu matsɛ yemi ɔ ba kɛ he wami.”

Yesu nɔmlɔ tso su tsake

(Mateo 17.1-13; Luka 9.28-36)

2 # Pet II, 1.17-18 Ligbi ekpa se ɔ, Yesu ngɔ Petro, Yakobo, kɛ Yohane; nɛ e kɛ mɛ ya he ko banee ngɛ yo gagaa ko nɔ. A ngɛ lɛ hyɛe nɔuu nɛ e nɔmlɔ tso su tsake. 3E tade ɔmɛ kpɛ nɛ a hiɛ futafuta bɔ nɛ níhi a he fɔlɔ ko be je nɛ ɔ mi nɛ ma nyɛ ha a hiɛ ja. 4Kɛkɛ nɛ Eliya kɛ Mose je a he kpo tsɔɔ mɛ nɛ a kɛ Yesu ngɛ munyu tue. 5Petro de Yesu ke, “Tsɔɔlɔ, e hi kaa wa ngɛ hiɛ ɔ. Ha waa ma bo tsu etɛ, o nɔ kake, Mose nɔ kake, kɛ Eliya nɔ kake.” 6Se e li nɔ́ nɛ e ngɛ dee ɔ, ejakaa a ye gbeye wawɛɛ nitsɛ.

7 # Mat 3.17; Mar 1.11; Luk 3.22 Amlɔ ɔ, bɔku ko ba ha a nɔ, nɛ gbi ko je bɔku ɔ mi de ke, “Nɔ nɛ ɔ ji ye bi nɛ i suɔ lɛ saminya a nɛ; nyɛɛ bu lɛ tue!” 8Kɛkɛ nɛ a hyɛ a he kɛ kpe, se a nɛ́ nɔ kpa ko hu, ja a kɛ Yesu kɛkɛ.

9Benɛ a ngɛ yo ɔ kplee ɔ, Yesu de mɛ veveeve ke, “Nyɛ ko sɛɛ níhi nɛ nyɛ na a ha nɔ ko, ja Nɔmlɔ Bi ɔ te si kɛ je gbeje lolo.”

10Lɔ ɔ he ɔ, a ngɔ munyu ɔ ngɔ to a yi mi lɛɛ, se a bi a he ke, “Si temi kɛ gbeje jemi ɔ, kɛ ji e sisi kɛɛ?” 11#Mal 4.5; Mat 11.14 A bi Yesu ke, “Mɛni he je nɛ mlaa tsɔɔli ɔmɛ deɔ ke ja Eliya ba lolo ɔ?”

12E ha mɛ heto ke, “Niinɛ, Eliya maa sɛ hlami kɛ ba nɛ e ba to níhi tsuo blɔ nɔ ekohu. Se mɛni he je a ngma ngɛ Nɔmlɔ Bi ɔ he ke e maa na amanehlu babauu, nɛ a maa ngɔ lɛ kaa nɔ ko nɛ a bui lɛ ɔ? 13Nyɛ ná nyɛɛ le kaa Eliya ba momo, nɛ a pee lɛ nɔ́ tsuaa nɔ́ nɛ a suɔ kaa bɔ nɛ a ngma ngɛ e he ɔ.”

Yesu tsa jokuɛ nyumuyo ko nɛ mumi yayami ngɛ e mi

(Mateo 17.14-21; Luka 9.37-43a)

14Benɛ a kpale ba na kaseli ɔmɛ nɛ piɛ ɔ, a ba na nihi babauu nɛ ba bu a nɔ, nɛ mlaa tsɔɔli komɛ kɛ mɛ ngɛ níhi a mi hlae. 15Benɛ ni ɔmɛ na Yesu ɔ, e pee mɛ nyakpɛ, nɛ a sa fo kɛ ba e ngɔ ba fɔ lɛ. 16Yesu bi e kaseli ɔmɛ ke, “Mɛni mi nyɛɛ kɛ ni ɔmɛ ngɛ hlae ɔ?”

17Kɛkɛ nɛ ni ɔmɛ a ti nɔ kake he nɔ nɛ e de ke, “Tsɔɔlɔ, i kɛ ye binyumu ba o ngɔ, ejakaa mumi yayami ngɛ e mi, nɛ e nyɛ we nɛ e tu munyu. 18He tsuaa he nɛ e maa nu lɛ ngɛ ɔ, e tsɛ̃ɛ̃ lɛ fiaa si; e nya mi fiaa hwɔli, nɛ e kpeɔ e lungu nya, nɛ e luaa gaganii. I de o kaseli ɔmɛ nɛ a hia mumi ɔ kɛ je e mi ɔ, a nyɛ we.”

19Yesu de mɛ ke, “Nyɛ yi nɔ nɛ ɔ bi nɛ nyɛ he we Mawu yi! Mɛni be i kɛ nyɛ maa hi si kɛ yaa si? Mɛni be ma to ye tsui si ha nyɛ kɛ ya su? Nyɛɛ ngɔ jokuɛ nyumuyo ɔ kɛ ba ye ngɔ.” 20Nɛ a pee ja.

Benɛ mumi ɔ na Yesu ɔ, amlɔ ɔ, e ha jokuɛ ɔ lua gaganii, nɛ e nɔ si. E kɛ e he wuwlua si, nɛ e nya mi fia hwɔli. 21Yesu bi e tsɛ ɔ ke, “Mɛni be enɛ ɔ bɔni lɛ peemi?”

E de lɛ ke, “Kɛ je e jokuɛ mi tɔɔ. 22Ke pee ɔ, e sakee lɛ fɔɔ la mi, kɛ nyu mi hulɔ, konɛ e tane e yi. Se ke o ma nyɛ pee he nɔ́ ko ha wɔ ɔ, lɛɛ naa wɔ mɔbɔ!”

23Yesu de lɛ ke, “O ngɛ dee ke, Ke o ma nyɛ, pi jã a? A ma nyɛ pee nɔ́ tsuaa nɔ́ ha nɔ nɛ heɔ yeɔ ɔ!”

24Amlɔ ɔ, bitsɛ ɔ kpa ngmlaa kɛ de ke, “I heɔ yeɔ, se ye hemi kɛ yemi ɔ pi. Piɛ he ha mi!”

25Benɛ Yesu na kaa nihi babauu sa fo kɛ ma e ngɔ ɔ, e ke mumi ɔ yi nɛ e de lɛ ke, “Mo amuɛti kɛ tue kpoku mumi, i ngɛ mo fae ke, jee e mi, nɛ o ko sɛ e mi hu!”

26Mumi ɔ kpa ngmlaa, nɛ e ha jokuɛ ɔ lua gaganii, nɛ e je e mi. Jokuɛ ɔ pee kaa nɔ gbogboe. Lɔ ɔ he ɔ, bɔ nɛ nihi babauu de ji, “Jokuɛ ɔ gbo.” 27Se Yesu nu e nine si, nɛ e wo e nɔ, nɛ e te da si.

28Benɛ Yesu ba we mi ɔ, e kaseli ɔmɛ bi lɛ zaa ke, “Mɛni he je nɛ wɔɔ lɛɛ wa nyɛ we mumi ɔ nɛ waa hia a?”

29E de mɛ ke, “Kikɛmɛ a mumi nɛ ɔ, nɔ́ ko nɔ́ ko nyɛ we lɛ hiami, ja sɔlemi.”#9.29 Ngmami komɛ kɛ piɛ he ke “kɛ hwɔ hami.”

Yesu tu e gbenɔ he munyu ekohu

(Mateo 17.22-23; Luka 9.43b-45)

30Yesu kɛ e kaseli ɔmɛ je lejɛ ɔ, nɛ a ya gu Galilea. E sume kaa nɔ ko nɛ le he nɛ e ngɛ, 31ejakaa e ngɛ e kaseli ɔmɛ ní tsɔɔe. E de mɛ ke, “A maa ngɔ Nɔmlɔ Bi ɔ ngɔ wo adesahi a dɛ mi, nɛ a maa gbe lɛ. Se ke a gbe lɛ ɔ, ligbi etɛ se ɔ, e maa te si kɛ ba wami mi ekohu.”

32Se a nɛ́ nɔ́ nɛ e de nɛ ɔ nya, nɛ a ngɛ gbeye yee hulɔ kaa a ma bi lɛ.

Mɛnɔ ji nɔmlɔ ngua pe kulaa?

(Mateo 18.1-5; Luka 9.46-48)

33Jehanɛ Yesu kɛ e kaseli ɔmɛ ba Kapernaum; nɛ benɛ a ba su we mi ɔ, Yesu bi mɛ ke, “Mɛni mi nyɛ ngɛ hlae ngɛ blɔ ɔ nɔ ɔ?”

34 # Luk 22.24 Se a pɛ̃ nya mi, ejakaa benɛ a ngɛ blɔ ɔ nɔ kɛ ma a, a hla mi ngɛ a kpɛti kaa mɛnɔ ji nɔmlɔ ngua pe kulaa. 35#Mat 20.26-27; 23.11; Mar 10.43-44; Luk 22.26 Yesu hi si nɛ e tsɛ ni nyɔngma kɛ enyɔ ɔmɛ, nɛ e de mɛ ke, “Ke nɔ ko ngɛ hlae nɛ e hi kekle blɔ he ɔ, e pee e he nihi tsuo a sekpɛlɔ, kɛ nihi tsuo a tsɔlɔ.” 36Kɛkɛ nɛ e ngɔ jokuɛ wayoo ko kɛ ba da ni ɔmɛ a kpɛti, nɛ e wo lɛ ngɛ e kɔni bɔkɔ mi, nɛ e de mɛ ke, 37#Mat 10.40; Luk 10.16; Yoh 13.20 “Nɔ tsuaa nɔ nɛ heɔ jokuɛyo kaa kikɛ nɛ ɔ ngɛ ye biɛ mi ɔ, imi e he ɔ nɛ; nɛ nɔ nɛ heɔ mi ɔ, pi imi kɛkɛ nɛ e he, se mohu nɔ nɛ tsɔ mi ɔ hulɔ.”

Nɔ nɛ ti si wui wɔ ɔ, e piɛ wa he

(Luka 9.49-50)

38Yohane de lɛ ke, “Tsɔɔlɔ, wa na nɔ ko nɛ e kɛ o biɛ ngɛ mumi yayami hiae, nɛ wa tsi lɛ blɔ, ejakaa e piɛ we wa he kɛ nyɛɛ o se.”

39Se Yesu ke, “Nyɛ ko tsi lɛ blɔ, ejakaa nɔ ko be nyɛe nɛ e kɛ ye biɛ ma tsu nyakpɛ ní nɛ amlɔ nɔuu ɔ e maa tu ye he munyu yayami. 40#Mat 12.30; Luk 11.23 Nɔ nɛ ti si wui wɔ ɔ, e piɛ wa he. 41#Mat 10.42 I ngɛ nyɛ dee ke, nɔ tsuaa nɔ nɛ ma ha nyɛ nyu nɛ nyɛ maa nu ngɛ imi Kristo ɔ ye he ɔ, hiɔwo kpakpa be lɛ bɔe.

Kahi

(Mateo 18.6-9; Luka 17.1-2)

42“Nɔ tsuaa nɔ nɛ ma ha jokuɛ tsɔwi nɛ ɔmɛ a ti nɔ kake maa pee yayami ɔ, afani nɛ a kɛ teji wɛ muɔ e kuɛ, nɛ a ya sake lɛ fɔ wo mi. 43#Mat 5.30 Lɔ ɔ he ɔ, ke o nine haa nɛ o peeɔ yayami ɔ, poo; afani nɛ o kɛ nine kake sɛ wami mi pe nɛ o kɛ nine enyɔ maa ya Abosiami a je la a nɛ gbo we gblegbleegble ɔ mi. [ 44Lejɛ ɔ, ‘gɔgɔ nɛ yeɔ mɛ, kɛ la nɛ sãã mɛ ɔ gbo we gblegbleegble.’] 45Ke o nane haa nɛ o peeɔ yayami ɔ, poo; afani nɛ o kɛ nane kake sɛ wami mi pe nɛ o hɛɛ nane enyɔ nɛ a ma sake mo ngɔ fɔ Abosiami a je la a mi. [ 46Lejɛ ɔ, ‘gɔgɔ nɛ yeɔ mɛ, kɛ la nɛ sãã mɛ ɔ gbo we gblegbleegble.’] 47#Mat 5.29 Ke o hɛngmɛ kake haa nɛ o peeɔ yayami ɔ, hiaa nɛ o sake ngɔ fɔ he; afani nɛ o kɛ hɛngmɛ kake sɛ Mawu matsɛ yemi ɔ mi pe nɛ o hɛɛ hɛngmɛ enyɔ nɛ a ma sake mo ngɔ fɔ Abosiami a je la a mi. 48#Yes 66.24 Lejɛ ɔ, ‘gɔgɔ nɛ yeɔ mɛ, kɛ la nɛ sãã mɛ ɔ gbo we gblegbleegble.’

49“A kɛ la maa tsu nɔ tsuaa nɔ he kaa bɔ nɛ a kɛ ngo tsuu bɔ nɛ a sã he ɔ.

50 # Mat 5.13; Luk 14.34-35 “Ngo hi, se ke ngo nya nyu gbo ɔ, kɛ a maa pee lɛ kɛɛ nɛ e maa doo ekohu? Nyɛ ha nɛ ngo su kpakpa nɛ ɔ nɛ hi nyɛ mi, konɛ nyɛɛ kɛ nyɛmimɛ nɛ hi si ngɛ he jɔmi mi.”

Currently Selected:

Marko 9: Dangme

Highlight

Copy