Mateo 7

Koo kojo ni kpahi

(Luka 6.37-38, 41-42)

1“Nyɛ kó kojo nihi, konɛ Mawu hu kó kojo nyɛ. 2#Mar 4.24 Bɔ nɛ nyɛ kojoɔ nihi ɔ, jã Mawu hu maa kojo nyɛ. Susumi nɔ́ nɛ nyɛɛ kɛ susuu ha nihi ɔ, lɔ ɔ nɔuu a kɛ ma susu ha nyɛ. 3Mɛni he je nɛ o naa ngu nyafii nɛ ngɛ o nyɛmi hɛngmɛ nɔ nɛ plai nɛ ngɛ mo nitsɛ o hɛngmɛ nɔ ɔ lɛɛ o nɛ ɔ? 4Kɛ o ma plɛ kɛ de o nyɛmi ke, ‘Ha ma je ngu nyafii ɔ ngɛ o hɛngmɛ nɔ;’ be mi nɛ plai ngɛ mo nitsɛ o hɛngmɛ nɔ ɔ? 5Osatotsɛ! Je plai ɔ ngɛ mo nitsɛ o hɛngmɛ nɔ kekle. Ke o pee jã loko o maa hyɛ nɔ́ saminya, nɛ o ma je ngu nyafii ɔ ngɛ o nyɛmi ɔ hɛngmɛ nɔ.

6“Nyɛ ko ngɔ níhi nɛ ngɛ klɔuklɔu ngɔ ha gbehi; ke nyɛ pee jã a, a ma plɛ wo nyɛ, nɛ a ma tua nyɛ. Nyɛ ko sake nyɛ june ngɔ pue kpotoohi a blɔ mi; ke nyɛ pee jã a, a maa naa nɔ.

Nyɛ bi, nyɛ hla, nyɛ si

(Luka 11.9-13)

7“Nyɛ bi, nɛ a ma ha nyɛ; nyɛ hla, nɛ nyɛ maa na; nyɛ si, nɛ a ma bli sinya a ha nyɛ. 8Ejakaa nɔ tsuaa nɔ nɛ biɔ ɔ, a haa lɛ; nɔ nɛ hlaa a, e naa; nɛ nɔ nɛ siɔ sinya a, a bliɔ kɛ haa lɛ. 9Nyɛ ti mɛnɔ nɛ ke e bi bi lɛ abolo nɛ e ma ha lɛ tɛ? 10Aloo mɛnɔ lɛ ke e bi bi lɛ pa mi lo nɛ e ma ha lɛ sinɔ? 11Nyɛ nɛ nyɛ peeɔ yayami po, tse nyɛ le bɔ nɛ nyɛ haa nyɛ bimɛ ní kpakpahi! Nyɛ Tsɛ nɛ ngɛ hiɔwe ɔ, anɛ lɛɛ e be nyɛe ma ha nihi nɛ biɔ lɛ ɔ ní kpakpahi nɛ pe enɛ ɔmɛ lo?

12 # Luk 6.31 “Lɔ ɔ he ɔ, nɔ́ tsuaa nɔ́ nɛ nyɛ hlaa kaa nihi nɛ pee ha nyɛ ɔ, nyɛ hu nyɛɛ pee ja nɔuu ngɔ ha mɛ. Mose mlaa a, kɛ ní nɛ gbali ɔmɛ tsɔɔ ɔ sisi ji nɛ ɔ nɛ.

Agbo tokofii ɔ

(Luka 13.24)

13“Nyɛɛ sɛ agbo tokofii ɔ mi, ejakaa agbo nɛ kɛ nɔ yaa hɛ mi kpatami mi ɔ mi bli. Blɔ nɛ yaa lejɛ ɔ hu ngɛ gbajaa, nɛ nihi babauu nyɛɛɔ nɔ kɛ sɛɛ mi. 14Se agbo nɛ kɛ nɔ yaa wami mi ɔ ngɛ tokofii; blɔ ɔ hu hí, nɛ nihi bɔɔ pɛ lɛ naa blɔ ɔ.

Tso kɛ e yiblii

(Luka 6.43-44)

15“Nyɛɛ hyɛ saminya ngɛ lakpa gbali a he. Ke a ba nyɛ ngɔ ɔ, a naa mɛ kaa jijɔ, se anɔkuale mi ɔ, a ngɛ kaa ogbeteehi; 16a ní peemi níhi nyɛɛ kɛ maa le mɛ. Mio tso wui wai yiblii, nɛ zezle hu wui ngmɔkɔ. 17Tso kpakpa a, yiblii kpakpa nɛ e woɔ, nɛ tso yaya hu woɔ yiblii yaya. 18Tso kpakpa be nyɛe maa wo yiblii yaya, nɛ tso yaya hu be nyɛe maa wo yiblii kpakpa. 19#Mar 3.10; Luk 3.9 Tso tsuaa tso nɛ wui yiblii kpakpa a, a hɛɛ, nɛ a sakeɔ kɛ fɔɔ la mi. 20#Mat 12.33 Lɔ ɔ he ɔ, níhi nɛ lakpa gbali ɔmɛ peeɔ ɔ, lɔ ɔmɛ nyɛɛ kɛ maa le mɛ.

I li nyɛ kulaa

(Luka 13.25-27)

21“Pi nɔ tsuaa nɔ nɛ tsɛɔ mi ‘Nyɔmtsɛ, Nyɔmtsɛ’ ɔ ji nɔ nɛ maa sɛ hiɔwe matsɛ yemi ɔ mi; se mohu nɔ nɛ peeɔ Tsaatsɛ nɛ ngɛ hiɔwe ɔ suɔmi nya ní. 22Kojomi ligbi ɔ, nihi babauu ma bi mi ke, ‘Nyɔmtsɛ, Nyɔmtsɛ! Pi o biɛ mi nɛ wa fiɛ Mawu munyu ɔ ngɛ lo? Pi o biɛ mi nɛ wa hia mumi yayamihi ngɛ lo? Nɛ pi mo o biɛ mi nɛ wa pee nyakpɛ ní fuu ngɛ lo?’ 23#La 6.8 Kɛkɛ ɔ, imi hu ma de mɛ ke, ‘I li nyɛ! Nyɛɛ je ye nɔ, nyɛ nihi nɛ nyɛ peeɔ níhi nɛ dɛ blɔ!’

Tsu mali enyɔ ɔmɛ

(Luka 6.47-49)

24“Lɔ ɔ he ɔ, nɔ tsuaa nɔ nɛ nuɔ ye munyu nɛ ɔmɛ, nɛ e yeɔ nɔ ɔ, e ngɛ kaa ní lelɔ ko nɛ ma e tsu ngɛ tɛ sa nɔ. 25Hiɔmi ba nɛ, nɛ pahi hia, nɛ kɔɔhiɔ fia wawɛɛ kɛ si tsu ɔ. Se tsu ɔ hule we, ejakaa a to sisi ngɛ tɛ sa nɔ.

26“Se nɔ tsuaa nɔ nɛ nuɔ ye munyu nɛ ɔmɛ, nɛ e yi nɔ ɔ, e ngɛ kaa nyumu kuasia nɛ ma e tsu ngɛ zia nɔ. 27Hiɔmi ba nɛ, nɛ pahi hia, nɛ kɔɔhiɔ fia wawɛɛ kɛ si tsu ɔ. Nɛ e hule kɛ pue si butuu nɛ nɔ́ ko piɛ.”

He blɔ nɛ Yesu ngɛ

28 # Mar 1.22; Luk 4.32 Benɛ Yesu tu munyu nɛ ɔmɛ gbe nya a, ni ɔmɛ a nya kpɛ a he ngɛ bɔ nɛ e plɛ kɛ tsɔɔ ní ɔ he. 29E tsɔɔ mɛ ní kaa nɔ ko nɛ hɛɛ blɔ nya, se pi kaa bɔ nɛ mlaa tsɔɔli ɔmɛ tsɔɔ ní ɔ.

Currently Selected:

Mateo 7: Dangme

Highlight

Copy