Mateo 27

Yesu ngɛ Pilato hɛ mi

(Marko 15.1; Luka 23.1-2; Yohane 18.28-32)

1Benɛ je na a, osɔfo nikɔtɔma amɛ, kɛ ma nimeli ɔmɛ tsuo so Yesu yi nɔ, konɛ a gbe lɛ. 2A bɔ lɛ pã, nɛ a ngɔ lɛ ya ha Roma amlaalo ɔ nɛ a tsɛɛ lɛ Pilato ɔ.

Yuda gbenɔ

(Ni Tsumi 1.18-19)

3 # Nits 1.18-19 Benɛ Yuda, nɔ nɛ tsɔɔ Yesu se blɔ ɔ na kaa a bu Yesu gbenɔ fɔ ɔ, e pia e he, nɛ e kpale sika hiɔ yi nyingmi etɛ ɔ ya ha osɔfo nikɔtɔma amɛ, kɛ ma nimeli ɔmɛ. 4E de mɛ ke “I pee yayami kaa i tsɔɔ nɔ nɛ pee we yayami ɔ se blɔ nɛ a gbe lɛ.”

Se mɛɛ lɛɛ a he nɔ ke, “Mɛni enɛ ɔ kɔɔ ngɛ wa he? Mo nitsɛ o sane ji lɔ ɔ!”

5Yuda ya sake sika a ngɔ pue sɔlemi we ɔ mi, nɛ e ho ya wo e kuɛ kpa.

6Osɔfo nikɔtɔma amɛ ya kukuɔ sika a, nɛ a de ke, “Muɔ sika ji nɛ ɔ nɛ; wa mlaa a ngmɛ́ blɔ kaa a kɛ toɔ sɔlemi we ɔ nito he ɔ.” 7Lɔ ɔ he ɔ, a ya da, nɛ a kɛ sika a he buɛ puɛlɔ ɔ abɔɔ ɔ, konɛ a pu nibwɔhi ngɛ lejɛ ɔ. 8Enɛ ɔ he je ɔ, kɛ ba si mwɔnɛ ɔ, biɛ nɛ a kɛ tsɛɔ jamɛ a abɔɔ ɔ ji “Muɔ Abɔɔ.”

9 # Zak 11.12-13 Enɛ ɔ ha nɔ́ nɛ gbalɔ Yeremia de to ɔ ba mi ke, “A ngɔ sika hiɔ yi nyingmi etɛ ɔ, nɛ Israel fɔfɔɛ komɛ to nɛ a kɛ ma he lɛ ɔ 10ya he buɛ puɛlɔ ɔ abɔɔ ɔ kaa bɔ nɛ Nyɔmtsɛ ɔ tsɔɔ mi ɔ.”

Pilato bi Yesu munyu

(Marko 15.2-5; Luka 23.3-5; Yohane 18.33-38)

11Yesu daa si ngɛ Roma amlaalo ɔ hɛ mi, nɛ amlaalo ɔ bi lɛ ke, “Mo ji Yuda bi ɔmɛ a matsɛ ɔ?”

Yesu he nɔ ke, “Ja o de ɔ nɛ.” 12Se benɛ osɔfo nikɔtɔma amɛ, kɛ ma nimeli ɔmɛ ngɛ e nya poe, e je we nya.

13Lɔ ɔ he ɔ, Pilato bi lɛ ke, “Níhi babauu nɛ a ngɛ dee kɛ ngɛ mo sie nɛ ɔ, anɛ o nui?”

14Se Yesu ha we lɛ heto; sanehi nɛ a po ngɔ fɔ e nɔ ɔ, e je we kake po nya. Nɔ́ nɛ ɔ ha amlaalo ɔ nya kpɛ e he nitsɛnitsɛ.

A bu Yesu gbenɔ fɔ

(Marko 15.6-15; Luka 23.13-25; Yohane 18.39—19.16)

15Daa Hetsɔmi nyami be ɔ, Roma amlaalo ɔ peeɔ kusumi ko; e ngmɛɛɔ pã mi no nɛ ma kpekpemi ɔ suɔ he haa ma a. 16Jamɛ a be ɔ mi ɔ, pã mi no kpanaku ko ngɛ nɛ a tsɛɛ lɛ Baraba. 17Lɔ ɔ he ɔ, benɛ ma kpekpemi ɔ ba bua a he nya a, Pilato bi mɛ ke, “Mɛnɔ he nyɛ suɔ nɛ ma ngmɛɛ ha nyɛ, Baraba, loo Yesu nɛ a tsɛɛ lɛ Kristo ɔ?” 18E le kaa Yuda nimeli ɔmɛ ngɔ Yesu ngɔ ha, ejakaa a nyɛ lɛ kaa e biɛ he si.

19Benɛ Pilato hii si ngɛ kojomi sɛ ɔ nɔ ɔ, e yo tsɔ nɔ kɛ sɛ gbi ba de lɛ ke, “Hyɛ, koo pee dalɔ nɛ ɔ yayami ko oo! Ejakaa i nla nlami basabasa ngɛ e he nyɔ nɛ ɔ mi, nɛ i hao wawɛɛ.”

20Osɔfo nikɔtɔma amɛ, kɛ ma nimeli ɔmɛ wo ni kpekpemi ɔ a yi mi ke a de Pilato nɛ e ngmɛɛ Baraba he ha mɛ, konɛ e gbe Yesu. 21Pilato bi ma kpekpemi ɔ ekohu ke, “Ni enyɔ nɛ ɔmɛ a ti mɛnɔ he nyɛ suɔ kaa ma ngmɛɛ ha nyɛ?”

Nɛ a he nɔ ke, “Baraba!”

22Pilato bi mɛ ke, “Lɛɛ mɛni ma pee Yesu nɛ a tsɛɛ lɛ Kristo ɔ he mɔ?”

Mɛ tsuo a he nɔ ke, “Sɛu lɛ!”

23Pilato bi ke, “Mɛni yayami e pee?”

Se enɛ ɔ ha nɛ a kpa ngmlaa wawɛɛ ke, “Sɛu lɛ!”

24 # Mose V, 21.6-9 Pilato na kaa e he hia we hu kaa a ya nɔ, ejakaa basabasa miɔ nɛ e maa te si. Lɔ ɔ he ɔ, e yɛ nyu, nɛ e fɔ e dɛ ngɛ ma kpekpemi ɔ hɛ mi, nɛ e de ke, “Nyumu nɛ ɔ gbenɔ ɔ, ye nine be mi oo, ye nine be mi! Nyɛ, nyɛ sane!”

25Ma kpekpemi ɔ tsuo he nɔ ke, “Ee, wa nu! Tue gblami nɛ maa ba ngɛ nyumu nɛ ɔ gbenɔ se ɔ, e pee waa kɛ wa nina wa nɔ!”

26Kɛkɛ nɛ Pilato ngmɛɛ Baraba he ngɔ ha mɛ. Se Yesu ɔ lɛɛ e ha a fia lɛ kpa, nɛ lɔ ɔ se ɔ, e ngɔ lɛ ngɔ ha nɛ a ya sɛu lɛ.

Ta buli ɔmɛ ye Yesu he fɛu

(Marko 15.16-20; Yohane 19.2-3)

27Jehanɛ ɔ, Pilato ta buli ɔmɛ ngɔ Yesu kɛ ba amlaalo ɔ we ɔ mi; nɛ tabo ɔ tsuo ba bua kɛ bɔle Yesu kɛ kpe. 28A je tade ɔmɛ ngɛ e he, nɛ a ngɔ tade tsutsuu klɔii ngɔ wo lɛ. 29A pee mio jlasi ngɔ fi e yi, nɛ a ngɔ tso ha lɛ nɛ e hɛɛ ngɛ e hiɔ nine mi. Kɛkɛ nɛ a kpla si ngɛ e hɛ mi, nɛ a ye e he fɛu ke, “Wa nga mo oo, Yuda bi a matsɛ!” 30A su lada ngɔ pue e nɔ, nɛ a he tso ɔ ngɛ e dɛ nɛ a kɛ fia e yi mi. 31Benɛ a ye e he fɛu ta a, a je tade klɔii ɔ ngɛ e he, nɛ a ngɔ lɛ nitsɛ e tade ɔmɛ ngɔ wo lɛ. Nɛ a ngɔ lɛ kɛ ho, konɛ a ya sɛu lɛ.

A sɛu Yesu

(Marko 15.21-32; Luka 23.26-43; Yohane 19.17-27)

32Benɛ a je ma a mi kɛ yaa a, a na nyumu ko nɛ je Kirene ma a mi, nɛ a tsɛɛ lɛ Simon. Ta buli ɔmɛ nyɛ e nɔ ke e wo Yesu sɛumi tso ɔ. 33A ya su he ko nɛ a tsɛɛ ke Golgata; e sisi ji “Yikoklodonya.” 34#La 69.21 Nɛ́ a su lejɛ ɔ, nɔ ko ha Yesu wai nɛ a kɛ tsopa nɛ dooɔ futu mi ke e nu; se benɛ e tso hyɛ ɔ, e sume kaa e maa nu.

35 # La 22.18 Kɛkɛ nɛ a sɛu lɛ, nɛ a fɔ sɔ kɛ dla e tade ɔmɛ. 36Lɔ ɔ se ɔ, a hi si ngɛ lejɛ ɔ, nɛ a bu e he. 37A ngma sane nɛ tsɔɔ nɔ́ he je nɛ a ngɛ lɛ sɛue ɔ kɛ mɛtɛ e yi je ke, “Yesu, Yuda bi ɔmɛ a matsɛ ɔ ji nɛ ɔ nɛ.” 38Jehanɛ ɔ, a sɛu ojo fiali enyɔ ngɔ piɛ e he; nɔ kake ngɛ e hiɔ nɔ, nɛ nɔ kake hu ngɛ e muɔ nɔ.

39 # La 22.7; 109.25 Nihi nɛ bee ɔ huanya yi, nɛ a tu musu bɔmi munyuhi kɛ si Yesu ke, 40#Mat 26.61; Yoh 2.19 “Mo nɛ o kuɔ sɔlemi we ɔ, nɛ o kpaleɔ maa lɛ ligbi etɛ ɔ ji nɛ ɔ! He mo nitsɛ o yi wami koo! Ke mo ji Mawu Bi ɔ, jee sɛumi tso ɔ nɔ kɛ kple si!”

41Osɔfo nikɔtɔma amɛ, mlaa tsɔɔli ɔmɛ, kɛ ma nimeli ɔmɛ hu ye e he fɛu ja nɔuu ke, 42“E he ni kpahi a yi wami, se lɛ nitsɛ e nɔ́ lɛɛ e nyɛ we nɛ e he! Pi lɛ nɛ e ke lɛ ji Israel matsɛ ɔ! Jehanɛ ɔ lɛɛ é kple si kɛ je sɛumi tso ɔ nɔ koo, kɛkɛ wa ma he ye! 43#La 22.8 E ngɔ e hɛ ngɔ fɔ Mawu nɔ, nɛ e deɔ ke Mawu Bi ji lɛ. Saminya! Ke Mawu ngɛ e he tsui ɔ, e je lɛ kɛ je tso ɔ nɔ koo!”

44Awi yeli ɔmɛ nɛ a sɛu ngɔ piɛ Yesu he ɔ, mɛ hu a bɔ lɛ ahlua ja nɔuu.

Yesu gbenɔ

(Marko 15.33-41; Luka 23.44-49; Yohane 19.28-30)

45Piani ngmlɛ nyɔngma kɛ enyɔ ɔ, zugba a nɔ tsuo wo diblii ngmlɛfia etɛ sɔuu. 46#La 22.1 Ngmlɛ etɛ mi ɔ, Yesu kpa ngmlaa wawɛɛ ke, “Eli, Eli, lama sabaktani?” E sisi ji, “Ye Mawu, ye Mawu, mɛni he je o kua mi?”

47Nihi nɛ daa si ngɛ lejɛ ɔ, a kpɛti ni komɛ nu, nɛ a de ke, “Eliya nyumu nɛ ɔ ngɛ tsɛe ɔ nɛ.” 48#La 69.21 Amlɔ ɔ, a ti nɔ kake sa fo ya ngɔ wo mi kutsa, nɛ e kɛ sɔ dã nɛ kuã mi, nɛ e ngɔ ma pamploo nya, nɛ e ngɔ ha lɛ ke e nu.

49Se nihi nɛ piɛ ɔ de lɛ ke, “Mlɛ! Ha waa hyɛ kaa Eliya ma ba je lɛ lo!”

50Yesu kpa ngmlaa wawɛɛ ekohu; kɛkɛ nɛ e ma nya.

51 # Mose II, 26.31-33 Tlukaa a, tsu mi pomi bo nɛ ngɛ sɔlemi we ɔ mi gba enyɔ kɛ je hiɔwe kɛ ba ma si. Zugba mimiɛ, nɛ tɛ sahi a mi gba, 52nɛ yɔkɔhi a nya bli. Kɛkɛ nɛ Mawu bimɛ babauu nɛ gbo ɔ, a tle mɛ si kɛ ba wami mi ekohu. 53A je kpo kɛ je a yɔkɔ ɔmɛ a mi, nɛ benɛ Yesu te si kɛ je gbeje se ɔ, a pue nɔ kɛ ho ma klɔuklɔu ɔ mi ya nɛ nihi babauu na mɛ.

54Benɛ asafoatsɛ ɔ, kɛ nihi nɛ kɛ lɛ ngɛ Yesu he bue ɔ na nɛ zugba mimiɛ, kɛ níhi tsuo nɛ nyɛɛ se ɔ, a ye gbeye wawɛɛ, nɛ a de ke, “Niinɛ, Mawu Bi ɔ ji nɛ ɔ nɛ!”

55 # Luk 8.2-3 Yihi fuu hu daa si ngɛ se lokoo ngɛ lejɛ ɔ ngɛ nɔ́ hyɛe. Yi nɛ ɔmɛ nyɛɛ Yesu se kɛ je Galilea, nɛ a ngɛ lɛ sɔmɔe. 56A kpɛti ni komɛ ji Maria Magdalena, kɛ Maria, Yakobo kɛ Yosef a nyɛ ɔ, kɛ Zebedeo bimɛ ɔmɛ a nyɛ ɔ.

Yesu pumi

(Marko 15.42-47; Luka 23.50-56; Yohane 19.38-42)

57Benɛ du bu ɔ, niatsɛ ko je Arimatia kɛ ba. A tsɛɛ lɛ Yosef, nɛ lɛ hu Yesu kaseli ɔmɛ a ti nɔ kake ji lɛ. 58E ya Pilato ngɔ, nɛ e ya de lɛ ke e ha lɛ Yesu gbogboe ɔ. Pilato fa ke a ngɔ kɛ ha lɛ. 59Nɛ Yosef ngɔ gbogboe ɔ, nɛ e ngɔ kploba he ngɔ blaa lɛ, 60nɛ e ngɔ lɛ ya fɔ lɛ nitsɛ e yɔkɔ he nɛ e ha a kpɛ ngɛ tɛ sa mi ɔ mi. Lɔ ɔ se ɔ, e kpɛne tɛ agbo kɛ tsi yɔkɔ ɔ nya, nɛ e je. 61Maria Magdalena, kɛ Maria kake ɔ hu hii si ngɛ yɔkɔ ɔ he ngɛ lejɛ ɔ.

Yesu yɔkɔ ɔ he bumi

62E nɔ jena Hejɔɔmi ligbi ɔ, osɔfo nikɔtɔma amɛ, kɛ Farisi bi ɔmɛ a nya ba bua ngɛ Pilato ngɔ. 63#Mat 16.21; 17.23; 20.19; Mar 8.31; 9.31; 10.33-34; Luk 9.22; 18.31-33 A de lɛ ke, “Nyɔmtsɛ, wa kai kaa benɛ jamɛ a sisilɔ ɔ ngɛ je mi kɛ mwɔɔ ɔ, e de ke, ‘Ligbi etɛ se ɔ, ma te si ekohu.’ 64Lɔ ɔ he ɔ, fa nɛ a ya bu yɔkɔ ɔ he saminya kɛ maa su ligbi nɛ ji etɛ ɔ. Ke pi jã a, e kaseli ɔmɛ ma ba ju lɛ kɛ ho, nɛ a ma ya de ma a ke e te si kɛ je gbeje. Kɛkɛ ɔ, nyagbe sisimi nɛ ɔ ma ba puɛ ní kulaa pe kekle nɔ́ ɔ.”

65Pilato de mɛ ke, “Hyɛ, ta buli ji nɛ ɔmɛ nɛ! Nyɛɛ ya nɛ nyɛ ya bu yɔkɔ ɔ he bɔ nɛ nyɛ ma nyɛ.”

66Lɔ ɔ he ɔ, a pue nɔ kɛ ho nɛ a ya sɔu yɔkɔ ɔ nya. Nɛ a ha ta buli ɔmɛ bu he.

Currently Selected:

Mateo 27: Dangme

Highlight

Copy