Mateo 13

Ní dulɔ ɔ

(Marko 4.1-9; Luka 8.4-8)

1Jamɛ a ligbi ɔ nɔuu ɔ, Yesu je we ɔ mi kɛ ho wo ɔ nya ya, nɛ e ya hi si ngɛ lejɛ ɔ. 2#Luk 5.1-3 Nimli jiji nitsɛnitsɛ ba bɔle lɛ kɛ kpe. Lɔ ɔ he ɔ, e ya sɛ lɛ ko mi nɛ e hi si, be mi nɛ ma a tsuo daa si ngɛ wo ɔ nya. 3Nɛ e tu mɛ munyuhi fuu ngɛ abɛ gbi mi. E de ke,

“Ligbi ko ɔ, ní dulɔ ko ho nɛ e ya du ní. 4Benɛ e ngɛ wu ɔ fĩae ɔ, ekomɛ ya pue blɔ he, nɛ lohwe pɛlitsɛmɛ ba kukuɔ. 5Ekomɛ ya pue tɛ sa nɔ, he nɛ zu be bɔ nɛ sa. Wu ɔmɛ puɛ nɔuu, ejakaa zu ɔ mi kuɔ we. 6Se benɛ pu je ɔ, pu ɔ sãã mɛ, nɛ akɛnɛ a be sipoku he je ɔ, a ngla. 7Wu ɔ ekomɛ hu ya pue miohi a mi; se mio ɔmɛ ha we tso ɔmɛ mumi womi he, nɛ a gbo. 8Se ekomɛ hu ya pue zugba kpakpa nɔ, nɛ tso ɔmɛ wo yiblii, ekomɛ lafa, ekomɛ nyingmi ekpa, kɛ ekomɛ hu nyingmi etɛ.”

9Nyagbe ɔ, Yesu de ke, “Nɔ nɛ ngɛ tue ɔ, e nu.”

Nɔ́ nɛ he je nɛ Yesu bu abɛhi

(Marko 4.10-12; Luka 8.9-10)

10Kɛkɛ nɛ Yesu kaseli ɔmɛ ba e ngɔ, nɛ a ba bi lɛ ke, “Mɛni he je o kɛ ni ɔmɛ ngɛ munyu tue ngɛ abɛ gbi mi ɔ?”

11Yesu he nɔ ke, “Nyɛɛ lɛɛ a kɛ hiɔwe matsɛ yemi ɔ mi laami sane ɔ ha nyɛ; se mɛɛ a kɛ ha we mɛ. 12#Mat 25.29; Mar 4.25; Luk 8.18; 19.26 Nɔ tsuaa nɔ nɛ ngɛ nɔ́ ko ɔ, a ma ha lɛ fuu kɛ piɛ he nɛ e na kɛ be nɔ. Se nɔ nɛ be nɔ́ ko ɔ, bɔɔ nɛ e ngɛ ɔ tete po, a ma kpɔ ngɛ e dɛ. 13Nɔ́ he je nɛ i kɛ ni ɔmɛ ngɛ munyu tue ngɛ abɛ gbi mi ji: a ngɛ hyɛe, se a nɛ; a ngɛ tue bue, se a nui, nɛ a nui sisi hulɔ. 14#Yes 6.9-10 Lɔ ɔ he ɔ, gbami nɛ Yesaya gba a kɔɔ a he niinɛ. E ke,

‘Niinɛ, nyɛ maa nu,

se nyɛ be sisi nue.

Niinɛ, nyɛ maa na,

se nyɛ be se kɔe.

15Nimli nɛ ɔmɛ kplii a tsui;

A wa tue, konɛ a ko nu nɔ́.

A ma a hɛngmɛ, konɛ a ko hyɛ nɔ́.

A pee kikɛ nɛ ɔ,

konɛ a ko nu níhi a sisi;

nɛ a ba kpale kɛ ba ye ngɔ

nɛ ma tsa mɛ.’

16 # Luk 10.23-24 “Se nyɛɛ lɛɛ a gbaa nyɛ pɛ! Nyɛ hɛngmɛ ngɛ nɔ́ hyɛe, nɛ nyɛ tue ngɛ nɔ́ nue. 17Niinɛ, i ngɛ nyɛ dee ke gbali, kɛ Mawu bimɛ babauu hla kaa a maa na níhi nɛ nyɛ ngɛ hyɛe nɛ ɔ, se a nɛ́; a hla kaa a maa nu níhi nɛ nyɛ ngɛ nue nɛ ɔ, se a nui.

Yesu tsɔɔ abɛ nɛ kɔɔ ní dulɔ ɔ he ɔ sisi

(Marko 4.13-20; Luka 8.11-15)

18“Jehanɛ, nyɛɛ bu tue, konɛ nyɛɛ le nɔ nɛ abɛ nɛ kɔɔ ní dulɔ ɔ he ɔ tsɔɔ. 19Nihi nɛ nuɔ matsɛ yemi ɔ he sɛ gbi, se a nui sisi ɔ, a ngɛ kaa wu nɛ ya pue blɔ he ɔ. Nɔ yayami ɔ baa nɛ e ba saa nɔ́ nɛ a du ngɛ a mi ɔ kɛ jeɔ. 20Wu nɛ ya pue tɛ sa nɔ ɔ daa si ha nihi nɛ nuɔ sɛ gbi ɔ, nɛ a heɔ amlɔ kɛ bua jɔmi. 21Se sɛ gbi ɔ he we si ngɛ a mi, nɛ e se kɛ we hulɔ. Ke haomi, loo yi wami ba ngɛ munyu ɔ he ɔ, kɛkɛ a nane kpata. 22Wu nɛ ya pue mio mi ɔ daa si ha nihi nɛ nuɔ sɛ gbi ɔ, se je nɛ ɔ mi he nya gbami, kɛ sika suɔmi gbee sɛ gbi ɔ, nɛ e wui yiblii. 23Se wu nɛ ya pue zugba kpakpa nɔ ɔ lɛɛ e daa si ha nihi nɛ nuɔ sɛ gbi ɔ, nɛ a kɔɔ se hulɔ. Mɛ ji ni nɛmɛ nɛ woɔ yiblii ɔ, ni komɛ lafa, ni komɛ nyingmi ekpa, kɛ ni komɛ hu nyingmi etɛ.”

Abɛ nɛ kɔɔ hu he

24Yesu bu mɛ abɛ kpa ko hu ke, “Hiɔwe matsɛ yemi ɔ ngɛ kaa kikɛ nɛ ɔ. Nyumu ko du wu kpakpa ngɛ e ngmɔ mi. 25Se nyɔ mi benɛ nɔ tsuaa nɔ hwɔ si ɔ, he nyɛlɔ ko ba du hu kɛ futu ngma a, nɛ e je. 26Benɛ ngma a ba wa nɛ e wo yiblii ɔ, hu ɔ hu yi je kpo. 27Wetsɛ ɔ tsɔli ba bi lɛ ke, ‘Nyɔmtsɛ, anɛ pi wu kpakpa nɛ o du ngɛ o ngmɔ ɔ mi lo? Jije hu nɛ ɔ je mɔ?’ 28E he nɔ ke, ‘He nyɛlɔ ko lɛ pee enɛ ɔ nɛ.’ E tsɔli ɔmɛ bi lɛ ke, ‘Lɛɛ o suɔ kaa waa ya nɛ wa ya hia lo?’ 29E he nɔ ke, ‘Dɛbi, eko ɔ, ke nyɛ ngɛ hu ɔ hiae ɔ, nyɛ maa hia ngma a hu kɛ futu mi. 30Nyɛ ha ngma a, kɛ hu ɔ tsuo nɛ wa kɛ yaa si ngma kpami be ɔ. Ke ngma kpami be ɔ su ɔ, ma de ní tsuli ɔmɛ ke a bua hu ɔ nya kekle nɛ a fi, konɛ a sã. Lɔ ɔ se loko ma ha nɛ a bua ngma a nya kɛ wo ye gba a mi.’ ”

Abɛ nɛ kɔɔ sinapi wu he

(Marko 4.30-32; Luka 13.18-19)

31Yesu bu mɛ abɛ kpa ke, “Hiɔwe matsɛ yemi ɔ ngɛ kaa kikɛ nɛ ɔ: Nyumu ko kɛ̃ sinapi wu, nɛ e ya du ngɛ e ngmɔ mi. 32Sinapi wu ji wuhi nɛ a duɔ ɔ a kpɛti nyafii pe kulaa. Se ke e wa a, e ba peeɔ tso nguaa pe tso ɔmɛ tsuo. Kɛkɛ ɔ, lohwe pɛlitsɛmɛ baa nɛ a ba peeɔ tsu ngɛ e kɔni ɔmɛ a mi.”

Abɛ nɛ kɔɔ masa he

(Luka 13.20-21)

33Yesu bu mɛ abɛ kpa ke, “Hiɔwe matsɛ yemi ɔ ngɛ kaa kikɛ nɛ ɔ: Yo ko ngɔ masa nɛ e kɛ futu kplolo mamu lita nyingmi eywiɛ kɛ ya su be nɛ lɛ tsuo fu.”

Yesu kɛ abɛhi tsɔɔ ní

(Marko 4.33-34)

34Abɛhi lɛ Yesu bu nɛ e kɛ tsɔɔ ma kpekpemi ɔ ní nɛ ɔmɛ tsuo. Niinɛ, e de we mɛ nɔ́ ko nɛ e bui abɛ kɛ tsɔɔ nya. 35#La 78.2 E pee enɛ ɔ, konɛ e kɛ ha nɛ nɔ́ nɛ gbalɔ ɔ de ɔ nɛ ba mi ke,

“I kɛ mɛ maa tu munyu ngɛ abɛ gbi mi.

Níhi nɛ a ngɔ kɛ laa

kɛ je be nɛ a to je ɔ sisi ɔ,

ma fiɛ kɛ tsɔɔ mɛ.”

Yesu tsɔɔ abɛ nɛ kɔɔ hu ɔ he ɔ sisi

36Benɛ Yesu si ma kpekpemi ɔ, nɛ e ba we mi ɔ, e kaseli ɔmɛ ba e ngɔ ba de lɛ ke, “Abɛ ɔ nɛ kɔɔ hu ɔ nɛ ngɛ ngmɔ ɔ mi ɔ he ɔ, tsɔɔ wɔ sisi.”

37Yesu he nɔ ke, “Nɔ nɛ du wu kpakpa a ji Nɔmlɔ Bi ɔ nɛ. 38Ngmɔ ɔ ji je ɔ; wu kpakpa a ji matsɛ yemi mi bimɛ ɔmɛ; hu ɔ ji nɔ yayami ɔ bimɛ. 39He nyɛlɔ ɔ nɛ du hu ɔ ji Abosiami. Ngma kpami be ɔ ji je nɛ ɔ nyagbe, nɛ ngma kpali ɔmɛ ji hiɔwe bɔfo ɔmɛ. 40Bɔ nɛ a bua hu ɔ nya nɛ a sã a, jã nɔuu a maa pee ngɛ je nɛ ɔ nyagbe mi. 41Nɔmlɔ Bi ɔ maa tsɔ e hiɔwe bɔfo ɔmɛ, nɛ a ma ba bua nimli nɛ ɔmɛ a nya ngɛ e matsɛ yemi ɔ mi: ni nɛmɛ nɛ haa nihi a nane kpataa, kɛ yayami peeli tsuo. 42A ma sake mɛ kɛ fɔ flɔɔnɔɔ kɛ e mi la hɛuu ɔ mi; nɛ lejɛ ɔ a maa wo yana, nɛ a ma kpe lungu nya. 43Se Mawu ma a lɛɛ, a ma kpɛ kaa pu ngɛ a Tsɛ ɔ hiɔwe matsɛ yemi ɔ mi. Nɔ nɛ ngɛ tue ɔ, e nu!

Abɛ nɛ kɔɔ juetli nɛ a ngɔ laa a he

44“Hiɔwe matsɛ yemi ɔ ngɛ kaa kikɛ nɛ ɔ: Nyumu ko ya na juetli ngɛ zugba ko mi. Benɛ e na juetli ɔ, e ngɔ laa ekohu. Bua jɔmi sɔuu nɛ e na he je ɔ, e ho nɛ e ya jua níhi tsuo nɛ e ngɛ ɔ, nɛ e kɛ he jamɛ a ngmɔ ɔ.

Abɛ nɛ kɔɔ adiagba he

45“Jehanɛ ɔ, hiɔwe matsɛ yemi ɔ ngɛ kaa kikɛ nɛ ɔ: Jua yelɔ ko lɛ ngɛ adiagba saminyawiiwi hlae. 46Benɛ e ya na adiagba saminyayoo kake nɛ he jua wa a, e ho nɛ e ya jua níhi tsuo nɛ e ngɛ ɔ, nɛ e kɛ he.

Abɛ nɛ kɔɔ ya a he

47“Hiɔwe matsɛ yemi ɔ ngɛ kaa kikɛ nɛ ɔ hulɔ. Wo hɛli komɛ fɔ ya ngɛ wo mi, nɛ a gbe lo slɔɔtohi babauu. 48Benɛ ya a hyi ɔ, a sã kɛ ba wo ɔ nya, nɛ a ba hi si, nɛ a hla lo ɔ mi. A bua kpakpa amɛ a nya ngɔ wo kusiihi a mi, se yaya amɛ lɛɛ a sake ngɔ pue he. 49Kikɛ nɛ ɔ nɔuu a maa pee ngɛ je nɛ ɔ nyagbe mi. Mawu bɔfo ɔmɛ maa je kpo, nɛ a ma ba hla nimli yayami ɔmɛ ngɛ nimli kpakpa amɛ a kpɛti. 50A ma sake mɛ ngɔ fɔ flɔɔnɔɔ kɛ e mi la hɛuu ɔ mi; nɛ lejɛ ɔ, a maa wo yana, nɛ a ma kpe lungu nya.”

Juetli momo kɛ ehe

51Yesu bi mɛ ke, “Nyɛ nu ní nɛ ɔmɛ a sisi?”

A he nɔ ke, “Ee.”

52E de mɛ ke, “Enɛ ɔ tsɔɔ kaa mlaa tsɔɔlɔ tsuaa mlaa tsɔɔlɔ nɛ ba plɛ pee kaselɔ ngɛ hiɔwe matsɛ yemi ɔ mi ɔ, e ngɛ kaa wetsɛ ko nɛ jeɔ ní hehi, kɛ ní momohi kɛ jeɔ e nito he.”

A kua Yesu ngɛ Nazaret

(Marko 6.1-6; Luka 4.16-30)

53Benɛ Yesu gbe abɛ nɛ ɔmɛ a bumi nya a, e je lejɛ ɔ, 54nɛ e kpale kɛ ba lɛ nitsɛ e ma mi. E tsɔɔ ní ngɛ kpe he ɔ, nɛ nihi nɛ bu lɛ tue ɔ, a nya kpɛ a he. A bi ke, “Jije nyumu nɛ ɔ ná kikɛmɛ a nile nɛ ɔ kɛ je? E nyakpɛ ní ɔmɛ hu nɛɛ? 55Anɛ pi kapitɛ ɔ bi ɔ ji nɛ ɔ? Anɛ pi e nyɛ nɛ a tsɛɛ Maria a? Pi e nyɛminyumuhi ji Yakobo, Yosef, Simon, kɛ Yuda a? 56E nyɛmiyi ɔmɛ ɔ, anɛ pi waa kɛ mɛ tsuo nɛ ngɛ hiɛ ɔ? Jije e ya ná ní nɛ ɔmɛ tsuo kɛ je mɔ?” 57#Yoh 4.44 Kɛkɛ nɛ a mi mi fu lɛ.

Se Yesu de mɛ ke, “A buu gbalɔ ngɛ he tsuaa he, ja lɛ nitsɛ e ma mi, kɛ lɛ nitsɛ e we mi pɛ.” 58Akɛnɛ a he we lɛ yi he je ɔ, e tsu we nyakpɛ ní fuu ngɛ lejɛ ɔ.

Currently Selected:

Mateo 13: Dangme

Highlight

Copy