Mose I, 18
18
A wo Abraham bi he si
1Yawɛ je e he kpo ngɔ tsɔɔ Abraham ngɛ Mamre tso ngua amɛ a he. Bɔ nɛ e ba ji nɛ ɔ nɛ: ligbi ko benɛ pu nya wa ngmangmaangma nɛ Abraham hii si ngɛ e bo tsu sinya a nya, 2#Heb 13.2 nɛ e wo e yi nɔ ɔ, e na nyumu ni etɛ komɛ nɛ ma e ngɔ. Benɛ e na mɛ ɔ, e tu fo kɛ je bo tsu sinya a nya nɛ e ya kpee mɛ. E kpla si nɛ e kɛ e hɛ mi bu si, 3-4nɛ e de mɛ ke, “Ye nyɔmtsɛmɛ, i kpa nyɛ pɛɛ nɛ nyɛ ko je lolo. Nyɛɛ hi si ngɛ tso nɛ ɔ sisi nɛ nyɛɛ jɔɔ nyɛ he, nɛ ma ba ha nyɛ nyu bɔɔ nɛ nyɛ kɛ fɔ nyɛ nanehi a he. 5I kɛ niye ní bɔbɔyoo ko hu ma ba ha nyɛ nɛ nyɛɛ ye, konɛ nyɛ na he wami nɛ nyɛ kɛ tsa nyɛ nyɛɛmi ɔ nɔ. Nyɛ wo ye hɛ mi nyami kaa nyɛ ba ye we ɔ mi; lɔ ɔ he ɔ, nyɛ ha ma sɔmɔ nyɛ.”
A he nɔ ke, “Saminya! Pee kaa bɔ nɛ o de ɔ.”
6Abraham he sɔ, nɛ e kpale kɛ ho bo tsu ɔ mi ya. E ya de Sara ke, “Ngɔɔ o mamu kpakpa a; pɔtɔ lɛ nɛ o kɛ sã abolo ha ni etɛ esɔ!” 7Kɛkɛ nɛ Abraham sa fo kɛ ya sɛ na amɛ a kpɛti, nɛ e nu na bɔbɔyoo ko nɛ wo zɔ. E kɛ lɛ ha e tsɔlɔ ko, nɛ tsɔlɔ ɔ hu kɛ na a ya pee niye ní nɔuu. 8Abraham ngɔ nyami, kɛ na nyɔ nyu kɛ piɛ niye ní nɛ e kɛ na bi ɔ pee ɔ he, nɛ e kɛ ya ma nyumu ɔmɛ a hɛ mi ngɛ tso ɔ sisi; nɛ e da si ngɛ a kasa nya ngɛ lejɛ ɔ, nɛ a ye.
9Lɔ ɔ se ɔ, nyumu ɔmɛ bi Abraham ke, “Jije o yo Sara ngɛ?”
E he nɔ ke, “E ngɛ bo tsu ɔ mi.”
10 #
Rom 9.9
Yawɛ de lɛ ke, “Hiɛmɛ nɛ ɔ jeha a, ma kpale kɛ ba o ngɔ ekohu; nɛ o yo Sara ma fɔ binyumu.” Jamɛ a be ɔ mi ɔ, Sara daa si ngɛ bo tsu ɔ sinya a nya ngɛ e huno ɔ se, ngɛ tue bue. 11Abraham kɛ Sara tsuo bwɔ kotokoto, nɛ Sara nine kumi se po. 12#Pet I, 3.6 Lɔ ɔ he ɔ, Sara muɔ nɛ e bi e he ke, “Be nɛ ɔ mi nɛ i bwɔ, nɛ ye huno hu bwɔ kikɛ nɛ ɔ, ma pa na ngɔɔmi ko ngɛ yo kɛ nyumu a buami mi lo?”
13Kɛkɛ nɛ Yawɛ bi Abraham ke, “Mɛni he je Sara muɔ nɛ e bi ke, ‘Anɛ imi yomoyo nɛ ɔ, ma fɔ niinɛ lo?’ ɔ. 14#Luk 1.37 Anɛ nɔ́ ko peemi wa ha Yawɛ lo? Kaa bɔ nɛ i de ɔ, hiɛmɛ nɛ ɔ jeha a, ma kpale kɛ ba o ngɔ ekohu; nɛ o yo Sara ma fɔ binyumu.”
15Akɛnɛ Sara ngɛ gbeye yee he je ɔ, e ye lakpa ke, “I muɛ”. Se Yawɛ de lɛ ke, “O muɔ!”
Abraham kpa pɛɛ ha Sodom
16Jehanɛ, nyumu ɔmɛ je lejɛ ɔ, nɛ a pue nɔ kɛ yaa Sodom blɔ. Abraham kɛ mɛ ho konɛ e ya je mɛ blɔ. 17Kɛkɛ nɛ Yawɛ de e he ke, “Nɔ́ nɛ i yaa pee nɛ ɔ, i kɛ be Abraham laae. 18E nina ma ba pee je ma kpetekpleenyɛ nɛ a he maa wa, nɛ ma gu e nɔ kɛ gbaa je ma amɛ tsuo. 19I hla Abraham, bɔ nɛ pee nɛ e fa e bimɛ ɔmɛ kɛ e nina a nɛ a bu mi tue, nɛ a pee nɔ́ nɛ da, kɛ nɔ nɛ hi. Ke a pee ja a, nɔ́ tsuaa nɔ́ nɛ i wo lɛ si kaa ma pee ha lɛ ɔ, ma pee.”
20Kɛkɛ nɛ Yawɛ de Abraham ke, “I nu Sodom kɛ Gomora he sane yaya babauu nitsɛ, kaa a yayami ɔ nya wa. 21Lɔ ɔ he ɔ, i yaa lejɛ ɔ nɛ ma ya hyɛ kaa níhi nɛ i nu ngɛ a he ɔ, e ngɛ mi ja, loo e be mi.”
22Kɛkɛ nɛ ni enyɔ ɔmɛ je lejɛ ɔ nɛ a pue nɔ kɛ yaa Sodom, nɛ Abraham lɛɛ e kɛ Yawɛ daa si ngɛ lejɛ ɔ kɛ mwɔɔ. 23Abraham hɛ lɛ kɛ su Yawɛ he, nɛ e bi lɛ ke, “Anɛ o ma kpata dali kɛ nimli yayamihi tsuo a hɛ mi kɛ bla niinɛ lo? 24Alini, ke dali nyingmi enuɔ ngɛ ma a mi ɔ, anɛ o ma kpata ma a tsuo hɛ mi lo? Anɛ o be a he ngɔe kɛ pa mɛ, bɔ nɛ pee nɛ o he dali nyingmi enuɔ ɔmɛ a yi wami lo? 25Dɛbi, e ko ba mi kaa o maa pee nɔ́ nɛ ɔ, kaa o maa gbe dali kɛ nimli yayamihi kɛ bla. Ke o pee ja a, kɛkɛ o gbla dali kɛ nimli yayamihi tsuo a tue kɛ bla. Dɛbi, e ko ba mi ja; je ɔ tsuo kojolɔ ɔ, e sa kaa e yeɔ dami sane.”
26Yawɛ he nɔ ke, “Ke i na dali nyingmi enuɔ ngɛ Sodom ma a mi ɔ, i kɛ ma a tsuo a he maa pa mɛ ngɛ dali nyingmi enuɔ ɔmɛ a he.”
27Abraham tu munyu ekohu ke, “Nyɔmtsɛ, i kpa mo pɛɛ nɛ o ngɔ kɛ pa mi kaa ma da o hɛ mi kɛ tu munyu. Zu kɛ la zu kɛkɛ ji mi, nɛ i be he blɔ nɛ i deɔ nɔ́ ko. 28Alini, eko piɔ a maa na dali nyingmi eywiɛ kɛ enuɔ, se pi nyingmi enuɔ. Anɛ o ma kpata ma a tsuo hɛ mi ngɛ nihi enuɔ nɛ piɛ ɔ a he lo?”
Yawɛ he nɔ ke, “I be ma a hɛ mi kpatae ke i na dali nyingmi eywiɛ kɛ enuɔ ngɛ lejɛ ɔ.”
29Abraham tu munyu ekohu ke, “Alini, eko piɔ a maa na dali nyingmi eywiɛ pɛ.”
Yawɛ he nɔ ke, “I be ma a hɛ mi kpatae ngɛ dali nyingmi eywiɛ ɔmɛ a he.”
30Abraham de ke, “Nyɔmtsɛ, i kpa mo pɛɛ, o mi mi nɛ ko fu, ha ma de ekohu. Ke alini, dali nyingmi etɛ pɛ lɛ ngɛ ma a mi nɛɛ?”
Yawɛ he nɔ ke, “Ke i na dali nyingmi etɛ ngɛ lejɛ ɔ, i be ma a hɛ mi kpatae.”
31Abraham ya nɔ nɛ e de ke, “Nyɔmtsɛ, i kpa mo pɛɛ nɛ o ngɔ kɛ pa mi kaa ma da o hɛ mi kɛ tu munyu. Alini, ke dali nyingmi enyɔ pɛ lɛ ngɛ ma a mi nɛɛ?”
Yawɛ he nɔ ke, “Ke i na dali nyingmi enyɔ ngɛ lejɛ ɔ, i be ma a hɛ mi kpatae.”
32Abraham de ke, “Nyɔmtsɛ, i kpa mo pɛɛ, o mi mi nɛ ko fu, ha ma tu munyu si kake nɛ ɔ pɛ. Alini, ke dali nyɔngma pɛ lɛ ngɛ ma a mi nɛɛ?”
Yawɛ he nɔ ke, “Ke i na dali nyɔngma ngɛ lejɛ ɔ, i be ma a hɛ mi kpatae.” 33Benɛ Yawɛ kɛ Abraham tu munyu gbe nya a, Yawɛ je e he, nɛ Abraham hu kpale kɛ ho we mi ya.
Currently Selected:
Mose I, 18: Dangme
Highlight
Share
Copy
Want to have your highlights saved across all your devices? Sign up or sign in
Bible in Dangme © Bible Society of Ghana, 2018.
