Ni Tsumi NYA TSƆƆMI
NYA TSƆƆMI
Sane nɛ ngɛ Luka Sane Kpakpa a mi ɔ nɔ tsami lɛ ngɛ womi nɛ a tsɛɛ “Bɔfo Ɔmɛ A Ni Tsumi” ɔ mi. Nɔ́ pɔtɛɛ nɛ ngɛ womi nɛ ɔ mi ji bɔ nɛ Mumi Klɔuklɔu ɔ ba Yesu kekleekle se nyɛɛli ɔmɛ a nɔ nɛ e ha nɛ a fiɛ Sane Kpakpa a nɛ kɔɔ Yesu he ɔ ngɛ “Yerusalem kɛ Yudea tsuo, kɛ Samaria, kɛ ya su zugba a nyagbe he ɔmɛ.” (1.8) Womi nɛ ɔ tsɔɔ bɔ nɛ Kristo asafo ɔ je sisi ngɛ Yuda bi ɔmɛ a kpɛti, nɛ e ya nɔ kɛ ba su be nɛ je ɔ tsuo ba he ye. Womi ngmalɔ ɔ suɔ kaa ni nɛmɛ nɛ maa kane womi ɔ nɛ a nu sisi saminya kaa Kristo we bi ɔmɛ ɔ, pi ma ywiali a kuu nɛ teɔ si kɛ siɔ Roma matsɛ yemi ɔ ji mɛ. Jehanɛ hu, a na nɛ a le kaa Kristo nɔ hemi kɛ yemi ɔ ji nɔ́ ko nɛ maa Yuda bi a jami ɔ nɔ mi.
Ke a hyɛ bɔ nɛ sane kpakpa a nɛ kɔɔ Yesu he ɔ gbɛ fĩa kɛ ya se lokoo, kɛ gu munyu ɔ fiɛmi kɛ asafohi a sisi tomi nɔ ɔ, a ma nyɛ maa dla sane ɔ mi etɛ. (1) Bɔ nɛ Kristo asafo ɔ je sisi ngɛ Yerusalem be nɛ Yesu ho hiɔwe ya a se. (2) Munyu ɔ gbɛ fĩa Palestina zugba a nɔ. (3) Munyu ɔ gbɛ fĩa Mediterenia zugba a nɔ hluu kɛ ya su Roma ma nguaa mi tɔɔ.
Nɔ́ ko pɔtɛɛ nɛ ngɛ womi nɛ ɔ mi ji bɔ nɛ Pentekoste ligbi ɔ, Mumi Klɔuklɔu ɔ tsu ní kɛ gu nihi nɛ he ye ɔ a nɔ ngɛ Yerusalem. Mumi ɔ tsɔɔ ní, nɛ e wo asafo ɔ, kɛ a hɛ mi nyɛɛli ɔmɛ he wami kɛ gblee níhi tsuo a mi kaa bɔ nɛ a ngma a. A po blema Kristo se nyɛɛli ɔmɛ a sɛ gbi ɔ kpiti kpiti nɛ a kɛ fiɛ. Níhi nɛ a ngma ngɛ womi nɛ ɔ mi ɔ tsɔɔ bɔ nɛ munyu ɔ woɔ nihi nɛ he ye ɔ kã ngɛ a wami si himi mi, nɛ e peeɔ asafo ɔ kake.
Bɔ nɛ a dla womi ɔ mi ha
A to blɔ nya kɛ ha odase yemi 1.1-26
a. Yesu fa e kaseli ɔmɛ nɛ e wo mɛ si 1.1-14
b. Bɔfo ɔmɛ hla nɔ kɛ ma Yuda nane mi 1.15-26
A ye odase ngɛ Yerusalem 2.1—8.3
A ye odase ngɛ Yudea kɛ Samaria 8.4—12.25
Paulo fiɛ Mawu munyu 13.1—28.31
a. Kekleekle blɔ nɛ Paulo hia kɛ ya fiɛ 13.1—14.28
b. A kpe ngɛ Yerusalem 15.1-35
d. Blɔ enyɔne nɛ Paulo hia kɛ ya fiɛ 15.36—18.22
e. Blɔ etɛne nɛ Paulo hia kɛ ya fiɛ 18.23—21.16
ɛ. A wo Paulo tsu ngɛ Yerusalem, Kaisarea, kɛ Roma 21.17—28.31
Currently Selected:
Ni Tsumi NYA TSƆƆMI: Dangme
Highlight
Share
Copy
Want to have your highlights saved across all your devices? Sign up or sign in
Bible in Dangme © Bible Society of Ghana, 2018.