Ni Tsumi 7

Stefano je e nya ngɛ kpe ngua a hɛ mi

1Osɔfo nɔkɔtɔma pe kulaa a bi Stefano ke, “Anɛ munyu nɛ ɔmɛ ngɛ mi ja lo?”

2 # Mose I, 12.1 Stefano he nɔ ke, “Tsaatsɛmɛ kɛ ye nyɛmimɛ, nyɛɛ bu tue. Benɛ wa nɛ̃ Abraham ngɛ Mesopotamia nɛ e na we nɛ e ba hi Haran lolo ɔ, Mawu nɛ hɛ mi ngɛ nyami ɔ je e he kpo tsɔɔ lɛ, 3nɛ e de lɛ ke, ‘Jee o weku li ɔmɛ a kpɛti, kɛ o zugba a nɔ kɛ ya zugba nɛ ma tsɔɔ mo ɔ nɔ!’ 4#Mose I, 11.31; 12.4 Lɔ ɔ he ɔ, Abraham je Kaldea bi ɔmɛ a zugba a nɔ, nɛ e ya hi Haran. Benɛ e tsɛ gbo se ɔ, Mawu ha nɛ e je lejɛ ɔ kɛ ba zugba nɛ nyɛ ngɛ nɔ mwɔnɛ ɔ nɔ. 5#Mose I, 12.7; 13.15; 15.18; 17.8 Mawu ha we Abraham nitsɛ zugba a kpɔ nɛ maa su nane ma he kake tete po. Se Mawu wo lɛ si kaa e ma ha nɛ zugba a ma ba pee e kɛ e nina a nɔ́. Benɛ Mawu wo si nɛ ɔ, Abraham be bi po. 6#Mose I, 15.13-14 Bɔ nɛ Mawu de lɛ ji nɛ ɔ nɛ: ‘O nina ma ya to nibwɔ ngɛ ma se zugba ko nɔ, nɛ a maa ye mɛ nyɔguɛ, nɛ a maa wa mɛ yi mi jeha lafa eywiɛ sɔuu. 7#Mose II, 3.12 Jamɛ a ma a nɛ a ma ya sɔmɔ ɔ, ma gbla a tue; nɛ lɔ ɔ se ɔ, o nina a maa je lejɛ ɔ, nɛ a ma ba ja mi ngɛ hiɛmɛ nɛ ɔ.’ 8#Mose I, 17.10-14; 21.2-4; 25.26; 29.31—35.18 Kɛkɛ nɛ Mawu kɛ lɛ so, nɛ e tsɔɔ lɛ nɔ pomi okadi ɔ. Lɔ ɔ he ɔ, benɛ a fɔ Isak ɔ, Abraham po lɛ ligbi nɛ ji kpaanyɔ ɔ. Isak fɔ Yakob, nɛ Yakob po e bimɛ nyɔngma kɛ enyɔ ɔmɛ nɛ ji wa blematsɛmɛ ɔmɛ.

9 # Mose I, 37.11, 28; 39.2, 21 “Yakob bimɛ ɔmɛ a hɛ ya kɔ̃ a nyɛmi Yosef nɔ, nɛ a jua lɛ kɛ ho Egipt ya. Se Mawu kɛ lɛ ngɛ, 10#Mose I, 41.39-41 nɛ e je lɛ kɛ je dengmehi tsuo a mi. Yosef hɛ mi ba nyami ngɛ Egipt matsɛ ɔ hɛ mi. Matsɛ ɔ na kaa e nɔ bɔ tsɔ, nɛ Mawu dloo lɛ nile nɛ mi kuɔ. Lɔ ɔ he ɔ, matsɛ ɔ tu Egipt zugba a, kɛ matsɛ we ɔ tsuo ngɔ wo Yosef dɛ mi. 11#Mose I, 42.1-2 Jamɛ a be ɔ mi ɔ, hwɔ ba Egipt kɛ Kanaan zugba a tsuo nɔ, nɛ a na nɔ́ saminya. Wa nɛmɛ ɔmɛ nɛ́ ní nɛ a ye. 12Benɛ Yakob nu kaa blɛfo ngɛ Egipt ɔ, e tsɔ e bimɛ ɔmɛ nɛ ji wa nɛmɛ ɔmɛ lejɛ ɔ. 13#Mose I, 45.1, 16 Benɛ a kpale ya lejɛ ɔ si enyɔne ɔ, Yosef je e he si ngɔ ha e nyɛmimɛ ɔmɛ, nɛ Egipt matsɛ ɔ hu ba le Yosef weku ɔ. 14#Mose I, 45.9-10, 17-18; 46.27 Jehanɛ Yosef tsɔ ke a ya ngɔ e tsɛ Yakob kɛ e we ɔ tsuo, nimli maa pee nyingmi kpaago kɛ enuɔ ɔ kɛ ba. 15#Mose I, 46.1-7; 49.33 Kɛkɛ nɛ Yakob pue nɔ kɛ ho Egipt ya. Nɛ lejɛ ɔ e kɛ e bimɛ ɔmɛ tsuo ya gbo ngɛ. 16#Mose I, 23.3-16; 33.19; 50.7-13; Yosh 24.32 A ngɔ a gbogbo ɔmɛ kɛ ba Shekem ba pu ngɛ yɔkɔ ko mi. Yɔkɔ nɛ ɔ, Abraham lɛ je sika kɛ he ngɛ Hamor bi ɔmɛ a dɛ.

17 # Mose II, 1.7-8 “Benɛ be ɔ nɛ Mawu maa ye si nɛ e wo Abraham ɔ nɔ ɔ su ɔ, jamɛ a be ɔ, wa nyɛmimɛ ɔmɛ a he ba hiɛ babauu. 18Kɛkɛ nɛ matsɛ ko ba bɔni tsɛ yemi ngɛ Egipt zugba a nɔ nɛ lɛɛ e li Yosef. 19#Mose II, 1.10-11, 22 Matsɛ nɛ ɔ sisi wa nɛmɛ ɔmɛ, nɛ e wa mɛ yi mi. E ha nɛ a sake a bimwɔwi ngɔ pue he, konɛ a gbo. 20#Mose II, 2.2 Jamɛ a be ɔ mi nɔuu nɛ a fɔ Mose, binyumuyo kɛ e he fɛu. A hyɛ e nɔ ngɛ e tsɛ we ɔ nyɔhiɔ etɛ; 21#Mose II, 2.3-10 lɔ ɔ se, benɛ a sake lɛ ngɔ fɔ he ɔ, Farao ɔ biyo ya wo lɛ, nɛ e lɛ lɛ; nɛ e kɛ lɛ pee e bi. 22A tsɔɔ Mose Egipt nile tsuo, nɛ e na biɛ kpanaa; e he biɛ ngɛ munyu tumi kɛ e ní peepee tsuo mi.

23 # Mose II, 2.11-15 “Benɛ Mose ye jeha nyingmi eywiɛ ɔ, e pee e yi mi kaa e ma ya slaa e nyɛmimɛ Israel bi ɔmɛ. 24Benɛ e ya mɛ slaami ɔ, e na a ti nɔ kake nɛ Egipt no ko ngɛ lɛ yi mi wae; nɛ e ya fa e nyɛmi ɔ he. E gbe Egipt no ɔ kɛ ye e nyɛmi ɔ he lue. 25Jinɛ e susu kaa e nyɛmimɛ ɔmɛ maa na kaa Mawu ngɛ e nɔ gue nɛ e kɛ kpɔ mɛ, se e ya bɛ mi ja. 26E nɔ jena a, e ba na Israel bi enyɔ nɛ a ngɛ kunɔ nɔe. E ya kpata mɛ, nɛ e de ke, ‘Tsaatsɛmɛ, nyɛɛ lɛɛ nyɛmimɛ ji nyɛ, mɛni he je nyɛ ngɛ kunɔ nɔe?’ 27Se nɔ nɛ nɔ́ dɛ ɔ tsɛ̃ Mose kɛ ya se, nɛ e bi lɛ ke, ‘Mɛnɔ lɛ wo mo wa nɔ matsɛ kɛ kojolɔ? 28Anɛ o ngɛ hlae nɛ o gbe mi kaa bɔ nɛ o gbe jamɛ a Egipt no ɔ hiɛ ɔ?’ 29#Mose II, 18.3-4 Benɛ Mose nu munyu nɛ ɔ, e tu fo kɛ je Egipt, nɛ e ya to nibwɔ ngɛ Midian zugba a nɔ. E ya fɔ binyumuhi enyɔ ngɛ lejɛ ɔ.

30 # Mose II, 3.1-10 “Jeha nyingmi eywiɛ se ɔ, Mawu bɔfo ba je e he kpo tsɔɔ Mose ngɛ la lilɛ mi ngɛ pu mi ngɛ Sinai yo ɔ he. 31Benɛ Mose na nɔ́ nɛ ɔ, e hɛ mi pee lɛ yaa. E hɛ lɛ kɛ yaa su he, konɛ e hyɛ; kɛkɛ nɛ e nu Nyɔmtsɛ ɔ gbi nɛ de lɛ ke, 32‘Imi ji o nɛmɛ a Mawu ɔ, Abraham, Isak, kɛ Yakob a Mawu ɔ.’ Gbeye ha Mose he do blibliibli, nɛ e nyɛ we nɛ e hyɛ nɔ́ ɔ hu. 33Kɛkɛ nɛ Nyɔmtsɛ ɔ de lɛ ke, ‘Je tokota amɛ, ejakaa zugba klɔuklɔu nɔ nɛ o daa si ngɛ ɔ nɛ. 34Amanehlu nɛ ye ma a ngɛ nae ngɛ Egipt ɔ, i le; nɛ i nu a kɛmɛmi ɔ hulɔ. Lɔ ɔ he ɔ, i kpale se kɛ ma ma ba je mɛ. Hyɛ, ma tsɔ mo Egipt.’

35 # Mose II, 2.14 “Kikɛmɛ a Mose nɛ ɔ nɔuu nɛ Israel ma a ke a hla we lɛ, nɛ a bi ke, ‘Mɛnɔ lɛ wo mo wa nɔ matsɛ kɛ kojolɔ?’ ɔ, Mawu gu bɔfo ɔ nɛ je e he kpo tsɔɔ lɛ ngɛ pú ɔ mi ɔ nɔ, nɛ e tsɔ lɛ kaa e ba ye a nɔ nɛ e kpɔ mɛ. 36#Mose II, 7.5; 14.21; Mose IV, 14.33 Lɛ nɛ e nyɛɛ a hɛ mi kɛ je Egipt, nɛ e pee nyakpɛ níhi, kɛ okadihi ngɛ lejɛ ɔ, kɛ Wo Tsu ɔ mi, kɛ nga a nɔ jeha nyingmi eywiɛ. 37#Mose V, 18.15, 18 Kikɛmɛ a Mose nɛ ɔ nɛ de Israel bi ɔmɛ ke, ‘Nyɔmtsɛ, nyɛ Mawu ɔ maa tsɔ gbalɔ ko kɛ je nyɛ nyɛmimɛ ɔmɛ a kpɛti kaa bɔ nɛ e tsɔ mi ɔ nɛ.’ 38#Mose II, 19.1—20.17; Mose V, 5.1-33 Mose nɛ ɔ nɛ e kɛ Israel ma kpekpemi ɔ nɛ ji wa nɛmɛ ɔmɛ hi nga a nɔ ɔ nɛ. Lɛ nɛ e kɛ Mawu bɔfo ɔ tu munyu ngɛ Sinai yo ɔ he; nɛ lɛ nɔuu nɛ e ngɔ Mawu sɛ gbi nɛ wami ngɛ mi ɔ ba ha wɔ.

39“Wa nɛmɛ ɔmɛ bui lɛ, mohu a hɛɛ lɛ soisoi, nɛ a hla kaa a maa kpale a se kɛ ho Egipt ya ekohu. 40#Mose II, 32.1 Lɔ ɔ he ɔ, a de Aaron ke, ‘Pee mawuhi ha wɔ, nɛ a nyɛɛ wa hɛ mi; se kikɛmɛ a Mose nɛ ɔ nɛ nyɛɛ wa hɛ mi kɛ je Egipt kɛ ba su hiɛmɛ nɛ ɔ, wa li nɔ́ nɛ ya ba e nɔ.’ 41#Mose II, 32.2-6 Kɛkɛ nɛ a pee na bi, nɛ a sã bɔ ngɔ ha amaga nɛ ɔ; nɛ mɛ nitsɛmɛ a nine nya ní tsumi ɔ, a na he bua jɔmi babauu. 42#Amos 5.25-27 Lɔ ɔ he ɔ. Mawu je e hɛ ngɛ a nɔ, nɛ e ngmɛɛ a he kaa a ja dodoehi ngɛ hiɔwe kaa bɔ nɛ a ngma ngɛ gbali ɔmɛ a womi ɔ mi ke,

‘Nyɛ Israel ma,

anɛ imi nɛ nyɛ sã lohwehi, kɛ niye ni bɔ

ngɔ ha ngɛ nga a nɔ

jeha nyingmi eywiɛ ɔ?

43Molok bo tsu mohu nyɛ wo tloo,

kɛ nyɛ mawu Renfan ɔ dodoe ɔ;

enɛ ɔmɛ ji amagahi nɛ nyɛ puɛ nɛ nyɛ ja.

Lɔ ɔ he ɔ, Babilon se lokoo

ma ha a maa ngɔ nyɛ kɛ ho.’

44 # Mose II, 25.9, 40 “Wa nɛmɛ ɔmɛ hɛɛ bo tsu nɛ tsɔɔ Mawu sihi he ɔ ngɛ nga a nɔ. A pee bo tsu ɔ pɛpɛɛpɛ kaa bɔ nɛ Mawu de Mose ke e pee ɔ. 45#Yosh 3.14-17 Benɛ wa nɛmɛ ɔmɛ a nine su nɔ ɔ, a kɛ Yoshua hɛɛ lɛ kɛ ba je ma amɛ a zugba a nɔ. Zugba nɛ ɔ nɔ nɛ Mawu fie je ma amɛ kɛ je ha wa nɛmɛ ɔmɛ. Hiɛ ɔ bo tsu ɔ hi kɛ ba su David be ɔ mi. 46#Sam II, 7.1-16; Kron I, 17.1-14 David hɛ mi ba nyami ngɛ Mawu hɛ mi; nɛ e kpa Mawu pɛɛ ke e ngmɛ lɛ blɔ nɛ e pee sihi he ko ha lɛ, Yakob Mawu ɔ. 47#Mats I, 6.1-38; Kron II, 3.1-17 Se Salomo mohu lɛ ba ma tsu ha lɛ.

48“Pohu Hiɔwe No ɔ tsa hi tsu nɛ a kɛ adesa nine pee mi kaa bɔ nɛ gbalɔ ɔ hu de ɔ.

49 # Yes 66.1-2 E ke, ‘Hiɔwe ɔ, ye matsɛ sɛ,

nɛ zugba a, nɔ́ nɛ i kɛ ye nane maa nɔ.

Mɛni tsu nyɛ maa ma ha mi mɔ?

Nɛ jije ma jɔɔ ye he ngɛ?

50Anɛ pi imi nitsɛ nɛ i pee enɛ ɔmɛ tsuo lo?’ ”

51 # Yes 63.10 Stefano ya nɔ nɛ e de ke, “Nyɛ kuɛ wa kaa amaga jali, nɛ nyɛ tsui, kɛ nyɛ tue wa kaa nɔ́ ko! Nyɛ ngɛ kaa nyɛ nɛmɛ ɔmɛ pɛ! Nyɛ hu nyɛ kplɛɛ we nɛ Mumi Klɔuklɔu ɔ nɛ tsu nyɛ he ní. 52Gbali ɔmɛ nɛ hi si sa a, nyɛ nɛmɛ ɔmɛ wa mɛ yi mi. A gbe ni nɛmɛ nɛ de to ke dalɔ ɔ maa ba a. Amlɔ nɛ ɔ, lɛ nitsɛ hu nyɛ tsɔɔ e se blɔ, nɛ nyɛ gbe lɛ. 53Nyɛ ná Mawu mlaa a kɛ gu Mawu bɔfo ɔmɛ a nɔ, se nyɛ yi nɔ.”

A fia Stefano tɛ

54Benɛ kpe ngua a mi bi ɔmɛ nu kikɛmɛ a munyu nɛ ɔmɛ ɔ, a mi mi wo la wawɛɛ nitsɛ, nɛ a kpe lungu nya kɛ wo e he. 55Kɛkɛ nɛ Mumi Klɔuklɔu ɔ ba Stefano nɔ wawɛɛ nitsɛ. E hyɛ hiɔwe too; e na Mawu hɛ mi nyami ɔ, nɛ e na Yesu nɛ daa si ngɛ Mawu hiɔ nɔ. 56Kɛkɛ nɛ e de ke, “Nyɛɛ hyɛ, i na hiɔwe nya nɛ bli nɛ Nɔmlɔ Bi ɔ daa si ngɛ Mawu hiɔ nɔ!”

57Se kpe ngua a mi bi ɔmɛ kpa ngmlaa wawɛɛ, nɛ a kɛ a nine tsi a tue. A tu kɛ ba yu e nɔ. 58A tsitsɛɛ e yi se kɛ je ma a mi, nɛ a ya fia lɛ tɛ. Nihi nɛ fia Stefano tɛ ɔ nɛ peeɔ odase ɔ, je a tade ɔmɛ ngɔ ha niheyo ko nɛ a tsɛɛ lɛ Saulo, nɛ e hyɛ nɔ ha mɛ. 59Benɛ a ngɛ Stefano tɛ ɔ fiae ɔ, e sɔle, nɛ ke, “Nyɔmtsɛ Yesu, he ye mumi ɔ!” 60E kpla si, nɛ e kpa ngmlaa wawɛɛ ke, “Nyɔmtsɛ, ngɔɔ yayami nɛ ɔ kɛ pa mɛ!” Benɛ e de kikɛ nɛ ɔ, kɛkɛ nɛ e ngɔ e nya.

Currently Selected:

Ni Tsumi 7: Dangme

Highlight

Copy