Ni Tsumi 5

Anania kɛ Safira

1Se nyumu ko nɛ a tsɛɛ lɛ Anania, kɛ e yo Safira ya jua a weto ní ko. 2Anania kɛ sika nɛ a na a mi fa ko to, nɛ e yo ɔ hu le he nɔ ko. Nɛ e kɛ sika a mi fa nɛ piɛ ba ha bɔfo ɔmɛ. 3Kɛkɛ nɛ Petro de lɛ ke, “Anania, mɛni he je Satan ba sɛ o mi nɛ o ye Mumi Klɔuklɔu ɔ lakpa kikɛ nɛ ɔ? Sika nɛ o na benɛ o jua zugba a, o ngɔ fa ngɔ to, pi jã? 4Benɛ zugba a ngɛ ɔ, o nɔ́; nɛ benɛ o jua a hu sika a mo nitsɛ o nɔ́. Mɛni he je o to o yi mi, nɛ o pee yayami kaa kikɛ nɛ ɔ? Nɔ́ nɛ o pee nɛ ɔ, pi adesa nɛ o ye lakpa, se Mawu!” 5Benɛ Anania nu munyu nɛ ɔ, e tsɔ fia si, nɛ e gbo. Nihi tsuo nɛ nu sane nɛ ba a ye gbeye wawɛɛ nitsɛ. 6Kɛkɛ nɛ nihewi ɔmɛ ba, nɛ a ngɔ nɔ́ kɛ blaa e gbogboe ɔ, nɛ a ya pu lɛ.

7Maa pee ngmlɛfia etɛ se ɔ, e yo ɔ hu ba lejɛ ɔ; lɛɛ e li sane nɛ ba. 8Petro bi lɛ ke, “De mi anɔkuale ɔ; anɛ bɔ nɛ o kɛ o huno ɔ nyɛ jua zugba a ha ji nɛ ɔ?”

Safira he nɔ ke, “Ee, sika a tsuo ji ja a nɛ.”

9Jehanɛ Petro bi lɛ ke, “Kɛ pee kɛɛ nɛ nyɛ pee nyɛ nya kake kɛ ye Nyɔmtsɛ ɔ Mumi ɔ lakpa a, nyɛ susu kaa nyɛ maa ye nyɛ he lo? Hyɛ, nihi nɛ ya pu o huno ɔ, mɛ lɛ a kpale kɛ ma a nɛ; a ma wo mo hu kɛ ho!” 10Amlɔ nɔuu ɔ, e tsɔ fia si ngɛ Petro nane nya, nɛ e gbo. Benɛ nihewi ɔmɛ ba su we ɔ mi ɔ, a na kaa e gbo; kɛkɛ nɛ a wo lɛ kɛ ho, nɛ a ya pu lɛ ngɛ e huno ɔ kasa nya. 11Asafo ɔ, kɛ ni kpahi tsuo nɛ nu sane nɛ ɔ ye gbeye wawɛɛ nitsɛ.

Okadihi kɛ nyakpɛ nihi

12Mawu pee okadihi, kɛ nyakpɛ níhi babauu kɛ gu bɔfo ɔmɛ a nɔ ngɛ ni ɔmɛ a kpɛti. He nɛ a pɔɔ kpemi ngɛ ji Salomo Ablanaa a nɔ. 13E ngɛ mi kaa nihi tuɔ a he munyu kpakpa mohu, se e bɛ nɔ kpa ko yi mi kaa e ya piɛ a he. 14Se kɛ̃ ɔ, nyumuhi, kɛ yihi babauu nɛ heɔ Nyɔmtsɛ ɔ yeɔ ɔ ba piɛ asafo ɔ he. 15Nyakpɛ níhi nɛ bɔfo ɔmɛ pee he je ɔ, ke pee ɔ, nihi ngɔɔ hiɔtsɛmɛ kɛ a sa kɛ baa gbɛjegbɛ tue, konɛ ke Petro bee ɔ, e nini kɛkɛ po nɛ nɔ a nɔ. 16Nihi jeɔ mahi nɛ bɔle Yerusalem ɔ a mi kɛ baa. A kɛ hiɔtsɛmɛ, kɛ nihi nɛ mumi yayamihi ngɛ mɛ haoe ɔ baa, nɛ bɔfo ɔmɛ tsaa hiɔtsɛmɛ ɔmɛ, nɛ a hiaa mumi yayami ɔmɛ hulɔ.

A wa bɔfo ɔmɛ yi mi

17Jehanɛ osɔfo nɔkɔtɔma pe kulaa a, kɛ e nimeli ɔmɛ, kɛ Saduki bi ɔmɛ nɛ hunga sa mɛ ɔ te si kɛ hɛdɔ wawɛɛ 18kɛ wo bɔfo ɔmɛ, nɛ a ya wo mɛ tsu. 19Se nyɔ mi ɔ, Nyɔmtsɛ ɔ bɔfo ba bli tsu ɔ nya sinya amɛ, nɛ e je mɛ; nɛ e de mɛ ke, 20“Nyɛɛ ya sɔlemi we ɔ nɛ nyɛ ya jaje kikɛmɛ a si himi he nɛ ɔ mi munyu ɔmɛ tsuo ngɔ tsɔɔ ma a.” 21Bɔfo ɔmɛ pee bɔ nɛ a de mɛ ɔ. A pue nɔ mɔtu kɛ ho sɔlemi we ɔ ya ya tsɔɔ ní.

Jehanɛ osɔfo nɔkɔtɔma pe kulaa a, kɛ e nikɔtɔma amɛ tsɛ Yuda ma nimeli ɔmɛ nɛ a ngɛ kpe ngua a mi ɔ kpe. A tsɔ nihi kɛ ya he nɛ a wo bɔfo ɔmɛ tsu ngɛ ɔ, konɛ a ya ngɔ mɛ kɛ ba. 22Se benɛ tsɔli ɔmɛ su lejɛ ɔ, a nɛ bɔfo ɔmɛ ngɛ tsu ɔ mi. Lɔ ɔ he ɔ, a kpale a se nɛ a ba bɔ kpe ngua a mi bi ɔmɛ amaniɛ ke, 23“Benɛ wa ya a, tsu ɔ nya ngɛ ngangɛ. A ngmɛ mi kpɛii, nɛ buli ɔmɛ hu pee klaalo kɛ daa si ngɛ sinya a nya. Se benɛ wa bli ɔ, wa nɛ bɔfo ɔmɛ a ti nɔ ko nɔ ko!” 24Benɛ osɔfo nikɔtɔma amɛ, kɛ sɔlemi we ɔ asafoatsɛ ɔ nu kikɛmɛ a munyu nɛ ɔ, a hɛ mi pee mɛ yaa, nɛ a li nɔ nɛ a ma de. 25Kɛkɛ nɛ nɔ ko ba de mɛ ke, “Nyɛ le nɔ́ ko! Ni ɔmɛ nɛ nyɛ nuu wo tsu ɔ, a daa si ngɛ ma a ní tsɔɔe ngɛ sɔlemi we ɔ.” 26Kɛkɛ nɛ asafoatsɛ ɔ, kɛ e we bi ɔmɛ ya ngɔ bɔfo ɔmɛ kɛ ba. A pee we mɛ soisoi, ejakaa a ngɛ gbeye yee kaa ma a maa fia mɛ tɛ.

27A ngɔ bɔfo ɔmɛ kɛ ba da kpe ngua a hɛ mi, nɛ osɔfo nɔkɔtɔma pe kulaa a ta a nya mi. 28#Mat 27.25 E bi mɛ ke, “Tse wa fia nyɛ tue mi veveeve ke nyɛ ko ngɔ Yesu biɛ kɛ tsɔɔ ní hu? Se nyɛɛ hyɛ nɔ́ nɛ nyɛ pee! Nyɛ ha nɛ nihi tsuo nɛ ngɛ Yerusalem ɔ nu nyumu nɛ ɔ he sane nɛ nyɛ ngɛ hlae nɛ nyɛɛ tsɔɔ kaa wɔ nɛ wa gbe lɛ!”

29Petro, kɛ bɔfo kpa amɛ he nɔ ke, “E sa kaa waa bu Mawu mohu tue, se pi nimli. 30Yesu nɛ nyɛ sɛu ngɛ tso nɔ nɛ nyɛ gbe lɛ ɔ, wa nɛmɛ a Mawu ɔ tle lɛ si. 31Mawu wo e nɔ, nɛ e ngɔ lɛ kɛ to e hiɔ nɔ, nɛ e pee lɛ hɛ mi nyɛɛlɔ, kɛ kpɔlɔ, konɛ Israel bi nɛ a ná he blɔ nɛ a tsake a tsui, nɛ a ngɔ a he yayami ɔmɛ kɛ pa mɛ. 32Wa ngɛ kikɛmɛ a sane nɛ ɔmɛ a he odase yee; nɛ Mumi Klɔuklɔu ɔ nɛ Mawu kɛ dloo nihi nɛ buɔ lɛ tue ɔ ngɛ odase yee ja nɔuu.”

33Benɛ kpe ngua a mi bi ɔmɛ nu munyu nɛ ɔ, e wo a mi mi la wawɛɛ nitsɛ, nɛ e pee mɛ kaa a gbe bɔfo ɔmɛ. 34Se a ti nɔ kake nɛ a tsɛɛ lɛ Gamaliel ɔ te da si. Farisi no, kɛ mlaa tsɔɔlɔ nɛ ma a buu saminya ji lɛ. Gamaliel fa ke a je bɔfo ɔmɛ kpo bɔɔ; 35nɛ e de sihi he ɔ ke, “Sane nɛ nyɛɛ kɛ nimli nɛ ɔmɛ ngɛ yee nɛ ɔ, nyɛɛ hyɛ saminya. 36Nyɛ kai kaa be bɔɔ ko pɛ ji nɛ nɛ Teuda wo e he nɔ ke nɔ ko ji lɛ, nɛ nyumuhi maa pee lafa eywiɛ ya nyɛɛ e se. Se a gbe lɛ, nɛ e we bi ɔmɛ tsuo gbɛ fĩa nɛ a kpe ɔ nya ya hɛ si. 37E se ɔ, Yuda, Galilea no ɔ hu ba benɛ a ngɛ nihi kanee ɔ. E ba gbla nihi kɛ nyɛɛ e se, se lɛ hu e hɛ mi kpata, nɛ e we bi ɔmɛ tsuo gbɛ fĩa. 38Lɔ ɔ he ɔ, sane nɛ ɔ mi hu, ga nɛ i ngɛ nyɛ woe ji nyɛ ko pee nimli nɛ ɔmɛ nɔ́ ko; nyɛɛ ngmɛɛ a he nɛ a ho. Ke yi mi nɛ a to, kɛ nɔ́ nɛ a ngɛ tsue nɛ ɔ, adesa dɛ mi nɛ e je ɔ, e be he ko sue. 39Se ke Mawu dɛ mi nɛ e je ɔ, nyɛ be Mawu nɔ nyɛe maa ye. Nyɛ ko ba pee nyɛ he kaa nihi nɛ a kɛ Mawu ngɛ ta hwue!”

Kpe ngua a ngɔ Gamaliel ga womi ɔ. 40A tsɛ bɔfo ɔmɛ kɛ ba, nɛ a ha nɛ a fia mɛ kpa. A bɔ mɛ kɔkɔ hulɔ ke a ko fiɛ kɛ Yesu biɛ hu; kɛkɛ nɛ a ngmɛɛ a he. 41Bɔfo ɔmɛ je kpe ngua a hɛ mi kɛ ho kɛ bua jɔmi kaa Yesu biɛ ɔ he ɔ, Mawu bu mɛ nihi nɛ sa kaa a bɔ mɛ ahlua. 42Daa ligbi ɔ, a tsɔɔ ní, nɛ a fiɛɔ sane kpakpa a nɛ kɔɔ Yesu Kristo he ɔ ngɛ sɔlemi we ɔ, kɛ nihi a wehi a mi.

Currently Selected:

Ni Tsumi 5: Dangme

Highlight

Copy