Ni Tsumi 3

A tsa glɔtsɛ ko

1Ligbi ko piani ngmlɛ etɛ sɔlemi be ɔ, Petro kɛ Yohane nyɛɛ kɛ yaa sɔlemi we ɔ. 2Nyumu ko nɛ kplɔ kɛ je e fɔmi mi hii si ngɛ sɔlemi we ɔ we agbo nɛ a tsɛɛ Agbo Saminyayoo ɔ nya ngɛ lejɛ ɔ. Daa ligbi ɔ, a woɔ nyumu nɛ ɔ kɛ baa agbo ɔ nya, nɛ e ba baa ní ngɛ nihi nɛ yaa sɔlemi we ɔ a dɛ. 3Benɛ e na Petro kɛ Yohane nɛ a yaa sɛ sɔlemi we ɔ, e ba mɛ ní. 4Se Petro kɛ Yohane hyɛ lɛ too; nɛ Petro de lɛ ke, “Hyɛ wa hɛ mi!” 5Kɛkɛ nɛ glɔtsɛ ɔ hyɛ mɛ gaa, nɛ e hyɛ blɔ kaa e ma ná nɔ́ ko kɛ je a dɛ. 6Se Petro de lɛ ke, “I be sika hiɔ, loo sika tsu, se nɔ́ nɛ i ngɛ ɔ, lɔ ɔ i ngɛ mo hae nɛ ɔ nɛ. Ngɛ Yesu Kristo, Nazaret no ɔ biɛ mi ɔ, tee si nɛ o nyɛɛ!” 7Kɛkɛ nɛ Petro nu glɔtsɛ ɔ hiɔ nine, nɛ e wo e nɔ da si. Amlɔ ɔ nɔuu ɔ, glɔtsɛ ɔ nane kɛ e kpɔji nya amɛ a mi wa lɛ; 8e hlu da si, nɛ e bɔni nyɛɛmi. Jehanɛ e nyɛɛ a se kɛ ya sɛ sɔlemi we ɔ, nɛ jamɛ a be ɔ tsuo ɔ, e ngɛ hlue nɛ e ngɛ Mawu yi jee. 9Nihi tsuo nɛ ngɛ lejɛ ɔ na lɛ nɛ e ngɛ nyɛɛe nɛ e ngɛ Mawu yi jee. 10Benɛ a kpá si kaa lɛ ji nɔ nɛ jinɛ e hii si ngɛ sɔlemi we ɔ Agbo Saminyayoo ɔ nya, nɛ e hii nɔ́ bae ɔ, a he mi po, nɛ a nya kpɛ a he saminya ngɛ nɔ́ nɛ ba a he.

Munyu nɛ Petro tu ngɛ sɔlemi we ɔ

11Nyumu ɔ mɛtɛ Petro kɛ Yohane a he kɛ mwɔɔ ngɛ ablanaa nɛ a tsɛɛ Salomo Ablanaa a nɔ. Nɔ́ nɛ ɔ pee ni ɔmɛ nyakpɛ, nɛ mɛ tsuo a bu kɛ ba e ngɔ. 12Benɛ Petro na ni ɔmɛ ɔ, e de mɛ ke, “Ye nyɛmimɛ Israel fɔfɔɛhi, mɛni he je nyɛ hɛ mi pee nyɛ yaa? Mɛni he je nyɛ ngɛ wɔ hyɛe gaa kikɛ nɛ ɔ? Nyɛ susu kaa wɔ nitsɛmɛ wa he wami, aloo wa Mawu nɛ wa jaa saminya he je nɛ nyumu nɛ ɔ ngɛ nyɛɛe nɛ ɔ? 13#Mose II, 3.15 Wa nɛmɛ Abraham, Isak, kɛ Yakob a Mawu ɔ wo e tsɔlɔ Yesu hɛ mi nyami. Se nyɛɛ lɛɛ nyɛ je lɛ ngɔ ha, nɛ nyɛ kua lɛ ngɛ Pilato hɛ mi, be mi nɛ lɛɛ e pee e juɛmi kaa e maa ngmɛɛ e he ɔ. 14#Mat 27.15-23; Mar 15.6-14; Luk 23.13-23; Yoh 19.12-15 Nyɛɛ lɛɛ nyɛ kua nɔ klɔuklɔu ɔ nɛ dami sane pɛ e yeɔ ɔ, nɛ nyɛ kpa pɛɛ ke a ngmɛɛ awi yelɔ mohu he ngɔ ha nyɛ. 15Wami matsɛ ɔ, nyɛ gbe lɛ. Se Mawu tle lɛ si kɛ je gbeje; lɔ ɔ nɔuu he odase yeli ji wɔ. 16E he wami nya nɛ a tsa glɔtsɛ nɛ ɔ nɛ. Nɔ́ nɛ nyɛ ngɛ hyɛe, kɛ nɔ́ nɛ nyɛ ná le nɛ ɔ, a nyɛ́ pee akɛnɛ a heɔ lɛ yeɔ. E he Yesu ye, lɔ ɔ he nɛ e na he wami kaa bɔ nɛ nyɛ tsuo nyɛ ngɛ hyɛe ɔ nɛ.

17“Jehanɛ ye nyɛmimɛ, i le kaa nɔ́ nɛ nyɛɛ kɛ nyɛ hɛ mi nyɛɛli ɔmɛ pee Yesu ɔ, pe nyɛ li nɛ nyɛ pee. 18Se nɔ́ nɛ Mawu de to momo kɛ gu e gbali ɔmɛ tsuo a nɔ kaa Kristo maa na amanehlu ɔ, ha e ba mi ja niinɛ. 19Lɔ ɔ he ɔ, nyɛ tsake nyɛ tsui, nɛ nyɛɛ kpale nyɛ se kɛ ba Mawu ngɔ, konɛ a ngɔ nyɛ he yayami ɔmɛ kɛ pa nyɛ. 20Kɛkɛ ɔ, mumi mi he wami maa je Nyɔmtsɛ ɔ ngɔ kɛ ba; e maa tsɔ Yesu Kristo, nɔ nɛ e hla ngɔ to ha nyɛ momo ɔ. 21E sa kaa e ya hi hiɔwe kɛ yaa su be nɛ a maa pee níhi tsuo ehe. Mawu tu nɔ́ nɛ ɔ he munyu kɛ gu e gbali klɔuklɔu ɔmɛ a nɔ blema lokoo. 22#Mose V, 18.15, 18 Ejakaa Mose de ke, ‘Nyɔmtsɛ nyɛ Mawu ɔ ma tle gbalɔ ko si kaa imi kɛ maa je nyɛ nyɛmimɛ ɔmɛ a kpɛti ngɔ ha nyɛ. Nyɛɛ bu lɛ tue, nɛ nyɛɛ pee nɔ́ tsuaa nɔ́ nɛ e ma de nyɛ ke nyɛɛ pee. 23#Mose V, 18.19 Nɔ tsuaa nɔ nɛ be jamɛ a gbalɔ ɔ tue bue ɔ, a ma je lɛ kɛ je Mawu bimɛ ɔmɛ a kpɛti, nɛ a ma kpata e hɛ mi.’ 24Gbali ɔmɛ tsuo nɛ ná sɛ gbi, kɛ je Samuel nɔ kɛ ya si nihi tsuo nɛ ba ngɛ e se ɔ a nɔ ɔ, níhi nɛ ngɛ bae ngɛ wa be nɛ ɔmɛ a mi ɔ hu a wo nɔ ta. 25#Mose I, 22.18 Si nɛ Mawu wo kɛ gu gbali ɔmɛ a nɔ ɔ, nyɛ nɔ́, nɛ somi nɛ Mawu kɛ nyɛ nɛmɛ ɔmɛ so ɔ, nyɛ piɛ he. Bɔ nɛ e de Abraham ji, ‘Ma gu o nina nɔ nɛ ma gbaa nimli tsuo ngɛ zugba a nɔ.’ 26Lɔ ɔ he ɔ, Mawu hla e tsɔlɔ ɔ, nɛ e maa tsɔ lɛ nyɛ ngɔ kekle, konɛ e ba gbaa nyɛ, nɛ e kpale nyɛ ti nɔ tsuaa nɔ kɛ je e blɔ yayami ɔmɛ a nɔ.”

Currently Selected:

Ni Tsumi 3: Dangme

Highlight

Copy