Maak 9

1Ka o yɛli ba, “Yɛlimaŋli ka n yɛri ya, ninvuɣ’ shɛb’ be kpe ka ku kpi hal ka bɛ nini ti nya ka Naawuni nam kana ni yiko.”

Yisa niŋgbuŋ biɛhigu taɣibu

(Matiu 17.1-13; Luk 9.28-36)

2 # 2 Pita 1.17-18 Di daba ayɔbu nyaaŋa ka Yisa daa zaŋ Pita mini Jeemsi ni Jɔn pah’ omaŋ’ zuɣu du zo’ shɛli din du pam zuɣu bɛ kɔŋko; bɛ nini maa ni ka Yisa niŋgbuŋ biɛhigu daa taɣi. 3Ka o binyɛrigu mi paligi paratɛte kaman gol’ la; ka chib’ shɛli ka dunia ŋɔ ni din ni tooi paɣ’ li ka di piɛl’ lala. 4Ka bɛ daa nya ka Anabi Ilaija mini Anabi Musa puhi zan’ o sani, ka bɛ min’ o tɔɣisiri yɛtɔɣa. 5Ka Pita yɛli Yisa, “Karimba, di viɛli ni ti be kpe. Chɛ ka ti ti suɣa ata: A zaɣ’ yini; Anabi Musa zaɣ’ yini; Anabi Ilaija mi zaɣ’ yini.” 6O daa lan ʒila o ni yɛn yɛli shɛm, dama dabiɛm daa kpe ba hal ti yaɣi.

7 # Mat 3.17; Maak 1.11; Luk 3.22 Ka sagban’ shɛli daa sirigina ti lim ba, ka bɛ wum ka kukol’ shɛli yɛri sagbani maa ni, “M Biyurigu m-bɔŋɔ! Wummiy’ o noli!” 8Ka bɛ dii ŋmaligi lihi bɛ luɣa zuɣu, ka bi lan nya so naɣ’ pahila Yisa ko.

9 # Mal 4.5; Mat 11.14 Bɛ ni daa yi zoli maa zuɣu siɣirina, ka Yisa kpahi bɛ zuɣu ni yɛli, “Miriya ka yi yɛli so yi ni nya shɛli maa yɛla, faashee Daadam Bia kum ni neebu nyaaŋa.”

10Ka bɛ daa zaŋ yɛlli maa niŋ bɛ suhuri ni, ka bɔhiri taba kum ni neebu maa gbinni ni nyɛ shɛm. 11Dimbɔŋɔ nyaaŋa ka bɛ daa bɔhi Yisa, “Mami Naawuni zaligubaŋdib’ yɛli ni Anabi Ilaija n-yɛn daŋ kandina?”

12Ka o garigi yɛli ba, “Di shiri simdi ni Anabi Ilaija daŋ na nti mali binshɛɣukam zali di zaani.” Ka ŋmaligi bɔhi ba, “Ka wula ka di sabi ni faashee Daadam Bia bahi di wahala balibu kam ka bɛ lan ʒiɛm o? 13N yɛri ya mi, Anabi Ilaija pun kana, ka bɛ daa niŋ o bɛ suhu ni yu shɛm kaman di ni daa sab’ o yɛla shɛm la.”

Alizin’ biɛɣu karibu yɛla

(Matiu 17.14-21; Luk 9.37-43a)

14Yisa mini Pita ni Jeemsi ni Jɔn daa ti paai Yisa nyaandol’ bɛn’ la sani nya ka salo pam n-laɣim gil’ ba, ka Naawuni zaligubaŋdib’ ŋmɛr’ o nyaandoliba maa naŋgbankpeeni. 15Salo maa ni daa nya o maa ka di gari ba pam, ka bɛ dii zɔri chan’ o sani ti puhir’ o. 16Ka o bɔhi ba, “Bɔ naŋgbankpeeni ka yi lee ŋmɛri maa?”

17Ka salo maa ni yino yɛl’ o, “Karimba, alizin’ birigu n-ʒi m bia zuɣu, ka n zaŋ o tah’ a sanna. 18O yi ti yiɣis’ o luɣ’ shɛlikam, o luhir’ o mi ka nintɔfuɣifuɣi ŋarit’ o noli, ka o ŋubir’ o nyina ka kpaŋ dilinli; ka n suhi a nyaandoliba ŋɔ ni bɛ kari alizin’ birigu maa, ka bɛ bi tooi.”

19Ka Yisa bɔhi ba, “Yinim’ bɛn ka yɛda ʒiɛmannim’ ŋɔ, daba ala ka m mini ya lee yɛn tooi laɣim be bee daba ala ka n yɛn tooi din ya suɣilo?” Ka yɛli ba, “Zaŋmiy’ o na!” 20Ka bɛ zaŋ o na.

Alizin’ birigu maa ni daa nya Yisa ka o dii yiɣisi bia maa, ka o lu m-bilinda, ka nintɔfuɣifuɣi ŋar’ o noli. 21Ka Yisa daa bɔhi bia maa ba, “Bɔ saha ka di piligi niŋd’ o lala?”

Ka o yɛl’ o, “O bilim ni.” 22Ka lan yɛli, “Alizin’ birigu maa kul luhir’ o la waawaayili; ka o luri buɣim ni, shɛlini mi kom ni ni o di o nyɛvili. Ka a yi ni tooi sɔŋ ti, nyin’ zom’ ti nambɔɣu sɔŋ ti!”

23Ka Yisa bɔh’ o, “Bɔ n-niŋ ka a yɛli ni n yi ni tooi? A bi mi ni binshɛɣukam zaa nandi ŋun niŋ yɛda sani?”

24Ka bia maa ba daa kuhi ni nintam yɛli, “N Duuma, n niŋ yɛda; ka n yɛda niŋbu ni pooi shɛli ni, nyin’ sɔŋm’ ma di puuni!”

25Yisa ni daa nya ka salo kabiri laɣindina maa, ka o tah’ alizin’ birigu maa zuɣu yɛli, “Nyin’ alizin’ tikpiralan’ birigu ŋɔ, n yɛr’ a mi, wari ka chɛ bia maa, ka di lan lab’ o sanna yaha!”

26Ka alizin’ birigu maa kuhi, ka lan yiɣisi bia maa pam ka naanyi zo ka chɛ o; ka bia maa be kaman o kpimi la hal ka sokam tɛhi ni o shiri kpimi. 27Ka Yisa daa gbaai bia maa nuu ni yiɣis’ o ʒili, ka o yiɣisi zani.

28Yisa ni daa ti kpe o yilikpɛrili ka o nyaandoliba bɔh’ o ashilɔni, “Ka bɔ n-niŋ ka tinim’ di bi tooi kari alizin’ birigu maa bahi?”

29Ka o yɛli ba, “Di yi pala wunsuhigu mini nolɔbo zuɣu so ku tooi kari alizini ŋɔ tatabo.”

Yisa lan yɛli o kum yɛla yaha

(Matiu 17.22-23; Luk 9.43b-45)

30Ka Yisa min’ o nyaandoliba daa yiɣisi ni doli Galili tiŋgbɔŋ polo. Ka o bi bɔri ni so baŋ ni o be nimaani, 31dama o daa wuhirila o nyaandoliba yɛri ba, “Bɛ ni ti zaŋ Daadam Bia niŋ salinim’ nuu ni ka bɛ ti ku o; amaa bɛ yi ti ku o, o ni ti neei kum ni daba ata dali.”

32Ka o nyaandoliba maa daa bi baŋ o ni yɛli shɛm maa gbinni, amaa ka mi daa lee zɔr’ o suhu ni bɛ bɔh’ o baŋ.

Toondaantali yɛla

(Matiu 18.1-5; Luk 9.46-48)

33Ka Yisa min’ o nyaandoliba maa daa ti paai Kapɛrinium nti kpe duu ka o bɔhi ba, “Bɔ naŋgbankpeeni ka yi di lee ŋmɛri sol’ ni la?”

34 # Luk 22.24 Ka bɛ fo, dama bɛ daa ŋmɛrila tab’ naŋgbankpeeni sol’ ni ni bɛ baŋ ŋun gar’ o kpee bɛ ni. 35#Mat 20.26-27; 23.11; Maak 10.43-44; Luk 22.26 Ka o daa ʒini ka boli bɛ pinaayi maa na ti yɛli ba, “Ŋun bɔri ni o gari sokam zaa, ŋun’ zaŋm’ omaŋ’ leei bia sokam zaa sani, ka zaŋ omaŋ’ leei sokam zaa dabili.” 36Ka o daa zaŋ bibil’ so na nti zali bɛ sunsuuni n-kpuɣ’ o buɣi ka yɛli ba, 37#Mat 10.40; Luk 10.16; Jɔn 13.20 “Ŋunkam deeri bibil’ ŋɔ tatabo n yuli zuɣu deeri la mani; ka ŋunkam mi deeri ma, pa mani ka o deera, amaa ŋun tim ma na ka o deera.”

Ŋun bi galindi ti bela ti polo

(Luk 9.49-50)

38Ka Jɔn daa yɛli Yisa, “Karimba, ti nyala so ka o mal’ a yuli karit’ alizin’ biɛri, ka ti kar’ o, o ni pa ti ni yino zuɣu.”

39Ka Yisa yɛli, “Di karitiy’ o; dama so kani ŋun ni tooi zaŋ n yuli tum alahiziba tuma ka dii lan ŋmaligi galim’ ma, 40#Mat 12.30; Luk 11.23 dama ŋunkam bi galindi ti bela ti polo. 41#Mat 10.42 Yɛlimaŋli ka n yɛri ya, ŋunkam tin ya ko’ mahim biɛla yi ni nyɛ Masia nyaandoliba la zuɣu, o ti ku kɔŋ di laara.”

Din chɛ ka salinim’ tumd’ alahichi

(Matiu 18.6-9; Luk 17.1-2)

42Yisa daa lan yɛli, “Ŋunkam mi chɛ ka bibihi bɛn niŋ ma yɛda ŋɔ ni yino birigi, bɛ yi di zaŋ nɛ’ karili lo dilan’ nyiŋgol’ ni zaŋ o bahi teeku ni di naan so o zuɣu. 43#Mat 5.30 Ka a nuu yi chɛ ka a yɛn birigi tum alahichi, nyin’ ŋmaam’ li bahi, dama a yi kɔŋ a nu’ yini ka ti be, di so ni a mali nuh’ ayi ka ti kpe buɣim din bi kpiri ni [ 44luɣ’ shɛli zunzuya ni bi kpira, ka buɣim mi bi kpiri ni.] 45Ka a napɔŋ yi chɛ ka a yɛn birigi tum alahichi, nyin’ ŋmaam’ li bahi, dama a yi kɔŋ a napɔn yini ka ti be, di so ni a mali napɔna ayi ka bɛ ti zaŋ a kpɛhi buɣim din bi kpiri ni, [ 46luɣ’ shɛli zunzuya ni bi kpira, ka buɣim mi bi kpiri ni.] 47#Mat 5.29 Ka a nimbil’ mi yi chɛ ka a yɛn birigi tum alahichi, nyin’ kpaɣim’ li, dama a yi kɔŋ a nimbil’ yini ka ti kpe Naawuni nam ni, di so ni a mali nina ayi ka bɛ ti zaŋ a kpɛhi buɣim ni, 48#Aiz 66.24 luɣ’ shɛli zunzuya ni bi kpira, ka buɣim mi bi kpiri ni.

49 Bɛ ni ti zaŋ buɣim kaman yalim zim la yuɣisi sokam zuɣu, ka ti niŋ yalim yuɣisi sara kam gba zuɣu. 50#Mat 5.13; Luk 14.34-35 Yalim nyɛla bin’ suŋ; amaa ka yalim yi ti niŋ piti, wula ka yi lee yɛn niŋ chɛ ka di lan nyaɣisi yaha? Chɛliya ka yalim be yi ni, ka yi mali suhu yini ni taba.”

Currently Selected:

Maak 9: DBwDB

Highlight

Copy