Maak 1

Jɔn Baptaizira waazu molo molibu

(Matiu 3.1-12; Luk 3.1-18; Jɔn 1.19-28)

1Naawuni Bia Yisa Masia lahibal’ suŋ m-bɔŋɔ. 2#Mal 3.1 Di piligimi kaman Anabi Aizaia ni daa sab’ shɛm la ni Naawuni yɛliya:

“N tumo m-bɔŋɔ;

n ni tim o ka o daŋ a tooni

nti mal’ a chandi maa soli ti a.

3 # Aiz 4.3 Ninvuɣ’ so ni ti be mɔɣu ni mooni molo yɛra,

‘Malimiya ti Duuma kandina soli gu o,

ka mal’ o soya ka di tuhi.’ ”

4Jɔn Baptaizira daa bela mɔɣu ni yihiri waazu yɛri niriba, “Niŋmiya tuuba, ka m baptaizi ya kom ni, ka Naawuni kpihim yi daalahichi.” 5Ka Judianim’ mini Jɛrusalɛmnim’ zaa daa kabi chaŋ o sani nti kaŋka bɛ daalahichi ka o naanyi baptaizi ba Jɔɔdɛn mɔɣili ni.

6 # 2 Nan 1.8 Jɔn Baptaizira daa yɛrila laakum kɔbiri binyɛrigu, ka mali gbaŋ lɔr’ o shee ni, ka o bindirigu daa nyɛla toli mini shiri. 7Ka o daa mooni molo yɛra, “Ŋun na be n nyaaŋa kanna mali yiko gari ma hal ka man’ pɔri gba ni n ti damd’ o tooni gbaag’ o namda mal’ o ka o pirigi. 8Kom ni ka man’ baptaiziri ya, amaa ŋun’ ni ti zaŋla Naawuni Shia Kasi baptaizi ya.”

Yisa baptaizibu deebu mini Sintani ni zahim o shɛm

(Matiu 3.13—4.11; Luk 3.21-22; 4.1-13)

9Di saha maa ka Yisa daa yi Nazarɛt Galili tiŋgbɔŋ ni ka Jɔn Baptaizira sanna ka Jɔn ti baptaiz’ o Jɔɔdɛn mɔɣili ni. 10Yisa ni daa ti puhiri yiri kom maa ni na, o dii nyami ka zuɣusaa bɔɣi, ka Naawuni Shia Kasi yi zuɣusaa na kaman ŋmani la nti tam o zuɣu. 11#Pil 22.2; Yila 2.7; Aiz 42.1; Mat 3.17; 12.18; Maak 9.7; Luk 3.22 Ka kukol’ shɛli daa yi zuɣusaa na yɛra, “M Biyurigu n-nyɛ a; n nini tiɣ’ a pam.”

12Di saha maa ka Naawuni Shia Kasi daa dii zaŋ Yisa tahi mɔɣu ni. 13Ka o daa be mɔɣu maa ni biɛɣ’ pihinahi, ka Sintani daa ti zahim o. Yisa mini mɔɣu ni biŋkɔbiri n-daa be mɔɣu maa ni, ka malaikanim’ daa kanna nti kpaŋsir’ o suhu.

Yisa boli kulipalinima anahi

(Matiu 4.12-22; Luk 4.14-15; 5.1-11)

14Naa Hɛrɔd ni daa gbaai Jɔn Baptaizira kpɛhi duu saha shɛl’ la nyaaŋa ka Yisa daa ka Galili tiŋgbɔŋ ni na nti yihiri Naawuni lahibal’ suŋ waazu 15#Mat 3.7 yɛra, “Saha paaya, ka Naawuni nam gba mirina; dinzuɣu niŋmiya tuuba ka niŋ lahibal’ suŋ ŋɔ yɛda.”

16Yisa daa ti baɣisiri Galili Teeku chana nti nya Saimɔn min’ o tizo Anduru, ka bɛ labiri laŋa teeku ni, dama bɛ daa nyɛla kulipalinima. 17Ka o yɛli ba, “Doliya ma, ka n chɛ ka yi booni ninsalinim’ tiri Naawuni kaman yi ni gbahiri zahim shɛm maa.” 18Ka bɛ daa dii chɛ bɛ lansi maa ka dol’ o.

19Ka o daa lan tirisi tooni biɛla ha nti nya Zɛbidii bihi Jeemsi min’ o tizo Jɔn, ka bɛ be ŋariŋ ni liɣiri bɛ lansi. 20Ka o dii boli bɛ gba, ka bɛ chɛ bɛ ba Zɛbidii min’ o tumtumdiba ŋariŋ maa ni ka dol’ o.

Alizin’ biɛɣu ni ʒi do’ so zuɣu yɛla

(Luk 4.31-37)

21Ka Yisa mini ba daa chaŋ ti kpe fɔntin’ shɛli din yuli booni Kapɛrinium la, ka Vuhim Dabisili dali daa ti paai ka o kpe Yɛhudianim’ jɛmbu duu nti gbaai niriba wuhibu. 22#Mat 7.28-29 O ni daa wuhiri ba shɛm maa daa gari bɛnkam wum li pam; dama o daa wuhiri ba mi kaman ninvuɣ’ so ŋun su fukumsi, ka pa ni Naawuni zaligubaŋdiba ni daa wuhiri ba shɛm la.

23Di saha ka alizin’ biɛɣu ni daa ʒi do’ so zuɣu daa dii kpe bɛ jɛmbu duu maa ni na nti kuhi bɔhi, 24“Ti min’ a bɔ ni, nyin’ Yisa Nazarɛt nir’ ŋɔ? A kamina ni a ti bahi ti yoli? M mi a ni nyɛ so: A nyɛla Naawuni Ninvuɣ’ Suŋ so o ni timna.”

25Ka Yisa daa tahi alizin’ biɛɣu maa zuɣu, “Fom’ a noli ka wara!”

26Ka alizin’ biɛɣu maa daa luhi doo maa, ka kuhi pam ka naanyi chaŋ ka chɛ o. 27Ka di daa niŋ niriba maa zaa alahiziba pam ka bɛ bɔhiri taba, “Bɔ n-lee bɔŋɔ? Wuhiri palli m-bala! Doo ŋɔ mali yiko mi hal ka alizin’ biɛri ti deer’ o noli!”

28Ka o yɛla daa dii moli gili Galili tiŋgbɔŋ maa ni zaa.

Yisa barinim’ tibbu yɛla

(Matiu 8.14-17; Luk 4.38-41)

29Di saha maa ka Yisa daa yi Yɛhudianim’ jɛmbu duu maa ni na, ka o mini Jeemsi ni Jɔn daa chaŋ ti kpe Saimɔn mini Anduru yiŋa. 30Ka Saimɔn deempaɣa niŋgbuŋ daa bii ka o doya, ka bɛ daa dii yɛli Yisa o niŋgbun’ biisim maa yɛla. 31Ka Yisa daa chaŋ ti gbaag’ o nuu ni yiɣis’ o ʒili; ka o niŋgbun’ biisim maa dii maai, ka o yiɣisi niŋ ba saani.

32Dindali maa zaawun’ yuŋ ka niriba daa tahi barinim’ mini alizin’ biɛri ni ʒi ninvuɣ’ shɛb’ zuɣu zaa Yisa sanna. 33Ka tiŋ’ maa nim’ zaa daa laɣimna nti muɣi dunoli. 34Ka o daa chɛ ka dɔro balibu kam ni mali ninvuɣ’ shɛb’ pam kpaŋ, ka daa kari alizin’ biɛri niriba pam zuɣu bahi, ka bi saɣi ni alizin’ biɛri maa yɛli shɛli, dama bɛ daa mi o ni nyɛ so.

Yisa yihi waazu Galili

(Luk 4.42-44)

35Ka Yisa daa ti daŋ yibu nolɔɣu kukoli saha chaŋ mɔɣu ni ni o ti suhi Naawuni. 36Ka Saimɔn min’ o tab’ la daa chani bɔr’ o shee 37nti nya o yɛl’ o, “Sokam kul lihiri bɔrila a shee.”

38Ka o yɛli ba, “Chɛliya ka ti chaŋ tin’ shɛŋa din be tooni ŋɔ ha ka n ti yihi waazu nimaani gba; dama di zuɣu ka n kana.”

39 # Mat 4.23; 9.35 Ka o daa gɔri gindi Galili tiŋgbɔŋ ni zaa yihiri waazu Yɛhudianim’ jɛmbu duri ni, ka kariti alizin’ biɛri bahira.

Yisa tibi kɔŋlana

(Matiu 8.1-4; Luk 5.12-16)

40Ka kɔŋlan’ so daa ka Yisa sanna nti damd’ o tooni m-balind’ o yɛra, “A yi di saɣi, a naan chɛ ka n kɔŋ’ ŋɔ naai ka n kpe n tab’ ni.

41Ka nambɔɣu daa gbaai Yisa, ka o teeg’ o nuu shih’ o ka yɛl’ o, “N saɣiya; di naama!” 42Ka doo maa kɔŋ’ maa daa dii naai, ka o niŋgbuŋ lan lab’ di bebu ni zaa. 43Ka Yisa kpah’ o zuɣu ni viɛnyɛliŋga, ka dii bah’ o ni o chama 44#Lɛv 14.1-32 ka yɛl’ o, “Miri ka a yɛli so di yɛla; amaa cham’ ti zaŋ amaŋ’ wuhi maligumaana, ka mali sara shɛli Anabi Musa ni daa sab’ zali zaŋ chaŋ kɔŋ’ tibbu polo la; dina n-ni niŋ a kpaŋbu maa shɛhira niriba sani.”

45Amaa ka doo maa daa chaŋ ti mol’ o kpaŋbu maa yɛla gili luɣilikam, dina n-daa chɛ ka Yisa ku lan tooi yi palɔni kpe tiŋ’ kam ni yaha, amaa ka kul bela mɔɣu ni, ka niriba yiri luɣ’ shɛlikam chan’ o sani.

Currently Selected:

Maak 1: DBwDB

Highlight

Copy