Jɔn 20

Yisa siliga kpalim zaɣ’ kuŋ

(Matiu 28.1-8; Maak 16.1-8; Luk 24.1-12)

1Bakɔi piligu dali asibaasi, di ni daa na bi neei zaa saha shɛli ka Mariama ŋun daa yi Magdala na la daa chaŋ siliga maa gbini nti nya ka kuɣili din daa yo siliga maa nol’ la biligimi doya. 2Ka o daa zo n-chaŋ Saimɔn Pita mini nyaandol’ so Yisa ni daa yuri la sani nti yɛli ba, “Bɛ yihi ti Duuma siliga la ni, ka ti bi mi bɛ ni zaŋ o ti sɔŋ luɣ’ shɛli.”

3Ka Pita mini nyaandol’ ŋun’ maa daa yina n-zaŋ kpa siliga maa polo. 4Bɛ niriba ayi maa daa kul zɔrimi, ka nyaandol’ ŋun’ maa daa zo ŋ-ŋma Pita zuɣu daŋ siliga maa gbini 5nti kurim lihi di ni nya ka bimpiɛlli doya, amaa ka o lee bi kpe di ni. 6Ka Saimɔn Pita daa dol’ o nyaaŋa paana ti kpe siliga maa ni n-nya ka bimpiɛlli maa doya, 7ka bantabiga din daa vili Yisa zuɣu la gba kpabikpabi do di ko ha ka chɛ bimpiɛlli maa. 8Di saha ka nyaandol’ so ŋun daa daŋ siliga maa gbini paabu la gba kpe di ni nti nya ka niŋ yɛda. 9Amaa bɛ daa na kul bi baŋ Naawuni Kundi ni yɛli ni o ni ti neei kum ni la gbinni. 10Di saha ka o nyaandoliba ayi maa daa ŋmaligi kuli bɛ yinsi.

Yisa yi Mariama Magdala nir’ la zuɣu

(Matiu 28.9-10; Maak 16.9-11)

11Amaa ka Mariama ŋun’ daa kpalim ʒe siliga maa gbini kumda. O ni daa kumdi maa ka o ti vɔbisi lihi siliga maa puuni 12n-nya malaikanim’ ayi ka bɛ ye binyɛr’ piɛla n-ʒi Yisa ni daa do luɣ’ shɛl’ la: Yino o zuɣu polo, ŋun’ la mi o naba polo. 13Ka bɛ bɔh’ o, “Paɣa, bɔ n-niŋ ka a kumda?”

Ka o yɛli ba, “Bɛ yihila n Duuma, ka m bi mi bɛ ni zaŋ o ti sɔŋ luɣ’ shɛli.”

14O ni daa yɛl’ lala maa, ka ŋmaligi lih’ o nyaaŋa n-nya Yisa ka o ʒiɛya, amaa ka o lee bi baŋ ni Yisa m-bala. 15Ka Yisa bɔh’ o, “Paɣa, bɔ n-niŋ ka a kumda? Ŋuni ka a bɔra?”

Mariama daa tɛhiya ni puu maa lana m-bala ka yɛl’ o, “N dana, nyini n-yi yih’ o, nyin’ wuhim’ ma a ni zaŋ o ti sɔŋ luɣ’ shɛli, ka n chaŋ ti zaŋ o.” 16Ka Yisa bol’ o, “Mariama!”

Ka o ŋmalig’ o polo ka yɛli Hiburuli ni, “Rabɔni!” Di gbinni nyɛla, “Karimba.”

17Ka Yisa yɛl’ o, “Di shihi ma; dama n na bi chaŋ m Ba sani. Amaa cham’ m mabihi la sani nti yɛli ba ni n chanila m Ba ŋun nyɛ yi gba Ba la ni n Naawuni ŋun nyɛ yi gba Naawuni la sani.”

18Ka Mariama ŋun daa nyɛ Magdala tiŋbia maa daa chaŋ ti yɛli Yisa nyaandoliba maa, “N nya ti Duuma!” Ka yɛli ba Yisa ni daa yɛl’ o shɛm la zaa.

Yisa yi o nyaandoliba zuɣu

(Matiu 28.16-20; Maak 16.14-18; Luk 24.36-49)

19Bakɔi piligu dali maa zaawun’ yuŋ ka Yisa nyaandoliba maa daa laɣim be du’ shɛl’ ni ka kpari di dunoya, dama bɛ daa zɔrila Yɛhudianima. Ka Yisa ti puhi zani bɛ sunsuuni na ka yɛli ba, “Naawuni tim’ ya suhudoo!” 20O ni daa yɛli ba lala maa, ka zaŋ o nuhi min’ o puluɣili wuhi ba, ka di niŋ o nyaandoliba maa suhupiɛlli pam bɛ ni daa nya bɛ Duuma maa zuɣu. 21Ka Yisa lan yɛli ba yaha, “Naawuni tim’ ya suhudoo! M Ba ni tim ma na shɛm, lala ka n gba timdi ya.” 22O ni daa yɛl’ lala naai maa ka o vuhi bahi bɛ polo ka yɛli ba, “Deemiya Naawuni Shia Kasi ŋɔ. 23#Mat 16.19; 18.18 Yi yi chɛ so daalahichi paŋ o, o shiri ni nya alahichi chɛ m-paŋ, amaa yi yi bi chɛ so daalahichi paŋ o, o daalahichi maa na kul ni ʒi o zuɣu.”

Yisa ni yi Tomas zuɣu shɛm

24Yisa ni daa ka o nyaandoliba maa sanna saha shɛli maa o nyaandoliba pinaayi la ni yino ŋun daa nyɛ jaa, ka o yuli booni Tomas la daa ka o tab’ maa sani. 25Ka o nyaandolitab’ maa daa ti yɛl’ o, “Ti nya ti Duuma.”

Amaa ka o yɛli ba, “Ka pa ni man’ ti nya o nuhi ni kpahi bɔba la, ka zaŋ n nubil’ bɔbili kpahi maa bɔba maa ni, ka zaŋ n nuu tim o puluɣili la bɔbili la ni, n ku niŋ yɛda.”

26Ka di daa mali ti kpa di naba dali yaha, ka o nyaandoliba maa lan laɣim be duu puuni, ka Tomas gba beni. Duu maa dunoya daa kparimi, ka Yisa daa ti lan puhi zani bɛ sunsuuni na ka yɛli ba, “Naawuni tim’ ya suhudoo!” 27Ka ŋmaligi yɛli Tomas, “Zaŋm’ a nubil’ bɔbili n nuhi ŋɔ ni, ka zaŋ a nuu tim m puluɣili bɔbili ŋɔ ni, ka niŋ yɛda.”

28Ka Tomas kuhi yɛli, “N Duuma ni n Naawuni!”

29Ka Yisa bɔh’ o, “A nini ni nya ma zuɣu ka a niŋ yɛda? Amaa bɛn nini bi nya ma ka niŋ yɛda mal’ alibarika.”

Litaafi ŋɔ daliri

30Yisa daa wuhi shihira pam o nyaandoliba maa ninni, ka din yɛla bi sabi niŋ litaafi ŋɔ ni. 31Amaa din sabi niŋ di ni ŋɔ sabimi ni yi niŋ yɛda ni Yisa nyɛla Masia ŋun nyɛ Naawuni Bia, ka yi yɛda niŋbu maa zuɣu chɛ ka yi nya nyɛvili o yuli zuɣu.

Currently Selected:

Jɔn 20: DBwDB

Highlight

Copy