Hiburunima 7

1Mɛlikizɛdɛk daa nyɛla Salɛm Naa mini Naawuni Zallakudura Naa maligumaana. Ti yab’ Ibrahimma ni daa chaŋ ti tuhi nanim’ tɔbu n-nyaŋ ba ka labirina la, Mɛlikizɛdɛk ŋɔ n-daa tuh’ o soli niŋ alibarika niŋ o ni. 2#Pil 14.17-20 Ka ti yab’ Ibrahimma daa yih’ o ni mali binshɛɣukam pia puuni zaɣ’ yiniyini ti o. O yuli Mɛlikizɛdɛk gbinni nyɛla Wuntia Naa. O lan nyɛla Salɛm Naa, ka di mi gbinni nyɛla Suhudoo Naa. 3O ka ba bee ma bee zuliya; o ka piligu, o mi ka bahigu, amaa o ŋmanila Naawuni Bia, ka kul nyɛ maligumaana hal ni saha din ka bahigu.

4Nyamiya o ni daa nyɛ ninvuɣ’ titali shɛm! Hal ka ti yab’ Ibrahimma daa yih’ o ni ŋme tɔbu di shɛlikam pia puuni zaɣ’ yiniyini ti o. 5#Kal 18.21 Lɛvi zuliya bɛn daa tumdi maligumaaniba tuma la, Naawuni fukumsi zaligu daa zali ba ni bɛ deem’ zaka Izraɛlnim’ sani. Dimbɔŋɔ wuhiri ni bɛ deem’ li la bɛmaŋmaŋ’ mabihi sani, hal bɛ mabihi maa gba ni daa kul nyɛ ti yab’ Ibrahimma zuliya la zaa yoli. 6Mɛlikizɛdɛk daa bi yi Lɛvi zuliya ni na, amaa o daa deei zaka ti yab’ Ibrahimma sani, ka niŋ alibarika niŋ ŋuna ŋun daa deei Naawuni daalikaulinim’ la ni. 7Biɛhiŋ kani, ŋun niŋdi alibarika niŋdi niriba ni gari o ni niŋ li niŋ ninvuɣ’ so ni. 8Lɛvi zuliya ni maligumaaniba bɛn daa deeri zaka niriba san’ la daa nyɛla bɛn kpira, amaa Mɛlikizɛdɛk ŋun gba daa deeri zaka la, ŋun’ daa nyɛla ŋun kul be nyɛvili ni kaman Naawuni Kundi ni wuhi shɛm. 9Nir’ ni tooi yɛli ni Lɛvi ŋun daa deeri zaka la gba daa be ti yab’ Ibrahimma ni n-yihi zaka ti Mɛlikizɛdɛk; 10dama o daa na bela o yab’ Ibrahimma niŋgbuŋ ni, bɛ ni daa na bi dɔɣ’ o saha shɛli Mɛlikizɛdɛk ni daa tuhi ti yab’ Ibrahimma sol’ la.

11Di daa nyɛla Lɛvi zuliya maligumaanitali zuɣu ka Naawuni daa zaŋ o fukumsi zaligunima ti Izraɛlnima. Ka Lɛvi zuliya maligumaanitali tuma maa yi daa nyɛla din ni tooi mali niriba ka bɛ be tibi, dindina di di bi kpa talahi ni maligumaani’ so ŋun tuma be kaman Mɛlikizɛdɛk tuma, ka pa ni Aduna maligumaanitali tuma la lan kana. 12Maligumaanitali tuma yi taɣi, dindina di nyɛla talahi ni zaligu gba taɣi. 13Di ni tɔɣisi binshɛŋa yɛla zaŋ chaŋ ti Duuma so polo ŋɔ daa bi yi Lɛvi zuliya ni na, ka o zuliya ni so mi daa bi tum maligumaaniba tuma bimbini gbini. 14Ti mi ni o yila Juda zuliya ni na, ka zaŋ chaŋ Juda zuliya polo, Anabi Musa daa bi kali ba pahi maligumaaniba ni.

Maligumaani’ so ŋun ŋmani Mɛlikizɛdɛk

15Di maan kahigi yɛla ŋɔ wuhi ni maligumaani’ so ni ti yiɣisi ŋmani Mɛlikizɛdɛk, 16ka leei ŋun nyɛ maligumaana ka di pala o yila maligumaaniba zuliya ni na kaman zaligu ni wuhi shɛm zuɣu, amaa ka nyɛla maligumaana nyɛvil’ shɛli din ku bahi yol’ la yiko zuɣu. 17#Yila 110.4 Dama di sab’ o yɛla Naawuni Kundi ni yɛli:

“A nyɛla maligumaana ŋun tuma ni be

kaman Mɛlikizɛdɛk tuma la

hal ni saha din ka bahigu.” 18Din beni nyɛla: Zaligu kurili la leela din daai baɣili kpaŋa di gbariginsim mini di ni ka buchi zuɣu, 19dama Naawuni fukumsi zaligu daa bi tooi chɛ ka binshɛli niŋ dɛde; amaa din lee beni nyɛla, tahima suŋ din gari li yipa kana, ka ti ni tooi miri Naawuni di zuɣu.

20Din pahi nyɛla, Naawuni daa pola pɔri zal’ li. 21#Yila 110.4 Bɛn daa pun nyɛ maligumaaniba la daa bi leei maligumaaniba maa la pɔri zuɣu, amaa ŋumbɔŋɔ ŋun’ daa leei maligumaana la Naawuni ni daa po pɔri yɛl’ o: “Ti Duuma ku lan taɣ’ o tɛha ka po, ‘A nyɛla maligumaana hal ni saha din ka bahigu.’ ” 22Yɛla ayi ŋɔ ni be kɔŋkɔba zuɣu n-chɛ ka Yisa leeg’ alikauli din so nyaanzaana.

23Di kɔŋkɔba bebu din pahi nyɛla, di daa simdi ni bɛn nyɛ maligumaaniba nyɛla ninvuɣ’ bɔbili bɛ ni daa kpiri ka bɛ tuma zaani tariga la zuɣu; 24amaa ŋumbɔŋɔ ŋun’ kul tumdila o maligumaanitali tuma, dama o kul ni be hal ni saha din ka bahigu. 25Dimbɔŋɔ zuɣu o nyɛla ŋun ni tooi tiligi bɛn vu’ m-miri Naawuni o zuɣu la sahakam, dama o nyɛla ŋun kul be ni o timdi sandaani tiri ba Naawuni sani.

26Dinzuɣu Yisa nyɛla maligumaani’ tital’ so ŋun tumdi din sɔŋdi ti ni yɛlimaŋli. O nyɛla ŋun be kasi ka ka galimi, ka alahichi mi ka o ni; Naawuni n-wolig’ o ka o be o ko ka chɛ alahichinima, ka duh’ o gari sokam zaa bɛn be alizanda ni. 27#Lɛv 9.7 O bi be kaman bɛn daa pun nyɛ maligumaaniba zuɣulaannim’ la; di mi bi kpa talahi ni o daŋ mali maligu dabisili kam omaŋmaŋ’ daalahichi zuɣu, ka naanyi lan mal’ li o niriba mi daalahichi zuɣu. Sara maligu yini ka o daa mali ka di naai di zaa, o ni daa zaŋ omaŋ’ mali sara shɛm la puuni. 28Anabi Musa zaligu daa zalila ninvuɣ’ shɛb’ bɛn bi be tibi ni bɛ nyɛ maligumaaniba zuɣulaannima, amaa Naawuni pɔri din daa doli fukumsi zaligu nyaaŋa la daa zalila ŋun’ Naawuni maŋmaŋ’ Bia ŋun be tibi hal ni saha din ka bahigu la.

Currently Selected:

Hiburunima 7: DBwDB

Highlight

Copy