Hiburunima 3

Yisa ni gari Anabi Musa shɛm

1M mabihi bɛn mali be kasi ka saɣi alizanda ni boligu ŋɔ, tɛhimiya Yisa ŋun nyɛ ti daadiini tumo ni maligumaani’ tital’ la yɛla. 2#Kal 12.7 O daa ʒe yim ŋun piig’ o maa sani kaman Anabi Musa ni daa ʒe yim o tuma ni Naawuni niriba sani shɛm la. 3Amaa Yisa nyɛla ŋun simdi ni o mali jilima pam gari Anabi Musa kaman ŋun me yili ni mali jilima gari o ni me yil’ shɛli maa shɛm la. 4Yili kam nyɛla ninvuɣ’ so ni me shɛli, amaa Naawuni n-nyɛ ŋun me binshɛɣukam zaa. 5Anabi Musa daa ʒe yim Naawuni niriba zaa sani kaman yilibia la ni o di Naawuni ni ti yɛn yɛli binshɛŋa yɛla la shɛhira; 6amaa Masia ŋun’ daa ʒe yim Naawuni niriba san’ la o ni nyɛ Naawuni Bia la zuɣu. Ka ti gba nyɛla o niriba, tinim’ dee yi kul mali suhukpeeni ka niŋ ti ni mali tahima shɛl’ la naani hal ni di bahigu ni.

Naawuni niriba vuhim nyabu

7Dinzuɣu di bemi kaman Naawuni Shia Kasi ni yɛli shɛm la:

“Yi yi wum Naawuni kukoli zuŋɔ dabisili ŋɔ,

8yin’ miriya ka yi niŋ tipawumlinima

kaman Naawuni niriba ni daa niŋ shɛm

taai duŋ yɔɣu ni n-zahim o ka di chɛ ka o yɛli,

9‘Yi yaannim’ daa zahim ma, hal bɛ ni daa kul nya

n ni tum shɛm yuun’ pihinahi puuni la zaa yoli.’

10Dinzuɣu ka n daa je suli niŋ

bɛ ʒiɛmani maa nima ka yɛli,

‘Bɛ kul birigirila bɛ suhuri ni waawaayili,

ka zaɣisiri n soya dolibu.’

11 # Yila 95.7-11 Ka n daa po n suhuyiɣisili puuni yɛli,

‘Bɛ kul ku nya vuhim shee n sani!’ ”

12M mabihi, miriya ka yi ni so mali suhu biɛɣu din biɛhinda, ka nyɛ din ni birigi ya Naawuni ŋun nyɛ nyɛvililan’ ŋɔ sani. 13Amaa saha shɛli Naawuni Shia Kasi ni booni zuŋɔ dabisili ŋɔ la puuni, kpaŋsimiya tab’ dabisili kam ka di chɛ ka yi ni so ku niŋ tipawumlilana alahichi yɔhiŋgu zuɣu; 14dama ti nyɛla bɛn mini Masia laɣim nyɛ zaɣ’ yini, ti yi kul niŋ ti ni daa tuui mali tahima shɛl’ la naani viɛnyɛliŋga hal ni di bahigu ni.

15 # Yila 95.7-8 Di bemi kaman di ni yɛli shɛm la:

“Yi yi wum Naawuni kukoli zuŋɔ dabisili ŋɔ,

yin’ miriya ka yi niŋ tipawumlinima

kaman bɛ ni daa niŋ shɛm taai duŋ la.”

16Banima n-nyɛ bɛn daa lee wum Naawuni kukoli, amaa ka ti taai duŋ la? Pa bɛna n-nyɛ Anabi Musa ni daa zaŋ ninvuɣ’ shɛb’ yi Ijipti na la? 17Ka banima n-daa lee ku Naawuni suli yuun’ pihinahi puuni la? Pa bɛna n-nyɛ bɛn daa tum alahichi ka kpi n-do yɔɣu ni la? 18#Kal 14.1-35 Ka banim’ ka o daa po n-yɛli ni bɛ ku nya vuhim o san’ la? Pa bɛna n-nyɛ bɛn daa niŋ tipawumlinim’ la? 19Dinzuɣu ti nyaya ni di nyɛla bɛ biɛhiŋ zuɣu ka bɛ daa bi tooi nya vuhim maa.

Currently Selected:

Hiburunima 3: DBwDB

Highlight

Copy