Piligu 37

Yisifu min’ o biɛyanima

1Yaakubu daa kul bela Keenan tiŋgbɔŋ ni din nyɛ o ba ni daa be luɣ’ shɛl’ la. 2Yaakubu min’ o malibu yɛtɔɣa m-bɔŋɔ.

Yisifu ŋun yuma daa nyɛ yuun’ pinaayopɔin la min’ o biɛyanim’ bɛn daa nyɛ o ba paɣiba Biliha mini Zilipa bihi la n-daa guli bɛ ba biŋkɔbiri. Ka Yisifu daa zaŋdi bɛ tuumbiɛri yɛtɔɣa na ti yɛri bɛ ba.

3Izraɛl daa yuri Yisifu pam gar’ o bihi bɛn kpalim maa zaa, o ni daa nyɛ o ni dɔɣi bi so o kuriginsim saha la zuɣu. O daa shɛla binyɛr’ wɔɣinli din baɣiri wɔɣa n-ti o. 4Amaa o bihi bɛn kpalim maa ni daa nya ka bɛ ba yuri Yisifu pam gari bɛn nyɛ o biɛyanim’ maa zaa maa, ka bɛ daa je Yisifu di zuɣu, ka bi tɔɣisir’ o yɛtɔɣa ni suhumahili.

5Dahin shɛli ka Yisifu daa ti zahim zahindi ka zaŋ li yɛl’ o biɛyanim’ maa, ka di chɛ ka bɛ jɛlinsi zaŋ chaŋ o sani maan pahi. 6O daa yɛli ba mi, “Wummiya n ni sa zahim zahindi shɛli ŋɔ: 7Ti sa bela puu ni lɔri kabɔba, yim ka n ti nya ka n kabɔbili yiɣisi zani, ka yi kabɔba laɣimna ti gili n kabɔbili maa n-damdi li tiŋa.”

8Ka o biɛyanim’ maa bɔh’ o, “A shiri nyɛla ŋun ti yɛn nyɛ ti naa? Bee a shiri nyɛla ŋun ti yɛn su ti fukumsi?” Dinzuɣu ka bɛ jɛlinsi zaŋ chaŋ o sani daa maan pahi, o ni daa zahim zahin’ shɛŋa maa min’ o yɛtɔɣa maa zuɣu.

9Dimbɔŋɔ nyaaŋa ka o daa ti lan zahim zahindi shɛli, ka zaŋ li yɛl’ o biɛyanim’ maa yaha. O daa yɛli ba mi: “Nyamiya, n lan zahimla zahindi shɛli. N sa nyami ka wuntaŋ’ mini goli ni saŋmarisi piniyini damdi ma tiŋa.”

10Amaa o ni daa zaŋ li yɛl’ o ba min’ o biɛyanim’ maa, o ba daa tahila o zuɣu ka bɔh’ o, “Zahim bɔ ka a lee zahim maa? M min’ a ma ni a biɛyanim’ ŋɔ shiri ti yɛn damdila a tooni?” 11#Tuma 7.9 Ka o biɛyanim’ maa daa zabir’ o nyuli di zuɣu, amaa ka o ba daa zaŋ o ni yɛli shɛm maa niŋ o suhu ni.

Bɛ gbaai Yisifu kɔhi, ka bɛ zaŋ o kuli Ijipti

12Dahin shɛli ka Yisifu biɛyanim’ maa daa zaŋ bɛ ba biŋkɔbiri chaŋ luɣ’ shɛli din miri Shɛkɛm ni bɛ ti ŋub’ mɔri. 13Ka Izraɛl daa ti yɛli Yisifu, “A biɛyanim’ zaŋ biŋkɔbiri chaŋ Shɛkɛm ni bɛ ti ŋub’ mɔri. Kamina ka n tim a bɛ sani.” Ka o yɛli, “To.”

14Ka o daa yɛl’ o, “Pumpɔŋɔ, cham’ ti nya a biɛyanim’ maa mini biŋkɔbiri maa mal’ alaafee, ka labina ti yɛli ma.” Di saha ka o daa tim o ka o yi Hiburɔn vinvamli ni chaŋ Shɛkɛm. 15Ka do’ so daa ti nya o ka o be mɔɣu ni chani ginda, ka o bɔh’ o, “Bɔ ka a lee bɔra?”

16Ka Yisifu yɛl’ o, “N lihiri bɔrila m biɛyanima,” ka yɛli, “N suhir’ a, wuhim’ ma bɛ ni zaŋ biŋkɔbiri maa be luɣ’ shɛli polo ka bɛ ŋubiri mɔri maa.”

17Ka doo maa yɛl’ o, “Bɛ zaŋ kpa luɣ’ shɛli polo, dama n wumya ka bɛ yɛli, ‘Chɛliya ka ti chaŋ Dɔtan.’ ” Di saha ka Yisifu daa biɛh’ o biɛyanim’ maa naba nti nya ba Dɔtan maa.

18Bɛ ni daa ti nya Yisifu ka o be katiŋ’ ha kanna, o daa ti yɛn paai bɛ sani, ka bɛ pun lo nia wuhi ni bɛ kum’ o. 19Bɛ daa yɛlila taba, “Zahin’ zahinda la n-kanna ŋɔ. 20Kamiyana pumpɔŋɔ ka ti ku o n-zaŋ o ti bahi bɔɣa ŋɔ zaɣ’ yin’ ni, ka yɛli ni mɔɣu ni biŋkɔbigu n-gbaag’ o ŋubi, ka ti nya o ni zahim zahin’ shɛŋa maa ni yɛn bahindi shɛm.”

21Amaa Rubin ni daa wum li, ka o fa o bɛ nuu ni ka yɛli, “Di chɛliya ka ti di o nyɛvili.”

22Rubin daa yɛli ba, “Di yihiya o ʒim, zaŋmiy’ o niŋ bɔɣili ŋɔ ni mɔɣu ŋɔ ni, ka di niŋy’ o shɛli.” O daa yɛlila lala ni o fa o bɛ nuu ni bahi n-zaŋ o kulisi ti ti bɛ ba. 23Dinzuɣu Yisifu ni daa mali ti paag’ o biɛyanim’ maa sani, bɛ daa darigimi fuɣ’ o binyɛr’ shɛli o ni daa ye ka di nyɛ zaɣ’ wɔɣinli ka mali bɔɣ’ wɔɣila la; 24ka zaŋ o ti niŋ bɔɣili ni. Kom daa ka bɔɣili maa ni, di daa nyɛla zaɣ’ kuŋ.

25Dimbɔŋɔ nyaaŋa ka bɛ daa ʒini ni bɛ di bindirigu ka lihi nya Ishimail zuliya sochandiba, ka bɛ yi Giliad n-taɣiri bɛ laakumnim’ bɛn ʒiri taansuri mini kpam ni mɛɛr, bɛ ni zaŋdi shɛŋa maani tima kuni Ijipti. 26Di saha ka Juda daa bɔh’ o mabihi maa, “Ti yi ku ti tizo ŋɔ ka wuhi ni pa tinima n-ku o, nyɔ’ bɔ ka ti lee yɛn nya di ni? 27Chɛliya ka ti zaŋ o kɔhi Ishimail zuliya ŋɔ zuɣu, ka di chɛliya ka ti niŋ o shɛli, dama o nyɛla ti tizo ni timaŋmaŋ’ niŋgbuŋ.” Ka o mabihi maa daa wum o ni yɛli shɛm maa. 28#Tuma 7.9 Ka Midian kɔhigɔriba daa garita, ka bɛ yihi Yisifu bɔɣili maa ni na n-zaŋ o kɔhi Ishimail zuliya maa zuɣu anzinfa laɣibaligu pisi, ka bɛ daa zaŋ Yisifu kuli Ijipti.

29Rubin ni daa ti lab’ bɔɣili maa gbinna nti bi nya Yisifu di ni, o daa darigimi toog’ o binyɛra, 30ka lab’ o mabihi maa sani ti yɛli ba, “Bia maa kani, ka ya ka n lee yɛn kpe?”

31Di saha ka bɛ daa gbaai bua n-kɔrigi zaŋ Yisifu binyɛrigu tim bua maa ʒim ni 32n-zaŋ o binyɛr’ wɔɣinli din bɔɣiri wɔɣ’ maa nti ti bɛ ba ka yɛl’ o, “Ti pihi li mi, lihim’ li nya, a bia binyɛrigu m-bala bee pa dina.”

33Ka o daa baŋ li ka yɛli, “M bia maa binyɛrigu m-bala; mɔɣu ni biŋkɔbigu n-gbaag’ o maa. Biɛhiŋ kani, ŋ-ŋɔ o kul dari tɔhitɔhila Yisifu zaa.” 34Di saha ka Yaakubu daa darigi toog’ o binyɛrigu, ka zaŋ buɣu so o shee ni n-kum o bia maa kuli dabisi’ gbaliŋ. 35Ka o bidibisi min’ o bipuɣinsi zaa daa kana ni bɛ ti maag’ o suhu, amaa ka o daa zaɣisi ka yɛli, “N ni kum m bia maa zuɣu hal ti paag’ o kpiimba biɛhigu shee.” Lala ka o ba daa kum o zuɣu.

36Ka Midiannim’ maa daa zaŋ Yisifu chaŋ Ijipti nti kɔhi Pɔtifa ŋun daa nyɛ tɔbbi’ shɛb’ bɛn guli Firawuna#37.36: FIRAWUNA: Ijiptinim’ daa booni bɛ nazuɣu la Firawuna. la sapashin’ kpɛm’ zuɣu.

Currently Selected:

Piligu 37: DBwDB

Highlight

Copy