Piligu 32

Yaakubu mali shili ni o kuli Iso sani

1Ka Yaakubu daa yiɣisi chani ka Naawuni malaikanim’ chirig’ o sol’ ni; 2ka o daa nya ba ka yɛli, “Naawuni sansani m-bɔŋɔ!” Dinzuɣu ka o daa boli nimaani yuli Mahanaim.#32.2 MAHANAIM: Hiburuli ni Mahanaim gbinni nyɛla sansana ayi.

3Ka Yaakubu daa tim tuumba o biɛli Iso sani Siɛr Ɛdom tiŋgbɔŋ ni, ka bɛ daŋ o tooni. 4O daa wuhi ba: “Yi ni ti yɛn yɛli n dan’ Iso shɛm m-bɔŋɔ: ‘A dabili Yaakubu ni yɛli shɛm m-bɔŋɔ: “N daa chaŋ ti bela Leeban sani hal ti paai pumpɔŋɔ. 5M mali niɣi mini bunsi ni biŋkɔbbaligu ni daba bɛn nyɛ dɔbba mini paɣiba; ka tim na ni n ti yɛli nyini n dana din ni chɛ ka a suhu maai ni mani.’ ”

6Ka tuumba maa daa ti labina ti yɛli Yaakubu, “Ti chaŋ a biɛli Iso sani, ka o zaŋ ninvuɣ’ kɔbisinahi pa omaŋ’ zuɣu n-kanna ni o ti tuh’ a soli.” 7Ka dabiɛm daa gbaai Yaakubu pam ka o suhu zɔhira. Ka o daa pirig’ o niriba bɛn be o sani min’ o biŋkɔbbaligu ni o niɣi ni o laakumnim’ ʒii buyi, 8ka yɛl’ o suhu ni, “Iso yi kana ti ku ninvuɣ’ shɛb’ bɛn be tooni ŋɔ, bɛn doli nyaaŋa la ni zo n-tiligi.”

9Di saha ka Yaakubu daa yɛli, “N yab’ Ibrahimma mini m ba Yisahaku Naawuni ŋɔ, Nyin’ Yawɛ, a daa yɛli ma, ‘Labim’ a ya min’ a dɔɣiriba sani ka n niŋ a zaɣ’ viɛlli.’ 10M bi simd’ a yurilim maŋli min’ a ʒiɛyimtali shɛl’ a ni ʒe man’ ŋun nyɛ a dabili ŋɔ biɛlifu gba, dama n jaaŋgbee kɔŋko ka n daa zaŋ na ti gbaai Jɔɔdɛn Mɔɣili ŋɔ du; amaa pumpɔŋɔ m malila buni balibu buyi. 11N suhir’ a, fam’ ma m biɛli Iso nuu ni bahi. N zɔr’ o, dama di pa shɛli ka o ti kana ti ku m mini m bihi ni bɛ manim’ ŋɔ zaa. 12#Pil 22.17 Amaa ka a mi daa pun yɛli ma, ‘N ni niŋ a zaɣ’ viɛlli, ka chɛ ka a zuliya ti be kaman mɔɣ’ bihigu la, ka so ku tooi kali ba.’ ”

13Ka Yaakubu daa gbe nimaani dindali maa yuŋ, ka daa piig’ o biŋkɔbiri maa ni shɛb’ ni o ti o biɛli Iso. 14O daa piila bunyama kɔbisiyi mini bulahi pisi ni piɛnyama kɔbisiyi mini piɛlahi pisi 15ni laakumnim’ bɛn mali bihim pihita mini bɛ bihi ni naɣinyama pihinahi mini naɣilahi pia ni bunnyama pisi mini bundibisi pia. 16Ka o daa pirigi ba gbilligbilli n-zaŋ ba niŋ o tumtumdiba nuu ni, ka bɛ taɣiri ba gbilligbilli dol’ taba ka o yɛli ba, “Garimiya n tooni chani ka chɛ ka larigim be yi sunsuuni.” 17O daa yɛl’ o tumtumdiba kpɛma, “M biɛli Iso yi ti tuhi ya soli bɔhi ya, ‘Ŋuni n-lee sun ya? Ka ya polo ka yi lee chana? Ka ŋuni n-lee su biŋkɔb’ shɛb’ bɛn be yi tooni ŋɔ?’ 18Di saha yin’ yɛlimiy’ o, ‘A dabili Yaakubu n-su ba, ka zaŋ ba ti ti ni ti zaŋ ba na ti ti nyini n-dan’ Iso pini, ka din pahi nyɛla, omaŋmaŋ’ doli ti nyaaŋa na.’ ” 19Lala ka o daa yɛl’ o tumtumda so ŋun pah’ ayi mini ŋun pah’ ata ni bɛn zaa daa taɣiri biŋkɔbiri maa; “Yi yi ti tuhi Iso soli, yin’ yɛlimiy’ o yɛtɔɣ’ yini maa, 20ka lan yɛl’ o, ‘Ka din pahi nyɛla, a dabili Yaakubu doli ti nyaaŋa na.’ ” Dama Yaakubu daa yɛlila o suhu ni, “N yi chɛ ka bɛ zaŋ pini ŋɔ daŋ n tooni ti ti o, n ni maag’ o suhu, ka di nyaaŋa m min’ o nini yi ti nya taba, di pa shɛli o ni deei ma.” 21Ka bɛ daa zaŋ pini maa daŋ o tooni, ka ŋun’ maŋmaŋ’ daa kpalim gbe suɣa maa shee dindali maa yuŋ.

Yaakubu mini ninvuɣ’ so vaya Pɛnuɛl

22Dindali maa yuŋ ka Yaakubu daa yiɣisi zaŋ o paɣiba ayi la min’ o dabipaɣiba ayi ni o bihi piniyini la chaŋ ti gbaai Jabok Mɔɣili du. 23O daa zaŋla bɛ min’ o binshɛɣukam zaa duhi mɔɣili maa duli; 24#Hoz 12.3-4 #Hoz 12.3-4 ka ŋun’ Yaakubu kɔŋko daa kpalim be nyaaŋa. Di saha ka do’ so daa kana ka o min’ o ti kpe val’ ni n-va hal ka biɛɣ’ ti neerina. 25Doo maa ni daa nya ka o bi tooi nyaŋ Yaakubu maa, ka o daa shih’ o sakpuɣu, ka o sakpuɣu maa ŋmirigi bɛ ni daa vari saha shɛli maa. 26Ka doo maa daa yɛl’ o, “Biɛɣu neera, chɛ ka n chaŋ.”

Ka Yaakubu yɛl’ o, “N ku chɛ ka a chaŋ, faashee ka a niŋ alibarika niŋ n ni.”

27Ka doo maa bɔh’ o, “A yuli?”

Ka o yɛl’ o, “N yuli Yaakubu.”

28 # Pil 35.10 Di saha ka doo maa daa yɛl’ o, “A yuli ku lan booni Yaakubu, amaa a yuli ni boonila Izraɛl,#32.28 IZRAƐL: Hiburuli ni yuli ŋɔ gbinni nyɛla, “O mini Naawuni vaya” bee “Naawuni vabu”. dama a mini Naawuni ni ninsalinim’ vaya ka a di nasara.”

29 # Zuɣ 13.17-18 Di saha ka Yaakubu daa yɛl’ o, “N suhir’ a, wuhim’ ma a yuli.”

Amaa ka doo maa bɔh’ o, “Bɔzuɣu ka a bɔri ni a baŋ n yuli?” Di nyaaŋa ka doo maa daa niŋ alibarika niŋ Yaakubu ni nimaani.

30Ka Yaakubu daa yɛli, “N nini nya Naawuni ka bi kpi.” Dinzuɣu ka o daa boli nimaani yuli Pɛniɛl.#32.30 PƐNIƐL: Hiburuli ni di gbinni nyɛla “Naawuni ninni”. 31Wuntaŋ’ puhibu na saha ka Yaakubu daa yi Pɛnuɛl chana ka luri wɔbiliwɔbili, o sakpuɣu maa zuɣu. 32Dinzuɣu dindali zaŋ na hal ni zuŋɔ, Izraɛlnim’ bi saɣiri ŋubiri binsakpuɣu zuɣu nimdi, doo maa ni daa shihi Yaakubu sakpuɣu maa zuɣu.

Currently Selected:

Piligu 32: DBwDB

Highlight

Copy