Piligu 28

1Di saha ka Yisahaku daa boli Yaakubu na ti niŋ alibarika niŋ o ni ka yɛl’ o, “Miri ka a kpuɣi Keenan paɣa. 2Yiɣisim’ chaŋ Mɛsopoteemia a ma ba Bɛtuɛl yiŋa nti kpuɣi a ma tizɔdoo Leeban bipuɣinsi ni yino niŋ a paɣa. 3Naawuni Kpiɔŋlan’ Naa niŋm’ alibarika niŋ a ni ka ti a nama, ka chɛ ka a zuliya nabi; ka a leei zuliya pam yaba. 4#Pil 17.4-8 O zaŋm’ o ni daa niŋ alibarika shɛli niŋ Ibrahimma ni la niŋ a min’ a zuliya bɛn be a san’ ni, ka yi deei tiŋgbɔn shɛli Naawuni ni daa zaŋ ti Ibrahimma, ka yi be di ni ŋɔ su!” 5Ka Yisahaku daa chɛ ka Yaakubu kuli Mɛsopoteemia Leeban ŋun daa nyɛ Bɛtuɛl Aram nir’ bia, ka nyɛ Yaakubu mini Iso ma Ribɛka tizɔdoo la sani.

Iso lan kpuɣi paɣ’ so

6Iso ni daa nya ka Yisahaku niŋ alibarika niŋ Yaakubu ni ka chɛ ka o kuli Mɛsopoteemia ni o ti kpuɣi paɣ’ nimaani maa, ka lan baŋ ni o ni daa niŋ alibarika niŋ o ni maa o daa yɛl’ o mi, “Miri ka a kpuɣi Keenan paɣa.” 7Ka o daa lan nya ka Yaakubu deeg’ o ba min’ o ma noli ka shiri kuli Mɛsopoteemia. 8Dinzuɣu Iso ni daa nya ka o ba Yisahaku nini bi tiɣi Keenan paɣiba maa, 9ka o daa chaŋ Ishimail zuliya ni ti kpuɣi Ibrahimma bia Ishimail bipuɣiŋga ŋun yuli daa booni Mahalat ka o tizɔdoo nyɛ Nɛbaiɔt la na ti pah’ o ni daa pun mali paɣ’ shɛb’ maa zuɣu.

Yaakubu zahim zahindi Bɛtɛl

10Ka Yaakubu daa yi Bɛrishiiba n-zaŋ kpa Haran polo. 11Ka o daa ti paai luɣ’ shɛli ka wuntaŋ’ lu ka o kpalim gbe nimaani dindali maa yuŋ. O daa piila kuɣ’ yini nimaani sɔŋ n-dɔni zaŋ o zuɣu kuɣ’ li gbihi. 12#Jɔn 1.51 Ka o daa ti zahim zahindi nya ka darigu ʒe tiŋa ka di zuɣusaa chaŋ ti tɔri alizanda, ka o nya ka Naawuni malaikanim’ dol’ li duri ka siɣirina. 13#Pil 13.14-15 Ka Yawɛ daa zani baɣil’ o ka yɛli, “Mani n-nyɛ Yawɛ ŋun nyɛ a yab’ Ibrahimma mini Yisahaku Naawuni, n ni zaŋ a ni do tiŋgban’ shɛli ni ŋɔ ti a min’ a zuliya; 14#Pil 12.3; 22.18 ka a zuliya ni ti bemi kaman bihigu la, ka yi ni yɛligi kpa wulinluhili polo mini wulimpuhili polo ni nuzaa polo ni nudirigu polo, ka dunia ŋɔ zuliya zaa ni ti nya alibarika la a min’ a zuliya maa zuɣu. 15M bɔri ni a baŋ ni n ni be a sani, ka gbib’ a luɣ’ shɛlikam a ni yɛn chaŋ, ka ni ti zaŋ a labisi tiŋgbani ŋɔ ni na. Dama n kul ku chɛ a hal ti niŋ n ni lo a alikauli ni n ni niŋ a shɛm maa.”

16Di saha ka Yaakubu daa neei gom ni ka yɛli, “Yɛlimaŋli, Yawɛ bela kpe ka m bi mi!” 17Ka dabiɛm daa kpe o ka o yɛli, “Kpe nyɛla dabiɛm zɔbu shee! Kpe nyɛla Naawuni yiŋa. Alizanda dunoli m-bɔŋɔ.”

18Ka Yaakubu daa daŋ yiɣisibu asibaasi n-kpuɣi kuɣ’ shɛli o ni daa zaŋ kuɣ’ o zuɣu la sa nimaani, ka booi kpam bahi di zuɣu. 19O daa boli nimaani yul’ la Bɛtɛl.#28.19 BƐTƐL: Hiburuli ni di gbinni nyɛla “Naawuni duu”. Amaa nimaani yuli daa pun boonila Luz. 20Di saha ka Yaakubu daa po pɔri yɛli, “Naawuni yi ni be n sani, ka gbib’ ma n ni chani luɣ’ shɛli ŋɔ, ka ti ma bindirigu ka n di, ka ti ma situra ka n ye, 21ka n ti lan labi m ba yiŋ’ yaha ni suhudoo, dindina Yawɛ n-ni nyɛ n Naawuni. 22Ka n ni zaŋ kuɣili ŋɔ sa luɣ’ shɛli ŋɔ ni leei nyin’ Naawuni yiŋa, ka a yi ti ma binshɛlikam zaa, biɛhiŋ kani, n ni yihi di bini pia kam ni zaɣ’ yini ti a.”

Currently Selected:

Piligu 28: DBwDB

Highlight

Copy