Piligu 19

Sɔdomnim’ tum alahichi

1Ka malaikanima ayi maa daa mali ti paai Sɔdom zaawuni, ka Lɔt daa ʒi Sɔdom tiŋ’ puuni dunol’ ni. Lɔt ni daa nya ba, ka o yiɣisi chaŋ ti tuhi ba soli n-damdi zaŋ o zuɣu silim tiŋa ka yɛli, 2“N duumanima, ŋmaligimiya kpe mani yi dabili ŋɔ yiŋ’ na nti paɣi yi naba, ka gbe kpe n-sa daŋ yibu chaŋ yi chandi shee.”

Ka bɛ yɛl’ o, “Aai, ti ni gbe solɔɣu zuɣu.”

3Amaa ka Lɔt daa balim ba pam; ka bɛ daa ŋmaligi dol’ o kpe o yiŋa; ka o daa chɛ ka bɛ mali bɔrɔbɔro din ka dabindi, ka o zaŋ li niŋ ba saani ka bɛ di.

4Ka bɛ daa na bi kpe gom, ka Sɔdom tiŋ’ puuni dɔbba bɛn nyɛ ninkura mini bipola zaa daa laɣimna nti teei gili yili maa, 5#Zuɣ 19.22-24 ka boli Lɔt m-bɔh’ o, “Saamba bɛn kpe a yil’ ŋɔ yuŋ ŋɔ la lee be ya? Zaŋm’ ba na ka ti goli ba.”

6Ka Lɔt daa vooi dunoli yo ka yi bɛ sani nti yɛli ba, 7“M mabihi, n suhiri ya, di tumiya tuumbiɛɣu ŋɔ. 8Nyamiya, m mali bipuɣins’ ayi bɛn na ʒi dɔbba, chɛliya ka n zaŋ ba tin ya na ka yi niŋ ba yi ni bɔri shɛm; ka di niŋ ya niriba ŋɔ shɛli, bɛ ni kpe n yili ŋɔ zuɣu.”

9Amaa ka Sɔdomnim’ maa yɛl’ o, “Miligim’ ka ti ti palo. A nyɛla sana kpe, ka bɔri ni a wuhi ti ti ni yɛn niŋ shɛm? A yi bi baŋ ti ni niŋ a din bie n-gari ti ni yɛn niŋ ba shɛm.” Ka bɛ daa kul dihiri Lɔt na hal ti paai dunoli m-bɔri ni bɛ ŋme n-kab’ li. 10Amaa ka niriba maa daa teei bɛ nuhi tirina n-vooi Lɔt kpɛhi duu bɛ sani, ka yo dunoli. 11#2 Nan 6.18 Di saha ka bɛ daa chɛ ka niriba bɛn ʒe dunol’ ni n-nyɛ ninkura mini bipola maa zaa zom, ka chani bɔbindi bɔri dunoli shee.

Lɔt yi Sɔdom

12Ka niriba maa daa bɔhi Lɔt, “A mali ninvuɣ’ shɛb’ yaŋɔ pahi? A bidibisi min’ a bipuɣinsi ni a deennim’ bee a dɔɣiriba shɛb’ yi be yaŋɔ, nyin’ cham’ ti zaŋ ba yi yaŋɔ, 13dama ti yɛn saɣimla yaŋɔ. Bɛ ni yɛri di niriba tuumbiɛri yɛla shɛm galisiya pam Yawɛ sani; dinzuɣu ka o tim ti na ni ti ti saɣim li.”

14Ka Lɔt daa yi n-chaŋ ti yɛl’ o deennim’ bɛn daa yɛn kpuɣ’ o bipuɣinsi la, “Yiɣisimiya n-zo n-yi yaŋɔ, dama Yawɛ yɛn saɣim li mi.” Amaa ka o deennim’ maa daa zaŋ o ni yɛli shɛm maa niŋ asahi.

15Ka biɛɣu daa ti neerina ka malaikanim’ maa kpam Lɔt jaande yɛra, “Yiɣisim’ zaŋ a paɣ’ min’ a bipuɣins’ ayi bɛn be a sani ŋɔ n-zo n-yi yaŋɔ, di yi pa lala, yaŋɔnim’ ni yɛn nya tibidarigibo shɛli maa ni tabili ya.” 16#2 Pita 2.7 Amaa ka Lɔt daa bi lɛbira, ka Yawɛ daa zo ba nambɔɣu n-chɛ ka malaikanim’ maa gbah’ o min’ o paɣ’ ni o bipuɣins’ ayi maa nuhi ni n-vo ba yihi tiŋ’ maa tariga ti zali. 17Bɛ ni daa zaŋ ba na ti zali maa nyaaŋa, ka bɛ daa yɛli ba, “Zomiya tiligi! Yi mi miriya ka yi ŋmaligi lihi yi nyaaŋa bee n-zani vinvamli ŋɔ ni luɣ’ shɛli. Kul zomiya ti du zoya ŋɔ ha, di yi pa lala, buɣim ni din ya.” 18Amaa ka Lɔt daa yɛli ba, “Aai, n duumanima, n suhiri ya, 19m mali zuɣusuŋ yi sani, ka yi niŋ ma nirilim pam tiligi n nyɛvili, amaa n ku tooi zo nti du zoya ŋɔ, dama di pa shɛli ka yɛlibiɛ’ shɛli ti paai ma nimaani ka n kpi. 20Nyama, timbil’ din ʒiɛya ŋɔ nyɛla din mirina ka nir’ ni zo nti kpe di ni. Chɛliya ka n zo nti kpe di ni tiligi. Yi nya di ni nyɛ timbil’ shɛm, ka m mi ni tooi zo nti kpe di ni tiligi.”

21Ka bɛ yɛl’ o, “Ti ni niŋ a ni yɛli shɛm maa gba, ti ku saɣim tin’ shɛli a ni yɛri maa. 22Niŋm’ yomyom zo nti kpe di ni, dama ka pa ni a paala nimaani, ti ku tooi niŋ shɛli.”

Dinzuɣu ka bɛ daa boli tiŋ’ maa yuli Zɔa.#19.22 ZƆA: Hiburuli ni di gbinni nyɛla “Bila”.

Sɔdom mini Gomɔra Saɣimbu

23Lɔt daa ti yɛn paai Zɔa, ka wuntaŋ’ pun puhimi. 24#Mat 10.15; 11.23-24; Luk 10.12; 17.29; 2 Pita 2.6 Di saha ka Yawɛ daa chɛ ka chilibi buɣim yi o sani alizanda ni n-lu Sɔdom mini Gomɔra zuɣu na 25n-saɣim di tinsi maa mini di vinvamli zaa ni tinsi maa niriba zaa ni tiŋgban’ ni bimbilli kam zaa. 26#Luk 17.32 Amaa ka Lɔt paɣ’ ŋun daa be o nyaaŋa daa ti ŋmaligi lih’ o nyaaŋa, ka leei yalim kuɣili.

27Ka Ibrahimma daa ti daŋ yibu asiba n-chaŋ o ni daa ʒe Yawɛ tooni luɣ’ shɛl’ la 28nti lihi Sɔdom mini Gomɔra ni vinvamli la zaa polo n-nya ka nyɔhi din ŋmani mɔɣu din galisi pam buɣim nyɔhi la kpuɣi du zuɣusaa. 29Naawuni ni daa saɣindi vinvamli ni tinsi maa saha shɛli maa, ka o daa teei Ibrahimma yɛla, ka yihi Lɔt o ni daa saɣindi tin’ shɛŋa din nyɛ Lɔt ni daa ʒi luɣ’ shɛl’ la n-tilig’ o.

Mɔabnim’ mini Ammɔnnim’ Piligu

30Ka Lɔt min’ o bipuɣins’ ayi la daa ti yiɣisi Zɔa n-chaŋ ti du zoya zuɣu n-kpe m-be vokabili ni, dama o daa zɔrila dabiɛm ni o be Zɔa. 31Ka bipuɣin’ kpɛm’ daa ti yɛli biasani, “Ti ba kurigiya, ka dɔbba mi ka tiŋgbɔŋ ŋɔ zaa ni n-ni kpuɣi ti kaman bɛ ni niŋdi shɛm dunia ŋɔ zaa ni la. 32Chɛ ka ti niŋ wain n-ti ti ba maa ka o nyu, ka ti chɛ ka o zaŋ ti dɔni, ka di chɛ ka ti nam zuliya o sani zali.” 33Ka bɛ daa shiri niŋ wain maa ti bɛ ba ka o nyu dindali maa yuŋ, ka bipuɣin’ kpɛm’ maa daa kpe ka o min’ o ba ti dɔni, ka o ba bi mi o ni dɔni o sani saha shɛli ni o ni yiɣisi saha shɛli.

34Ka biɛɣu daa neei, ka bipuɣin’ kpɛm’ maa yɛli biasan’ la, “Nyama, Mam’ mini m ba sa dɔniya yuŋ la, dinzuɣu chɛ ka ti lan niŋ wain maa ti o yuŋ ŋɔ, ka a gba kpe o sani ka a min’ o ti dɔni, ka di chɛ ka ti nam zuliya o sani zali.” 35Ka bɛ daa lan niŋ wain maa ti bɛ ba ka o nyu dindali maa yuŋ; ka biasani maa gba daa kpe ka o min’ o ba ti dɔni, ka o ba bi mi o ni dɔni o sani saha shɛli ni o ni yiɣisi saha shɛli. 36Lala niŋbu ni ka Lɔt bipuɣins’ ayi maa zaa daa zaŋ puhi bɛ ba sani. 37Ka bipuɣin’ kpɛm’ maa daa ti dɔɣi bidibiga m-bol’ o yuli Mɔab.#19.37 MƆAB: Hiburuli ni yuli ŋɔ bolibu ŋmanila bɛ ni yɛra, “Di yila m ba sanna la”. O yaansi n-nyɛ Mɔabnim’ bɛn na kul beni hal ni zuŋɔ dabisili ŋɔ. 38Ka biasan’ la gba daa ti dɔɣi bidibiga m-bol’ o yuli Bɛnammi.#19.38 BƐNAMMI: Hiburuli ni yuli ŋɔ gbinni nyɛla, “N niriba bidibiga” bee “N dɔɣim bidibiga”. O yaansi n-nyɛ Ammɔnnim’ bɛn na kul beni hal ni zuŋɔ dabisili ŋɔ.

Currently Selected:

Piligu 19: DBwDB

Highlight

Copy