Piligu 17

Gunibu din nyɛ alikauli lɔbu shihirili

1Ibram ni daa ti paai yuun’ kɔbigayinika saha shɛli, ka Yawɛ daa ka o sanna ti yɛl’ o, “Mani n-nyɛ Naawuni Kpiɔŋlan’ Naa; doli ma, ka tummi din tuhi. 2N ni chɛ ka m min’ a lo tab’ alikauli, ka n chɛ ka a zuliya nab’ pam.” 3Ka Ibram daa teei dɔni n-zaŋ o nina kpa tiŋa, ka Naawuni yɛl’ o, 4“N lo a alikauli, a ni niŋ zuliya pam yaba. 5#Rom 4.17 A mi yuli ku lan booni Ibram, amaa a yuli ni boonila Ibrahimma;#17.5 IBRAHIMMA: Hiburuli ni di gbinni nyɛla zuliya pam yaba. dama n zaŋ a leela zuliya pam yaba. 6N ni chɛ ka a nam zuliya pam, ka chɛ ka a zuliya yɛligi, ka nanim’ ti yi a zuliya ni na.

7 # Luk 1.55 “Ka n ni chɛ ka m min’ a ni a zuliya mali alikauli din ni ʒiɛya sahakam bɛ ʒiɛmana ni. Ka n ni nyɛ a min’ a zuliya maa Naawuni. 8#Tuma 7.5 Ka n ni zaŋ Keenan tiŋgbɔŋ zaa din nyɛ yi ni be tiŋgban’ shɛli puuni n-nyɛ saamba ŋɔ n-ti a min’ a zuliya maa, ka yi su li sahakam, ka n nyɛ bɛ Naawuni.”

9Ka Naawuni daa lan yɛli Ibrahimma, “Di simdi ni a min’ a zuliya maa gbibi n daalikauli maa bɛ ʒiɛmana zaa ni. 10#Tuma 7.8; Rom 4.11 A min’ a zuliya maa ni yɛn doli n daalikauli shɛli maa m-bɔŋɔ: Di simdi ni yi puuni doo kam guni. 11Gunimiya, ka di nyɛ m mini ya daalikauli maa shihirili. 12Gunimiya bidibiga kam o dɔɣibu nyaaŋa daba anii dali yi ʒiɛmana zaa ni; di yi nyɛla yi yiŋa ka yi dɔɣ’ o bee yi yi zaŋla yi liɣiri n-da o tinzun nir’ sanna, ka o pala yimaŋmaŋ’ zuliya. 13Di simdi ni a guni bɛ ni dɔɣi dab’ so a yiŋa min’ a ni zaŋ a liɣiri da so na zaa. Dina n-ni chɛ ka n daalikauli maa be yi niŋgbuna ni n-nyɛ alikauli din ni be sahakam. 14Ka doo kam ŋun bi guni, bɛn’ yihim’ o o daŋ’ ni, o ni bi gbibi n daalikauli maa zuɣu.”

15Ka Naawuni daa yɛli Ibrahimma, “Zaŋ chaŋ a paɣ’ Zarai mi polo, di lan bol’ o Zarai, amaa pumpɔŋɔ zaŋ chana bolim’ o la Zara.#17.15 ZARA: Hiburuli ni di gbinni nyɛla “Nabipuŋga”. 16N ni niŋ alibarika niŋ o ni; ka din pahi nyɛla, n ni chɛ ka o dɔɣi bidibiga ti a. N shiri ni niŋ alibarika niŋ o ni, ka chɛ ka o leei zuliya pam yabipaɣa; ka nanim’ ni ti yi o zuliya ni na.”

17Ka Ibrahimma daa teei dɔni n-zaŋ o nina kpa tiŋa ka la ka yɛl’ o suhu ni, “Wula ka ninvuɣ’ so ŋun paai yuun’ kɔbiga ni tooi lan dɔɣi bia? Ka Zara ŋun paai yuun’ pihiwɛi ŋɔ ni tooi lan dɔɣi bia?” 18Ka Ibrahimma daa yɛli Naawuni, “N suhir’ a, dolimi Ishimail nyɛvili.”

19Amaa ka Naawuni daa yɛl’ o, “Aai, a paɣ’ Zara ni dɔɣi bidibiga ti a, ka a bol’ o yuli Yisahaku.#17.19 YISAHAKU: Hiburuli ni di gbinni nyɛla “O lara”. Ka n ni lo a min’ o zuliya alikauli shɛli din ni be sahakam. 20N wum a ni suhi ma suhigu shɛli zaŋ chaŋ Ishimail gba polo maa. N ni niŋ alibarika niŋ o ni, ka chɛ ka o zuliya nab’ pam. O ni ti nyɛla nanim’ pinaayi yaba, ka n chɛ ka o zuliya ti galisi pam. 21Amaa n ni zaŋ n daalikauli n-lola Yisahaku so Zara ni yɛn dɔɣi ti a yuuni na ŋ-ŋɔ tasaha la.” 22Naawuni ni daa tɔɣisi Ibrahimma yɛtɔɣa ŋɔ naai ka o daa chaŋ ka chɛ o.

23Di nyaaŋa ka Ibrahimma daa gun’ o bia Ishimail mini bɛ ni daa dɔɣi dab’ bidib’ shɛb’ o yiŋa bee o ni daa zaŋ o liɣiri da shɛba. Doo kam ŋun daa be Ibrahimma yiŋa, o daa guni ba dindali maa kaman Naawuni ni daa yɛl’ o shɛm.

24Ibrahimma yuma daa nyɛla yuun’ kɔbigayinika saha shɛl’ o ni daa guni; 25ka o bia Ishimail mi daa nyɛ yuun’ pinaata bia saha shɛl’ o ni daa guni. 26Dindali maa ka Ibrahimma min’ o bia Ishimail daa guni. 27Ka dɔbba bɛn zaa daa be o yiŋ’ puuni, ka nyɛ bɛ ni dɔɣi bidib’ shɛb’ mini bɛ ni daa zaŋ bɛ liɣiri da shɛb’ tinzunnim’ sani zaa gba daa guni.

Currently Selected:

Piligu 17: DBwDB

Highlight

Copy