Tuumba Tuma 3

Gbarigu kpaŋbu yɛla

1Dahin shɛli ka Pita mini Jɔn daa ti chani Naawuni jɛmbu duu wuntaŋ’ ni kurig’ ata saha din nyɛ Yɛhudianim’ Naawuni jɛmbu saha la. 2Ka ninvuɣ’ shɛb’ daa ʒi gbaridɔɣirili na nti sɔŋ Naawuni jɛmbu duu maa duno’ shɛli din yuli daa booni Duno’ Viɛlli la shee. Bɛ daa yi pun ʒir’ o la lala na nti sɔŋdi nimaani sahakam ka o maani bɛn kpɛri Naawuni jɛmbu duu maa ni bara. 3O ni daa ti nya ka Pita mini Jɔn yɛn kpe Naawuni jɛmbu duu maa ni saha shɛli maa, ka o maani ba bara. 4Ka Pita mini Jɔn mirigi bɛ nina kpa o, ka Pita ti yɛl’ o, “Lihim’ ti!” 5Ka o kpuɣ’ o zuɣu lihiri ba, ka tɛhiri ni bɛ yɛn ti o la shɛli. 6Ka Pita yɛl’ o, “N ka laɣifu din ni ti a, amaa n ni mali shɛli, dina ka n yɛn ti a: Yisa Masia Nazarɛt nir’ yuli zuɣu, yiɣisim’ zani n-leei ŋun chana.” 7Ka daa gbaai gbarigu maa nudirigu n-yiɣis’ o zali, ka o naba min’ o napɔŋkpuɣila dii teei n-kpaŋ zaa. 8Ka o yiɣisi zani n-chani doli ba hal ti kpe Naawuni jɛmbu duu maa ni, ka kul gbaai chandi ka yiɣiri jɛmdi ka paɣiri Naawuni. 9Ka sokam daa nya o ni chani ka paɣiri Naawuni maa, 10ka baŋ ni ŋuna n-yi nyɛ gbarigu n-ʒiini Naawuni jɛmbu duu duno’ shɛli din yuli booni Duno’ Viɛlli la shee maani bara la. Ka din daa niŋ o maa niŋ ba alahiziba ka gari ba pam.

Pita yihi waazu Naawuni jɛmbu duu

11Ka gbarigu maa daa kul vili Pita mini Jɔn gbibi kirikiri, ka di niŋ niriba alahiziba, ka bɛ kab’ doli ba hal ni kazal’ shɛli bɛ ni daa booni Sulemaana Kazala la ni. 12Ka Pita daa nya lala ka bɔhi niriba maa, “Yinim’ Izraɛlnima, bɔ n-niŋ ka yɛlli ŋɔ niŋ ya alahiziba bee wula ka yi ti yuuni ti kaman tinim’ maŋmaŋ’ yiko ni bee ti wuntitali zuɣu n-chɛ ka gbarigu ŋɔ yiɣisi leei ŋun chani maa?” 13#Yibu 3.15 Ka lan yɛli ba, “Ibrahimma mini Yisahaku ni Yaakubu bɛn nyɛ ti yaannim’ la Naawuni n-ti o tumo Yisa jilima maa; Yisa so yi ni daa zaŋ tahi Gomna Pailɛt sani nti di o saria ka o daa bɔri ni o bah’ o ka yi zaɣisi la. 14#Mat 27.15-23; Maak 15.6-14; Luk 23.13-23; Jɔn 19.12-15 Ninvuɣ’ Suŋ ni ŋun lan nyɛ wuntialana ka yi daa zaɣisi maa, ka daa lee chɛ ka Gomna Pailɛt yihila ŋun kuri niriba bahi, 15ka kula ŋun tiri nyɛvili; amaa ka Naawuni daa neeg’ o kum ni. Tinima n-nyɛ di shɛhiranima. 16O yuli yiko n-ti gbarigu ŋɔ alaafee maa; o yuli yɛda niŋbu zuɣu ka yi nya ka wum din niŋ ŋɔ. Yɛda niŋbu zaŋ chaŋ Yisa sani zuɣu n-chɛ ka gbarigu maa nya alaafee zaa yi zaa ninni ŋɔ.”

17Pita daa lan yɛli, “M mabihi, m baŋya ni ʒilinsi zuɣu ka yi mini yi kpamba daa niŋ Yisa lala maa. 18Amaa Naawuni ni daa chɛ ka anabinim’ zaa yɛli ni o Masia ni ti di wahala pam la n-niŋ pali maa, 19dinzuɣu niŋmiya tuuba ka ŋmaligi lab’ ti Duuma polo ka o kpihim yi daalahichi, 20dama dina n-ni chɛ ka ti Duuma niŋ alibarika niŋ yi ni, ka tim Yisa Masia so o ni daa pun lo ni o ni tim yi sanna la. 21Ŋuna n-nyɛ ŋun ni lan kpalim be alizanda ni hal ka binshɛɣukam zaa ti niŋ pali kaman Naawuni ni daa chɛ ka o daanab’ suma yɛli shɛm dunia piligu ni la ha. 22#Zal 18.15, 18 Anabi Musa daa yɛliya, ‘Ti Duuma Naawuni ni ti pii so yi mabihi ni n-chɛ ka o niŋ anabi kaman o ni daa pii ma shɛm la. O yi ti yɛli ya shɛlikam, yin’ doliya li. 23#Zal 18.19 Ka daadam kam ŋun ti zaɣisi anab’ maa yɛligu wumbu ni ti bahi yoli zaa kahikahi.’ 24Anab’ shɛb’ bɛn daa be anabi Samuɛl ʒiɛman’ ni mini anab’ shɛb’ bɛn daa dol’ o nyaaŋa zaa daa pun yɛli ʒiɛmani ŋɔ yɛla.” 25#Pil 22.18 Pita daa lan yɛli ba yaha, “Yi gba nyɛla anabinim’ maa yaansi, ka su alikauli shɛli Naawuni ni daa lo yi yaannim’ maa. O daa yɛli ti yab’ Ibrahimma ni o zuliya zuɣu ka dunia ŋɔ zuliya kam ni ti nya alibarika. 26Dinzuɣu ka o daa piig’ o Bia n-tuui tim o la yi sanna ni o ti niŋ alibarika niŋ yi ni, ka taɣi yi zaa biɛhigu n-yihi ya yi tuumbiɛri ni.”

Currently Selected:

Tuumba Tuma 3: DBwDB

Highlight

Copy