Tuumba Tuma 1

1 # Luk 1.1-4 N dan’ Tiɔfilus, litaafi shɛli n ni daa tuui sab’ la wuhirila Yisa ni daa piligi wuhiri niriba ka tumdi shɛm 2hal nti paai dahin’ shɛli o ni daa ti o tuun’ shɛb’ o ni pii la zaligu Naawuni Shia Kasi yiko ni ka lab’ alizanda ni la. 3O ni daa di wahala kpi la nyaaŋa o daa lan zaŋ omaŋa wuhi ba shihira balibu pam puuni ni o shiri neei kum ni. Ka bɛ nina daa nya o ka bɛ min’ o be hal ti paai biɛɣ’ pihinahi, ka o daa wuhi ba Naawuni nam yɛla pam. 4#Luk 24.49 Yisa mini ba ni daa laɣim maa ka o yɛli ba ni bɛ di yi Jɛrusalɛm chaŋ luɣ’ shɛli, amaa ni bɛ kul guhim’ hal ka bɛ ni wum ŋun’ Yisa sani ni o ba Naawuni lo ba alikauli shɛl’ la ti niŋ pali. 5#Mat 3.11; Maak 1.8; Luk 3.16; Jɔn 1.33 Ka yɛli ba, “Jɔn Baptaizira daa baptaiziri niriba la kom ni, amaa yinim’ ni deela Naawuni Shia Kasi baptaizibu daba ayi ŋɔ sunsuuni.”

Yisa labi alizanda ni

6Yisa min’ o tuumba maa ni daa ti lan laɣim ka bɛ bɔh’ o, “Ti Duuma, a ni chɛ ka lzraɛlnim’ nam lan kpe bɛ nuu ni pumpɔŋɔ?”

7Ka o garigi yɛli ba, “Di bi kpan ya ni yi baŋ di dabisa bee saha shɛli m Ba Naawuni ni zal’ li o yiko ni. 8#Mat 16.19; Maak 16.15; Luk 24.47-48 Amaa saha shɛli Naawuni Shia Kasi yi ti kpe yi ni, yi ni nya yiko ka leei n shɛhiranima Jɛrusalɛm zaŋ tabili Judia mini Samaria tiŋgbana ni hal ti kpa dunia tarisi zaa.” 9#Mat 16.19; Luk 24.50-51 Yisa ni daa tɔɣisi yɛtɔɣa ŋɔ naai saha shɛli maa, ka o dii wuɣiri duri zuɣusaa, ka bɛ kul lihir’ o hal ka sagbani ti lim o, ka bɛ bi lan nya o.

10Bɛ ni daa na kul kpaai bɛ nina kpa zuɣusaa lihir’ o ni chani maa ha, ka bɛ nya ka niriba ayi ye binyɛr’ piɛla ʒe bɛ sani ka bɔhi ba, 11“Yinim’ Galilinim’ ŋɔ, bɔ ka yi lee ʒiɛya lihiri zuɣusaa lala?” Ka lan yɛli ba, “Yisa so yi ni nya ka o yi yi sani chani alizanda ni shɛm maa, lala ka o ti lan yɛn labina.”

Ŋun zani Judas zaani

12Di saha ka Yisa nyaandoliba maa daa yi Olivi Tihi Zoli maa zuɣu n-lab’ Jɛrusalɛm. Olivi Tihi Zoli maa mini Jɛrusalɛm bi wɔɣ’ ni taba. 13#Mat 10.2-4; Maak 3.16-19; Luk 6.14-16 Bɛ ni daa ti paai yiŋa ka bɛ du n-kpe jirambisa du’ shɛl’ ni bɛ ni daa pun be la. Nimaani ka Pita mini Jeemsi ni Jɔn ni Anduru ni Filip ni Tomas ni Baatolomiu ni Matiu ni Alifius bia Jeemsi ni Saimɔn ŋun daa nyɛ bɛn bɔri ni bɛn’ lzraɛlnim’ su bɛmaŋ’ la ni yino ni Judas Jeemsi so bia la daa laɣim. 14Bɛmbɔŋɔnim’ mini paɣ’ shɛba ni Yisa ma Mariama ni Yisa tizɔbihi zaa daa malila tɛhi’ yini n-laɣim suhiri Naawuni.

15Di saha ka Pita daa yiɣisi zan’ o nyaandolitab’ maa sunsuuni. Bɛ daa nyɛla kaman ninvuɣ’ kɔbiga ni pisi laasabu ka o yɛli ba, 16“M mabihi, di daa kpami ni Naawuni Shia Kasi ni daa chɛ ka Naa Dauda yɛli yɛtɔɣ’ shɛli zaŋ chaŋ Judas ŋun daa zaŋ niriba chaŋ ka bɛ ti gbaai Yisa la polo la niŋ pali. 17Judas daa nyɛla ti ni yino, ka o nuu daa be ti tuma ŋɔ ni.”

18 # Mat 27.3-8 (Judas ni daa deei laɣ’ shɛli o daalahichi tumbu ni la, o daa zaŋ li dala palo, ka daa ti lu ka o zuɣu sani tiŋa, ka o puli tahi ka o nyɔri zaa yina. 19Ka Jɛrusalɛmnim’ zaa daa wum di yɛla, ka boli tiŋgbani maa yuli Akɛlidama.)#1.19 AKƐLIDAMA: Di gbinni nyɛla, “Ʒim palo.”

20 # Yila 69.25; 109.8 “Dama di sab’ Yila litaafi ni yɛli:

‘Chɛ ka o yili zani dabɔɣu,

ka so ku kpe di ni’;

‘Chɛ ka so zani o zaani n-deeg’ o ni chɛ tuun’ shɛli maa.’

21-22 # Mat 3.16; Maak 1.9; 16.19; Luk 3.21; 24.51 Pita daa lan yɛli, “Di simdi ni ninvuɣ’ so ŋun daa be ti mini Yisa sani Jɔn Baptaizira ni daa baptaiz’ o saha shɛl’ la hal ti paai o ni daa ti lab’ alizanda ni dahin shɛl’ la pahi ti zuɣu n-di ti Duuma Yisa kum ni neebu la shɛhira.”

23Ka bɛ daa pii niriba ayi zali; bɛna n-nyɛ: Yisifu so bɛ ni daa booni Barisabas (ka lan boon’ o Justus la) mini Mataias, 24ka daa suhi ti Duuma n-yɛli, “Nyin’ ti Duuma ŋun mi niriba zaa suhuri ŋɔ, wuhim’ ti a ni pii so niriba ayi ŋɔ ni 25ni o deei Judas ni daa tum birigi n-chaŋ o chandi shee ka chɛ tinim’ tuumba ŋɔ tuun’ shɛl’ la.” 26Ka bɛ daa niŋ piibupiibu m-piila Mataias, ka bɛ daa sab’ o yuli pahi tuumba piniyini maa yuya ni.

Currently Selected:

Tuumba Tuma 1: DBwDB

Highlight

Copy