2 Pita 1
1
1Man’ Saimɔn Pita ŋun nyɛ Yisa Masia dabili ni o tumo la n-sabiri gbaŋ ŋɔ tiri ninvuɣ’ shɛb’ bɛn yɛda mali buchi kaman ti gba yɛda ni mali buchi shɛm ti Naawuni ŋun nyɛ ti Tiligira Yisa Masia wuntitali puuni la. 2Naawuni niŋm’ alibarika niŋ yi ni, ka tin ya suhudoo din kul zoori pahiri Naawuni mini ti Duuma Yisa baŋbu puuni!
Naawuni niriba bolibu mini bɛ piibu
3Masia Naawunitali yiko chɛ ka ti nya binshɛɣukam zaa din simdi ni ti zaŋ mali nyɛvili mini biɛhigu din luri Naawuni sizuura, ŋuna ŋun bol’ ti o jilima min’ o zaɣisuntali baŋbu puuni la zuɣu. 4Dimbɔŋɔnim’ zuɣu ka o lo ti alikauli kara din mali buchi ni di chɛ ka ti yi dunia ŋɔ niŋgbuŋ kɔr’ biɛri din saɣindi ninsalinim’ la ni, ka ti min’ o laɣim mali Naawunitali biɛhigu. 5Dimbɔŋɔ zuɣu lomiya ania n-chɛ ka zaɣisuntali pahi yi yɛda niŋbu zuɣu, ka chɛ ka baŋsim pahi yi zaɣisuntali zuɣu, 6ka chɛ ka yi maŋgbibbu pahi yi baŋsim zuɣu, ka chɛ ka yi ʒiɛyimtali pahi yi maŋgbibbu zuɣu, ka chɛ ka yi Naawuni sizuura lubu pahi yi ʒiɛyimtali zuɣu, 7ka chɛ ka yi mabihili nirilim niŋbu pahi yi Naawuni sizuura lubu zuɣu, ka chɛ ka yi yurilim mi pahi yi mabihili nirilim niŋbu maa zuɣu. 8Dimbɔŋɔnim’ yi be yi ni galisi pam, di ni chɛ ka yi nyɛla bɛn tumdi viɛnyɛliŋga, ka nyɛ bɛn mali buchi baŋbu shɛli din yiri ti Duuma Yisa Masia ni na la puuni. 9Ŋunkam ka dimbɔŋɔnim’ nyɛla tɛhijihilana ni zoma, ka lan nyɛla ŋun tam ni o daalahichi pun kpihim. 10Dinzuɣu m mabihi, kpaŋmiya yimaŋ’ niŋ nimmoo n-chɛ ka yi bolibu mini yi piibu la ba n-zani, dama yi yi niŋ lala yi ku lu. 11Ka dimbɔŋɔ ni chɛ ka yi nya soli kpe ti Duuma ŋun nyɛ ti Tiligira Masia nam din ka bahigu la ni. 12Daliri ŋɔ zuɣu ka n lo ni n kul teeri ya dimbɔŋɔnim’ yɛla, hal yi ni pun mi li ka ba n-zani yɛlimaŋ’ shɛli yi ni pun dee’ la ni zaa yoli. 13N tɛhiya ni di tuhiya ni n neei yi tɛha ka yi teeri yɛla ŋɔ, n ni na kul be n nyɛvili ni ŋɔ, 14dama m mi ni di ku lan yuui ka n kani kaman ti Duuma Yisa Masia ni kahigi wuhi ma shɛm. 15Ka n ni kpaŋ mmaŋ’ niŋ di ni simdi ni n niŋ shɛm, ka di chɛ ka yi ti tooi teeri dimbɔŋɔnim’ yɛla sahakam n kalinsi nyaaŋa.
Shɛhiranim’ bɛn nini nya Masia jilima
16Pa kurimbuni lahibaya din pa yɛlimaŋli ka ti daa zaŋ wuhi ya ti Duuma Yisa Masia yiko min’ o kandina yɛla, amaa ti nyɛla shɛhiranim’ bɛn nini daa nya o jilima. 17#Mat 17.1-5; Maak 9.2-7; Luk 9.28-35 Dama saha shɛl’ o ni daa nya tibiginsim mini jilima o Ba Naawuni sani la ka kukoli daa yi Zallakudura Naa Jilima Biɛhigu Shee na n-di o shɛhira yɛli, “M Biyurigu m-bɔŋɔ; n nin’ ni tiɣi so pam m-bala.” 18Ka ti daa wum kukoli din yi alizanda ni na di o shɛhira maa, dama ti daa be o sani zoli din be kasi la zuɣu. 19Dinzuɣu ti niŋ anabinim’ ni daa tɔɣisi yɛtɔɣ’ shɛŋa la naani pam. Ka yi yi niŋ ania dol’ li, yi niŋ din tuhi viɛnyɛliŋga, dama di ŋmanila firila din ne zibisim ni hal ka biɛɣu ti neerina ka biɛŋmariga neesim neei yi suhuri ni la. 20Ka din nyɛ yɛlikpeeni nyɛla, baŋmiya ni anabitali yɛtɔɣa din be Naawuni Kundi ni pala ninsal’ ni ni tooi kahigi shɛli gbinni wuhi omaŋmaŋ’ baŋsim puuni; 21dama anabitali yɛtɔɣa daa bi yirila ninsal’ suhu yubu ni na, amaa Naawuni Shia Kasi n-daa be ninsalinim’ ni n-chɛ ka bɛ tɔɣisiri Naawuni yɛtɔɣ’ shɛŋa din daa yir’ o sanna maa.
Currently Selected:
2 Pita 1: DBwDB
Highlight
Share
Copy
Want to have your highlights saved across all your devices? Sign up or sign in
Dagbani Bible with Deuterocanonical Books © Bible Society of Ghana, 2011.
