Tuma 10

Pita mini Kɔniilius

1Do’ so daa be Siizaria ka o yuli booni Kɔniilius. O daa nyɛla sapashini n-su tɔbbi’ shɛb’ bɛ ni daa booni Italinim’ Bɔŋ la. 2O daa nyɛla wuntizɔra ŋun kul suhiri Naawuni sahakam, ka o min’ o yiŋnim’ zaa daa zɔri Naawuni, ka o tiri nandaamba pina pam. 3Dahin shɛli, kaman kurig’ ata saha ka o nini daa ti nya Naawuni malaika ʒii ka o kpɛr’ o sanna ka bol’ o, “Kɔniilius!”

4Ka dabiɛm daa gbaag’ o ka o kpaag’ o nina kpa malaika maa ka bɔh’ o, “N dana, wula?”

Ka malaika maa yɛl’ o, “Naawuni deeg’ a suhigu, ka nya a ni tiri nandaamba pina la, di zaa leei ŋun’ Naawuni ni ku tam shɛli yɛla. 5Dinzuɣu timmi Jɔpa ti boli Saimɔn ŋun yuli lan booni Pita la na. 6O kpɛrila o tɔɣima Saimɔn ŋun nyɛ gbanzaba, ka o yiŋ’ baɣi teeku noli la yiŋa.” 7Malaika maa ni daa yɛl’ o lala ka chaŋ naai, ka o bol’ o yiŋbih’ ayi mini tɔbbi’ so ŋun daa nyɛ wuntizɔra ka gul’ o sahakam la na 8nti kahigi yɛla maa zaa wuhi ba, ka naanyi tim ba Jɔpa maa.

9N-yi biɛɣu ka bɛ chaŋ ti miri Jɔpa, di saha ka Pita mi daa du jirambisa zuɣusaa ni o ti suhi Naawuni. Di daa nyɛla agbaa saha. 10Ka kum daa wum o pam ka o bɔri bindirigu ni o di, amaa ka bɛ daa na duɣirimi; di saha maa ka o daa nya ʒii 11ka Naawuni daa chɛ ka o nini nya ka zuɣusaa bɔɣi, ka o nya binshɛli ka di kɔtomsi be kaman adiiku tital’ la, ka di sirigiri o sanna hal ti paai tiŋa. 12Ka di puuni zaa daa palila biŋkɔbiri balibu kam mini tinvura ni biŋgbamda ni noonsi. 13Ka kukol’ shɛli daa yɛl’ o, “Pita, yiɣisima n-kɔrigi ŋubi!”

14Amaa ka Pita yɛli, “N Duuma, n ku tooi niŋ lala, dama n na ʒi n-di bin’ yoya ŋɔ tatabo bee n ni chihiri binshɛŋa.”

15Ka kukoli maa lan yɛl’ o pahi buyi, “Naawuni ni lihi binshɛŋa bin’ suma, nyin’ miri ka a bol’ li bin’ yoya.” 16Ka di daa niŋ lala siɣimsiɣim buta ka lan lab’ zuɣusaa.

17Pita ni daa na kul mal’ o ni nya shɛli ʒii maa puuni yɛla bilisir’ o suhu ni saha shɛli maa ka Kɔniilius tuumba maa bɔhi n-kana ti ʒe Saimɔn ŋun nyɛ gbanzab’ yiŋ’ maa dunol’ ni 18bɔhira, “Kpe ka Saimɔn ŋun yuli lan booni Pita la kpɛra?”

19Pita ni daa kul ʒiya tɛhiri ʒii maa yɛla maa ka Naawuni Shia Kasi yɛl’ o, “Nyama, niriba ata kana ti bɔr’ a. 20Dinzuɣu yiɣisim’ siɣi doli ba chaŋ ka di biɛhind’ a suhu ni, dama mani n-tim ba a sanna.” 21Di saha ka Pita daa siɣi ninvuɣ’ shɛb’ Kɔniilius ni daa timna maa sani ti yɛli ba, “Mani n-nyɛ yi ni bɔri so maa.” Ka bɔhi ba, “Bɔ n-lee tahi ya na?”

22Ka bɛ garigi yɛl’ o, “Naawuni n-sa tim o malaika suŋ sapashin’ so ŋun yuli booni Kɔniilius la sanna nti yɛl’ o ni o timmina ti boli nyin’ Pita nti wum din be a nol’ ni. Ti dan’ Kɔniilius nyɛla ninvuɣ’ maŋli ŋun zɔri Naawuni, ka mali yu’ suŋ Yɛhudianim’ zaa sani.” 23Ka Pita daa zaŋ ba kpe duu ka o mini ba ti gbe.

N-yi biɛɣu ka Pita yiɣisi ni o mini Kɔniilius tuumba maa chaŋ, ka Yisa nyaandol’ shɛb’ bɛn daa be Jɔpa pahi Pita zuɣu ka bɛ chaŋ.

24N-kaai biɛɣu ka bɛ paai Siizaria, ka Kɔniilius pun laɣim o dɔɣiriba min’ o zo suma na ka bɛ ti ʒiya guli ba. 25Pita ni daa ti kul zaŋ o zuɣu tiriti dunol’ ni ka Kɔniilius dii yiɣisi nti gban’ o tooni jɛmd’ o. 26Ka Pita daa gbaag’ o nuu ni yiɣis’ o zali ka yɛl’ o, “Yiɣisima! Man’ gba kul nyɛla ninsala kaman nyin’ la.” 27O ni daa yɛl’ o lala bahi ka kpe yili maa ni, o nya ka niriba pam m-pun laɣim ʒiya. 28Ka o yɛli ba, “Yi zaa mi di ni chihiri ni Yɛhudia nira mini zuliya shɛb’ laɣim shɛm bee ka bɛ ti kpe zuliya shɛb’ yinsi yɛla; amaa Naawuni wuhi ma ni n di lihi so yoli bee n-siŋ so. 29Dina n-chɛ ka m bi biɛhim ka ka yi sanna yomyom maa, dinzuɣu yɛlimiya ma yi ni boli ma na shɛli zuɣu.”

30Ka Kɔniilius yɛl’ o, “Daantal’ la kurig’ ata saha ka n daa suhiri Naawuni n yili ŋɔ nti nya ka do’ so ye binyɛr’ piɛlli ʒe n tooni 31ka yɛli ma, ‘Kɔniilius, Naawuni deeg’ a suhigu, ka nya a ni tiri nandaamba pina shɛm la, di zaa leei ŋun’ Naawuni ni ku tam shɛli yɛla. 32Dinzuɣu timmi Jɔpa nti boli Saimɔn ŋun yuli lan booni Pita la na. O kpɛrila o tɔɣima Saimɔn ŋun nyɛ gbanzaba ka o yiŋ’ baɣi teeku nol’ la yiŋa. 33Dina n-daa chɛ ka n dii tim a sanna maa, ka a mi ni kana maa a niŋ viɛnyɛla. Dinzuɣu pumpɔŋɔ ti zaa bela Naawuni tooni ni ti wum ŋun’ Naawuni ni ti a zilin’ shɛli ni a ti ti.’ ”

Pita ni yihi waazu Kɔniilius yiŋ’ shɛm

34 # Zal 10.17 Ka Pita daa yaag’ o noli yɛli ba, “Pumpɔŋɔ m baŋya ni Naawuni shiri bi gaŋdi niriba; 35dama Naawuni deeri zuliya kam ni ninvuɣ’ so ŋun zɔr’ o ka tumdi din tuhi. 36Yi mi Naawuni ni daa chɛ ka bɛ zaŋ yɛtɔɣ’ shɛli nti yɛli Izraɛlnim’ la yɛla; bɛ daa yihi lahibal’ suŋ waazu wuhi ni suhudoo yirila Yisa Masia sanna. Ŋuna n-nyɛ sokam zaa Duuma. 37Jɔn Baptaizira ni daa yihi kom baptaizibu yɛla waazu la nyaaŋa ka yɛligu ŋɔ daa pili Galili m-mol’ gili Judia tiŋgbɔŋ ni zaa 38n-wuhiri Naawuni ni daa ti Yisa Nazarɛt nira Shia Kasi yiko ka o gindi tumdi tuun’ suma, ka chɛ ka Sintani ni daa nahindi ninvuɣ’ shɛb’ zaa kpaŋdi shɛm, dama Naawuni daa be o sani. 39Tinima n-nyɛ o ni daa tum shɛlikam Yɛhudianim’ tinsi ni mini Jɛrusalɛm maa zaa shɛhiranima. Ka bɛ daa ti zaŋ o kpahi tabili dapulli zuɣu ku o; 40amaa ka Naawuni daa neeg’ o kum ni daba ata dali ka chɛ ka o yi palo. 41Pa sokam zaa n-daa nya o, naɣila Naawuni ni daa pii tinim’ shɛb’ leei shɛhiranim’ maa n-daa nya o, ka ti min’ o laɣim di ka nyu o ni daa neei kum ni maa nyaaŋa. 42Ka o daa yɛli ti ni ti yihim’ waazu ti niriba, ka wuhi ba ni ŋuna ka Naawuni zaŋ leei nyɛvilinim’ mini kpiimba zaa sariakarita. 43Ŋuna ka anabinim’ zaa di shɛhira ni ŋunkam niŋ o yɛda ni nya alahichi chɛ m-paŋ o yuli zuɣu la.”

Bɛn pa Yɛhudianim’ deei Naawuni Shia Kasi

44Pita ni daa kul yɛri maa ka Naawuni Shia Kasi daa siɣi bɛnkam daa wum yɛligu maa zuɣu na. 45Ka di daa niŋ Yisa yɛdaniŋdib’ bɛn nyɛ Yɛhudianima n-doli Pita na la alahiziba bɛ ni daa nya ka bɛn pa Yɛhudianim’ gba deei Naawuni Shia Kasi maa zuɣu; 46dama bɛ daa wum ka bɛ tɔɣisiri tinzun yɛligu balibu kam yɛtɔɣa paɣiri Naawuni. Di saha ka Pita bɔhi, 47“So ni tooi mɔŋ ninvuɣ’ shɛb’ bɛn deei Naawuni Shia Kasi kaman ti gba ni daa deei shɛm la kom baptaizibu?” 48Ka daa yɛli ba ni bɛ deem’ kom baptaizibu Yisa Masia yuli zuɣu. Ka bɛ daa balim Pita ni o kpalimmi bɛ sani niŋ daba ayi.

Currently Selected:

Tuma 10: RLDB

Highlight

Copy