Mə́líʼkus 2

Yə́sus ayɛ́ɛ́lɛ lɛ́ kɛgɔd kɛ́ mɔɔd kíiʼkini kodáŋana

(Maʼt 9.1-8; Lóʼk 5.17-26)

1Mədúg a ngim yɛ́ɛy, Yə́sus əyímbuúlíni a Kaʼpɛlɛnáyum. Ungim aáság koob lɛ́ aándɛ a noádɛʼ. 2Pɔɔd pááság kiim əgəə́yiilə kɔ piíŋ, oʼtómódáán síɛ́ɛ́d. Odɛɔ́ŋ kɛnɔ kɛ́ kaag ongoo, na a udíyoog kɛ́. Ayɛ́ɛ agoboyáʼkananɛ Tɔsɔm tó Táán. 3Pɔɔd pə́mmú pááság kiim əgiig, nto yɔɔbɔn íniʼ. Pə́yíím pásɛŋ kɛgɔd əgiim na kɛ́lɛ́ kɛnɔ kɛ́ Yə́sus ayɛ́ɛ. 4Wɔnɔ́ ná kɛnɔ kɛ́yɛ́ɛ kɛgágáán na pɔɔd, pádɛʼkɔ́ɔgɔɔŋ ngə́ ɛgosɔd na kɛgɔd kɛ́ɛg a udi ó Yə́sus. Pɛ́ɛ́bág a kɛbon kɛ́ noádɛʼ, páágadɛd a kɛnɔ kɛ́ Yə́sus ayɛ́ɛ#2.4 «Pɛ́ɛ́gádɛ́d kɛbon a kɛnɔ kɛ́ Yə́sus ayɛ́ɛ». Pɛbon pɛ́ toádɛʼ tó a Palɛstíin pɛ́yɛ́ɛ pɛbadɛʼpad. Páyɛ́ɛ pawáaga pɛ́lɛ́ na pɛláaŋ, na pɛdɔb., pə́ə́suuli kɛgɔd kɛ́ɛg kɔ kɛɛ́mmɛ́ŋɛ́náán a pɛʼkwág. 5Ná Yə́sus yɛɛ́dála wɔnɔ́ ná pɔɔd póob páyáág oʼto na nyɔ́lɛ́, yɛɛ́dɛánɛ ɔnɔ́ na kɛgɔd kɛ́ɛg: «Mbóoó, mbə́gulísin mabɛ́ mááŋ áaá.» 6Palɛŋ pɛcɛm pə́mmú páyɛ́ɛ kɔ áay pələndínə́ə́n. Náa pə́əgəə́bə́ə́ kəə́lúluu kɔ a ntɛ́m yɔɔbɔn a kaadɛ pɔ́nɔ́ əə: 7«Tuə́ áa mɔɔd nyóonɛ alɛɛ́ ogolónɛ a unuʼ wə́ə́ŋ tɔgɛ́ɛ́ wɔnɔ́ tóod əə́? Alɛ agofánan Táán! Ánɛ wɛndɛ́ŋ áa alɛɛ́ ugulisin mɔɔd mabɛ́ ná kɛ́sánɛn əgín lɛ́ Táán nyɔ́lɛ́nyɔ́əsíŋ ə́#2.7 «Alɛ agofánan Táán!»: Pódála tɛn a kálaʼtaʼ ɛ Ləf 24.16 «…ná kɛ́sánɛn əgín lɛ́ Táán nyɔ́lɛ́nyɔ́əsíŋ ə́?»: Pódála tɛn a kálaʼtaʼ ɛ Pɛʼk 103.3; Ɛsa 43.25 ?» 8Yə́sus yɛɛ́lɛ́ŋ nkə kɛ́ pɔɔd póob páyɛ́ɛ afɛga a ntɛ́m yɔɔbɔn a kaadɛ. Náa ɔnɔ́ na pɔ́lɛ́: «A igə aa polɛɛ́ na mafɛgaʼ móom náan a ntɛ́m yaaŋan ə́? 9Na kodɛ́anɛ na kɛgɔd kɛ́ mɔɔd lɛ́: “Mbə́gulísin mabɛ́ mááŋ,” na komodɛ́anɛ lɛ́: “Tɛ́ɛ́mɛn, nyáŋɛn pɛʼkwág pɛáŋ, táŋána,” kɛ́yaán áa kɛ́lɛɛ́ kɛfɛ́fɛ́n lɛ́ mɔɔd ə́səə əə́? 10Mɛ, ndɛ anyɔ́ŋɛn anɛ́ɛ́n lɛ́ pólɛŋ poɔʼkɔ́ mɛ Mɔɔ́n o mɔɔd ndɛ na toɛn tóonɛ lɛ́ ndísin mɔɔd mabɛ́ a nsí yɛ́ɛnɛ.» Aáság kaágasɛ ná kɛgɔd kɛ́ɛg kɛ́lɛɛ́, ɔnɔ́ na kɛ́lɛ́: 11«Mbóoó, mɛ mbágodɛánɛ! Tɛ́ɛ́mɛn aá, úsiəd pɛʼkwág pɛáŋ, wúúli a noádɛʼ noáŋ áaá!» 12Əgín tɛn ná yiísə́ə́ náan, kɛgɔd ŋwaád kɔ áay a əngis á pɔɔd, kɛányáŋɛn pɛʼkwág piə́ŋ əguúli a noádɛʼ nuə́ŋ. Ungim ayɛ́ɛ əgəə́wúnəni kɛ́fɔlɛ́, páagɛɛ́ʼkɛn nugəm na Táán pɔ́nɔ́: «Pɛ́go pɛ́go, tɛdɛ́ʼtála kɛbán kímmú wɔnɔ́ kɛ́ɛnɛ, kɛ́agaáyɛ́ɛlɛ!»

Yə́sus yɛɛ́dɔ́ŋɔn mɔɔd niiŋ lɛ́ Lə́fi

(Maʼt 9.9-13; Lóʼk 5.27-32)

13Yə́sus əyúúlíni a ɛbá ɛ́ noom nó a Kalilə́ə. Pɔɔd páyɛ́ɛ́n amoóboan kɔ piíŋ, əə́bə́ə́ koboyáʼkananɛ Tɔsɔm tó Táán. 14Ná ayɛ́ɛ aáʼkoman koboyáʼkananɛ, aáság kɛɛn. Alɛ anɛ́ɛ́n agosan a, aáság kodála mɔɔd nyummú niiŋ lɛ́ Lə́fi, mɔɔ́n wo Əlifə́ə, undəndínə́ə́n a oʼkɔɔ wə́ə́ŋ ó pigólí lɛ́ ayɛ́ɛ əgud a kɛnɔ kɛ́ nɛwáagɛʼ. Aáság komodɔ́ŋɔn ɔnɔ́ na nyɔ́lɛ́: «Wɛ, mɛ́ɛn wínjə́ən.» Lə́fi aáság koság kodɛ́ɛmɛn əgumuyə́ən. 15Páyɛ́ɛ́n a noádɛʼ nó Lə́fi. Yə́sus ayɛ́ɛ agonɛ́ɛnɛ kɔ na paaʼkan pə́ə́ŋ. Ɛ́fɔlɛ́ ɛ́ Pagɔ́mmanɛʼ mag na pɔɔd tɛn pá ɔlaa wɔ́ɔ́bɔn ódɛʼkɛ́lɛɛ́ ɔŋŋɛʼ a əngis á pɔɔd páyɛ́ɛ agonɛ́ɛnɛ kɔ ondáŋ na pɔ́lɛ́ lɛ́ ombod ó pɔɔd wóow náan aa óyɛ́ɛ wiim úyə́njən Yə́sus. 16Ná palɛŋ pɛcɛm, na Pafalɛsɛyɛ́ɛŋ pɛ́ɛ́dála lɛ́ Yə́sus alɛ agonɛ́ɛnɛ na pɔɔd póob náan, pííŋíən na paaʼkan pə́ə́ŋ pɔ́nɔ́ əə: «A igə aa nyóon alɛɛ́ agonɛ́ɛnɛ ondáŋ na Pagɔ́mmanɛʼ mag, na pɔɔd tɛn pá ɔlaa wɔ́ɔ́bɔn ódɛɔ́gɔ ɔŋŋɛʼ a əngis á pɔɔd əə́?» 17Yə́sus ayóób nkə kɛ́ɛg kɛ́ pɔɔd páyɛ́ɛ agosɔyɔ. Náa ɔnɔ́ na pɔ́lɛ́: «Pɔɔd pá pálɛɛ́ panasáŋ, fiɛ́d na mɔdɔdɔɔ, póʼkóodi njaan na uʼkóʼtonon. Pá pálɛɛ́ abany aa pálɛɛ́ na njaan na nyɔ́lɛ́. Mɛ, ntiimin a nsí yɛ́ɛnɛ a oʼto ó pá pálɛɛ́ afɛga lɛ́ pɔ́lɛ́ pálɛ sáád, ndóo. Mbíim a oʼto ó pá pámálɛ́ŋɛ́ɛ́ lɛ́ pɔ́lɛ́ pálɛ pɛɛlɛʼ mabɛ́.»

Nkə kɛ́ Yə́sus yiísə́ə́ a kɛbán kɛ́ kəə́gili moom mó konɛ

(Maʼt 9.9-13; Lóʼk 5.27-32)

18Wɔɔ́s wúmmú, paaʼkan pá Sɛ́aŋ Ɔsɔgɛn pɔɔd, na Pafalɛsɛyɛ́ɛŋ pííguminin ə́simə́. Náa páagɛɛn əŋíən na Yə́sus pɔ́nɔ́ əə: «A igə aa paaʼkan pááŋ pə́díəguminií ə́simə́, kɔmɔɛ́d lɛ́ Pafalɛsɛyɛ́ɛŋ na paaʼkan pá Sɛ́aŋ Ɔsɔgɛn pɔɔd pɔ́lɛ́ pə́əgumən yɛ́lɛ́ ə́?» 19Əyíbuyúlísíni ɔnɔ́ na pɔ́lɛ́: «Ə́lə́ə́ aa poáʼkoyag kodálaá lɛ́ mɔɔd aálad kodɔn, náa pɔsɔ́sɔ́g pə́ə́ŋ pá ɔɔ́dɔ́ŋɔn a wɔɔ́n, pə́ələndin, pánnɛ́, páŋŋó, sɔ́g wɔɔbɔn nyɔ́ aálad kodɔn kɔ ə́? Ndóo, kɛnɛŋ kiim kɛ́ sɔ́g wɔɔbɔn nyɔ́ aálad kodɔn agálɛɛ́ na pɔ́lɛ́, pɔ́dɛɔ́gɔ págolɔb pánnɛ́, páŋŋó. 20Kɛɔ́bɔn kɛnɛŋ kɛ́lɛ́ɛ́ kiim kɛ́ pɔ́lɛ́ tɛn pádɛndɛ́ɛ́ konɛ́ɛ́, páŋŋó. Ná sɔ́g wɔɔbɔn adɛndɛ́ɛ́ kɛɛnɛɛ́ kə́mmú kɔ na pɔ́lɛ́, áay aa pɔ́lɛ́ tɛn pálɛ́ɛ́ kuguminií ə́simə́.» 21Yə́sus ayɛ́ɛ́n na tɔgɛ́ɛ́ yuudi, ɔnɔ́: «Mɔɔd ɔdɛɔ́gɔ ugusiəd kɛsom kɛ́ kilə́ə́ kɛ́ kɛwa agolɔ́g kiwoo kɛ́ kilə́ə́ kɛ́ kiə́ʼkulunií lɛ́ kɛsom kɛ́ kilə́ə́ kɛ́ kɛwa kíəgəə́nyúlə, kísúələ kɛ́ɛg káag kɛ́ kiʼtug, kɛ́wag ná kiwoo kíiʼkini agá kubu.» 22«Yoom ímuʼ na maloʼ. Pádɛ́agɛɛga tɛn maloʼ má mawa a piʼtug pɛ́ pɛsɔɛ́ŋ lɛ́ maloʼ má mawa máaman kaáda pɛ́lɛ́, ná mə́ə́sugin miim a nsí. Na maloʼ na pɛsɔɛ́ŋ, muim mólɛ molɔ́sɔ́ɔ́n. Ndóo, aádɛ́ɛ́ kɛɛga maloʼ má mawa a pɛsɔɛ́ŋ tɛn pɛ́ pɛwa.»

Nkə kɛ́ Yə́sus yiísə́ə́ a noá na kisúgiʼ

(Maʼt 12.1-8; Lóʼk 6.1-5)

23A wɔɔ́s ó kisúgiʼ kɛ́ Yúdɛn wúmmú, Yə́sus ayɛ́ɛ agosan yɛ́ a malɛ́m má ngəŋ. Wɔnɔ́ ná páyɛ́ɛ agosan kɔ, paaʼkan pə́ə́ŋ pə́ə́bə́ə́ kosɔɛ́lɛla nto yɛ ngəŋ, páanɛ#2.23 Kɛ́lɛ náan a kálaʼtaʼ ɛ Tɛʼt 23.26 24Náa Pafalɛsɛyɛ́ɛŋ pá páyɛ́ɛ ondáŋ kɔ na pɔ́lɛ́, pə́əŋíən na Yə́sus pɔ́nɔ́ əə: «Waádála nkə kɛ́ paaʼkan pááŋ pálɛɛ́ agɛɛlɛ ə́? Adɛ́ kɛ́lɛ kɛcɛm lɛ́ pɛ́ɛlɛ náan wɔɔ́s ó kisúgiʼ ə́#2.24 Kɛ́lɛ náan a kálaʼtaʼ yɛ Ɔsa 34.21 !» 25Náa Yə́sus əə́buyúúlisini ɔnɔ́: «Podɛ́njag kobana nkə kɛ́ Tə́fid na pɔsɔ́g piim pá páyɛ́ɛ na nyɔ́lɛ́, páyɛ́ɛ́lɛ wɔɔ́s wó njaan ɛyɛ́boobány, pə́múúnə yoom ɛ́ konɛ pɔ́dɛɔ́ŋ ɔ́? 26Adɛ́ Tə́fid yɛɛ́sɔ́d a uʼkóó ó Táán, əə́siəd pɛlɛ́ɛd pɛ́ pɛ́ɛ́fɔ́nyɛn Táán, páánɛ́ na pɔsɔ́sɔ́g pə́ə́ŋ ə́? Moom móom módɛʼkɛ́ɛ kɛcɛm lɛ́ mɔɔd wɛndɛ́ŋ adɛnnɛ́ mólɛ́ ná kɛ́sánɛn əgín lɛ́ payaaganɛʼ pɛfɔny pɔ́lɛ́bə́əsíŋ ə́? A kɛnɛŋ kɛ́go kɛ́ɛg, adɛ́ Abɛaʼtáal aa ayɛ́ɛ ɔnjaaganɛʼ pɛfɔny nyɔ́ oʼkóʼkóón á#2.26 «páánɛ́ na pɔsɔ́sɔ́g pə́ə́ŋ ə́?»: Kɛ́lɛ náan a kálaʼtaʼ ɛ 1Sa 21.2-7. «Abɛaʼtáal»: Kɛ́lɛ náan a kálaʼtaʼ ɛ 2Sa 15.35 «…ná kɛ́sánɛn əgín lɛ́ payaaganɛʼ pɛfɔny pɔ́lɛ́bə́əsíŋ ə́?»: Kɛ́lɛ náan a kálaʼtaʼ ɛ Ləf 24.9 ?» 27Yə́sus yiísə́ə́ ɔnɔ́ na pɔ́lɛ́: «Táán ayáág kisúgiʼ lɛ́ ná mɔɔd yóoyig a wɔɔ́s wóow, adɛʼkáyaág kɛ́lɛ́ lɛ́ mɔɔd aa yɛ́ɛnɛɛ́ kɛɔ́lɛ́ kɛ́ kisúgiʼ. 28Kólɛ́ aa pugódíí lɛ́ pólɛŋ lɛ́, mɛ Mɔɔ́n o mɔɔd aa ndɛɛ́ lɛ́ nsəə nkə aa kɛáyɛ́lɛɛ́ a wɔɔ́s ó kisúgiʼ.»

Currently Selected:

Mə́líʼkus 2: yatDBL

Highlight

Copy