Maʼtɛ́as 8

Yə́sus ayóómɛ mɔɔd nyummú nyɔ́ ayɛ́ɛ abany nkún

(Mə́l 1.40-44; Lóʼk 5.12-14)

1Wɔnɔ́ ná Yə́sus ayɛ́ɛ əgiim ə́suu oʼkon, kiʼtúú kɛ́ pɔɔd kɛáság kiim kímuyə́ən. 2Náan aa mɔɔd nyummú ayáyɛ́ʼtɛ́nɛ́ɛ́ a ɛbá yə́ə́ŋ. Mɔɔd ogo nyóon ayɛ́ɛ abany nkún. Yiídə́ə́ŋə́nən Yə́sus a udi na əndu, ɔnɔ́ na nyɔ́lɛ́: «Sə́dúk! Omaʼkɔnyɔ́ŋɛn, olɛ ogɛnjoómɛ, nkún yaam yɛ́ɛman.» 3Yə́sus aáság kudə́əmini ombɔg, ɔɔ́dɔ́bɛd mɔɔd, náa ɔnɔ́ na nyɔ́lɛ́: «Ɛɛ́ɛ, mbányɔ́ŋɛn, nkún ɛ́man na wɛ áaá!» Əgín tɛn kɔ áay a kɛnɛŋ kɛ́ɛg, nkún yəəŋ yaáság koman. 4Náa Yə́sus ɔnɔ́ na nyɔ́lɛ́: «Nuŋ unuʼ wááŋ kɔŋɛʼ, odɛʼtɛánɛ na mɔɔd nkə kɛ́ kɛ́másánɛ́ɛ́. Tod agá ogoóloodi na payaaganɛʼ pɛfɔny, wɛ́ɛlɛ kɛfɔny kɛ́ Moyíis yiísə́ə́ əguloodi na ungim lɛ́ kobany koáŋ koáʼkoman#8.4 Kɛ́lɛ náan a kálaʼtaʼ ɛ Ləf 14.2-32 »

Yə́sus ayóómɛ uʼkudin o sɔ́njaa yimmú yɛ́ nkóón

(Lóʼk 7.1-10; Sɛ́a 4.46-54)

5Yə́sus yɛɛ́dɛ́ɛ́mɛn agɛɛn a Kaʼpɛlɛnáyum. A nɛsɔd nɛ́ɛn, nkúm ɛ kiʼtúú kɛ́ pasɔ́njaa əʼtin áʼtáan yimmú yaáság kiim. Ɛyɛ́moyɔ́sɔ́gɔ́lɔ́nɛ́ɛ́ 6yɔ́nɔ́: «Sə́dúk! Uʼkudin waam nyummú alɛ ongɛɛ́mmɛ́ŋɛ́náán a noádɛʼ, alɛ abany na toɛn, ɔgɔlɛ́gɛ́san.» 7Náa Yə́sus ɔnɔ́ na nyɔ́lɛ́: «Ooʼó, ndəəgiim amoyóómɛ.» 8Nkúm ɛ kiʼtúú kɛ́ pasɔ́njaa yɛ́ɛy yaáság kuúlisini na Yə́sus yɔ́nɔ́: «Sə́dúk! Ntiigin nyóonɛ lɛ́ ósɔd a yoog yaam, səə əgín nɔgɛ́ɛ́ noáŋ númuʼ ná uʼkudin waam yɔ́ɔy, 9lɛ́ əgín mɛɛ́nyɔ́amɔɛ́d nyóonɛ, ndɛ na pəsə́dúg pá pálɛɛ́ agɛʼkɔmɔn. Nkóódi tɛn pasɔ́njaa pá mɛ ndɛɛ́ agoʼkɔmɔn. Nyɔ́ mbádóm, aagɛɛn. Nyɔ́ mbɔ́dɔ́ŋɔn, əəgiim. Mbaʼkodɛ́anɛ na nyummú lɛ́ yɛ́ɛn agɛɛlɛ yoom yɛ́ɛnɛ, aagɛɛn agɛɛlɛ.» 10Ná Yə́sus ayóób tɔgɛ́ɛ́ tóod; yɛɛ́nyɔ́ga kɛ́fɔlɛ́ na mɔɔd nyóon. Náa ɔnɔ́ na pɔɔd pá páyɛ́ɛ əgiim pə́muyə́ən: «A fɔ́lɔ́b, ndabodɛ́anɛ nyɔʼkɔ́: Ntɛ́ʼtála mɔɔd ɔmbɔ́ úmmuʼ a nigúu nɛ́ Ɛ́sɛlayɛl niim, nyɔ́ yaágɛ́nɛ́ɛ́ oʼto na Táán wɔnɔ́ mɔɔd nyóonɛ. 11Kólɛ́ aa ndábodɛ́anɛ lɛ́ piíŋ pálɛ́ɛ́ kiim pádɛ́ɛman lɛ́ na pá a noá nó ándɛ wɔɔ́s wə́əgiim ódɛ́ɛman, na pá a noá nó ándɛ wáagɛɛn agɛɛ́mɛŋan, əgiimən a kɛsɛɛn kɛ́ a Nɛlaamɛʼ nɛ́ a mɔɛn. Pálɛ́ɛ́ konɛ kɛsɛɛn kɛ́ɛg ondáŋ na Ábɛlaam, na Ɛ́sag, na Yáʼkɔb. 12Kɔmɔɛ́d lɛ́ pəŋi pamɔɛ́d pá polɛɛ́ pɔɔ́n pá a Nɛlaamɛʼ nɛ́ a mɔɛn, pálɛ́ɛ́ koboodo a táán, a mbin a kaadɛ. Polɛ́ɛ́ kɛɛn kɔ́gɔ́ɔg əgín mandɛɛ na mandɛɛ, əgín pɛgɛg kaágáma.» 13Náa ɔnɔ́ na nkúm ɛ kiʼtúú kɛ́ pasɔ́njaa yɛ́ɛy: «Tod a wɛ noádɛʼ á! Nkə kɛ́ɛg kɛ́ umə́líʼtíníí, kɛáyɛ́ɛlɛ á!» Əgín tɛn a kɛnɛŋ kɛ́go kɛ́ɛg, uʼkudin wo nkúm ɛ kiʼtúú kɛ́ pasɔ́njaa əʼtin áʼtáan yɛ́ɛy aáság koom.

Yə́sus ayóómɛ ŋŋíin ɛ Píɛ

(Mə́l 1.29-31; Lóʼk 4.38-39)

14Yə́sus ayɛ́ɛ́n a nó Píɛ, aáboan kɔ lɛ́ ŋŋíin ɛ Píɛ yiíngi, alɛ agoyáa. 15Aáság kodam ə́muúgumin a ombɔg, ɔʼkɛ́ɛd cacalaʼ, əndigi ayáa kə́mmú, aáság kodɛ́ɛmɛn əgiim aboyáabɛn.

Yə́sus ayóómɛ pabámbany piíŋ

(Mə́l 1.32-34; Lóʼk 4.40-41)

16Na niób, pə́yíímən kɔ áay na ɛ́fɔlɛ́ ɛ́ pɔɔd pá məŋun má mabɛ́ máyɛ́ɛ əguyə́bi. Yə́sus ayɛ́ɛ agoŋɛ́ŋŋaŋ məŋun má mabɛ́ móom əgín na nɔgɛ́ɛ́ nó nóyɛ́ɛ agolon a unuʼ wə́ə́ŋ: Ayóómánɛ tɛn pabámbany piim pá páyɛ́ɛ kɔ áay. 17Taa, náan aa nkə kɛ́ Ɛsayíi, ɔndɔɛgɛʼ pɛbán o Táán yiísə́ə́, kɛ́yáás. Yiísə́ə́ ɔnɔ́: «Yɛɛ́nyáŋɛn pɛnɛ́m piə́s, əmə́yəə́lúu mabámbany mə́ə́s#8.17 Kɛ́lɛ náan a kálaʼtaʼ yɛ Ɛsa 53.4 »

Nyɔ́ aányɔ́ŋɛn kuyə́ən Yə́sus ogóódi lɛ́

(Lóʼk 9.57-60)

18Ná Yə́sus yɛɛ́dála kiʼtúú kɛ́ pɔɔd kɛ́ kɛ́yámoyágoʼkɛnɛn, yɛɛ́dɛánɛ na paaʼkan pə́ə́ŋ lɛ́ páyaag nsɛ́ɛ́ ɛ noom yɛ́ɛy káag. 19Ɔndɛŋ pɛcɛm nyummú ayáyɛ́ʼtɛ́nɛ́ɛ́ a ɛbá ɛ́ Yə́sus, ɔnɔ́ na nyɔ́lɛ́: «Kɛlág, kɛnɔ kiim kɛ́ waágɛɛn, mɛ ndəguyə́ən kɔ.» 20Náa Yə́sus ɔnɔ́ na nyɔ́lɛ́: «Pɛyɛɛ́njɛ́m pígóódi pɛbaŋ pɛ́ pɛ́agɛɛ́mɛŋan kɔ, pɛsag na aŋŋany. Kɔmɔɛ́d lɛ́ mɛ Mɔɔ́n o mɔɔd ntigóodi əgín ɔmbɔ́ kɛnɔ kɛ́ nyíngigií oʼto agɛɛlɛ lɛ́ nyóoyig.» 21Náa ongaaʼkan wəəŋ nyummú ɔnɔ́ na nyɔ́lɛ́: «Sə́dúk sɛ́gɔɔ, yaŋ kiʼti nyɛ́ɛn əni sɛ waam.» 22Yə́sus ayɛ́modɛánɛ ɔnɔ́ na nyɔ́lɛ́: «Ndóo, wɛ tí pɛlóŋ píniəŋən pɛlóŋ pɛɔ́bɔn. Mɛ́ɛn wínjə́ən.»

Yə́sus yɛɛ́dɔ́ɔ́lɛ kigud

(Mə́l 4.31-41; Lóʼk 8.23-25)

23Yə́sus yɛɛ́bág a kɛʼkɔ́m na paaʼkan pə́ə́ŋ agosan. 24Pálɛ anɛ́ɛ́n kɔ agoyaag a, kigud kɛáság kiim kɛ́dɛ́ɛmɛn na nɛŋo a unuʼ: Kɛ́yɛ́ɛ wɔnɔ́ kísúʼkin kɛʼkɔ́m a məní. Yə́sus ayɛ́ɛ ənim ɛnɔ. 25Paaʼkan páyáyɛ́ʼtɛ́nɛ́ɛ́ a ɛbá yə́ə́ŋ, pááság kumuyóndigi, pɔ́nɔ́ na nyɔ́lɛ́: «Sə́dúk óoó! Sə́dúk wɛ! Tiə́gú o! Ɛ́bɛyɔ́ɔ́yɛ́!» 26Aáság kiim yóndig. Náa ɔnɔ́ na pɔ́lɛ́: «Tuə́ áa polɛɛ́ náan kwag kwag kwag na wɛɛ́y ə́? Kəə́liʼtiniʼ koáŋan kúligi kudom ə́!» Aáság kodɛ́ɛmɛn kidə́níʼtən, aásásɛ́dɛn kigud, aásásɛ́dɛn tɛn puní pó noom. Kɛnɔ wiiy. 27Pɔɔd páyɛ́ɛ əgəə́wúunəni, pə́əgəə́ŋíənə pɔ́nɔ́ əə: «Ombod ó mɔɔd igə aa ólɛɛ́ náanɛ lɛ́ ɔmbɔ́ kigud, ɔmbɔ́ noom nó ɛbá fiɛ́d, muim móamoyóbɛn əə́#8.27 Kɛ́lɛ náan a kálaʼtaʼ ɛ Pɛʼk 65.8; 89.10; 107.23-32 !»

Yə́sus ayóómɛ pɔɔd pábaan pá məŋun má mabɛ́ máyɛ́ɛ əguyə́bi

(Mə́l 5.1-20; Lóʼk 8.26-39)

28Ná páyɛ́ɛ́n əgiig nsɛ́ɛ́ ɛ noom yɛ́ʼkáag, a nigúu nɛ́ Pagadalɛnɛyɛ́ɛŋ#8.28 Pálɛ́ɛg yimmú yɛ́ ɛyɛ́ɛ a noá nó kusuu nó noom nó Kɛnɛsalɛ́ɛd aa ɛyɛ́ɛ niiŋ lɛ́ Kadala. Pálɛ́ɛg ɛgo yɛ́ɛy ɛdɛʼkɛ́ɛ ɛ Yúdɛn , pɔɔd pábaan pááság kiim amoóboan. Páyɛ́ɛ əgiim pálón a pɛnɛngɛlɔ́ɔŋ. Məŋun má mabɛ́ máyɛ́ɛ əgubuyə́bi. Páyɛ́ɛ agonyɛn kɛ́fɔlɛ́, mɔɔd angwɛ́ɛ́sɛ kosan a ngə́ yɛ́ɛy. 29Pə́ə́bə́ə́ kosása, pɔ́nɔ́ na Yə́sus: «Wɛ, Mɔɔ́n o Táán, nkə aa wəə́guunə na pəsi ə́? Umíim lɛ́ wíim abɛyáág a ntɔ́b kɛnɛŋ kídiig ə́?» 30Kɛa kɛ́ ubid ó pɔŋɔnɛá kɛ́yɛ́ɛ aníɛn kɔ áay laálá sɔɔŋ na pɔ́lɛ́. 31Məŋun má mabɛ́ mə́ə́bə́ə́ kɔɔ́sɔ́gɔlɔn Yə́sus, mɔ́nɔ́: «Nga waanyɔ́ŋɛn lɛ́ óbɛɛŋɛŋ, ɛ́bɛɛdóm tíɛn ɔsɔd a ubid ó pɔŋɔnɛá wóow.» 32Náa Yə́sus ɔnɔ́ na pɔ́lɛ́: «Todáan ɔsɔd kɔ.» Mááság kolon a pɔɔd póob, mámɛ́ɛn ɔsɔd a pɔŋɔnɛá. Əgín tɛn ná mɛ́ɛ́sɔ́d a pólɛ́, ubid ó pɔŋɔnɛá wóow ungim wááság kiim wə́ə́lis kɔ́gɔ́ɔg a oʼkon a mɔɛn, ómádágɛ́dɛ́ɛ́ a məní cuuum. Puim puə́wú. 33Pɔɔd pá páyɛ́ɛ a kinuŋ kɛ́ pɔŋɔnɛá póob pɛ́ɛ́gádɛ́d na ɔʼtɛ́d agɛɛn a pálɛ́ɛg. Páyɛ́ɛ́n oʼkaalɛʼ ó kɛbán kɛ́ pɔɔd póob pá məŋun má mabɛ́ máyɛ́ɛ əguyə́bi, na nkə kiim kɛ́ kɛ́yásánɛ́ɛ́. 34Náan aa pálɛ́ɛg ngim iyíím íbugig agɛɛn kɛnɔ kɛ́ Yə́sus ayɛ́ɛ. Ná páyɛ́ɛ́n amoóboan, páyɛ́moyɔ́sɔ́gɔ́lɔ́nɛ́ɛ́ lɛ́ ásan, adɛndɔ́b kə́mmú áay a nigúu nɛɔ́bɔn.

Currently Selected:

Maʼtɛ́as 8: yatDBL

Highlight

Copy