LUCAS 14

Jesusax p'usu usun jaqiruw k'umaraptayi

1Mä sábado urunsti Jesusax fariseonakan jilïripan utaparuw manq'ir saräna, mayni fariseonakasti wal uñch'ukisipkäna. 2Ukansti jupan nayraqatapan p'usu usun mä jaqiw ukankaskäna. 3Jesusasti kamachi yatichirinakampiru, fariseonakampiruw jiskt'äna:

—¿Wakisiti, janicha sábado urun qullañaxa? —sasa.

4Jupanakasti amukïpxänwa. Ukat Jesusax uka usutar llamkt'asin k'umaraptayäna, ukatsti: “sarxam” sarakïnwa. 5Fariseonakarusti sänwa:

—¿Khitis jumanakatxa, sábado urükipana, wawaman jan ukax, vacaman mä p'iyar jalantipan ukspach jan wayskaspaxa? —sasa.#14.5 Mt 12.11; Lc 13.15.

6Jupanakasti ukarux janiw kunsa arusxatirjamäpkänti.

Jaqichasïwir jawsayatanaka

7Jesusax jawsatanakan suma qunuñanak#14.7 Mt 23.6; Lc 20.46. ajllitap uñjasin aka arunakampiw jupanakar iwxt'äna:

8—Kunapachatix maynix mä jaqichasïwir jawsaykätam ukkhaxa, janiy jilïrinakan suma qunuñapar qunt'asimti, inampis jumat juk'amp yaqha jilïr jawsayatax purinispa, 9ukat jumanakar jawsirix jutasin siristam: ‘Qunuñam aka maynir churam’ sasa. Ukatsti mä p'inqaw qhipïr qunuñar qunt'asir sarasma. 10Jan ukasti, jawsayatax qhipïr qunuñar qunt'asim; ukat jawsayktam ukax jutasin jumar sañapataki: ‘Jilata, nayräx suma qunuñar qunt'asinim’ sasa. Ukhaman jumax mä jach'añchäwi katuqäta jumamp chik qunt'atäpki ukanakan nayraqatapana.#14.10 Pr 25.6-7. 11Khititix jach'a jach'a tukurïki ukaxa, jisk'ar tukuyatäniwa, ukampis jisk'ar tukurïki ukasti jach'ar tukuyatäniwa.#14.11 Pr 29.23; Mt 23.12; Lc 18.14.

12Jawsayki uka jaqirux sarakïnwa:

—Kunapachatix mä manq'añ wakichkäta ukkhaxa, jan jawsayamti uñt'at masinakamarusa, jilanakamarusa, wila masinakamarusa, janirak uta jak'aman qamir jaqinakarusa; jupanakax jawsayxarakïtamwa, ukhamat kutt'ayxapxätam. 13Manq'añ wakichaykäta ukkhasti, jan kunaninakaru, suchunakaru, kayu usutanakaru, juykhunakar jawsayam; 14jumasti kusisitaw uñjasïta. Jupanakasti janiw kutiyapkätamti, ukampis jumax aski jaqinakan jakatatäwipan churäwim katuqxäta —sasa.#14.14 Stg 2.1-4.

Jach'a manq'äwit amuyt'äwi

(Mt 22.1-10)

15Uk ist'asinsti, manq'añatak qunt'atäpkän ukanakat mayniw Jesusar säna:

—Diosan qhapaq markapan jach'a manq'äwin manq'irix kusisiñaniwa.

16Jesusasti juparux sänwa:

—Mä jaqiw mä jach'a manq'añ wakichayäna, ukat walja jaqinakar jawsayarakïna. 17Manq'añ wakichatäxipansti, uywataparuw jawsayatanakar yatiyir khithäna: ‘Jutapxam, manq'añax wakt'ayatawa’ sasa. 18Ukampis taqiniw uka manq'äwir jan sarañatak kunayman arunak wakiyapxäna. Nayrïr jawsayatax sänwa: ‘Jichhakiw mä uraq alasta, uk uñjir sarañaxawa, janikiy ñanqha katustati’ sasa. 19Maynïrix sänwa: ‘Phisqa yunta vaca alasta, uk yant'iriw sarä, janikiy ñanqha katustati’ sasa. 20Maynïristi sarakïnwa: ‘Jichhakiw jaqichasta ukat jan sarkäti’ sasa. 21Uywatasti kuttanxasin taqi uk uywiripar yatiyäna. Ukatsti uywirix wal phiñasïna, uywataparux sarakïnwa: ‘Jank'ak saram, plazanakata, marka thakhinakat irptanim jan kunaninakaru, suchunakaru, juykhunakaru, kayu usutanakaru’ sasa. 22Ukxarusti uywatax sarakïnwa: ‘Tata, arsutamarjamaw phuqta, ukampis qunt'asiñax utjaskakiwa’ sasa. 23Ukat uywirix uywatapar säna: ‘Saram, thakhinakaru, marka jak'anakaru, ukatsti irptasinkakim utaxar phuqhantañkama. 24Nayasti sapxsmawa, nayraqat jawsaykta ukanakat janiw khitis manq'axat manq'kaniti’ —sasa.

Criston chiqpach arkirip tukuñataki

25Walja jaqiw Jesusarux arkäna; jupasti kutikipstanisin jupanakaruw sarakïna: 26“Maynitix nayan ukar jutchi, ukatsti awkiparu, taykaparu, warmiparu, wawanakaparu, jilanakaparu, kullakanakaparu, kipka jakañaparus nayat sipan juk'ampi munaschi ukaxa, janiw nayan yatiqirixäkaspati. 27Khititix nayar arkasin cruzap jan apañ munkchi ukax janiw nayan yatiqirixäkaspati. 28Jumanakat maynitix mä torre lurañ munaspaxa, ¿janit nayraqatax qunt'asisin qawqha qullqitix tukuyañatak munaskaspa uk amuyt'askaspaxa? 29Ukampis torre lurañtix qalltani, ukat janirak tukuykani ukkhasti, uk uñjirinakax taqiniw jupat larusipxani, 30akham sasa: ‘Aka jaqix lurañ qalltasin janiw tukuykxiti’ sasa. 31Jan ukax kawkïr reyis, yaqha reyimpi nuwasir sarañapäkani ukaxa, ¿janit jupax qunt'asisin nayraqat amuyt'askaspaxa, kunjämsa tunka waranqa soldadompix saykataspa, pä tunka waranqa soldadompi jutiriruxa? 32Jan saykatirjamäsaxa, mayni reyix jayankaskani ukkhaw sumar mantxañatak khithani. 33Ukhamasti, jumanakat khititix taqi kunapsa jan jaytkani ukax, janiw nayan yatiqirixäkaspati.#14.33 Lc 9.57-62; 18.29-30; Flp 3.7.

Kunapachatix jayux ch'aphaqsutäxi

(Mt 5.13; Mc 9.50)

34“Jayux askiwa; ukampis ch'aphaqarutix tukuspaxa, ¿kunatakis uka jayux askïspaxa? 35Janiw uraqitakisa, wanutakis askïkxiti; jan ukasti waranukutakïxiwa. Khitinakatix jinchunïki ukanakax ist'apxpan.”

Currently Selected:

LUCAS 14: AYOPD

Highlight

Copy