HECHOS 3

Uj suchu runa puririn

1Uj kuti Pedrowan Juanwan temploman wicharisharqanku kinsa kaj hora kashajtin. Chay horaqa karqa Diosmanta mañakuna hora. 2K'achitu nisqa punkupitaj uj runa tiyakusharqa. Payqa mamampa wijsanmantapacha suchu karqa. Sapa p'unchaytaj apamoj kanku, temploman yaykojkunamanta mañakunampaj. 3Suchu runataj Pedrota Juantawan temploman yaykushajta rikuspa, paykunamanta mañakorqa imallatapis qorinankuta. 4Paykunataj suchuta qhawarerqanku. Pedrotaj nerqa: Qhawariwayku.

5Suchu runataj paykunata qhawarerqa, yuyaspa imallatapis jaywarinankuta. 6Pedrotaj payman nerqa: Mana kapuwanchu qolqe nitaj qori. Imachus kapuwasqanta qosqayki: Nazareno Jesucristoj sutimpi jatariy, puririytaj.

7Pedrotaj, suchu runaj paña makinmanta jap'ispa sayaricherqa. Chay kikimpachataj runaj chaki moqosnin sinch'iyaporqanku. 8Suchu runataj patata phinkirispa sayaykorqa, puriytataj qallarerqa. Apostoleswan khuskataj temploman yaykorqa kusiywan purispa, phinkiykachaspa ima, Diosta yupaychaspa. 9Tukuy runataj purishajta rikorqa, Diosta yupaychashajtataj. 10Runastaj rejserqanku suchu runapuni pay kasqanta, pichus templo punkupi k'achitu nisqapi tiyakoj. Chayraku t'ukushaj qhepakorqanku chay suchu runa purisqanmanta.

Templopi Pedro parlan

11Salomón nisqa jatun punkupi, Pedrowan Juanwan kasharqanku. Purirej suchu runataj, paykunamanta jap'iykukuspa mana kacharikorqachu. Runakunataj imata jina t'ukuspa, chayman tantakamorqanku. 12Pedrotaj chayta rikuspa paykunaman nerqa: Israelitas, imaraykutaj kay jinata t'ukushankichejri? Imaraykutaj kay jinatapuni qhawawaykuri? Ichapis qankunaqa yuyashankichej, atiyniykuwan, chayrí Diosta yupaychaj runas kasqaykurayku kay runata puririchisqaykuta. 13Abrahampa Diosnin, Isaacpata, ñaupa tatasninchejpata ima, kamachin Jesusta jatunchaspa k'anchayninman oqharerqa. Qankunataj payta pusarqankichej Pilatojman, qhesacharqankichejtaj paypa ñaupaqempi. Pay kacharipuyta munashajtimpis mana munarqankichejchu. 14Qankunaqa qhesacharqankichej ajllasqata, cheqa kajta, cuentanmantataj mañarqankichej uj runa wañuchi kacharisqa kananta. 15Ajinata qankunaqa wañucherqankichej kausayta qojta. Diostaj paytaqa wañusqamanta kausarichimorqa, noqaykutaj chay rikusqaykuta willayku. 16Señor Jesuspa sutimpi creesqanrayku, kikin Jesús kay runataqa thañicherqa, pitachus qankuna rikunkichej, rejsinkichejtaj. Jesuspi creesqanrayku, ñaupaqeykichejpi kay runaqa thañisqa kashan.

17Kunanqa hermanos noqa yachani, Jesusta wañuchispaqa mana yacharqankichejchu imatachus ruwasqaykichejta, nillataj kamachejkunasniykichejpis. 18Unayña Dios willarqa tukuy profestaspa siminnejta, Criston ñak'arinanta. Chaytaqa Dios junt'arqa. 19-20Chayrayku sajra kausayta saqespa Diosman kutiriychej, juchasniykichej pampachasqas kanankupaj, Diosmantapacha samakuy p'unchaykuna jamunankupaj; Cristota kachamunampaj, pimantachus qankunaman willasqaña karqa. 21Chay Cristoqa Jesusmin, pichus janaj pachallapiraj qhepakonqa, Dios watejmanta tukuy imasta mosojyachinankama. Chaykunamanta Diosqa willarqa ajllasqa profetasninnejta unaymantapacha. 22Ajinata Moisespis nerqa: Señor Diosniykichej uj profetata jatarichenqa wauqesniykichej ukhumanta noqata jina. Payta kasunkichej tukuy ima nisqampi. 23Pillapis chay profetaj nisqanta mana kasojqa, Diospa ajllasqasninmanta wijch'usqa kanqa.

24Kunan p'unchaykunamantaqa, ñaupajtaña tukuy profetas willarqanku Samuelmanta qallarispa, jinallataj paypa qhepanta jamojkunapis. 25Qankunaqa profetaspa wawasnin kankichej, jap'erqankichejtaj tatasniykichejwan Dios tratota ruwasqanta. Maypachachus Abrahamman nerqa: Qampa mirayniykipi, tukuy runaj ayllusnin bendicisqa kanqa, nispa. 26Chayrayku Diosqa kamachinta kausarichimuspa, qankunamanraj ñaupajta kachamorqa, bendicisqa kanaykichejpaj, maypachachus sajra kausayniykichejta saqespa Diosman kutirejtiykichej.

Currently Selected:

HECHOS 3: QCHSB

Highlight

Copy