Èdɔwɔ̀wɔwo 8

1Saolò dà àsi ɖo Stefanɔ̀ be wùwùa ji.

Saolò tĩ èhabɔ̀bɔa yomè

Gbè kè gbè wo wù Stefanɔ̀a, àmèwo tɔ àyà dodo na Yesù be èhabɔ̀bɔ kè lè Yèruzàlɛm-a, eye woa keŋu kãhlɛ̃ ɖo Yudeà ku Sàmarìa be àgowo ji. *Àmèdɔ̃dɔ̃awo kpò ye mu si ò. 2Mawume ɖewo va sɔ Stefanɔ̀ be àmèti kukua yì ɖì, eye wo fã ɛ̀ veve ɖe.

3Saolò ya jè àgbàgba la gbã Yesù be àmèha a. E tona àxuewo mè, lena ŋusù ku nyɔ̃nù kèwo xɔ̀ Yesù ji sèawo do ègàkpa mè.

Filipò do Mawu be àŋɛ̀a lè Samarìa-nyigbã ji

4Àmè kèwo kãhlɛ̃awo lè do àŋɛ̀nyuɛ̃ a yì àfi sia àfi kè wo le toa. 5Nène a ye Filipò va yì èdù gã ɖe mè lè Sàmarìa nyigbã ji, lè do Kristò be àŋɛ̀a. 6Ekè àmèawo sè ènyà kèwo Filipò le gblɔ̃, eye wo kpɔ ŋùdãdɔ kèwo be le wɔ̀a, woa kpata wo xɔ̀ yebe ènufiɔfiɔa ji sè. 7Gbɔ̃gbɔ̃ màkɔ̀màkɔwo to lè àmè sùgbɔ kèwo mè wo nɔ̀a mè ku àpa lelele, nènea ke ye dɔ̀nɔ̀kplibɔ sùgbɔ xaya, eye kpòtɛ̃ sùgbɔ zɔ̃ àzɔ̃lì. 8Eŋuã ŋuti ye jìjɔɛ gã ɖe nɔ̀ èdù ŋua mè tɔwo mè.

9Vɔ̀a, ŋusù ɖe lè Sàmarìa be èdùa mè. Wo yɔna ɛ̀ be Simɔ̀n. Ŋusù kèa wɔ̀nà ŋùdãnu sùgbɔ kèwo dãnaŋù do àmè kèwo keŋu lè Sàmarìa be àgowo jiawo. Ekèa na be wo kpɔna ɛ̀ be e nyi àmè gã ɖe, 10eye àmèwo keŋu nɔ̀nà e yomè, so ɖèviwo ji, kaka yì jè àmègãxowo keŋu ji. Wo gblɔ̃nà be: “Àmè kèa ye ɖo Mawu be ŋusɛ̃ kè wo yɔna be 'ŋusɛ̃ trìakɔa.'” 11Woa kpata, wo ɖona èto è, ɖo, so gà ɖe mè kea, yebe ŋùdãnuwɔ̀wɔ nana àmèwo kãnà yà. 12Vɔ̀a, ekè wo xɔ̀ àŋɛ̀nyuɛ̃ kè Filipò do na woa ji sè, so Mawu be èfìɔdu ku Yesù Kristò be nyikɔ ŋutia, wo lè mawusi na wo, ŋusù ku nyɔ̃nùwo keŋu. 13Simɔ̀n ŋutɔ cã xɔ̀sè, eye wo lè mawusi na ɛ̀. Ekèa yomè a, mu gbà trɔ lè Filipò yomè ò, eye jèsì ku ŋùdãdɔ gã kèwo Filipò le wɔ̀awo dãnaŋù do è.

14 *Àmèdɔ̃dɔ̃ kèwo lè Yèruzàlɛm a, wo va sè be Sàmarìatɔwo xɔ̀ ènyàa ji sè, eye wo ɖo Petrò kudo Yòhanɛ̀s ɖoɖa wo. 15Ekè wo ɖo èdùa mèa, wo fãkue ɖo xɔ̀sètɔwo ta, ne Mawu bèa na wo Gbɔ̃gbɔ̃ Kɔ̀kɔ̀ɛ a; 16ɖoa, Gbɔ̃gbɔ̃ Kɔ̀kɔ̀ɛ a mu kpɔ va woa dòmètɔ ɖe ji hàɖe ò. Mawusi kpò ye wo lè na wo, lè Tɔhonɔ̀ Yesù be nyikɔ mè. 17Ekè Petrò ku Yòhanɛ̀s fãkue vɔ̀a, wo sɔ àlɔ̀ ɖo woa ji, eye Sàmarìatɔwo xɔ̀ Gbɔ̃gbɔ̃ Kɔ̀kɔ̀ɛ a. 18Ekè Simɔ̀n kpɔ be àmèdɔ̃dɔ̃awo sɔ àlɔ̀ ɖo xɔ̀sètɔawo ji, eye Mawu na wo Gbɔ̃gbɔ̃ Kɔ̀kɔ̀ɛ a, e sɔ ègà homè ɖe na wo, 19gblɔ̃ be: “Mì sɔ ŋusɛ̃ kèa na nyè cã, ne àmè kèwo ji mù la sɔ àlɔ̀ ɖoa, woa xɔ̀ Gbɔ̃gbɔ̃ Kɔ̀kɔ̀ɛ a.” 20Vɔ̀a, Petrò ɖo e ŋuti na ɛ̀ be: “Ne ɖì èwò ku ègà wòa ŋuti! Wò susu be wò teŋu sɔ ègà plè Mawu be ènu nana a? 21Ènu ɖe mu kã wò lè ènyà kèa mè ò, eye wò mu la kpɔ gomè lè ènu kèa mè ò, ɖo àpo èjìmè mu kɔ̀ lè Mawu be ŋùmè ò. 22Ye ŋutia ɖè àsi lè sùsu vuɛ̃ wòa ŋuti, ne wòa ɖè kuku na Tɔhonɔ̀; e teŋu sɔ àpo èjìmè be sùsu ŋua kè wò. 23Mù kpɔ be wò lè ŋùbia mè veve ɖe, eye wò zũ èvuɛ̃ be ègàmènɔ̀tɔ.” 24Simɔ̀n ɖo e ŋuti be: “Mì fãkue na Tɔhonɔ̀ ɖo ta nyè, ne ènu kèwo mì gblɔ̃awo dòmètɔ ɖekpe mu gbà jɔ̀ ɖo ji nyè ò.” 25Ekè Petrò ku Yòhanɛ̀s ɖù ɖase so Tɔhonɔ̀ ŋuti eye wo gblɔ̃ yebe ènyàa vɔ̀a, wo trɔ yì Yèruzàlɛm, lè do àŋɛ̀nyuɛ̃ a lè Sàmarìa be kɔpe sùgbɔ mè.

Filipò ku Ètiopìa be kobonɔ̀a

26Tɔhonɔ̀ be àtikplɔtɔa #8.26 Tɔhonɔ̀ be àtikplɔtɔ: Gbɔ̃gbɔ̃ Kɔ̀kɔ̀ɛ a ŋutɔ. gblɔ̃ na Filipò be: “So ne wòa yì èdùa be àpùgo, eye wòa le èmɔ kè so Yèruzàlɛm va to zògbèa ji yì Gazàa.” 27Filipò so ze ɖèka yì. Ètiopìa ŋusù *kobonɔ̀#8.27 Kobonɔ̀: àmè tata; àmè kè mu ɖo neku ò, àlo wo ɖè neku na a. ɖe yì sɛ̃ Mawu lè Yèruzàlɛm, eye be trɔ lè yì àxue. Ŋusù kèa, nyi èfìɔ be ènujikpɔtɔ gã ɖe, eye be kpɔna Etiopìa-nyɔ̃nùfìɔa#8.27 Etiopìa-nyɔ̃nùfìɔ: yebe Bùbu nyikɔ ye nyi Kãdakè. , be àdɔ̀kùnuwo keŋu ji. 28E nɔ̀ ànyi lè yebe kèkea mè, lè hlɛ̃ ènu, lè Mawu be gblɔ̃ɖɛtɔ Ezayà be xoma mè. 29Gbɔ̃gbɔ̃ Kɔ̀kɔ̀ɛ a gblɔ̃ na Filipò be: “Tètè gogo kèke ŋua” 30Filipò ɖèbla gogo kèkea. Ekè be sè kobonɔ̀a le hlɛ̃ gblɔ̃ɖɛtɔ Ezayà be xoma a, e biɔ ɛ̀ be: “Wò ŋɔjè ènu kè wò le hlɛ̃ fifìa mèa?” 31Ètiopìa ŋusùa ɖo e ŋuti na ɛ̀ be: “Àleke mù la wɔ̀, la ŋɔjè e mè, ne àmè ɖekpe mu ɖè e gɔ̃mè na mù ò?” E gblɔ̃ na Filipò be ne ɖo kèkea mè, ne bèa va nɔ̀ ànyi ɖo yè gbɔ. 32Ènu kè bè le hlɛ̃ lè Mawunya xoma a mèa ye nyi ekèa:

“Wo kplɔ̀ ɛ̀ sìgbè àlɛ̃ nène, ne woa yì wù ì;

sìgbè àlɛ̃vi nènea, e trɔ àmumui lè àmè kè le kpà

èfu na ɛ̀a be ŋùkɔ̀.

Nène a ye mu kè ènu ò.

33Ekè wo bɔ̀bɔ̀ ɛ̀ ɖo ànyia,

wo mu sò kòjo jɔ̀jɔɛ na ɛ̀ ò.

Àmè kɛ ye la teŋu pò nupo

so Yebe jìjimèviwo ŋuti ò?

Đo wo wù ì lè xixe kèa mè.”

34Ŋusù kobonɔ̀a biɔ Filipò be: “Àmè kɛ ŋuti gblɔ̃ɖɛtɔa le gblɔ̃ ènyà kèa so ò? Ye ŋutɔ be ŋutinya ye loo, àlo àmè bu tɔ̀ ye? Tɔ̀wò jɔ̀, gblɔ̃ ɛ̀ ma sè.” 35Eye Filipò kè ènu, pò nupo so ènu kè ye ŋusùa lè hlɛ̃ lè mawunya xoma a mèa ŋuti, gblɔ̃ Yesù be àŋɛ̀nyuɛ̃ a be ènyà na ɛ̀. 36Wo le èmɔa lè yì, eye wo kpɔ èsì lè àfi ɖe, eye kobonɔ̀a gblɔ̃ be: “Kpɔɖa! Èsì ye nyi ekèa. Nukɛ ye la gbe be wo mu gbà lè mawusi na mù ò?” [ 37Filipò gblɔ̃ be: “Ne wò xɔ̀sè ku àpo èjì bliboa, eŋuã wo la lè mawusi na wò.” Etiopìa-ŋusùa ɖo e ŋuti na ɛ̀ be: “Mù xɔ̀sè be Yesù Kristò ye nyi Mawu be Èvia#8.37 Hɛ̃hlɛ̃ ègbã vɔ adrɛ̃gɔ̃ a mu lè Mawu be xoma xoxo ɖewo mè ò. .”] 38E ɖè ègbè be kèkea ne nɔ̀tè. Wo àmè èvèawo to, ɖo èsìa mè, eye Filipò lè mawusi na kobonɔ̀a. 39Ekè wo to lè èsìa mèa, Tɔhonɔ̀ be Gbɔ̃gbɔ̃ a sɔ Filipò jo, eye kobonɔ̀a mu gbà kpɔ ɛ̀ ò. Vɔ̀a, e le yebe èmɔ yì ku jìjɔɛ. 40Filipò va kpɔ ye ɖokoe lè èdù kè wo yɔna be Azotòa mè, eye be le èmɔ le do àŋɛ̀nyuɛ̃ a to èdùwo mè, kaka va ɖo Kayizarèa.

Currently Selected:

Èdɔwɔ̀wɔwo 8: GEN

Highlight

Copy