Èdɔwɔ̀wɔwo 6

Wo cã ènujikpɔtɔwo

1Lè àzã ŋuawo jia, nukplaviawo lè sùgbɔ ɖo e ji, eye xɔ̀sètɔ kèwo dona Grikgbeawo, le lì lihũi be, ne Hebrùwo lè ma gbè sia gbè be ènuwoa, wo sònà yèwo be àhòsìawo ɖɛ. 2Eŋuã ŋuti ye *àmèdɔ̃dɔ̃ woèvèawo va yɔ nukplaviwo keŋu bɔ̀, gblɔ̃ na wo be: “Mu sɔ̀gbè be mia tàsi Mawu be ènyàa ɖɛ ne mia va nɔ ma ènu ɖùɖu ò. 3Ye ŋutia, nɔ̀viwo mì kpɔ mìa dòmè ne mìa cã àmè adrɛ̃, kèwo xɔ̀ nyikɔ nyuɛ̃awo, àmè kèwo mè Gbɔ̃gbɔ̃ Kɔ̀kɔ̀ɛ a lè, eye wo nyi ènunyatɔwo, ne mia sɔ wo ɖo èdɔ kèa nu. 4Eŋuã, miawo yaa, mi la kpe ŋùku ɖo kuefã kudo Mawunya be èdɔa ŋuti.” 5Ènyà kèa nyɔ ŋùmè na àmèha a keŋu, eye wo cã àmè adrɛ̃ kèawo: Stefanɔ̀, àmè kè ɖo xɔ̀sè, eye Gbɔ̃gbɔ̃ Kɔ̀kɔ̀ɛ ɖɔ ɛ̀ fuua, Filipò, Prokorà, Nikanɔrà, Timɔnà, Parmenà ku Nikola, so Ãtiokìa, àmè kè nyi àgbàlè trɔ zũ Yudàvia#6.5 Àgbàlè trɔ zũ Yudàvi: àmè kè va trɔ zũ Yudàvi to èkɔ̀ pòpo mè. . 6Wo ɖè àmè cãcã kèawo fiɔ *àmèdɔ̃dɔ̃awo, eye àmèdɔ̃dɔ̃awo fãkue, eye wo ɖo àlɔ̀ woa ji. 7Mawu be ènyàa va kèkè èta ɖo e ji, eye, nukplaviwo le sùgbɔ ɖo e ji lè Yèruzàlɛm. Mawunɔ sùgbɔ ɖewo xɔ̀ Yesù ji sè lè Yudàviwo dòmè.

Wo le Stefanɔ̀

8Eye Stefanɔ̀ kè ɖɔ ku Mawu be màje kudo ŋusɛ̃a, wɔ̀ ŋùdãdɔ ku kpajije gãwo lè dùkɔ̃a dòmè. 9Vɔ̀a, lè ekèawo mèa, Yudàvi ɖewo lè bɔ̀bɔ̀pe kè wo yɔna be “Àmèjojowo tɔ̀a” va sitè ɖo Stefanɔ̀ ŋuti. Woa dòmètɔ ɖewo so Kirenè ku Àlɛ̀ksãdrìa, eye èɖewo cã so Kilikìa ku Azìa. Wo dɔ̃ ènyà ku Stefanɔ̀, 10Vɔ̀a, wo mu teŋu nɔ̀tè lè ŋùkɔ̀ na ɛ̀ ò, ɖo e le pò nupo ku ènunya kè Gbɔ̃gbɔ̃ Kɔ̀kɔ̀ɛ a na ɛ̀a. 11Nène a, wo na ègà àmè ɖewo be woa ɖà àjè ɖo Stefanɔ̀ si be: “Mi sè e lè gblɔ̃ bùsu-nya ɖo Mosè ku Mawu ŋuti.” 12Ekèa na be dùkɔ̃a, ku èdùmèmègãwo, kudo èsefiɔtɔwo kpata, pòzĩ va jè Stefanɔ̀ ji, le è, kplɔ̀ ɛ̀ yì èdùnyagblɔ̃haa be ŋùkɔ̀. 13Wo trɔ kplɔ̀ àjè ɖàsèfo buwo va, gblɔ̃ be: “Ŋusù kèa mu dokpò bùsu-nya gbɔ̃gblɔ̃ ɖo miabe Tèpe Kɔ̀kɔ̀ɛ kèa kudo Mosè be èsea ŋuti ò. 14Đo mi sè lè e nu, be gblɔ̃ be Yesù Nazarɛttɔ̀a la gbã mawuxɔa, eye e la ɖɔ̀lì èkɔ̀do kèwo Mosè ɖo ɖɛ na miawo.” 15Àmè kèwo keŋu nɔ̀ ànyi lè èdùnyagblɔ̃haa mèawo fɔ ŋùkuvi ɖo Stefanɔ̀ ji gãa, eye wo kpɔ yebe ŋùmè ze sìgbè Mawu be àtikplɔtɔ ɖe tɔ̀ nène.

Currently Selected:

Èdɔwɔ̀wɔwo 6: GEN

Highlight

Copy