Èdɔwɔ̀wɔwo 5

Ànanìa ku Safirà

1Vɔ̀a, ŋusù ɖe, kè wo yɔna be Ànania a ku èsrɔ̃a Safirà sà woabe ànyigbã ɖe. 2E pò ɖo du ku èsrɔ̃a, eye wo ɖè ègàa ŋuti kpɔ̀tɔ̀, eye e sɔ kpɔ̀tɛa va na *àmèdɔ̃dɔ̃awo. 3Vɔ̀ Petrò biɔ ɛ̀ be: “Ànanìa, nukɛ ŋuti Satana ɖɔ àpo èjì mè nène ò? Wò ɖè èci kè wò sà ànyigbãa ŋuti kpɔ̀tɔ̀, va lè ɖa àjè na Gbɔ̃gbɔ̃ Kɔ̀kɔ̀ɛ a! 4Ekè wò mu kpɔ sà ànyigbãa òa ɖe, mu nyi tɔ̀ wò kpò be nyi òa? Fifì kè wò sà ɛ̀a, yebe ègàa, mu nyi tɔ̀ wò kpò be gbà nyi òa? Àlekè ye susu kèa teŋu va èjì mè na wò lekea ò? Mu nyi àgbètɔwo ye wò ɖà àjè na ò, vɔ̀a, Mawu ye wò ɖà àjè na.” 5Ekè Ànanìa sè ènyà kèa, e jè ànyi, eye be ku zè ɖèka. Vɔ̃vɔ̃ gã ɖe jè àmè kèwo keŋu sè ènu kèawoa ji. 6Đèkajɛ kèwo lè funuawo, sitè, sɔ àvɔ xasa ɖo yebe àmèti kukua ŋuti, eye wo dro è to yì ɖì.

7Sìgbè gàpòpo ètɔ̃ yomè nènea, èsrɔ̃a va ɖo. Mu sè ènu kè jɔ̀ a ò. 8Petrò yɔ ɛ̀, biɔ ɛ̀ be: “Ègà homè kèa ye wò kudo èsrɔ̃ wò, mì xɔ̀ ɖo ànyigbã kè mì sàa taa? To e na mù.” E ɖo e ŋuti be: “Ɛ̃, nènea kpò mi sà ɛ̀.” 9Ekè be gblɔ̃ nènea, Petrò gblɔ̃ na ɛ̀ be: “Àleke wɔ̀ ye èwò ku èsrɔ̃ wòa, mì pò ɖo du, jro la do Tɔhonɔ̀ be Gbɔ̃gbɔ̃ a kpɔ ɖo ò? Kpɔɖa, ɖèkajɛ kèwo yì ɖì èsrɔ̃ wòawo ye le ɖo àxuea mè ŋua. Wo la kɔ wò cã yì ɖì.” 10Zè ɖèkaa, nyɔ̃nùa cã jè ànyi, ɖo Petrò be àfɔ̀ gbɔ, eye be ku. Ekè ɖèkajɛawo ɖo àxuea mèa, wo kpɔ yebe àmèti kukua, eye wo dro ye cã, yì ɖì ɖo èsrɔ̃a gbɔ. 11Vɔ̃vɔ̃ gã ɖe jè èhabɔ̀bɔ bliboa ku àmè kèwo keŋu sè ènu kèawoa ji.

Àmèdɔ̃dɔ̃awo le wɔ̀ ŋùdãnuwo

12Mawu wɔ̀ ŋùdãdɔ sùgbɔ, e ɖè jèsì sùgbɔ fiɔ, to *àmèdɔ̃dɔ̃awo ji lè dùkɔ̃-a mè. Xɔ̀sètɔawo keŋu bɔ̀nà ɖo du lè Salomɔ̀n be àwa mè. 13Àmè buwo mu gbà xànà la jè woa ji ò; vɔ̀a dùkɔ̃a bùnà wo ŋutɔ, eye e kafuna wo. 14Àmè kèwo xɔ̀ Tɔhonɔ̀ ji sèawo, le sùgbɔ ɖo e ji, lè ŋusù mè, lè nyɔ̃nù mè.

15Eye àmèwo kɔna woabe dɔ̀nɔ̀wo ɖo àbàti ku àbawo ji, va ɖona èmɔwo to, be, ne Petrò va lè yìa, yebe vɔ̃vɔ̃lì tètè ne jè dɔ̀nɔ̀awo ji. 16Àmè sùgbɔ fuu pònà zĩ so kɔpe kèwo pòxla Yèruzàlɛm awo mè, kplɔ̀nà dɔ̀nɔ̀wo ku àmè kèwo gbɔ̃gbɔ̃ màkɔ̀màkɔwo le ɖè èfũ naawo vana, eye èdɔ̀a vɔ̀nà na wo.

Wo le tĩ àmèdɔ̃dɔ̃awo yomè

17So ènu kèawo ŋutia, * mawunɔ gãa ku yebe ŋutime kèwo nyi Sadusìwo be èhasòsoa lè hùãŋu àmèdɔ̃dɔ̃awo veve ɖe. Nène a, wo ɖo ènu ɖo woa ŋuti. 18Wo le àmèdɔ̃dɔ̃awo do èdù be ègàkpa mè. 19Vɔ̀a, lè èzã mèa, Tɔhonɔ̀ be àtikplɔtɔ ɖe hũ ègàkpaa be àgbowo, kplɔ̀ wo to jè àgboa ji. E gblɔ̃ na wo be: 20“Mi yì nɔ̀ mawuxɔa mè, ne mìa gblɔ̃ àgbè yeye be ènyà kèawo na àmèwo keŋu.” 21Ekè àmèdɔ̃dɔ̃awo sè ènyà kèa, wo tùtà mawuxɔa mè, ŋùdekɛ̃nyɛ fùtù, eye wo fiɔ ènu àmèwo.

Ekè Mawunɔ gãa ku yebe ŋutimewo vaa, wo yɔ Izràɛl be àmègãwo na dùnyagblɔ̃haa be gòdodo. Ekè wo bɔ̀a, wo dɔ̃ àmè ɖoɖa ègàkpaa mè be wo ne yì kplɔ̀ àmèdɔ̃dɔ̃awo va. 22Ekè gbãdãgbãwo yìa, wo mu gbà kpɔ wo lè ègàkpaa mè ò. Wo trɔ va ɖo ègbèa be: 23“Mi kpɔ àgboawo keŋu lè tutu àdodoe, eye gbãdãgbã lè èhɔ̃awo ji. Ekè mi hũ èhɔ̃awoa, mi mu kpɔ àmè ɖekpe lè èxɔ̀a mè ò.” 24Ekè mawuxɔa ji kpɔtɔwo be èga ku * mawunɔ gãwo sè ènyà kèa, wo titɔ lè àmèdɔ̃dɔ̃awo be ènyà mè, eye wo le biɔ woa ɖokoewo ènu kè jɔ̀ ŋua be gɔ̃mè. 25Vɔ̀a, àmè ɖe va gblɔ̃ na wo be: “Àmè kèwo mì le tu ɖo ègàkpa mèawo ye lè mawuxɔa mè, gbà le fiɔ ènu dùkɔ̃a ŋua.”

26Eye mawuxɔa ji kpɔtɔwo be ègaa ku sumɔ̃viwo yì kplɔ̀ àmèdɔ̃dɔ̃awo va. Wo mu kplɔ̀ wo ku tùkaɖa ò, ɖo wo le vɔ̃ be dùkɔ̃a la va pò èkpe yèwo. 27Ekè wo kplɔ̀ àmèdɔ̃dɔ̃awo vaa, wo kplɔ̀ wo yì èdùnyagblɔ̃haa be ŋùkɔ̀, eye Mawunɔ Gãa dohùɛ do wo be: 28“Mi do *èse na mì veve ɖe be mì mu gbà fiɔ ènu lè àmè kèa be nyikɔ mè ke ò. Fifìa mìabe ènufiɔfiɔa gbãkpe Yèruzàlɛm be èdùa mè keŋu. Eŋuã, mì jro la sɔ ŋusù kèa be èku kpla èkɔ̀ na mi!” 29Vɔ̀a, Petrò ku àmèdɔ̃dɔ̃ kpɔ̀tɛawo ɖo e ŋuti na ɛ̀ be: “E jè be woa sè ètonu na Mawu bòhũ, wu àgbètɔwo. 30Mia tɔgbewo be Mawu fɔ̃ Yesù kèa kè mì wù, wàlɛbɛ kè mì ka ɛ̀ ɖo àtisòga ŋutia. 31Eye Mawu kɔ ɛ̀ ɖo ji, lè yebe ɖùsi mè, sìgbè èfìɔvi ku Hlùɛ̃tɔ nène, ne bèa na èdɛ̃ ɖɔ̀lì ku èvuɛ̃ kèke Izràɛl. 32Mi nyi ɖàsèfowo na ènu kèawo, mia ku Gbɔ̃gbɔ̃ Kɔ̀kɔ̀ɛ kè Mawu na àmè kèwo sènà ètonu na ɛ̀awo.”

33Ekè èdùnyagblɔ̃tɔawo sè ènyà kèa, wo bijì ŋutɔ, eye wo jro la wù wo. 34Vɔ̀a, Farizì ɖèka lè woa dòmè wàlɛbɛ ŋua; wo yɔna ɛ̀ be Gamaliɛl; e nyi èsefiɔtɔ gã ɖèka, eye dùkɔ̃a keŋu bùnà ɛ̀. Ŋusù kèa, sitè lè èdùnyagblɔ̃haa mè, ɖè ègbè be woa ɖè àmèdɔ̃dɔ̃awo to vi ɖe. 35Eŋuã yomè a, e gblɔ̃ na èdùnyagblɔ̃tɔawo be: “Mia tɔ̀, Izràɛl-ŋusùwo, mì kpɔ nyuɛ̃ ɖe, ɖo ènu kè mì ji be yèwoa wɔ̀ ku àmè kèawoa ŋuti. 36Hùenu ɖewo ye nyi ekèa va yì; Teudas ɖe sitè lè fikèa, be yè nyi àmè tɔ̀xɛ ɖe, àmè sìgbè àgbètɔ èkàwo sɔ̃ŋu nène kplɔ̀ ɛ̀ do. Vɔ̀a, ye ŋutɔa, wo wù ì, eye àmè ŋuawo keŋu kãhlɛ̃, eye ènyà kè be sɔ vaa, mu yì ŋùkɔ̀ ò. 37Lè ekèa yomè a, Yudà, Galileatɔa sitè lè àmè hɛ̃hlɛ̃ be hùenu. E dɔ̃ àmè sùgbɔ ɖo ŋuti; ye cã ku, eye àmè kèwo keŋu kplɔ̀ ɛ̀ doawo kãhlɛ̃. 38Fifìa, mù la gblɔ̃ na mì be mìa trɔ lè àmè kèawo yomè; mì tàsi wo ne woa jo. Đo, ne ènu kè wo ɖo lè wɔ̀a, so àgbètɔ gbɔa, e la gbãdo. 39Vɔ̀a, ne e nyi be Mawu be wɔ̀wɔ ye be nyia, mì mu la teŋu gbã ɛ̀ do ò. Ne mì mu kpɔ nyuɛ̃ ɖe òa, e la va ze ŋutɔ cã be mi le sitè ɖo Mawu ŋuti.” Eye woa keŋu sè yebe ègbè. 40Wo yɔ àmèdɔ̃dɔ̃awo va, eye wo na wo pò wo ku àtãŋù, eye wo gbà do *èse na wo be wo mu gbà pò nupo lè Yesù be nyikɔ mè ke ò, eye wo tàsi wo. 41Àmèdɔ̃dɔ̃awo jo lè èdùnyagblɔ̃haa be ŋùkɔ̀, eye, wo lè kpɔ jìjɔɛ, ɖo, wo be Mawu bù yèwo cã be yèwo nyi àmè kèwo jè ne woa do yèwo ŋùkpɛ̃ ɖo Yesù be nyikɔ taa. 42Eye, gbè sia gbè, lè mawuxɔa mè ku àxuewo mèa, wo mu dokpò ènufiɔfiɔ àmèwo ku àŋɛ̀nyuɛ̃ a dodo be Yesù ye nyi Mɛ̀sia ò.

Currently Selected:

Èdɔwɔ̀wɔwo 5: GEN

Highlight

Copy