Actes 11

Peetroo máafì tin jítèe Jeerusaleem

1 Akpambal nì nnabiyaamu mun nìn bí Juudeeyee gbìl̄ yii bin kaa sá Juuda yabee mun fōō Unimbɔti nyɔɔbundi. 2Peetroo nìn fātìi bāań Jeerusaleemee, bin nìn fōō ki kíí ki sá Juuda yabee nìn bíi wòoǹ-u, 3yii u kɔ́ bin kaa gíí dikpancandee dumpu, u nì bi jíń tijin. 4Ní Peetroo bíi máafí-bi tin jítèe, an nín kíliń pu ki tin kúntì puee, yii: 5«M nìn bí Joopee tiŋki poon ki bíi mèé ní Unimbɔti ŋúbitì m-nimbiliŋ m wál̀ tiwan tiba, tì bí kii satakpaanee ki bóob́ ajannaatil pu ki nyánní yilpu ki sīntìń m-cee. 6Ní m bíi kpèé sata poon dímmmee, ní ki ká tiwaŋkuti tin còom̄ ataa anaayee nì ipeel, nì tin fùee nì nnɔmbiyaamu, 7ní m gbìl̄ nneen ŋubɔ bí-mi yii: <Peetroo, yīkìí kpɔ̀ kí ŋmɔ́!> 8Ní m bí yii: <Aayee, m-Dindaan! Doooo nee tiwan tin ti kòó àá tin kaa bí circiree kaa láá pée kɔ́ m-nyɔkɔn.> 9Nliliitiimin ní nneenee gíti lī yii: <Tin Unimbɔti ŋáŋkèe, sii taa lì yii taa ŋān̄!> 10Áli míǹ diba dibee mita, ní an wanti kɔkɔ fātìi nín jɔ́ḿ yilpu. 11Dicilpu niinee, bininjab bita bin bi nìn túnní Seesaaree m-ceeyee bāań kudii kun ni m nìn kóòyee nyɔkɔpu. 12Ní Circir Fam bí yii man nì bi ń nīn cá, ḿ taa gùgufì. Man nì nnabiyaamu muluu nee di nìn nóó ki cūtì Kɔɔrneeyi dumpu. 13Ní u mun máafì-ti u nín nìn kā u-dumpu Unimbɔti tuuŋŋu ŋubɔ bāań ki tùkū-u yii: <Tɔ̄ Joopee, bí yíiń-si Siimɔn un bi páaǹ diyindi yii Peetrooyee. 14U làá tùkù-si tibɔti tin pu sii nì a-samaau kɔkɔ làá dī kí ká difiilee.> 15M kíĺ ki bíi sòoǹ nì bee, ní Circir Fam kpákatìń bi-pu kii mì nín nìn kpákatìń ti mun pu mpeepeekaam puee. 16Niinee, m téetì ti-Dindaan nyɔɔbundi nee pu yii: <Yoowaneesi nìn fùul̀ binib Unimbɔti nyim, ama Unimbɔti làá dāá fàl̀ nimbi nì Circir Fam ní.> 17Unimbɔti pú bi mun u-Fam mbaantiim kii u nín nìn pú ti mun puee ní, kun puee ti-kɔkɔ fōō ti-Dindaan Yeesu Kriisitoo ki kíí. Kin ma mun ŋma ní ḿ kpákáǹ Unimbɔti?» 18Bi gbìl̄ mimmee, kaa ti bíi kpākantí-u, ki kíǹ ki bíi nyɔ́ŋkí Unimbɔti ki bí yii: «Mimmee, Unimbɔti yāntì bin kaa sá Juuda yabee mun fá bi-kpitii kí ŋmā kí ká dimaŋfal dee.»

Kriisitoo nikitil din bí Antiyɔɔsee

19Bin bin bi nìn páb́ bi yàl̄ Eetiyeen kúm boonee bàn̄ áli Feenisii nì Siipiri nì Antiyɔɔsi, ki sòoǹ Unimbɔti bɔti Juuda yab ŋmaniŋma cee. 20Ama bi-kansikin biba bin nyánní Siipiri nì Siireenee bāań Antiyɔɔsi ki mun bíi tùkù bin kaa sá Juuda yabee Tibɔmɔntiil tin sòoǹ ti-Dindaan Yeesu puee. 21Ti-Dindaan pɔŋŋu nìn bí bi-cee, ní kunipaau nìn fōō ki kíí ki nóó ti-Dindaan. 22Kriisitoo nikitil din bí Jeerusaleemee nín gbìl̄ an bɔtee ní bi dū Baarnaabaasi ki tú Antiyɔɔsi. 23U bàn̄ee ní ki ká Unimbɔti nín bīiǹ bi-pu miŋyee ní an mɔ́ɔkiǹ-u, ní u bíi tìì-bi kunyannyaau, yii bi-kɔkɔ ń nīn yú nì dipɔbil diba kí nīn nákáǹ ti-Dindaan. 24Di sá yii u nìn sá unimɔnti, ki gbí Circir Fam ki cáá fookii. An puee binib tikpil nìn dɔ́miń ki nóó ti-Dindaan.

25Míǹ boonee ní Baarnaabaasi búntì Taarsi kí nyàab̀ Sɔɔl. 26U bàn̄ ki ká-uee, ní ki cáań-u Antiyɔɔsi. Dibimmɔndi kɔkɔee, bi nìn dūu kāl̀ Kriisitoo nikitil kansikin ki dàkà binib tikpil Unimbɔti bɔti. Antiyɔɔsi tiŋkin ní bi péé péé ki yíiń Yeesu boonnooliibi yii Kriisitoo yab. 27Ŋyunti gbantee, Unimbɔti bɔnaatiliibi biba nyánní Jeerusaleem ki sīntì Antiyɔɔsi. 28Bi-kansikin ubɔ ní bi nìn yíì Agabusi. Unimbɔti Fam yāntì kijapaayee yíkìi lī yii, ŋkùm miba làá nyā kitiŋ kɔkɔ pu kí nīn pɔ̄ɔ̄. - Ní mì lafun bāań Kloodi beel yuntiŋu. 29Ní Yeesu boonnooliibi bíi màkà báà ŋma ń tīī u nín ŋūǹ puee bí dūú tūtuǹ bi-nabiyaamu mun kóò Juudeeyee. 30Bi tīīyee, ní ki yāntì Baarnaabaasi nì Sɔɔl yōoǹ ki cáa cūnnì Jeerusaleem Kriisitoo nikitil kpilib cee.

Currently Selected:

Actes 11: BASSARDC

Highlight

Copy