Zechariah 10
10
Hay Panalimunan Apo Dios hinan Tataguna
1Ha"in an hi Zechariah ya inali' di,
“Hinan puntamman tu'u ya mahapul tu'uy udan.
At hiyanan ibaga tu'un Apo Dios ta pa'alionay udan
ti Hiyay nunlumuh bunut an alpuwan di udan.
Ti pumhod ay di itanom tu'u ya pumhod tu'un amin.#10:1 Hay kinulug nan do'ol an tatagu ya hi Ba'al an bulul di iCanaan di mangipa'alih udan ta tumagu nan inhabalda, mu bo'on ti hi Apo Dios.
2At adiyu edenol hinan bulul ya nan mangibaag hi aat di en'enap
ti layah an amin nan ibagadan mi'id ipatukana,
ya nan pangal'alu'da ya mid hulbina.
At hiyanan mid poto' di ayanyu an umat ayuh nan na'utaw an kalnilun maligligatan
ti mi'id di manalimun ay da'yu.”
3Ya inalin Apo Dios di,
“Nidugah ahan di bungot'uh nan paddungnay mangipahtul ay da'yun tatagu',
at moltao' didan amin ti da'yun tatagud Judah ya bagi',
ya halimuna' da'yu,
at da'yuy mumbalin hi umat hinan mun'abi'ah an kabayun mi'gubat.
4Ya hay alpuwan nan paddungnay Batu#10:4 Hay ipa"elna ya nan Alin Pento' Apo Dios an hi Jesu Kristu (Psa. 118:22; Mat. 21:42; Mk. 12:10; Lk. 20:17; Ac. 4:11; I Pet. 2:4, 7). an miyammah nan dugun di abung ya hinad Judah,
ya hina goh di alpuwan nan paddungnay Pado' di tuldan abung,#10:4 Hay ipa"el nan tuldan abung ya nan nasyon ad Israel, ya hay a'usalan nan pado'na ya ta way mandol ta adi matu"in. Hiyah ne goh di tamun nan Alin Pento' Apo Dios.
ya alpuwan goh nan Panan mangipa'wah hinan ayiw an mipana,#10:4 Hay ituduna ya nan Alin Pento' Apo Dios an manalimun ay dida ti gubatonay buhulda.
ya hina goh di alpuwan nan mun'ap'apu an numbino'ob'on di ipapto'da.
5Ya awniat da'yuy mangab'abak
an umat ayuh nan nun'atulid an tindalun pun'amehyu nan buhulyu
an ta"on nan mumpungkabayu ti wagwadaa' ay da'yu.
6Idat'uy bi'ahyun tatagud Judah ya ad Israel,#10:6 Munlammung nan Hudyud Judah ya nan Hudyud Israel an ta"on unda nilahhin hidin numpapto'an din Alin hi Rehoboam hidin 930 B.C. ta duwadan pumpapto'an.
ya ibaliw'u goh da'yu ti hom'o' da'yu ta pa'anamuto' da'yuh nan babluyyu
ti nidugah di pammo'a' ay da'yu.
At paddungnay agguy'u ingnganuy da'yuh din hopapna
ti Ha"in an Apu an Diosyu ya donglo' mahkay di luwaluyu.
7At da'yun holag Israel ya nun'atulid ayu an umat ayuh nan titindalu,
ya umamlong ayu an umat ayuh nan imminum hi bayah.
Ya wa ay ta tigon nan imbabaluyyuy umamlonganyun o'ommodda
at nidugah di umamlongandah nan inat'un Diosyu.
8Ya amungo' nongkay da'yun tatagu',
ya ibaliw'u da'yu ta dumo'ol ayu an umat hidin ado'olyuh din hopapna.
9Ti ta"on hi un'u nun'iwa'at da'yuh nan numbino'ob'on an abablubabluy
mu nonomnomona'#10:9 Hay pohdon nan ngadan Zechariah an ibaga ya hi Apo Dios ya nonomnomona. At mattig an inusal Apo Dios nan ngadan Zechariah ta mapolhat di panudtuduna. damdama ay da'yu an ta"on hi un ayu wah nan adagwin babluy.
At baliwa' da'yu nongkay ya nan imbabaluyyu ta mumpumbangngad ayuh nan babluyyu.
10At ekak'u da'yud Egypt ya ad Assyria ta iyanamut'u nongkay da'yu,
ya ipado'ol'u da'yu ta umuy di udum an mi'hitud Gilead ya ad Lebanon.
11Ya melwang ayuh nan nidugah an punligatan
an paddungnay baybay an bad'angonyu ti padinngo' nan dalluyun,
ya tud'o' nan Wangwang an Nile an ta"on un ma'alluhung.
Ya pogpogo' di pumpapto'an di i'Assyria ya nan i'Egypt ay da'yun tatagu' ta adida mahkay mumpahpahiya.
12Ya Ha"in an Dios di dumalat hi bumi'ahanyun tatagu',
at un'unnud ayu mahkay ay Ha"in,
at nan immandal'uy atonyu.”
Currently Selected:
Zechariah 10: NHAD
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
