យេរេមា 39

ក្រុងយេរូ‌សាឡិមត្រូវដួលរលំ

1នៅខែដប់ ឆ្នាំទីប្រាំបួននៃរាជ្យសេដេគា ស្តេចយូដា នោះព្រះបាទនេប៊ូក្នេសា ជាស្តេចបាប៊ីឡូន និងពល‌ទ័ពទ្រង់ទាំងអស់ ក៏មកឡោម‌ព័ទ្ធច្បាំងនឹងក្រុងយេរូ‌សាឡិម។ 2នៅថ្ងៃប្រាំបួន ខែទីប្រាំបួន ឆ្នាំទីដប់មួយ នៃរាជ្ជកាលព្រះបាទសេដេគា គេបំបែកទម្លាយកំផែងទីក្រុងបានហើយ។ 3ពេលនោះ គេយកបានក្រុងយេរូសាឡិមហើយ មន្ត្រីរបស់ស្តេចបាប៊ីឡូនទាំងប៉ុន្មាន ក៏ចូលមកអង្គុយនៅត្រង់ទ្វារជាន់កណ្ដាល គឺមាននើកាល-សារេស៊ើរ សាំកា-នេបូរ សាសេគិម រ៉ាបសារីស នើកាល-សារេស៊ើរ រ៉ាបម៉ាក់ ព្រមទាំងមន្ត្រីឯទៀតទាំងប៉ុន្មានរបស់ស្តេចបាប៊ីឡូន។

4កាលព្រះបាទសេដេគា ជាស្តេចយូដា និងពួកទាហានទាំងប៉ុន្មានបានឃើញគេ នោះក៏រត់ចេញពីទីក្រុងទៅទាំងយប់ តាមផ្លូវសួន‌ច្បាររបស់ស្តេច ដែលចេញតាមទ្វារនៅកណ្ដាលកំផែងទាំងពីរ ទ្រង់ចេញតម្រង់ទៅឯស្រុកវាល។ 5ប៉ុន្តែ ពល‌ទ័ពសាសន៍ខាល់ដេ ក៏ដេញតាមព្រះបាទសេដេគាទាន់នៅត្រង់វាលយេរីខូរ កាលគេចាប់ទ្រង់បានហើយ ក៏នាំទៅព្រះបាទនេប៊ូក្នេសា ជាស្តេចបាប៊ីឡូន ត្រង់រីបឡា នៅស្រុកហាម៉ាត ហើយនេប៊ូក្នេសាក៏កាត់ទោសទ្រង់។ 6ស្តេចបាប៊ីឡូនសម្លាប់ពួកបុត្រារបស់ព្រះបាទសេដេគា នៅចំពោះព្រះ‌នេត្ររបស់ទ្រង់ត្រង់រីបឡានោះ ក៏សម្លាប់ពួកអ្នកមានត្រកូលខ្ពស់ទាំងប៉ុន្មាននៃស្រុកយូដាដែរ 7ហើយចាក់បង្ខូចព្រះ‌នេត្ររបស់ព្រះបាទសេដេគា រួចដាក់ច្រវាក់នាំទៅឯស្រុកបាប៊ីឡូន។ 8ពួកខាល់ដេក៏ដុតព្រះ‌រាជវាំង និងផ្ទះទាំងប៉ុន្មានរបស់បណ្ដា‌ជនចោល ព្រមទាំងរំលំកំផែងក្រុងយេរូ‌សាឡិមផង។ 9បន្ទាប់មក នេប៊ូសា‌រ៉ាដាន ជាមេ‌ទ័ពធំ លោកដឹក‌នាំសំណល់ពួកបណ្ដា‌ជនដែលនៅក្នុងទីក្រុង និងពួកអ្នកដែលចូលខាងលោក ព្រមទាំងសំណល់នៃប្រជាជនទាំង‌ឡាយទៅជាឈ្លើយ ដល់ស្រុកបាប៊ីឡូន។ 10ប៉ុន្តែ នេប៊ូសា‌រ៉ាដាន ជាមេ‌ទ័ពធំ លោកទុកពួកអ្នកក្រីក្រក្នុងបណ្ដា‌ជន ជាពួកអ្នកដែលគ្មានអ្វីសោះ ឲ្យនៅក្នុងស្រុកយូដា ហើយនៅគ្រានោះក៏ចែកដំណាំទំពាំងបាយជូរ និងចម្ការឲ្យដល់គេផង។

ព្រះបាទនេប៊ូក្នេសាដោះលែងហោរាយេរេមា

11ព្រះបាទនេប៊ូក្នេសា ជាស្តេចបាប៊ីឡូន បានបង្គាប់នេប៊ូសា‌រ៉ាដាន ជាមេ‌ទ័ពធំ ពីដំណើរហោរាយេរេមាថា៖ 12«ចូរទំនុក‌បម្រុងហោរាយេរេមាឲ្យបានល្អផង កុំធ្វើបាបលោកឡើយ គឺត្រូវប្រព្រឹត្តនឹងលោកតាមដែលលោកប្រាប់ចុះ»។ 13ដូច្នេះ នេប៊ូសា‌រ៉ាដាន ជាមេ‌ទ័ពធំ ហើយនេប៊ូសាសបាន រ៉ាប-សារីស នើកាល-សារេស៊ើរ រ៉ាប-ម៉ាក់ ព្រមទាំងចៅ‌ហ្វាយធំៗទាំងអស់របស់ស្តេចបាប៊ីឡូន 14ក៏ចាត់គេឲ្យទៅយកហោរាយេរេមាពីទី‌លានគុក មកប្រគល់ដល់កេដាលា ជាកូនអ័ហ៊ី‌កាម ដែលជាកូនសាផាន ឲ្យនាំលោកទៅផ្ទះវិញ។ ដូច្នេះ លោកបាននៅជា‌មួយប្រជាជន។

15ព្រះ‌បន្ទូលរបស់ព្រះ‌យេហូវ៉ាបានមកដល់ហោរាយេរេមា ពេលលោកជាប់នៅក្នុងទី‌លានគុកនៅឡើយ នោះថា៖ 16«ចូរទៅប្រាប់អេបេឌ-មេលេក ជាសាសន៍អេធីយ៉ូពី ដូច្នេះ គឺថាព្រះ‌យេហូវ៉ានៃពួកពល‌បរិវារ ជាព្រះរបស់សាសន៍អ៊ីស្រា‌អែល មានព្រះ‌បន្ទូលដូច្នេះថា មើល៍! យើងនឹងនាំអស់ទាំងពាក្យរបស់យើងមកលើក្រុងនេះ ឲ្យបានសេចក្ដីអាក្រក់ មិនមែនជាសេចក្ដីល្អទេ ពាក្យទាំងនោះនឹងបានសម្រេចនៅមុខអ្នកក្នុងថ្ងៃនោះ»។ 17ប៉ុន្តែ ព្រះ‌យេហូវ៉ាមានព្រះ‌បន្ទូលថា៖ «យើងនឹងជួយអ្នកឲ្យរួចនៅថ្ងៃនោះ ហើយអ្នកមិនត្រូវប្រគល់ទៅក្នុងកណ្ដាប់ដៃនៃពួកមនុស្សនោះ ដែលអ្នកខ្លាចឡើយ។ 18ដ្បិតយើងនឹងជួយសង្គ្រោះអ្នកពិតប្រាកដ អ្នកមិនត្រូវដួលដោយដាវឡើយ គឺនឹងបានរួចជីវិត ពីព្រោះអ្នកបានយកយើងជាទីទុកចិត្ត» នេះជាព្រះ‌បន្ទូលនៃព្រះ‌យេហូវ៉ា។

Currently Selected:

យេរេមា 39: គកស១៦

Highlight

Copy