Matayo 9

Yesu kapfonya kihewi na kamuyatsia nabviseze

Marko 2:1-12; Luka 5:17-26

1Yesu kanjia chomboni na kavuka yombe jwa pfii jwa hiḍi ziwa na kenda mudzini kwao Kaperinaumi. 2Hukuḍe kapfiikijwa muntu ahinamfiye atsukwiijwe na t̯at̯a. Yesu epfoona faro ya hawaḍe wantu wamutsukwiiyeo, kamwamba huyu ahinamfiye, “Mwanangu,#9:2 Waalimu wa Kiyahud̯i na wakuu wangine, wakwakunenani na muntu kwa njia ya umpowe, wekimuhana mwanangu kuyanga matsako. dzipfe mojo, nabvisezo kuziyatsijwa.” 3D̯ubva waalimu wangine wa *Sharia waḍabva kunena na mojoni#9:3 Haya matsoro ya Kiyunani pia yanaweza kuwa na maana ya kwamba: waḍabva kunena wao na wao. wakyamba, “Huyu muntu huyu kakukufuruni t̯i!”

4Yesu epfohambuya hiviḍe wevyowakit̯ara, kawauza kawamba, “Kut̯i nywinywi mwakunit̯ariani mambo mazuka dzayohayo? 5Koro vivodho vya kunena ni vi? Kumwamba huyu muntu, ‘Nabvisezo kuziyatsijwa?’ Ambu kumwamba, ‘Nuka wenende?’ 6Natsaka kumuyanga kwamba mimi *Mwana jwa Ad̯amu nina mamulaka ya kuyatsia wantu nabvise humu lumwenguni.” Kisa kamwamba huyu muntu ahinamfiye, “Nuka wima, hwaa hiḍi t̯at̯aḍyo wende nyumbani.” 7Na huyuḍe muntu kanuka kenda nyumbani. 8Wantu wonse weokuwapfo wanjijwa ni oga na waḍabva kumushad̯a Muungu kwa kumumpa mwanaad̯amu uwezo mukuu dzohuu.

Yesu kamuhana Matayo awe mwanafund̯iwe

Marko 2:13-17; Luka 5:27-32

9Yesu epfonuka na hapfaḍe, kendakaona *muhwaa kuwa mumodza eyeakihanigwa Matayo.#9:9 Matayo kwa sari ḍingine ekihanigwa Lawi. Ewa kakaa chihako humuḍe mwa hi ofisi ya kuhwaiya kuwa. Yesu kamwamba, “Niuḅa!” Nae Matayo kanuka kamuuḅa.

10Ḅaad̯aye, Yesu na wanafund̯iwe wenda nyumbani kwa Matayo wakaḍye chakuḍya. Wepfokaa kuḍyani, wahwaa kuwa wenji na wantu wangine weonahwajwa kuwa wanabvise, nao wakaa chanoni kuḍyani pfamodza nao. 11Hawa *Mafarisayo wepfoona hivi, wawauza hawa wanafund̯iwe wawamba, “Kut̯i ayu mwaalimu jwenu kakuḍyani na wahwaa kuwa na wantu wangine wanabvise?”

12Yesu epfowasikia, kawambukuya kawamba, “Weo na matsea ntawanalacha muriit̯a. Weonalacha muriit̯a ni hawaḍe weo wajwazi. 13Endani mukalache maana ya haya matsoro yambiiyeyo, ‘Mimi si haḍya ya mvuugiya zenu, ela natsaka mukifwiyana t̯ei nywinywi kwa nywinywi.’ Koro mimi sikudzia wantu weonadziona kwamba ni wahachi, ela nidzia wanabvise.”

Yesu kauzwa dzuu ya kufunga

Marko 2:18-22; Luka 5:33-39

14Nsiku modza wanafund̯i wangine wa Yohana Mut̯opya wamwendea Yesu na wamuuza wamwamba, “Kut̯i swiswi na Mafarisayo hunakaa na kufunga, ela wanafund̯iwo ntawakae na kufunga?” 15Yesu kawambukuya kawamba, “Waalikijweo harusini wanawezadze kuwa na masikit̯iko huku huyu ḅwana harusi akiwa ka pfamodza nao? Nsiku idzafika, ambapfo huyu ḅwana harusi kadzanujwa kahi yao. Hapfo ndipfo wadzepfofunga.

16Ntaku muntu eyenahuna kiraka kuyawa kwa nguo mpya, akakingiza kwa nguo ijariyeyo. Koro akihenda dzavyo, hiki kiraka che nguo mpya kidzepfoḍabva kunyaa, kinainuha hi nguo ya kae, ndookomu nayo inaḅaika zaid̯i. 17Dza vivyo, ntaku muntu eyenangiza mvinyo mpya kwa mifuko ya nchingo#9:17 Wayahud̯i wekihwaa nchingo za waḍondo na kuzielekanya mifuko ya kuwekea mvinyo. ya kae. Koro akihenda dzavyo, hi mifuko ya nchingo inaḅaika ne mvinyo inahika. Mvinyo mpya inangizwa kwa mifuko ya nchingo mipfya! Na muntu akihenda hivi, ndipfo hi mifuko ne mvinyo ntaviwezi kunangika.”

Yesu kafufuya mwanamuke na kapfoza muke

Marko 5:21-43; Luka 8:40-56

18Yesu epfoakinena hivi, kendejwa ni muntu mumodza eyekuwa mukuu jwa *sunagogi. Huyuḍe muntu epfokwenda kamuvunzia nkuhi Yesu na kamwamba, “Ḅwana, mwanamuke wangu kahuna nsoho saambi. Ela nimanya kwamba ukyenda ukimupfaza mukono anafufuka.”

19D̯ubva Yesu na hawa wanafund̯iwe wanuka wagijana na huyuḍe muntu. 20-21Wepfowakyenda, wadzijwa ni muke eyekuwa na ujwazi wa kukakanyika mwazi. Hu huu ujwazi ewa kamakaa nao kwa myaka kumi na miwii. Huyu muke ewa kamamat̯a kamba, “Amaa nikyenda nikiuhora au mutse weḍi lot̯a ḍya Yesu saapfowa?” D̯ubva kenda na nyuma kenda kauhora hu mutse wa hiḍi lot̯a ḍya Yesu. 22Yesu kaperuka kamuona na kamwamba, “Maama, dzipfe mojo, faroyo ikupfoza.” Na pfapfo huyuḍe muke kapfowa.

23Yesu epfofika hapfaḍe nyumbani pfa huyuḍe mukuu jwa sunagogi, kaona t̯ut̯a ya wantu weowakiiya na wangine weowakikwimba na nzumari.#9:23 Wayahud̯i wewa na mila ya kwamba wakifwijwa, wekiiya na kubiga nzumari kuyanga kwamba wana masikit̯iko. Ela ntawekikwimba meya ya kiyad̯a. 24Kawamba, “Yawani nyonse! Huyu mwana nkakufwa, kakuyaani t̯u!” Ela hawaḍe wantu waḍabva kumutseka Yesu koro wemanya kwamba kafwa ḍugha. 25D̯ubva hawaḍe wantu wepfoyawa, Yesu kanjia humuḍe chumbani kamugija mukono huyuḍe mwanamuke, nae kasumama! 26Ndookomu maagu dzuu yeḍihiḍi dzambo yad̯achaa hihiiḍe ḍanda yonse.

Yesu kapfonya ntumbu matso wawii na ḅuḅwi

27Yesu epfonuka akwakuchiani, kaḍabva kuuḅwa ni ntumbu matso wawii. Hawa ntumbu matso wekimuḅaiya madzwi wakyamba, “E Mwana jwa D̯aud̯i,#9:27 Wayahud̯i wekiyoweeya kwamba huyu Mupfonya jwao kadzayawa sindo wa haju D̯aud̯i na kadzawapfonya na mad̯ina garagara, na anawat̯awala dza hiviḍe vya haju D̯aud̯i. Ndookomu Yesu wekimuhana, ‘Mwana jwa D̯aud̯i,’ yani mudzukuu D̯aud̯i. ad̯o hufwiye t̯ei!”

28Wagija kumuuḅa na nyuma hat̯a wenda wanjia humuḍe nyumbani emoakikaa. Ndookomu Yesu kawauza kawamba, “Muhikiza kwamba mimi naweza kumuhendeza muone?” Nao wamwambukuya wamwamba, “Ee, huhikiza Ḅwana!” 29Nae Yesu kawahora haya matso yao na kawamba, “Ḅasi navimuhendekeye dza muhikiziyevyo!” 30Nao pfapfo waḍabva kuona! Makisa Yesu kawaseresa vyumuni kawamba, “Manyani mutsevimwambia muntu yuḍejwonse!” 31Ela wakidzawakinuka wavid̯achasa kula pfantu hihiiḍe sehemu, wakisumwiiya wantu dzuu ya hayaḍe ya Yesu eyoakihenda.

32Hawaḍe wantu wepfowakiyawa, wantu wangine wamuyehea Yesu muntu eyekuwa na mpepfo nzuka zimuhendeyezo ḅuḅwi. 33Yesu epfoiyavya hiḍe mpepfo nzuka t̯u, huyuḍe muntu kaḍabva kunena. Wantu wamaka na waḍabva kunena wakyamba, “Hachi ntahudzaona mambo dzayahaya yahendeke pfaḍepfonse hi hii nsi ya Isiraeli!”

34Ela hawa Mafarisayo wamba, “Kakuyavyani mpepfo nzuka kwa uwezo wa Shaat̯ani, mukuu jwa mpepfo nzuka zonse.”

Yesu kawafwiya t̯ei wantu

35D̯ubva Yesu kenda midzi yonse na vidzidzi vye hiḍe ḍanda, akiyongweeza masunagogini na kusumwiiya haya *Maagu Mema dzuu ya Uhaju wa Mbinguni. Na pia kawapfonya wantu wenji na wenji weokuwa na majwazi na nd̯wari za kula namuna. 36Epfoona hivi vit̯aro vya wantu vivyovikimwendea, kawasikit̯ikia muno. Koro kawaona dza mbuzi zisizokuwa na mut̯unga. Kawaona kwamba wekihangaika na ntaweewa na madzikwat̯yo yaḍeyonse. 37Ndookomu kawamba hawa wanafund̯iwe, “Haya mavuno ni menji, ela hawa wa kuyavuna ni wachuchu. 38D̯ubva muyombeni huyu Ḅwana jwa haya mavuno ongeze wantu wa kuyavuna.”

Currently Selected:

Matayo 9: pkb

Highlight

Copy