Matayo 4
4
Yesu kaḍemegwa ni Shaat̯ani
Marko 1:12-13; Luka 4:1-13
1Makisa Yesu kayongojwa ni Ruhu Mudheru kenda hat̯a yuwandani, endeyekoakiḍemegwa ni Shaat̯ani. 2Hukuḍe, Yesu kafunga kwa nsiku miyongo mine, siku na musikahi, hat̯a mwiso kagijwa ni nzaa. 3D̯ubva Shaat̯ani#4:3 Haya matsoro ya Kiyunani yanakwamba: Huyu eyenaḍema wantu. kamwendea kamwamba, “Ikiwa kwamba wewe u Mwana jwa Muungu ḍugha, yaamuru haya mawe haya yawe mikahe.”
4Ela Yesu kamwambukuya kamwamba, “Vyoregwa matsoroni kwamba,
‘Mwanaad̯amu nkanaishi kwa chakuḍya#4:4 Haya matsoro ya Kiyunani yanakwamba: mwanaad̯amu nkanaishi kwa mukahe t̯u. t̯u,
ela kwa kula chuuwo kiyawiyecho kwa Muungu.’ ”
5Makisa Shaat̯ani kamupfiika Yesu hat̯a Yerusalemi, na kamusumamisa hapfaḍe pfantu pfepfo dzuu pfa mwiso pfe *Hekalu. 6Kisa kamwamba, “Ikiwa kwamba wewe u Mwana jwa Muungu ḍugha, dzyanguse nsi kuyawa hapfa dzuu. Koro vyoregwa kwamba, ‘Muungu anawaamuru malaikawe wakwamiye, na wakutsukuye dzuu dzuu, utsekudzakolasika na iwe hat̯a modza.’ ” 7Yesu kamwambukuya kamwamba, “Ela kawii vyoregwa matsoroni kwamba, ‘Nkudzomuḍeme Ḅwana Muungujo.’ ” 8Makisa Shaat̯ani kamuhwaa Yesu kawii kamupfiika dzuu ya murima mukuu, na kamuyanga nsi zonse za lumwengu na mad̯ahaye yonse. 9Kisa kamwamba, “Haya yonse nayakupfa wewe, ikiwa kwamba kunivunzia nkuhi kuniyomba mimi.” 10Ela Yesu kamwamba, “Ninukia hapfa Shaat̯ani! Koro vyoregwa matsoroni kwamba, ‘Umuhile Ḅwana Muungujo na umuhumikie jeje heket̯u!’ ” 11D̯ubva Shaat̯ani kamuyatsa, na kudza malaika wakimuhumikia Yesu.
Yesu kaḍabva kaziye ya kusumwiiya
Marko 1:14-15; Luka 4:14-15
12Yesu kadza kasikia kwamba Yohana Mut̯opya kangizwa gerenzani. Ndookomu nae kanuka na Yud̯aya kenda ḍyimbo ḍya Galilaya. 13Ela epfokwenda Nazareti nkakukaa muno. Kadzakanuka kenda mudzi wa Kaperinaumi wiwo geri ya ziwa ḍya Galilaya, nsi ya vyeet̯i vya Zabuloni na Nafutali. 14Na hivi hivi vihendeka ili hikiḍe chuuwo kinenejwecho ni *nabii Isaya kit̯imiye. 15Koro nabii Isaya ewa kamba,
“Nina maagu kwa hawaḍe wantu weo nsi ya vyeet̯i vya Zabuloni na Nafutali.
Hi hii nsi yaa geri ya ziwa,
ḍoombe ya tsana ya Yorod̯ani.
Hii ni nsi ya Galilaya,
iyokukajwani ni wantu wa vyeet̯i vingine.
16Hawa ni wantu weokuishini kizani pfasipfo kumumanya Muungu.
Ela wadzaona muyanga mukuu wa mafara.
Wakukaani nsi iringijweyo ni kiza cha kufwa.
Ela hu muyanga wa Muungu udzawayangaiya tswee.”
17D̯ubva hangu huhuuḍe wakati Yesu kaḍabva kusumwiiya wantu akiwamba, “Pfyehuzani mama, koro Uhaju wa Mbinguni umaawa hafufi.”
Yesu katsana wanafund̯iwe wa d̯ura
Marko 1:16-20; Luka 5:1-11
18Nsiku modza Yesu epfoakyenenda geri ya ziwa ḍya Galilaya, kaona ndugu wawii. Wewa ni Simioni eyeakihanigwa Pet̯ero na huyu ndugujwe ekihanigwa And̯erea. Hawa wandugu wowii wekilowa na nyavu koro wewa wantu wa kulowa. 19Yesu kawahana kawamba, “Niuḅani, nami namuhendeza munawa walowa wa wantu.” 20Nao pfapfo waziyatsa hizi nyavu zao wamuuḅa. 21Yesu epfokwenda usoni, kaona ndugu wangine wawii. Wewa ni Yakobo na Yohana, wana wa Zebed̯ayo. Wewa wakaa chihako chomboni pfamodza na baba jwao, wakisona nyavu zao. Yesu kawahana, 22nao pfapfo wamuyatsa baba jwao pfamodza na hichi chombo chao, na wamuuḅa Yesu.
Kazi ya Yesu ahendeeyo ḍyimbo ḍya Galilaya
Marko 3:7-12; Luka 6:17-19
23Yesu kazinga ḍyimbo ḍyonse ḍya Galilaya, akyenda na kuyongweeza masunagogini na kusumwiiya haya *Maagu Mema dzuu ya Uhaju wa Mbinguni. Na pia kapfonya wantu wenji na wenji weokuwa na majwazi na nd̯wari za kula namuna. 24D̯ubva kula pfantu, wantu waḍabva kunena wemawe, na shad̯umeaye ifika hat̯a ḍyimbo ḍya Siria. Wantu wamuyehea wajwazi weokuwa na nd̯wari za kula namuna. Hangu wantu weokuwa na mpepfo nzuka, weokuwa na vifofo, na hat̯a weohinamfa, wonse wayehegwa kwa Yesu awapfonye, nae kawapfonya wonse. 25Ndookomu wantu wenji na wenji waḍabva kumuuḅa. Wangine wewa mbwa hiḍi hiḍiḍe ḍyimbo ḍya Galilaya, wangine wewa wayawa Yerusalemi na ḍanda zingine za ḍyimbo ḍya Yud̯aya. Wangine wao wewa wayawa sehemu iyoikihanwa, “Midzi Kumi,” na wangine wayawa ḍanda zingine ziizo ḍoombe ya tsana ya Yorod̯ani.
Currently Selected:
Matayo 4: pkb
Highlight
Share
Copy
Want to have your highlights saved across all your devices? Sign up or sign in
© 2004, Bible Translation and Literacy