Matayo 13

Inganyo ḍya mushat̯a mbeju

Marko 4:1-9; Luka 8:4-8

1Makisa iiḍe nsiku, Yesu kanuka na hapfaḍe nyumbani kenda hukuḍe geri yeḍi ziwa kakaa chihako. 2Epfokaa karingwa ni t̯ut̯a nkuu ya wantu, nae kaona kwamba heri anjie chomboni. Epfonjia kakaa chihako, na hawa wantu wasumama hapfaḍe geri yeḍi ziwa. 3Makisa kawasumwiiya mambo menji na menji kwa mainganyo. Kawamba, “Kwiwa na muntu mumodza endeye kushat̯ani mbeju. 4Epfoakishat̯a, mbeju zingine zigwa njiani na ziḍigwa ni nsongo. 5Mbeju zingine zigwa maweni kusikokuwa na mutsanga mwinji, na zimea haraka. 6Ela kwa kwamba hi mitse ntaiwa na mizi yendeyeyo nsii, ipfobigwa ni dzuwa inyuuka ifwa. 7Zingine zigwa miwani na hi miwa nayo ikuya iishumpanya hi mimea na iiyaga. 8Ela mbeju zingine zigwa kuntu kwa mutsanga munono na zivyaa chima cha nseensee miyongo mihahu zaid̯i ya hiviḍe zishat̯ijwevyo. Zingine zivyaa chima cha miyongo mihandahu ambu gana, zaid̯i ya hiviḍe zishat̯ijwevyo. 9D̯ubva huyuḍe eye na masikio nasikiye!”

Yesu keleza maana eyonasumwiiya na mainganyo

Marko 4:10-12; Luka 8:9-10

10Makisa hawa wanafund̯i wamwendea Yesu wamuuza wamwamba, “Ḅwana, kut̯i kula ukwakunenani na hawa wantu unakaa na kunena na mainganyo?”

11Yesu kawambukuya kawamba, “Nywinywi muḍyaalijwa kuimanya siri ya Uhaju wa Mbinguni, ela wangine ntawakuḍyaalijwa. 12Koro huyuḍe eye na kintu na akikitumia, huyo anakwongezejwa zaid̯i na zaid̯i. Ela huyuḍe asiye na kintu, ḅasi hat̯a hakaḍe kachuchu ekonako pia anakapfokwa.#13:12 Haya matsoro ya Kiyunani yana maana ya kwamba: huyuḍe eyenatsaka kunisikiiya anapfegwa kuimuka zaid̯i na zaid̯i, ela huyuḍe asiyetsaka kunisikiiya, hat̯a hakaḍe kachuchu amanyiyeko nako pia anakapfokwa. 13Ndiyo maana niyonanena nao na mainganyo kwa dzambo ḍya kwamba gula kuona wanaona, ela ntawahambuye kintu. Na kusikiiya wanasikiiya, ela ntawaimuke kintu. 14Ndookomu huḍe unabii wa Isaya unat̯imia kwao. Koro vyoregwa kwamba,

‘Munapfindiiya na kupfindiiya,

ela ntamut̯oimuka kintu.

Munachimiza na kuchimiza,

ela ntamut̯oona kintu.

15Vitswa vyenu vihenda vyumu,

na masikio yenu yahenda maziho.

Na kuona ntamuone,

koro mufinya.

Ndookomu ntamusikiye, ntamuone,

na wala ntamuimuke kintu.

T̯ambere si hivyo,

mundeniperukia mimi,

nami nindemupfonya.’

16Ela nywinywi muvodhyegwa muno, koro matso yenu yanaona, na masikio yenu yanasikia. 17Koro hachi nyakumwambiani, manabii wenji pfamodza na wantu wangine wachuuwo, wat̯amani muno kuyaona haya haya mwiyokuonani nywinywi, ela ntawakuyaona. Wat̯amani kuyasikia haya mwiyokusikiani nywinywi, ela ntawakuyasikia.”

Maana ya hiḍi inganyo ḍya mushat̯a

Marko 4:13-20; Luka 8:11-15

18Yesu kagija kunena na hawa wanafund̯iwe kawamba, “D̯ubva nywinywi sikiiyani maana ya hiḍi inganyo ḍya huyu muntu endeye kushat̯ani mbeju. 19Hiziḍe mbeju zigwiyezo njiani, ni dza hawaḍe wantu weonayasikiiya haya maagu ya Uhaju wa Mbinguni na wakatsayaimuka. Muzuka Shaat̯ani anakudza na kuwapfoka hiḍe mbeju ye chuuwo cha Muungu ishat̯ijweyo myojoni mwao. 20Hiziḍe mbeju zigwiyezo maweni, ni dza hawaḍe wantu weonakisikiiya hichi chuo cha Muungu na iyo saa wakachipfokea na tsekea muno. 21Ela kwa kwamba hichi chuuwo ntachikungora myojoni mwao, faro yao ntaiwe na nguvu. Wakipatwa ni mad̯ina kwa dzambo ḍye chuuwo, iyo saa wanaziyekeza faro zao. 22Hiziḍe mbeju zigwiyezo miwani ni dza hawaḍe weonakisikiiya chuuwo cha Muungu, ela mirumiru za maisha na makulekule ya ujabva wa huju lumwengu vinawalinga na kukishumpanya hichi chuuwo. Ndookomu hichi chuuwo ntakivyae matunda yaḍeyonse myojoni mwao. 23Na hiziḍe mbeju zigwiyezo kwiiko na mutsanga munono, ni dza hawaḍe wantu weonakisikiiya hichi chuuwo na wakachigija na mojo mumodza. Maisha yao yanamuvyaiya Muungu matunda dza hiviḍe vya muhi wivyonavyaa mumpaka ukaara gomba.”

Inganyo ḍya pfaiya

24Yesu kadza kawasumwiiya wantu inganyo ḍingine kamba, “Uhaju wa Mbinguni unaingana na muntu ashat̯iye mbeju nyema za nganu nkondeni mwakwe. 25Ela huḍe sikuwe, kula muntu epfoakiyaa, kwenda nyabvajwe hukuḍe nkondeni endeyeakishat̯a mbeju za pfaiya makisa akigonzowa. 26Hi nganu ipfokuya hat̯a ikiḍabva kuyavya masuke, hiḍi pfaiya naḍyo ḍiyawiya. 27Hawa wahumisi wa huyuḍe mwenye hi nkonde wamwendea na wamuuza wamwamba, ‘Ḅwana, dzaambia akuḍe nkondeni ntahwiishat̯a nganu nyeema? Mani kut̯i e nkonde idzaa pfaiya t̯ipu?’ 28Huyuḍe mwenye kawambukuya kawamba, ‘Hiḍyo pfaiya ḍinawa kwamba ḍishat̯wa ni nyabva.’ Nao wamuuza wamwamba, ‘Unatsaka hwende hukaḍikuye-kuye?’ 29Nae kawamba, ‘Moro ḍiyatseni, koro munaweza kuḍikuya-kuya pfamodza ne nganu. 30Ishinu viyatseni vikuye pfamodza. Ngera ya mavuno idzepfofika nawamba hawa wahenda kazi waḍikuye-kuye hiḍi pfaiya na waḍifunge-funge malopa waḍigibvile moho. Ela nawambia kwamba hi nganu waivune na wainingiziye chihaani.’ ”

Inganyo ḍya mbeju ya tsare

Marko 4:30-32; Luka 13:18-19

31Yesu kawasumwiiya inganyo ḍingine kawamba, “Uhaju wa Mbinguni nauinganya na mbeju ya tsare#13:31 Haya matsoro ya Kiyunani yahadza mbeju ya harid̯ale. Hii iwa ni mbeju ndoḍo sawa sawa na mbeju ya tsare. imeeyeyo nkondeni. 32Mbeju ya tsare ndiyo mbeju ndoḍo ya mwiso kahi ya mbeju zonse. Ela ikimea inawa muhi mukuu wa kwamba hat̯a nyuni nao wanakudza na kudzielekanyia vitsanza humu mahambini.”

Inganyo ḍya hamira

Luka 13:20-21

33Yesu kawasumwiiya inganyo ḍingine kawamba, “Uhaju wa Mbinguni nauinganya na hamira ya muke ahwaiyeyo akiikandia mukahe. Ingawa hu unga wiwa ni mwinji na mwinji,#13:33 Haya matsoro ya Kiyunani yanakwamba: ni chima cha pishi nsano na nusu. hi hamira injia-njia, na hu unga wonse ufura hat̯a uhenda mukahe mukuu na mukuu.”

34D̯ubva haya haya mayongweezo yonse, Yesu kayawasumwiiya wantu na mainganyo. Na kula epfoakisumwiiya t̯ut̯a ya wantu, ekiwasumwiiya na mainganyo. 35Hivi hivi vit̯imiza huḍe unabii unenejweo ukyamba,

“Nikwakuḅaani kanwa kunena,

nanena nao na mainganyo.

Na nawaimusya mambo yawekejweyo dza ngadzi

hangu kuumbwa kwa lumwengu.”

Yesu keleza maana ya inganyo ḍya pfaiya

36Makisa Yesu kanuka na hapfaḍe pfe t̯ut̯a ya wantu kanjia nyumbani. Hawa wanafund̯iwe wamwendea wamwamba, “Ḅwana, hwambie maana ya hiḍi inganyo ḍya pfaiya.”

37Nae kawamba, “Huyu muntu endeye kushat̯ani mbeju, ni dzami *Mwana jwa Ad̯amu. 38Maana ya hi nkonde ni huju huju lumwengu. Hizi mbeju nyema ni hawaḍe wantu weo wa Uhaju wa Mbinguni. Na hiḍi pfaiya ni hawaḍe weo wa Muzuka Shaat̯ani. 39Huyu nyabva endeyeakishat̯a mbeju za pfaiya, ni Shaat̯ani. Hi ngera ya mavuno, maanaye ni mwiso wa lumwengu, na hawa wantu wa kuvuna ni malaika.

40Dza vya pfaiya ḍivyonakujwa-kujwa ḍikaundukizwa na kutsomwa, ndivyo vidzevyowahendekea wanabvise nsiku ya mwiso. 41Mimi Mwana jwa Ad̯amu nidzawahuma malaika wangu wadzeowayavya wantu wazuka wonse kuyawa Uhajuni mwangu. Wadzawaundukiza wantu wonse weonangiza wenzao nabviseni, pfamodza na hawaḍe weonahenda mazuka, 42na wadzawafat̯ula mohoni. Huko huko hawa wantu wadzaiya na kurhigha magego. 43Na hawaḍe weo wahachi, wadzayangaa dza hiḍi dzuwa Uhajuni mwa Baba jwao jwa yuwinguni. D̯ubva huyuḍe awee na masikio nasikiye!”

Inganyo ḍya nkandi ifitsijweyo

44Yesu kawasumwiiya inganyo ḍingine kawamba, “Uhaju wa Mbinguni uingana na nkandi ya thamani nkuu muno ifitsijweyo nkondeni, na ikyenda ikionegwa ni muntu. D̯ubva kwa tsekea eyokuwa nayo, huyuḍe muntu kaifitsa kawii. Makisa kenda kaguza vyonse evyokuwa navyo, na kagala kenda kaiguya hiḍe nkonde ili hiḍe nkandi iwe yakwe.”

Inganyo ḍya lulu

45Yesu kagija kunena kamba, “Na kawii Uhaju wa Mbinguni nauinganya na muntu jwa guzi eyeakilacha lulu ya kuguya. 46Nsiku modza kenda kaona lulu nyema muno iyoikiguzwa. D̯ubva nae akidzaakiiona kenda kaguza vyonse evyokuwa navyo, na kenda kaiguya.”

Inganyo ḍya nyavu

47Yesu kasumwiiya inganyo ḍingine kamba, “Na kawii Uhaju wa Mbinguni waa dza nyavu iyonagiswa madzini na ikagiza kula aina ya kisembe. 48Ipfonadzaa, hawa walowa wanainuha wakaiyavya gubani. Wanakaa chihako wakaḍabva kutsana-tsana hivi visembe. Hivi visembe vyema vyema wanavihwaa wakavingiza vikapfuni, ela hiviḍe visivyo maana wanavihwaa wakavifat̯ula. 49Ḅasi hivi hivi ndivyo vidzevyowa nsiku ya mwiso. Hawa malaika wadzawat̯anya wantu wahachi na wazuka. 50Hawaḍe wazuka wadzafat̯ulwa mohoni wadzekoiya na kurhigha magego.”

51Makisa Yesu kawauza hawa wanafund̯iwe kawamba, “Dze, avi vyonse nimusumwiiyevyo muviimuka?” Nao wamwambukuya wamwamba, “Ee, huviimuka.”

52Nae kawamba, “Ḅasi kula aimanyiye hi *Sharia na ayagijiyee haya mayongweezo dzuu ya Uhaju wa Mbinguni, anawa dza muntu ayaviye nkandiye ya kae na mpya na akizitumia pfamodza.”

Yesu kadzizigwa mudzini kwao

Marko 6:1-6; Luka 4:16-30

53Yesu epfokwisa kunena haya haya mainganyo kanuka na hukuḍe 54kagala mudzini kwao na kenda kayongweeza humuḍe *sunagogini. Wonse wamusikiiyeo wamaka muno hat̯a waḍabva kuuzana wao na wao wakyamba, “Ayu muntu ayu, hi hii mvidhyo eyonayo kaihwaa ku? Ambu amumpiye uwezo wa kuhenda haya haya mafara ya kumakisa ni ga? 55Ae ntahukumumanya kwamba ni mwana jwa ayuḍe seremala? Dzaambia mamajwe si Maria? Awa wanduguzwe si aḍe Yakobo, Yusufu, Simioni na Yud̯a? 56Na hat̯a awa waimbuzwe, si wantu hwiwokuishini nao humu humu mudzini? Mani azi akili na umanyi mwinji na mwinji kavihwaa ku?” 57Ndookomu ntavikuwatsakiza na wadziza kumuhikiza. Nae Yesu epfoona hivyo kawamba, “Hangu d̯ura nabii anahilwa kula pfantu, isipfokuwa mudzini kwao na balabalani kwao!” 58Ndookomu kwa dzambo ḍya kwamba hawa wantu ntawakumuhikiza, nae nkakuhenda mafara menji ya kumakisa.

Currently Selected:

Matayo 13: pkb

Highlight

Copy