Luka 3
3
Maelekanyo ya njia ya Yesu
Matayo 3:1-12; Marko 1:1-8; Yohana 1:19-28
1Wiwa mwaka wa kumi na nsano hangu *Kaisari Tiberio awe haju jwa nsi yonse ya Rumi. Nsiku hizo, Pontio Pilato, ewa liwali jwa Yud̯aya. Na *Herod̯e ewa haju jwa Galilaya, na Filipo ndugujwe, ewa haju jwa Iturea na Tirakoniti. Hali Lisania ewa haju jwa Abileni. 2Na Anasi na Kayafa wewa wakohani wakuu. Ngera hizo, chuuwo cha Muungu kimudzia Yohana mwana jwa Zakaria, akiwa yuwandani. 3Kenda ḍanda zonse za tsana ya Yorod̯ani, akisumwiiya wantu kwamba, wapfyehuze mama na wat̯opyegwe ili Muungu apate kuwayatsia nabvise zao. 4Ndookomu yahendeka dza yorejwevyo chuoni mwa *nabii Isaya kwamba,
“Ni muntu eyekulalabvani yuwandani akyamba,
‘Ielekanyeni njia ya Ḅwana,
na muyarongaarye machiyoye.
5Mawehe yonse nayadzazwe,
mirima na maguba yonse navisapfazwe.
Na njia zipfohokeyezo nazigonzojwe
na njia nzuka nazihendegwe kuwa nyema.
6Wantu wonse wadzaiona njia ya mupfonyo wa Muungu.’ ”
7D̯ubva wantu wenji na wenji wamwendea Yohana wakitsaka awat̯opye. Nae kawamba, “E nywinywi kivyazi cha nyoka! Ni ga amwambiyee kwamba munaweza kuid̯arama e hukumu ya Muungu iyokudzani? 8Ikiwa kwamba mupfyehuza mama ḍugha, ḅasi ishini maisha ya kuyanga kwamba muziyatsa nabvise zenu. Na wala namutsedzihwaiya kwamba mu wadheru usoni kwa Muungu kwa kwamba mu kivyazi cha Iburahimu. Koro hachi nyakumwambiani, Muungu anaweza kuyahwaa haya mawe haya, na ayapfyehuze kuwa yuvyee jwa Iburahimu. 9Na sasa hiḍi shoka ḍimakwisa kuwekwa t̯ayari. D̯ubva kula muhi usiwovyaa matunda mema unakentwa na unakwangukijwa mohoni.” 10Wantu wamuuza Yohana wamwamba, “Mani d̯ubva huhendedze?” 11Nae kawambukuya kamba, “Awee na nkanzu mbii namumpe modza huyuḍe asikintu, na awee na chakuḍya nahende vivyo.” 12Makisa kudza na *wahwaa kuwa, weowakitsaka kut̯opyegwa. Nao wamuuza wamwamba, “Mwaalimu, ehe naswi huhendedze?” 13Nae kawambukuya kawamba, “Namutsehwaa kuwa kuchia chima muwekeejwecho.” 14Makisa na asikari nao pia wamuuza, wamwamba, “Ehe naswi huhendedze?” Yohana kawambukuya kamba, “Namutsesit̯aki muntu kwa dzambo asiḍyohenda nolawe kudhara vivyo vya wantu. Furumani na maipfo ya kazi yenu.”
15Kula mumodza eyeakiindia yadzeyohendeka kaḍanganika, koro ntawakumanya kwamba Yohana ndiye ayu *Masiya ambu hat̯a. 16Ndookomu Yohana kawamba, “Mimi nyakumut̯opyani na madzi, ela kuna muntu eyekudzani nyuma yangu, eye na uwezo mukuu kunichia mimi. Sinamala hat̯a kufunguya milao ya viyahuvye.#3:16 Kazi ya kufunguya milao ya viyahu iwa nza wahumwa. Ndookomu Yohana kamba nkanamala hat̯a kuwa muhumwa jwa huyu awee kudzani. Jeje kadzamut̯opya na Ruhu Mudheru na moho. 17Mikononi mwakwe kagija yutseo jwa kuvut̯ia. Kaa t̯ayari kudzaivut̯ya hi bvaro na aḍisafise hiḍi hanga. Hi bvaro nyema anaihwaa anaingiza chihaani, ela haya mapfapfi anayangiza mohoni na yanapfya moho usiozimika.”
18Ndookomu Yohana kawaera wantu kwa njia nyinji, akwakuwasumwiiyani maagu mema. 19Kamut̯olela haju Herod̯e, kwa dzambo ḍya kumuhwaa Herod̯ia, eyekuwa mukaza ndugujwe na kwa mazuka yangine ahendeyeo. 20Kwa dzambo ḍyevihivi Herod̯e kamufunga Yohana gerenzani, akidzyongezea mazukaye.
Kut̯opyegwa kwa Yesu
Matayo 3:13-17; Marko 1:9-11
21Wantu wonse wepfokwisa kut̯opyegwa, Yesu nae kadza kat̯opyegwa. Makisa epfoakiyomba hizi mbingu zipfenuka, 22na Ruhu Mudheru kamusukia kwa yuumbo jwa ndiwa. Makisa kusikika idzwi kuyawa mbinguni ḍikyamba, “Wewe u mwanangu mutsakwa, nitsakizwa nawe muno.”
Yukoo jwa Yesu
Matayo 1:1-17
23Yesu epfoḍabva kuyongweeza, ewa na chima cha myaka miyongo mihahu. Eehanwa Yesu mwana jwa Yusufu, dza vya wantu wamut̯ariiyevyo. Heli ewa babajwe Yusufu.
24Heli ewa mwana jwa Matati.
Matati ewa mwana jwa Lawi.
Lawi ewa mwana jwa Meleki,
na Meleki ewa mwana jwa Yanai.
Yanai ewa mwana jwa Yusufu.
25Yusufu ewa mwana jwa Matatia.
Matatia ewa mwana jwa Amosi.
Amosi ewa mwana jwa Nahumu.
Nahumu ewa mwana jwa Esili.
Esili ewa mwana jwa Nagai.
26Nagai ewa mwana jwa Mati,
na Mati ewa mwana jwa Matatia.
Matatia ewa mwana jwa Simei,
na Simei ewa mwana jwa Yoseki.
Yoseki ewa mwana jwa Yod̯a
27na Yod̯a ewa mwana jwa Yonani.
Yonani ewa mwana jwa Resa,
na Resa ewa mwana jwa Zerubabeli.
Zerubabeli ewa mwana jwa Salatieli,
na Salatieli ewa mwana jwa Neri.
28Neri ewa mwana jwa Meleki,
na Meleki ewa mwana jwa Ad̯i.
Ad̯i ewa mwana jwa Kosamu,
na Kosamu ewa mwana jwa Elimadamu.
Elimadamu ewa mwana jwa Eri.
29Eri ewa mwana jwa Yoswa,
na Yoswa ewa mwana jwa Elieza.
Elieza ewa mwana jwa Yorimu,
na Yorimu ewa mwana jwa Matati.
Matati ewa mwana jwa Lawi,
30na Lawi ewa mwana jwa Simioni.
Simioni ewa mwana jwa Yud̯a,
na Yud̯a ewa mwana jwa Yusufu.
Yusufu ewa mwana jwa Yonamu,
na Yonamu ewa mwana jwa Eliakimu.
31Eliakimu ewa mwana jwa Melea,
na Melea ewa mwana jwa Mena.
Mena ewa mwana jwa Matata,
na Matata ewa mwana jwa Natani.
Natani ewa mwana jwa D̯aud̯i,
32na D̯aud̯i ewa mwana jwa Yese.
Yese ewa mwana jwa Obed̯i,
na Obed̯i ewa mwana jwa Boazi.
Boazi ewa mwana jwa Salimoni,
na Salimoni ewa mwana jwa Nahasoni.
33Nahasoni ewa mwana jwa Aminadabu,
na Aminadabu ewa mwana jwa Adimini.
Adimini ewa mwana jwa Arini,
na Arini ewa mwana jwa Ezironi.
Ezironi ewa mwana jwa Perezi,
na Perezi ewa mwana jwa Yud̯a.
34Yud̯a ewa mwana jwa Yakobo,
na Yakobo ewa mwana jwa Isaka.
Isaka ewa mwana jwa Iburahimu,
na Iburahimu ewa mwana jwa Tera.
Tera ewa mwana jwa Nahori,
35na Nahori ewa mwana jwa Serugu.
Serugu ewa mwana jwa Ragau,
na Ragau ewa mwana jwa Pelegi.
Pelegi ewa mwana jwa Ebari,
na Ebari ewa mwana jwa Shela.
36Shela ewa mwana jwa Kainani,
na Kainani ewa mwana jwa Arifakisadi.
Arifakisadi ewa mwana jwa Shemu,
na Shemu ewa mwana jwa Nuhu.
Nuhu ewa mwana jwa Lameki,
37na Lameki ewa mwana jwa Metusala.
Metusala ewa mwana jwa Henoke,
na Henoke ewa mwana jwa Yaredi.
Yaredi ewa mwana jwa Mahalaleli,
na Mahalaleli ewa mwana jwa Kainani.
38Kainani ewa mwana jwa Enosi,
na Enosi ewa mwana jwa Seti.
Seti ewa mwana jwa Ad̯amu,
na Ad̯amu ewa mwana jwa Muungu.
Currently Selected:
Luka 3: pkb
Highlight
Share
Copy
Want to have your highlights saved across all your devices? Sign up or sign in
© 2004, Bible Translation and Literacy
