Luka 23

Yesu kapfiikwa kwa Pilato

Matayo 27:1-2, 11-14; Marko 15:1-5; Yohana 18:28-38

1Makisa kit̯aro chonse cha wantu wanuka wamuhwaa Yesu, wenda nae kwa Pilato. 2Waḍabva kumuḍia wamba, “Humut̯onga huyu muntu akwakuwaaryani wantu wehu akiwamba, watseipfa kuwa kwa sirikali ya *Kaisari. Na kakudzihanani *Kirist̯o, yani Haju.” 3Pilato kamuuza Yesu kamwamba, “Wewe ndiwe ayu haju jwa Wayahud̯i?” Yesu kamwambukuya kamwamba, “Kuvinena wewe mwenye!” 4Makisa Pilato kawambia wakohani wakuu na t̯ut̯a ya wantu kawamba, “Huyu muntu huyu sikwakumuonani na tsowa ḍiḍeḍyonse.” 5Ela wongeza kumuḍia wamba, “Kakuyehani fuḍyo kahi ya wantu wa Yud̯aya nzima kwa mayongweezoye. Kaḍabva na Galilaya na sasa kamakudza na hapfa.”

Yesu kapfiikwa kwa Herod̯e

6Pilato epfovisikia hivi vyuuwo kawauza kawamba, “Ayu muntu ayu ni Mugalilaya?” 7Epfomanya kwamba Yesu kayawa Galilaya, ḍyimbo ḍiḍyoḍikit̯awaligwa ni haju *Herod̯e, kamupfiika kwa Herod̯e. Hizihiziḍe nsiku, Herod̯e ewa kadza Yerusalemi.

8Herod̯e katsekea muno epfomuona Yesu. Ewa kasikia mambo menji dzuuye, na ekit̯amani kwa nsiku nyinji kumuona Yesu. Ekit̯amani kwamba Yesu ahende mafara ya kumakisa ili nae ayaone. 9Ndookomu Herod̯e kamuuza Yesu mambo menji ela Yesu nkakwambukuya chuuwo. 10Makisa wakohani wakuu na waalimu wa *Sharia wasumama na wamusit̯aki Yesu na muvuku. 11Na Herod̯e na asikariwe waḍabva kumutsezea na kumubaladhaiya Yesu. Makisa wamuvwika lot̯a ḍya mad̯aha na wamugalicha kwa Pilato. 12D̯ura Herod̯e na Pilato wekevana. Ela hangu hiyo hiyo nsiku wahenda maḅamu.

Yesu kahukumigwa kufwa

Matayo 27:15-26; Marko 15:6-15; Yohana 18:39-19:16

13Makisa Pilato kawahana pfamodza wakohani wakuu, wakuu wa Kiyahud̯i na wantu wangine. 14Kawamba, “Mumuniyeheya huyu muntu na mwamba kakwaaryani wantu. Nami nimukora usoni yenu, ela sikumuona na tsowa hat̯a modza kahi ya hayaḍe mumuḍiiyeo nayo. 15Na hat̯a Herod̯e nkakumuona na tsowa, koro ndiyo maana amugalichiyeo kwehu. Muntu huyu nkakuhenda untu uḍewonse wa kumumala kufwa. 16Ndookomu anapfuhwa na lucha, makisa anayatsigwa na shuulize.” [ 17Kula jila ya *Pasaka, Pilato ekiwafungwiiya hawa wantu mufungwa mumodza.]#23:17 Hivi vyuuwo vivyo humu mahani ntavipfo kwa matsoro yangine ya kae ya Kiyunani. 18Ela kit̯aro chonse cha wantu waholoka wamba, “Muyage! Muhufungwiiye Baraba!” 19(Baraba ewa ni muntu eyefungwa gerenzani kwa dzambo ḍya fuḍyo zihendekeyezo mudzini na kwa dzambo ḍya uyaji.)

20Pilato kanena na hawaḍe wantu kawii, akitsaka kumufunguya Yesu. 21Ela wamukelelea wamwamba, “Mupfatsike! Mupfatsike!” 22Pilato kawambia kawii mweedha wa hahu, “Ayu muntu ayu, kahenda tsowa ga? Sikwakuonani uzuka uḍewonse ahendeyeo hat̯a imumale kufwa t̯i! Hat̯a vivyo, anapfuhwa na lucha, makisa anafungujwa.” 23Ela wongeza hoisa, wakyamba ni had̯i Yesu apfatsikwe, mumpaka madzwi yao yat̯usa. 24Ndookomu Pilato kahuna kuwahendea dza watsakiyevyo wao. 25Kamufunguya Baraba, huyu muntu eyefungwa kwa dzambo ḍya fuḍyo na uyaji, na kamuwapfa Yesu, wamuhende dza watsakiyevyo wao.

Kupfatsikwa kwa Yesu

Matayo 27:32-44; Marko 15:21-32; Yohana 19:17-27

26Hawa asikari wepfowakichia na Yesu wakamupfatsike, wat̯ongana na muntu mumodza jwa kuyawa Ukirene eyeakihanwa Simioni. Ewa kayawa makondeni kakuujani mudzini. Ndookomu wamugija, na waumupfaza hu muhi wa mpatsa autsukuye nyuma ya Yesu. 27T̯ut̯a nkuu ya wantu imugwa mongo. Kahi ya hawa wantu kwiwa wake weowakimuiiya na kumusikit̯ikia. 28Yesu kawaperukia na kawamba, “Enywi wake wa Yerusalemi, namutseniiya mimi hat̯a, ela dziiyeni nywinywi na wana wenu. 29Koro nsiku zakudzani, za wantu kwamba, ‘Tsekea nza nd̯at̯a, mahumbo yasiyovyaa, na mawee yasiyokwamusa.’ 30Makisa wadzayambia mirima na virima, ‘Hugwiyeni muhufinikize!’ 31Ikiwa kwamba mambo dza haya yanahendejwa muhi muwitsi, ehe fat̯i muhi ukumiyeo?”#23:31 Ambu: Ikiwa kwamba wantu wakunihendeani dza hivi mimi nisiye tsowa, ehe fat̯i nywinywi mwiwo wanabvise? 32Asikari wahwaa na wantu wawii wangine, weokuwa wahenda mazuka, kwendawayaga pfamodza na Yesu. 33Wepfofika pfantu pfepfopfakihanwa “Pfaa ḍya Kitswa,” wamupfatsika Yesu pfamodza na hawa wahenda mazuka wowii, mumodza mukono kuyume na yungine mukono tsonso wa Yesu.

[34Makisa Yesu kamba, “Baaba, wayatsiye! Koro ntawadzi weḍyokuhendani.”]#23:34 Hivi vyuuwo vivyo humu mahani ntavipfo kwa matsoro yangine ya kae ya Kiyunani. Hawa asikari wazigawana hizi nguoze kahi yao kwa kuzibigia kura.

35Wantu wasumama kuyowa yeyoyakihendeka. Ao hawa wakuu wa Kiyahud̯i wamubaladhaiya Yesu wamwamba, “Kapfonya wantu wangine. Mani d̯ubva nkadzipfonya mwenye, ikiwa kwamba ndiye huyu *Masiya jwa Muungu amutsaniye ḍugha?” 36Hawa asikari nao wamubaladhaiya kwa kumumpa mvinyo ibushaiyeyo, 37na wamwamba, “Ikiwa kwamba u haju jwa Wayahud̯i ḍugha, dzipfonye mwenye!”

38Dzuu ya kitswa cha Yesu wabiga kiḅao chorejwecho hivi vyuuwo hivi, “Huyu Ni Haju Jwa Wayahud̯i.”

39Mumodza jwa hawaḍe wahenda mazuka wapfatsikijweo pfamodza na Yesu, nae kamunyira kamwamba, “Dzaambia wewe siwe ayu Masiya? D̯ubva nkwadzipfonya na uhupfonye naswi?” 40Ela huyu mumodza kamubusa huyu mwenziwe kamwamba, “Wewe nkunamushooga Muungu hat̯a, na huku hwakuhukumigwani vimodza? 41Swiswi hunamala kuhukumigwa kwa mazuka yehu huhendeyeyo. Ela jeje nkatsowa ahendeeḍyo.” 42Makisa huyuḍe muntu kamwamba Yesu, “E Yesu, nikumbuka nami udzepfokudza Uhajuni mwako!”

43Yesu kamwamba, “Hachi nyakukwambiani, yeo unawa pfamodza nami *Paradiso.”

Kufwa kwa Yesu

Matayo 27:45-56; Marko 15:33-41; Yohana 19:28-30

44Ipfofika chima cha saa ntandahu, nsi yonse ifungiiya kiza cha go mumpaka saa kenda. 45Na yukangadzi#23:45 Huju yukangadzi jwiivinga hi sehemu nd̯eru ye Hekalu. Hii iwa ni sehemu ya wantu wasiyoruhusijwa kunjia, lamud̯a huyu Mukohani Mukuu t̯u. Nae ekinjia mweedha mumodza t̯u kwa mwaka. jwa *Hekalu juḅaika na kahi. 46Makisa Yesu kaḅaa idzwi kuu, kamba, “Baaba, ruhu yangu nyakuiwekani mikononi mwako!” Epfonena hivi, kahuna nsoho.

47Huyu mukuu jwa asikari epfoona haya yahendekeeyo, kamushad̯a Muungu kamba, “Hakika huyu ewa muntu muhachi!” 48Wantu weot̯ut̯aa hapfo, wepfoona haya yahendekeeyo, wauja makwao na sikit̯iko. 49Waḅamu wonse wa Yesu na hawaḍe wake wamuuḅiyeo hangu Galilaya wasumama na jwa kuye wakiyowa haya yeyoyakihendeka.

Kuzikwa kwa Yesu

Matayo 27:57-61; Marko 15:42-47; Yohana 19:38-42

50Makisa kudza muntu mumodza eyeakihanwa Yusufu jwa kuyawa mudzi wa Wayahud̯i wa Arimataya. Ewa muzee jwa gasa ya Kiyahud̯i. Na ewa muntu mwema na muhachi. 51Jeje nkekuḅaliana na hawa maabagasa wenziwe dzuu ya hiviḍe wahuniyevyo na wakimuhendea Yesu. 52Ndookomu kamwendea Pilato, kamuyomba apfegwe ruhusa ya kuuzika hu mwii wa Yesu. 53Makisa kaususya hu mwii na hapfa muhini mwa mpatsa, kaulinga-linga na sand̯a, kaungiza mbeerani, it̯ukurijweyo mwambani. Hi mbeera iwa ntaidzatumijwa ni muntu.

54Hihiiḍe nsiku iwa ni nsiku ya kudzielekanya kwa dzambo ḍye Sabato,#23:54 Sabato inaḍabva nsiku ya tsano ya ḍyuma dzuwa ḍikwakutswani, na inasiya nsiku ya pfii yakwe dzuwa ḍikwakutswani. Kula muntu ekidziwekea kula kintu, koro nsiku ya Sabato ntaku kazi iyoikihendegwa. na *Sabato iwa yaa hafufi kuḍabva. 55Hawaḍe wake weomuuḅa Yesu hangu Galilaya wamuuḅa Yusufu, waiona hi mbeera na namuna ya mwii wa Yesu uwekejwevyo. 56Makisa wauja makwao na waelekanya manunkanto na mafuha ya marasha ya kwendaupfakaza hu mwiiwe. Ela nsiku ya Sabato wayavya hara dza vya Sharia ivyonawamala kuhenda.

Currently Selected:

Luka 23: pkb

Highlight

Copy